_____________________ الــريـاش
﷽
𓆩 اســاور حــسين 𓆪
بقلمي رواية : الــرياش
ومِثل نار بگطّن مَابينت مهَموم
بارد بالوجِه وآنهَ أحتِرگ سكتَة!
لطفا لا تنسون التصويت والتفاعل بين الفقرات
⊰ دُر⊱
ياسين : لك انت منوووووووو ؟
_ ولك انا الصياد واجيت أصيدك .
حاولت افتح الباب مقفول ضربته بكُل قوتي
واني اصرخ : انفتح لك دخيلك انفتح .
لزمني يسار من ايدي وبخبال رجع السيارة وطلع من الفرع
ضربت على شباك اريد ينتبهون عليه بس حايرين
يشيلون بـ ياسين من سيارته صعدوا بسيارتهم
من عبرت سيارة يسار رفع ايده جود ما اعرف شنو يحجي
بس ركض ورانا للنص وبعد ما كدر يكمل خابت امالي
كل فرحتي طفت كل ضني هاي هيه راح اخلص منهم
بس رجعت بين ايدهم حبيسه ، صرخت وبجيت بعلو صوتي
وبداخلي اعتب عليهم عافوني ما ركزوا وعافوني
ويسار يخابر على باقي عمامي مثل المجنون
_ اخذوا عمي حاصرونا اثنين ملثمين سيارتهم بدون رقم .
سد الخط وضربني بظهر ايده على شفايفي بكل حقد
_ تعرررررفيهم منووووو هذولي ولد ابو حسن موووو ؟
_ الله لا يوفقك لك لا تضربني .
_ لچ دُر احجي منو هل جن منووووو ؟
_ ما ادري حالي من حالك ملثمين يمكن ناس تكرهكم ؟
_ لا تبقين تلفين بالموضوع بنت الكلب تغطين على ولد ابو حسن .
_ شنو يثبت هذولي ولد ابو حسن لك حقير ؟
_ مبين ولد ابو حسن كلهم مخاوين الجن يطلعون ما ادري منين .
درت وجهي منه شفايفي تجري دم امسح بالكلينكس وارجع ليوره
رجعونا للمزرعة شكد حاولت اعرف اسم المنطقة صعبة صارت
لان مو كل المناطق اعرف اسمائها ، فتحوا ولد عمي ما شايفتهم
ما اعرف اولاد منو بس صغار بعدهم دخل يسار السيارة ونزل
شفت عمامي الاثنين الباقين ، نزلت ركضت للبيت سمعت
اصوات نسوانهم يمكنّ لأول مرة يجتمعون بمكان واحد كلهم
حتى من اشوف اولادهم وبناتهم عبالك غريبين سامعة اسمائهم
بس بعمري ماشفتهم او التقي بيهم .
صعدت فتحت الباب الغرفة قالب ثلج البرا ارحم منها
عفتها ومشيت الغرفة حرة اريد افوت مقفولة الغرفة
ضربت على باب اكثر من مرة ماكو صوتها يمكن طلعوها ؟
لو صاير بيها شي ؟ صار ايام مختفية اخاف بيها شي ؟
اريد ارجع وسمعت صوت مبحوح واصابع ناعمة بيضة
تنمد من جوة الباب : دُر لا تروحين دُر ساعديني .
نزلت بالگاع تلمست اصابعها جامدات من البرد
_ حرة تسمعيني .
_ جوعانة راح اموت عطشانة .
_ الله لا يوفقهم راح اجيب ماي دقيقة .
ركضت الغرفتي استغليت فرصة انشغالهم بياسين الخايس
شفت صينية البارحة بعدها موجودة اخذت بطل ماي
وصمونه بس يابسة من الهوا البارد ، رجعت اركض ارجف عليها
_ الباب مقفول لچ حرة شلون بيه .
_ لا تعوفيني اخاف اموت وحدي ابقي يمي .
شهگت وسديت شفايفي ما اريد تسمع صوت البجي
_ ما تموتين لچ بعدچ صغيرة صيري قوية الله يخليچ .
كعدت بصف بابها اناشغ من القهر ابجي على حال هل مسكينة
هم فقدت حب حياتها ومات ، وصدمتها بابوها ، وكسرتها بهل غرفة .
صفنت بالبطل ساعة كاملة بدقايقها وثوانيها
دُر : حرة تسمعيني اخذي ماي .
حرة : شلون .
دُر : راح اصب بقبق البطل واشربي الحد ما تشبعين .
حرة : اخاف احد يشوفوج هذولي يضربون بدون رحمة .
دُر : اكلهم بسنوني والله اشربي .
صبيت ونزلته من جوة الباب شربته ورجعت طلعته رجعت
انطيها وهي تشرب وترجع الى ان همست : شبعت .
نزلت الصمون وقطعة جبن مغلفة
_ أكليهن دبري امرچ بيهن الحد ما تفرج .
حرة : عفية روحي لا تبقين هنا .
_ راح اروح بليل اجي عليچ .
عفتها ورجعت للغرفة بدلت فستاني وطلعت على صوت يسار
يشيل بروحه ويرگعها هو وعمامي العاريه يصرخ
_ مو انسجن علي الآكبر عبالي خلصنا
هذولي منين طلعووووووا فهموني راح اتخبل شنو منو شكو
عقلي بعد ما يستوعبهم .
ابو يسار : ما شفتوا شكلهم ؟
يسار : لا بس سمعت يگول انا الصياد اجيت اصيدك
ومن جنت عدهم علي الآكبر من يتعب يصيح
بـ اسم صياد يجي يساعده .
ابو يسار: يتعب من شنو ؟
يَسار: يضربنا قابل منين يتعب هل كلب .
واحد من عمامي كلش جبير بالعمر بس
مهتم بروحه كاعد بكل هدوء على تخم وبيده
جگارة جبيرة لونها جوزي جاوبهم بغضب : نخلص من علي الآكبر
يطلع الصياد وهاي احنا على هل رنا شوكت تخلص هاا شوكت ؟
يَسار: خلصوا عليهم من يمكم استخدم نفوذك .
_ استخدمت وعلي الآكبر بالسجن ومنتظرين
مكالمة مني انهي علية ويودع .
لطمت على وجهي وركضت على درج صرخت
_ شنوووووو هاااا شكوووووو مو گلت .
هجم يسار سد شفايفي ودفعني يرجعني يريد
دفعته وصحت بيهم : انتوا جذابين مو انفصلت
وحلفت بس انفصل يطلع يودع شنووووو يووووودع .
رفع ايده يأشر الهم بمعنى بعدوها من هنا
دُر : على جثتي اتحرك لكم حرام عليكم شنو الدنيا بس الكم
عوفوهمممم بحالهم عووووفهم ليش تورطون نفسكم وياهم .
جاوبني وهو يخزرني بحقد
_ اكرها هل بنية صلفة ولكم اي تربية ماعدهااااا .
دُر : انتوا ما عدكم رحمة ما تخافون من الله شفتوهم
ناس على گد حالهم استغليت الفرصة ودخلتوا للسجن .
_ اي وهسة شنو الجديد ؟
دُر : الجديد رب العالمين ما راح يترك علي الآكبر
مظلوم والله سبحانة ينصر المظلوم حتى لو بعد حين .
_ يسسسسسسار شوف شغلك .
دفعني على درج لزمت بطني وصرخت حسيتها تتگطع
من الوجع رفعت عيوني خليتها بنص عيونهم وصحت
_ شوفوا والله تتندمون والله ما أسامحكم والله ما اسامحكم .
_ ولي وشيلي علي الآكبر من راسچ لان بعمرچ بعد
ما تشوفه وتحجين وياه هذا ابن الشوارع ما يناسبنا .
سحبني يسار من شعري اجر بروحي منه ماقبلت اصعد ترك
شعري وسحبت روحي من بين ايده صعدت الزم بالمحجر
والوب ما تدري من خوفي على علي الآكبر لو وجع بطني
دخلت بغرفتي غسلت وجّهي وشغلت الهيتر كعدت بصفه
ارعش وابجي على كل موقف وذكرى حلوة صارت بيناتنا
على كل مرة قسيت وياه بالكلام ، وعلى كل صد بدر مني اتجاهه
خفت رعبتني فكرة بعد بعمري ما ألتقي بي واشوفه اموت
المووووت اهون بساعتهاا .
بقيت لا ساعة ولا ساعتين بالغرفة احوم لا نايمة ومرتاحة
ولا كاعدة ومستقر حالي ، دخلت بنية بيدها صينية اكل
قبل لا اكل سويت لفة ومشيت على اطراف اصابيعي
صحت على حرة جاوبتني صوتها كلش تعب
_ شبيچ حرة ؟
_ وصلت الموت وحدي .
لزمت رأسي بيدي افتر شسوي ربي شنو بيدي وين انطي وجهي
منو يسمعني ويساعدني ، ولا واحد بيهم بي خير ياربي
_ حرّة جوعانة تريدين تشربين ماي .
_ لا .
نزلت جوة بعد ما اتحمل ظلمهم والله فتحت الباب الخارجي
ولد عمي كلهم شباب اكبار حتى بيهم اعمارهم ب30 يشربون
اركيلة من شافوني كلها تباع بطرف عيونها عود الخايسين ما راضين
اريد احجي خفت لا كلهم يضربوني رجعت دخلت حتى يسار خيسه
ماكو ، رحت للمطبخ ادور علاج صار صوت شاب يجي عمرة 15
يمكن اقل او اكثر يحجي برزانة ايده بجيب البنطلون
_ دُر مو ؟
_ اي اني دُر .
_ محتاجة شي اشوفج دايخة ؟
_ حرة مو زينة وضعها خطر لازم ننقلها مستشفى .
_ حاولت وياهم رافضين .
_ شعجب حاولت .
التفت على باب شاف ماكو احد طلع تلفونه وهمس
_ هذا تلفوني اخذي واصعدي بالغرفة اتصلي على ريان
احجي وياه واذا تعرفين عنوان المزرعة بلغي اسمها اني
والله ما عدهم ثقة بيه وما اعرف هواي بالمزارع وطريقها .
فتحت عيوني ما مستوعبه كلامه اشرت على نفسي وحجيت متعجبة
_ تنطيني تلفونك اخابر ريان .
_ اي اني دزيت الهم صور اثنين من جنتي مضروبة
ومشمور عليج مي وثلج والثانية من سويتي عملية
وشرحت حالتج الهم وزوجج بليلتها حرگ بيوتنا كلهن .
اخذته منه ودموعي تعبر على فرحتي وحزني
ضاقت وربي فرجها بساعة ومن اشخاص ما متوقعتها منهم
اخذته منه قبل لا اطلع همس وعيونه على الباب : الرمز 133133 .
صعدت بحذر دخلت للغرفة بقيت الباب مفتوح قليل
ودورت على اسم ريان بين الاسماء مكتوب
ابن العم ريان ، اتصلت بنفس الثانية جاوبني يحجي
كالعادة بصوته البارد : الو .
_ ريان تعال وين عفتني .
_ دُر دُر انتِ زينة .
_ لااا والله لاا تعبوني ضربوني ذلوني اني مو اختك
عيب عليك هيج تعوفني والله لا انت ولا انور تكدرون عليهم
طلاك وصار بعد ماعدهم حجه اي واحد من اخواني يكدر يطلعني منهم .
ريان : هذولي رافضين حتى اعرف العنوان ، وانور طالبي
واذا يبين روحه يروح بين رجليهم هرس .
_ ليش ؟
_ هو هرب شهد منهم ورفض يعتدي عليها .
_ انور معقولة ؟
_ اي حجيت وياه وهددته ويمكن مفكر بكلامي وطلعها .
باوعت بعدهم ماكو احد
_ شوكت تخلصني الله يخليك طلعني منا .
ريان : والله ما كاعدين كلّنا ندور على مكانكم .
_ علي الآكبر كر .
اريد احجي ما اكدر غصيت بكلمتي
_ شبي بعده بالسجن يومين وتصير المرافعة مالته الزلمة
تبهذل بسببنا وبسبب اهلنا من جهه انتِ ومن جهه ثانية اني .
_ انت الصياد .
_ والله راح اصيدهم واحد واحد ازرع الرعب بگلوبهم كلهم .
_ صار شكد تعرف علي الآكبر .
_ خمس سنوات .
_ علي الآكبر كرهني ؟
_ مهوس بيچ ، يگول دُر طبعها طبع
شاهين قوية وادري بيها ترجعلي .
_ بس حذرني .
_ زعلان منچ بس مايكره الشخص
من يحب مايكره لا تخافين من علي الآكبر .
بقيت اوصف المكان بالتفصيل شلون يدخلون واخر
اسم منطقة اعرفها وهو يسجل ويبحث بخارطة التلفون
اذا اكو مزرعة قريبة من المناطق القريبة من اللي اذكرها
خفت من سمعت صوت سديت التلفون وضميته دقايق
واخذته نزلته بقيت بالمطبخ انتظر انفتح الباب دخلوا
اثنين من ولدهم يضحكون ، واثنين يرزلون بيهم
واخر واحد دخل يسار يفتر بالصالة ويخابر مكالمة
يتودد ومكالمة يهدد واسماء علي الأكبر واخوانه والصياد
ما سكتت لحظة وهو يذكرهم مسببين رعب الهم .
تعجبت من فات ابوية واني عبالي اخذوا هو وياسين
كعد لازم راسه حركته المعتادة ويسب ويهدد بيسار
يوسف : طيشك وين وصلنا عمك بيدهم من ايدك .
_ واني شكوووووو .
_ لحيت طلاق وطلاق ولازم وضروري حجيت فهمتكم
مايصير مو يعرفون تاريخ حضورنا وادري بيهم دمهم فاير مايسكتون .
يَسار: واني شدراني غير گلت علي الآكبر بالسجن بعد مايكدرون
يسوون شي ضعفت قوتهم واحنا صرنا أقوى منهم .
يوسف : راح علي الآكبر وطلع اخوانه وياهم الصياد مادري منين
هذا المفروض هيج ناس ما نستهين بيهم لان عدنا نفوذ .
يسار : خيولون هل كلاب .
يوسف : لاااا لاااا تستهين مو عبالك فقراء هل اشخاص
رابين بالشارع وبمناطق شعبية مثل هيج ناس يصير دمهم
حار واصحاب دروب ملعبين يعني وخاف منهم .
طلعت من المطبخ مبتسمة وكفت على درج وصحت
_ قريباً يجون يشگوگ شگ يخيسه .
ركض عليه أبويّة لزمه ودفعه على تخم
_ اذا توگعين بيدي اشگچ .
_ اسبح امشي اسبح واسكت .
صعدت وهو يسب ويغلط ويهدد ولد عمي طلعوا
يصيحون شكووو وشصاير ، بقيت بغرفتي بس
خايفة يجي ، للفجر عيوني صارت تغفي حسيت
بحركة قريبة مني بقيت ارافس من الخوف
وهو يصيح : اشششش فضحتينا اشششش .
أستوعبت هذا نفسه اللي ساعدني بالتلفون
آخذه مني يريد يطلع مستعجل صحت
_ شنو اسمك ؟
_ فهد .
عافني وطلع سديت الشباك ورجعت تغطيت
قبضت ايدي ياريت التلفون عندي واكتب
كلشي صار اريد اشكي همي اريد افهمه
آريد يقرا يفهمني يستوعب ويحل مشكلتي
مثل ماتعودت يحل كل مشاكل حياتي .
علي الآكبر..
جدران متهالكة ، باردة متباعدة ، ناس ناطقة
بريئ ، مجرم ، متهم ، قاتل ، مجموعات متنوعة
ذبل صبري ، اتهامات كيدية ، تحقيقات مستمرة
نايم على فراش بعد ماخلصت تحقيق رفعت ايدي
كلها دم ، وظهري مذبح من الضرب ، بريئ ولأن
بريئ تتعاقب هذا نظامنا بأراضي سجونا العراقية .
أنفتح باب واحد من المنتسبين صاح
_ علي الآكبر صفوان .
_ نعم .
_ تعال .
مشيت وياه طلعوني صعدوني بسيارة ونقلوني على مختبر
كعدت اني ودكتور بغرفة والحرس موجود
_ مد ايدك ارفع الردن .
_ شنو هاي .
_ اخذ فحص دم منك اشوف نسبة تعاطي المخدرات عندك .
_ ههههههه حجيتها وارجع اكررها اني بالجديد شربت جگاير
مخدرات هاي الامور عيوني ما شايفتها اخذها شلون ؟
_ ناخذ وكلشي يبين بالتحاليل .
اخذ مني دم واختبار تنفس يشوفني مدخن قديم
ورجعوني النفس مكاني ، بليل نكعد اني والزلم
هناك زينين مو زينين من الملل نكعد نسولف
والجديد يسولف الهم على اخبار الشارع شصاير وشنو
التطورات الصارت برا خلال مدة سجنهم وناس تنطي
عناوين اهلهم اذا صار فترة طويلة ما زايريهم حتى اللي
يطلع يروح يشوفهم ويبلغهم السجين يربد يشوفهم .
شفت العجايب ولان موكل محامي واسطة عرفته
ريان مايسكت دافع تقدمت مرافعتي ، طلعوني من الصبح
يعاملوني معاملت القاتل ايد ورجل مكلبش ولازمين ايدي
منا ومنا من وصلت اول ما نزلت من السيارة صار ابوية
گدام عيوني من شاف ملابسي وايدي بيها الحدايد
نزلت دموعه ويهز براسه ما راضي علية نزلت راسي
ومريت منه مكسور خاطرة وخاطري .
جود : علي الآكبر وياك احنا كلنا والله تطلع .
اخواني كلهم موجودين يمثلون القوة بس من شافوني
كلهم بينت الكسرة بعيوني اني استصعبها لابس هل لبس
همَّ شلون يتقبلون ، بس صعدوني شفت ريان ابتسم
وصار قريب مني والحرس مايقبلون
_ اريدك مثل ما عرفتك علي الآكبر .
_ طمني عليهم .
_ قربنا نوصل الهم لا تفكر .
دخلوني على قاضي التحقيق سلموا تحاليلي
وملفي اذا عندي سوابق او لا ، اقوال منطقتي
المحامي بصفي والباب شوية مفتوح اشوف
ابوية واخواني وريان وياهم كشف على اوراق
القاضي : علي الآكبر صفوان احلف على القران راح تنطق بالحقيقة .
خليت ايدي وحلفت ابتعدت وبلش اسئلة .
القاضي : تحاليلك سليمة .
علي الآكبر: وانا متأكد من روحي .
القاضي : نسبة التدخين قليلة .
علي الآكبر: صار شهر بديت أدخن .
القاضي : شنو السبب .
علي الآكبر : خليك بمكاني وانت حالف على قران قبلي تنطق بالعدل
اذآ عفوا اذكر حرمتك سيدي بس اذا انت بمكاني وزوجتك بالإكراه
موجودة عد عمامها تتعنف كل ساعة وصار شهر ماتعرف عايشة
ميتة ، من توصل حالتي مو بس تشرب جگاير
يمكن حتى تتعاطى لان المقابيلك سلطة وانت شكد
ما تحاول وياهم يشترون ناس بفلوسهم مثل ما انا واكف هنا
يمك زور بتهمة باطلة انا بعيد كل البعد عليها .
القاضي : زوجتك تتعنف ، وتدعي تهمتك كيديّة شنو إثباتك ؟
علي الآكبر: عوفني بالحبس واني رافع بلاغ من بداية روحتها
على موضوعها استلم دعوتها وافتح تحقيق
خليهم يدوروها وينهاا موجودة
بمزرعة اب مزرعة مانعرف بيها ، واخر شي طلگوها مني
بتهديد واحلف عليهه بتهديد .
صرت اسولف عنهم منو همه وشنو سبب حقدهم
وليش صار هيج كلشي بالتفصيل سلمته بملف عنده
القاضي : استنتج من كلامك حتى يتخلصون منك
ويضغطون على بنية بالطلاق افتروا عليك بتهمة
المخدارات والممنوعات .
علي الآكبر: اي نعم .
المحامي استلم الكلآم والمستشارين وياه يدرسون بكلامي
اخذوني على زنزانة صغيرة انتظر بيها حتى يدرسون قرارهم
ساعة ورجعوني مقابيل القاضي نقلب السحر على الساحر من قرر
القاضي : بعد التطلع على ملفاتك الشخصية ملفك نظيف
حسب كلام أبناء منطقتكم اثبتت ملفك سليم
وعلى ما تم رأيته من خلال تحاليلك فـ تحاليلك نقية خالية من المخدرات
وبعد الاستماع لكلامك تبين لنا دخولك خطة محاكة من قبل عائلة
الرياش وسوف يتم التحقيق في موضوعهم بالايام المقبلة
اعلن من هنا إخلاء سبيلك بكفالة .
_ اشكرك سيدي .
_ تحريت على عائلة الرياش ونسبة لقوة نفوذهم
تحققت من كلامكم وثبتت من ألأخير ابني يكدرون يسون اكثر .
_ ادري .
_ انتبه ومثل ما بلغتكم قضيتكم تابعتها وقريباً نحدد مواقعهم .
هزيت براسي تشكرت منه تركت المحامي يحجي وياهم
وانا رجعت للمركز ساعة وابن عمي حضر المركز تكفلني وطلعت
باب المركز اهلي ينتظروني حضني جود بكل قوته
_ ما اكدر على فراگك علوكي انت النفس والروح
همست بإذنه
_ انجب واسكت .
_ اشكرك .
سلمت على اخواني كمز جود على ظهري
بست ايد ابوية وادري بي شكد ضايج
التفتت على الشارع ريان بالسيارة ينتظر
علي الآكبر: انا اروح بليل ارجع .
ابو حسن : امك تنتظرك .
علي الآكبر : راجع بوبة بليل راجع .
عفتهم ومشيت للسيارة ركبت بيها التفتت على ريان
_ الحمدلله على سلامتك .
_ احس مشتاق تشوفني .
_ وين عفتني ولك .
_ غير اهلك الزينين .
صفگ وهو يحجي متحمس
_ لو تعرف شصار .
_ ضروري يصير شي اذا مايصير
انطيك غمه تساوي عمك كله .
_ حتى اكسر أيدك واحملها الك .
_ لاااااا تتحداني عوفني محترمك .
باوع صفح ودار وجهه يكمل طريقة
_ شصار .
ما جاوبني يغلس
علي الآكبر : شو باوع بوجهي .
التفت شفت عيونه ابتسمت هو قلص عيونه مخنزر
ريان : شبيك لك ؟
علي الآكبر: عيونك تشبه عيون اختك .
ريان : اهووووووو هم رجعنا كافي .
علي الآكبر: اذا اشوف اختك الله يستر مني .
ريان : علي الآكبر احترم روحك راح اشمرك من السيارة .
علي الآكبر: اسبيها سبي وحگ ابو فاضل كلبي محمل عليهه .
ريان : لا ما أتحملك وين السماعات .
علي الاكبر : شغل هنا يا فارس بدر .
ريان : اريد اشغل موسيقى هادئة .
علي الآكبر: متريش مثل ابوك ، ادور ماركة مثل امك
ابو مصايب مثل اختك ، اريد اكتلك مثل اخوك .
ريان : اعتذر وانطيك خبر يخليك ترافس من الفرح .
علي الآكبر: ارافس ؟
ريان : مثل الزمال .
سكتت وهو سكت من قربنا نوصل للبيت بدون مقدمات بلغني
_ ياسين عندي بالبيت .
فتحت عيوني لزمت ايده سحبتها
_ احلف .
_ وغلاتك .
_ ولككككككككك كفوووووووووو الصياد بعد .
_ هو صدتهم .
_ بيت الرياش كلهم يرحون فدوة للصياد بوية انت ذيب ذيب .
نزلت للبيت دخلت للغرفة الداخلية مطفين الأضاءة كلها
وانا شغلتها وكعدت مقابيله وجهه صار اصفر من شافني
يبلع بريگه حيران خايف مرعوب
_ لا تخاف ما أضربك ولا اسوي شي بيك الـــــى ...
ضحكت بكل برود وكملت
_ الى ان اكعد انا ودُر واخليها تشرح الصار وياها بالتفصيل
شلون ضربتها وشوكت وين مو تكدر على نسوان
والله اخلي ايدك مفتوحة لا اربطها ولا استضعفك
من ضربها مو جانت ايدها مفتوحة انت هم ايدك دافع بيها على نفسك
ما اخليك تستخدمها بس بضرب النسوان .
تقربت اكثر صارت نظراتي تركز بتحدي
_ وحگ ابو راس الحار اكسر ايدك وارجعك
محمل عظام ايدك المكسورة .
ياسين : تتندم اني اريد انهيها افصل دُر منك
ترجع لحياتها وانت هم ترجع تستقر بحياتك .
علي الاكبر: مو بكيفك .
ياسين : دُر ماترجع بعد انساها .
علي الآكبر: لا تجبرني ابلش بيك من هسة .
ياسين : إذا ماسافرت وطلعت من العراق لان يسار مجهز كلشي.
علي الاكبر : جوازها عندي .
ياسين : ههههههههههه بعدك تفكّر بهذه الطريقة ابني بيومين
طلعت جوارها وكافة المستمسكات .
ضربته بوكس على عيونه طفيتها
_ اموووووووووتك ولك وعلي اموتك اذا اخسرررررها
لا عبالك من تسفروهاا اترك الموضوع وخلص انتظرها
وادورها عمري كله كل عمررررررري انتظرررررها .
ياسين : لك بابا ما نريدك بيناتنا بت اخوية ما اقبل تصير الك
اموتها وماتصير مرتك افتهمها استوعبهاااا .
علي الآكبر: وينهاااا ؟
ياسين : لو تموت ما انطي العنوان لا تحاول تتعب .
طلعت شفت ريان واكف يتسمع على كلامنا
_ سمعت ؟
_ مايحتاج ينطي العنوان حجيت اني ودُر .
_ شوكت ؟
_ قبل كم يوم من تلفون ابن عمي .
_ شلونها .
_ مو زينة .
_ خلينا نتحرك .
_ لا مو هيج .
_ شكو .
_ ارجع البيت شوف اهلك وارتاح كم ساعة
بين ما ارتب الوضع انا وجود وباقي اخوانك .
علي الآكبر: ما اكدر ارتاح من ترجع هسة .
قاطعني وهو يطلع للكراج شغلت جگارة ورحت
ريان : اذا ما ترتاح ما نتحرك اني واخوانك وحدنا
ما نكدر عليهم انت بهل هجمات تفيدنا.
اخذت سيارته ورجعت للبيت الطريق صار طريقين
دخلت للبيت سمعت صوت امي تبجي وتصيح
_ طلع ومايرجع يسلم ويشوفني اكلت عقله ولكم تخبل ابني تخبل .
علي الآكبر: اجيت يمه اجيت .
دارت وجهه مني مقهورة وتناشغ
نزلت بست راسها واخذت ايدها بوستها
ام حسن : بهذلت روحك ولك يمه كافي اول تالي تدخل سجون
وين معرف احنا محاميين وقضاية وتحقيق وخطف ومساومات
احنا ناس كافّين خيرنا وشرنا انت واخوانك بالمطعم
وابوك بالشغل وباقي اخوانك كل واحد وشغلته صار شهر
واكثر كلكم لا شغل ولا عمل تتراكضون على دُر واهلها شبيكم .
علي الآكبر: دُر مرتي عرضي عرض آخوهم غصباً عليهم
يدورون ويدوخون عليهه چا يعوفوني وحدي بعمري
ما رديت واحد بيهم واجه دورهم انا احتاجهم يسندون ظهري .
عفتها وكفت باوعت بوجهه ما واحد بيهم ورفعت اصبعي
احجي وياهم وادقق على كل كلمة انطقها
_ واذا مايريدون يسندون ظهري براحتهم ما اجبر احد .
خليتهم كلهم كاعدين وصعدت فتحت الغرفة شفت عطرها على ميز
مشيت بتعب رشيت بالجو وجريت نفس : هدمتيني دُر .
كعدت والعطر بيدي كل دقيقة ارجع ارش اريد ريتي
تنترس من عطرها انا والله مهوس بتفاصيلها
نهضت تعبان عيوني تغفي وحدها سبحت
واخذت ملابسي لبست السواد سحبت العطر
رشيت عطرها على لثامي ولبسته خليته على رگبتي ونزلت .
لگيت اخواني كلهم سابقيني على بيت ريان
بس حسن وأبوية يحرسون بيتنا قبل لا اطلع دورت
على شهد ماكو دخلت على غرفة امي شفتها كاعدة
عازله نفسها من شافتني وكفت خجلانة تقترب تبوسني
اشرت الها : تعالي .
اجت حضنتني تبجي
_ شبيچ ؟
_ قبل كم يوم رحت على علوية ام زينب بالطريق من راجعين
هذا المدگدگ انور اخو دُر شخط سيارته الخايسة وگف
فقدت والله مو بيدي من اتذكر هو خطفني وشلون ضربني
على راسي واهله شلون أذوني اخاف والحسين مو بيدي
صرخت وهو صار عصبي لان العالم عبرت ما ادري شنو راد يحجي
بس قبل لا يصعد گال
_ اني غبي اجيت أساعدكم .
علي الآكبر: انور شمه بشنو يساعد يخلينا نشمشم وياه ؟
شهد : ما ادري .
علي الآكبر: بس اخلص موضوع دُر استلم انور لان ياسين
موجود عندي ، بعد بس انور يوگع بيدي اذا ما اسوي اله اعادة ضبط
المصنع وارجعه بتحديث الرجولة ابن الكلب .
ام حسن : رايحين للموت برجلكم .
علي الآكبر: ادعيلنا .
عفتها بدون ما اكثر كلام وطلعت ابوية وحسن منتظريني
ابو حسن : دير بالك على روحك وارجع انت وياها .
بست راسه وصعدت سيارتين وصلت البيت ريان
شفت بالباب دراجتين وسيارتين طلعوا وريان صار بصفي
_ جاهز .
_ نبلش .
ريان : هواي شافوا روحهم واخذوا راحتهم .
علي الآكبر : ضروري يعرفون من يكطع نفس يستهدف القناص .
دُر ..
الكل اعصاب ، دايخين باختفاء ياسين ، ابوية من جهه
ويسار وباقي عمامي داخلين أنذر الشيطان مالتهم مختفي
وهاملين حرة رجعت اعبر الها اكلها من جوة الباب
نزلت جوة ادور بالغرف على امها شفتها طالعة من الحمام
_ عمة حرة حالتها مو زينة .
_ مابيدي شي عليها ابوها هددني ما ادخل يريد يربيها .
تجاهلتني ودخلت للغرفة مشيت وراها سدت الباب بوجهي
مشيت طلعت للحديقة يسار وباقي ولدهم كاعدين من شافني
اخذ نفس من الجگارة وصاح : شكووووو نازلة .
دُر : حباب تعال اريد احجي وياك .
يسار : امشي ولي دُر اعصابي ماتتحمل كلامج .
دُر : حرة .
يسار : اشششششش اششششش لا تذكريها وعوفيها لا تدخلين .
دُر : لك ابني البنية راح تمووووت .
يسار : ابنچ ؟
دُر : هسة عفت كلًكلامي وركزت على هل كلمة .
يسار : فووووتي جوووووووة .
فهد : اعصابك شبيك .
يسار : لا تدخل لا اطيح حظك .
دُر : طيح الله حظك انت شكد بلا احساس
لك خطية بنت عمك راح تمووووت .
دفر الطبلة ولزمني من ايدي وهو يهز بيه يمشي ويصيح
_ لچ اني موووو بحالچ وحالهااااا الف مصيبة براسي
فتح بابها شفتها نايمة ترجف شفايفها صايرة زرگ
وجهه ابيض مثل الموتى اريد اوصل الها عبالي
يريدني اساعدها سحبني من ايدي ودفرني على حايط
ونزل عليهه لزمها من شعرها ورفعها من رگبتها
_ شبيچ لچ هااااااا شبيچ ؟
دُر : لاااا يسار ابوس ايدك نزلهااا لك راح تموووت بيدك .
وكفت اسحب بيده وهي تصرخ من الوجع فتحت عيونها
صايرة دم عيونها حضنتها شمرها خليتها بحضني
ما تكدر تتنفس رجفت لطمت على وجهي هو أنصدم
_ لك ماتت بس شوووووفهااااااااااا .
كعد يحاول يخليها تگعد بقيت اركض نزلت اصرخ
فات فهد اشرت على درج لزمني من ايدي صاح
_ لچ شكووووووو ؟
_ موتها لك موتهااا .
صعد يركض سمعت صوت صياح عالي
نزل يسار وفهد على الصوت يسحبون بالمسدسات
وطلعوا يركضون قفل الباب فتحت الشباك
شفت ريان دخل عليهم يمشي بكل ثقة يشرب بجگارته
مبتسم بغرور : مسوين اجتماع نسوان .
يسار : انت شلون عرفت العنوان ؟
التفت يسار على فهد وصاح على ولد عمهم
_ انا هذا ما اثق بي اكيددددد هوه .
ريان : اني مو ابن عمكم يعني طبيعي اعرف عنوانكم وأزوركم .
طلعوا عمامي من الغرفة ركضت عليهم واني منهارة جسني كله
يرعش لزمت ايد ابوية منهارة : بابا يسار موتها ماتت حرة .
يوسف : اوكفي دُر خليني اشوف شصاير برا .
طلع ورجعوا قفلوا الباب صعدت فوك حرة نفس نومتها
حاولت ارفعها على فراش عمليتي توجعني ما اكدر
ركضت على غرفتي من سمعت صوت صياح عالي
فتحت الشباك يطل على حديقة شفت يسار رافع السلاح
بوجه ريان : روح منااا ريان تحملتك الخاطر ابوك رووووح .
تجاهله بكل برود والتفت يوجّه كلامه لأبوية
_ انطيني اختي اخليها عندي بالحسنة لا تجبروني
اتصرف وياكم بتصرفات ما اريد اتصرررررفهاااااا .
يسار : على جثتي .
ريان : جوابكم بسررررررعة مستعجل تنطوهاااا لو اتصرف .
يسار : تتصرف شنووو اموتك والله اموتك .
ريان : ساكتين مو ؟
يَسار: امشي لك المسكون ماتخوف جلبي .
ريان : تطلع على جثتك مو ؟
يَسار: والله على جثتي اقبل تطلع وياكم .
ريان : تحب تموت على صامت لو بفعالية ؟
يَسار: اطلع برا .
رفع ريان اصابعه صار يصوفر بصوت عالي
شهگت من سمعت صوت السيارة تفلش
بابهم واشتغلت "يا فارس بدر يا حيدر يا فارس بدر "
دخلوا خمسة ملثمين بيدهم أسلحة ميزت من بينهم
علي الآكبر هجم على يسار يضرب بي بوكسات
ويسار بطرف المسدس يضرب بعلي الآكبر على راسه
دفره جود من ورا وگع وعلي الاكبر صار فوك يسار
يضرب بوكسات بخبال رفع راسه يسار يريد يوكف
وضربه بغمه ورجع رفع ايده وغمه وكل ما يغم يرجع يغمه اكثر
علي الآكبر: ولك من كون غمه تغمك غم يا اغم يا ابن الأغم .
جسمي تشنج من ركض واحد من ولد عمي وغدر
سراج الدين رفع حديدة وضربها براسه وگع
بالگاع والدم ينزل مثل البوري المفتوح
هجم جود سحب الحديدة وضربة بيها
وهو يصرخ ويستنجد وعمامي يسبون بيهم
عبرهم ريان يريد يدخل للبيت الباب مقفول
رجع على ابوية وهددهم : اذا ماتفتحون الباب والله تصير مو زينة والله .
يوسف : تساند الغريب على عمامك وولدهم يا حيف بيك التعب .
ريان : يا تعب بس لا ربيتني وما ادري بيك .
يوسف : لك شوف روحك اني سويتك بدوني ماتصير.
ريان : انطيتني الفلوس بس الثمن جانت حياتي كلها
جردتني من فرحتي وضحكتي هدمت كلبي انت واخوتك .
علي الآكبر: لا تكثر كلام وياهممممم المفتاح يطلع
والمطلوب يرررررجع وحسابنا ما خلص اني وياكم .
راح جود وسيف الدين صعدوا سراج الدين بالسيارة
وعلي الآكبر صار مقابيل ابوية مد ايده
_ انطيني المفتاح يوسف وخليني محترمك .
ابو يَسار : دُر مو مرتك .
علي الآكبر: ما اتذكر نطقت الطلاق
وكلشي صار مو برضاتي ولا رضاها
واحب اذكرك شرّعاً بعدها مرتي غصباً عليكم كلكم .
يوسف : ما اريد انطيها الك عوفهااا ليش تزيد النار حطب .
علي الآكبر: يوووووووسف اريد مرتي .
جود : الظاهر مايفيد وياهم الكلام نكمل عليهم لان ولدهم
صاروا جثث ، بعد بس هل اربعة نكمل عليهم ؟
ريان : المفاتيح والله بعد ما اعيد كلاااااااااااااامي .
عافهم ابوية وراح للباب فتحه وصاح
- بس ريان يفوت .
دخل ريان صعد هو وابوية يتعاركون
تجاهله من شافني طلعت من الغرفة عيوني منفوخة من البجي
_ شبيچ دُر ؟
دُر : ريان هذا يسار موت حرة ؟
ريان : منو حرة .
دُر : بنت ياسين .
ريان : وينها .
مشيت للغرفة ابوية من شافها بهت وريان عبالك انضرب على وجهه
نزل لزمها من رگبتها يشوف النبض دقيقة وصاح : عايشة .
شالها مثل الطفل ركض بيها وهو يصيح
_ علي الاكبر سوق السيااااااارة بسرعة افتحوا الباب .
صعدوها بالسيارة وجود اجه بتجاهي لزمني وصعدني
هو وسيف الدين وعز الدين ، وعلي الآكبر وريان راحوا
طلعت منهم معقولة خلصت منهم درت وجهي عليهم
واكفين بالباب وابوية عيونه كلها غضب وخوف
ضميت وجهي بيدي وبجيت تعبت والطريق
طول خليت راسي وغفيت بالساعة كعدت
واكفين مقابيل بيت : بيت منو هذا ؟
جود : بيت ريان انزلي بين ما يرجعون .
نزلوني للبيت فتت للحمام اغسل بوجهي اريد اسيطر على رجفتي
طلعت امسح بدموعي جود مقابيلي : هذا مو حلم مو خلصت منهم.
ضحك فرحان يريد يطمني : مبين هواي ناديتي هيلب وهل
صدك صارت هيلب الحمدلله على سلامتچ زوجة اخي
جهزي روحچ علوكي يريد يسبيچ سبي .
دُر : ضايج مني مو .
سيف الدين : كلشششش وحگ الله كل ما ينذكر اسمچ
يعض اصبعه ويصيح اخخخخخخخخ اذا ألزمها .
عز الدين : انجب انت وياه .
دخلت للمطبخ فتحت الثلاجة شربت عصير
واني اسمع دگات كلبي بقيت بالمطبخ والولد طلعوا
بالكراج سمعت صوت بالغرفة ردت إفتح إنارة شايلها
رجعت للمطبخ دورت بالمجرات شفت جداحة وبيها
ضوء خفيف اخذتها ومشيت للغرفة واني ارجف حجيت : منو هنا .
شفت مفتاح معلگ بالبسمار بصف الباب فتحته صار مقابيلي
ياسين صرخت وجسمي يهتز تراجعت اريد اشرد سحبني
من ايدي : طلعتي دُر ؟
يريد ياخذ الجداحة من ايدي اشتغلت والنار لاحت ايدي
فزيت وعطت بوجع واني اناشغ واصيح دخل علي الآكبر
يركض وياه اخوانه ياسين بس شافهم عافني وشمر الجداحة يصيح
_ مووو اني والله مو اني .
صار ايام واسابيع ما شايفته بس صارت عيوني بعيونه
نزلت دموعي وركضت حضنته انتظرت يحضني بس
صدمني ايده ما رفعها غير من بعدني منه وصاح
_ ياسين انت تجني على روحك وحسابك صار ثگيل .
لزمني من ايدي وطلعني وجود قفل الباب عافني بنص الممر
شفت ريان طلع من الاستقبال اشر بيده
_ دُر حرة تريدج .
دخلت على استقبال شفتها نايمة على تخم
كعدت يمها جانت تبجي مسحت دموعها وحجيت اريدها تضحك
_ اضحكي حرة خلصنا منهم .
حرة : فرحت لج فرحت عبالي متت اني ما اريد
اعيش بعد موت مصطفى .
ريان : منو مصطفى ؟
درت وجهي شفته واكف مكتف ايده رافع حاجبة
دُر : يا مصطفى تگول والحبيب المصطفى تحلف بالنبي شبيك .
حرة : جذابة مصطفى حبيبي وراد يخطبني وعمامك موتوا .
رفع حاجبة متعجب من جرئتها بالكلام ضربت على خدي
اريد الطف الجو : عفية ترا احنا لا اكل ولا شرب جوعانين .
طلع وعافنا درت عليهه صحت
_ انتي مخبلة .
_ لا تجذبين شنو يريد يصير ولي امري كافي الكلاب ذولاك .
رجع دخل دارت وجهه وهو يباع بنظرات حايرة
ريان : دُر علي الآكبر ينتظرچ برا بالسيارة .
بلا احساس رفعت ايدي اقرض أظافري بخوف
_ شنو ينتظر برا لازم هو يجي ياخذني يصعدني .
ريان : اخو راسه مفتوح ورجعوا بالبيت وتعارك هو واهله
والدنيا كلها ضده لا تزيديهاااا دُر فدوة .
دُر : اخذ حرة ويايه .
ريان : وين تاخذين حرة هاااا بيت متروس زلم سالمين ؟
دُر : لعد شلون ؟
حرة : لا تخافين بس اصير زينة يومين واطلع .
ريان : وين اطلعين ؟
حرة : تحب اقدم الك تقرير ؟
ريان : لو سمحتي طبعاً ست حرة .
دارت وجهه تباع بطرف عينها ما عاجبها الوضع
رجعت عليهه وهمست بصوت خافت : باجر ارجع اشوفچ
امانة لا تروحين المكان .
حضنتني حيل تحاول ما تنزل دموعها ويشوفها ريان شاورتني بأذني
_ عليج الله لا تتأخرين وتعالي باجر مو تعوفيني اني وياه وحدنا .
_ اجي وعد شبيج بي اكعدي عاقلة .
_ احاول .
عفتها وكفت بالكراج من شفته بالسيارة دار وجهه
شافني ورجع التفت ينتظر اصعد اخوانه ماكو بس هو كاعد
ريان : روحي .
دُر : اذا زعلان مني وعصبي عليه ليش ياخذني .
ريان : صالحي هناك .
دُر : مبين قافل واخاف اروح والله .
راح ريان عليه يحجي وياه وهو فقد يضرب بالسيارة نزل
عصبي ضميت راسي بيدي سحبها ويمشي بيه سريع
صعدني بالسيارة وصعد يسوق ويستغفر ويضرب الستيرن
ويسب ويغلط ما ادري بمنو بس يفشر هيج من اهلكم وهيج
من عمامكم وهيج بكل شريف ومو شريف بيكم الحد ما وصلنا
للبيت دخل السيارة اول ما شافتني ميثاق لطمت على وجهه
وهي تصرخ : هم رجعهااااا يااااااا اخوك بين الحياة والموت ورجعتهااا ؟
لزم ايدي وعبرها امه وكفت بنص الصالة تصيح
_ والله اذا تصعدها بعمري ما أرضى عليك ولك
ما راح يسكتون ولك راح يهجمون بيوووووتنا
ولك هاي اخوها كسر اختك .
وأخوانا يتعاركون على هل كلمة وهو فقد يهدد
بميثاق وهي تنس من بينهم لزمتني من ملابسي
وضربتني وهو تخبل لزمها بلا وعي وشمرها على الحايط
وامه وكفت بوجهه تلطم : ولككككك مايصير ولك اخوك الخاطر اخوك .
علي الآكبر: هي بدت هي ضررررربتهاااااا ماتشووووف حالهااا
هل حيوووووانة انعل ابوهااا اذا بعد تلزمهاااااااا .
ميثاق : تضربني علمود وحدة سا*****
علي الآكبر : تروحين الها فدوة لچ حجل برجلها ما البسچ .
دخل ابو صار بنصهم يفشر ويصيح وريمان وبتول وميثاق يتهجمن
يريدن بس يلزمني هجمن البيت هجم بصوتهن
اجه علي الآكبر لزمني من ايدي وصعدني
قفل الباب يفلش بالغرفة يريد بقيت جامدة بس اريد اطلع
كعد على تخم تعبان لدقايق همست : اذا كارهني لا تنتقم مني .
تقرب مني قَلّص أيده على ثوبي تشنج جَسمي وقُشَعريرة سرت بروحي
هُزلت قوتي أمام إشْتدّاد ملامحة ورهبة الأصوات خفت والله خفت
_ بس لا مفكرة من اريد انتقم منچ اسافر لو اترك بيتي
واهلي وناسي حتى ما اشوفچ واضعف وارجعچ بـ اسمي يمي بحضني ؟
هزيت راسي بـ لا وهمست بصوت هزيل
شفايفي يابسات من هول اصواتهم خلف الباب
والله اذا يسلمني الهم يموتوني ارتعبت اريد
اجر النفس عجزت اضرب على صدري
واني ارفع ايدي : أفهمك اريد افهمك .
رفّع أيده قبض على وجهي بيها وحط عيونه بعيوني
وصاح منهار وجهه احمر وشرايينه بارزة
_ وحگ من زرع عشگچ بگلبي اخلي عيني بعينچ بس ما اشووووفچ .
الصار مو بيدي فشلت افهمه
وصوته صوته سچاچين تمزق بصور احلامي
ألتفتت اليه من سمعت مركز على حروفه وهو ينطقها ينطقه
رفع إصبعه يأشر بتنبيه استكبر وتلون من متيّم الى كاره مبغض
_ حبيتچ بكُل طاقتي ومستعد بنفس الطريقة انهي وجودچ
تفوت مثل ماتريدين ماتمشي ويايه ، حسيت وبعده احساس
بالغت بيچ ، تريدين إنهي وجودج وأربح وتخسرين ؟
_ تلچمني كلماتك لا تكمل الخاطري .
- حاربت عليچ چي نادرة بس وحگ عگال ابوية
وگعدته بديوان الشيوخ اذا اضطرّ الامر اصير
جتال كلمن جاب طاريچ واردچ للصفر .
_ وهنا انكسر تدري النساء من ينكسرون شيصير ؟
غرز ايده بزندي وعيونه طالت النظر بعيوني
بنفس الصلابة تمردت واقتربت رسخت كل كلماتي بعقلي وحچيتها بثقة
_ من ننكسر شايف الحية من تبدل جلدها ، بالضبط يصيّر ويانا تظهر
شخصية ثانية احنه شخصياً مانعرفها ، ارمم نفسي بس بطريقة جديدة
اتجاهل بطريقة كلاسيكية ، لا اخلي عيني بعينك وما اشوفك
ولا اصير جتالت كلمن جاب طاريك .
_ لا تردين جواب بوجهي ؟
_ لا تنسى كلامك انتَ بذات نفسك گلت طبعچ طبع شاهين
انت تگول حاربت عليچ بس اني عندي حبك معركة وفزت بيها .
عافني وهو تعبان جسده الصنديد منهك گعد وايده على راسه مرتاب
وهموم وتعب الدنيا كلها على ظهره ، شهگت من لچمني الحرگ
تجرأت وتقدمت مثل الطفلة اللي تدلل على ابوها
هو يخفض راسه نزّلت ايدي وخليتها گدام عيونه
_ احترگت شوف ايدي احترگت وتوجعني وانتَ ولا مهتم .
باقي علّى حاله لا تحرك ولا يتفقدني مسحت دموعي
وبعدت ايدي منه نويت اطلع سحبني من خصري وگعني
بحضنه استنشق شعري هيمان وهو مغمض عيونه وكأن يرتكب معصية .
تلمست وجهه حسيت جسمه تصلب وتوطد صدره
رفعني غايته يسيطر ويكفكف على نفسه من قربي بوقت مقرر به فراقنا .
گعدني بمكانه وطلع من الغرفة انهضمت ودموعي صارت تتسابق
على خدي لملمت نفسي اريد اطلع من هذا المكان لازم كُلشي ينتهي
ايدي صارت على مقبض الباب واسمع جلجلة اصواتهم يطالبونه
يتخلص مني وهو يراددهم بنبرة شديدة الغضب
المكان نرج رج وصوت نحيب مُعاتب: تريد علاج وهي هجمت بيوتنا
بعدك مخليها عايشة وتعالجها تشتري علاج ومعقمات
والله أهجم بيتها مثل ما هجمت بيوتنا من الله لا يوفقچ يا بنت الحررررام .
مردت روحي مرد اذا اطلع هسة الله يستر مني
ردع افكاري وهو يرجع ينظر لي نظرات حادة
وكأنه عنده علم بأفكاري حكم ايده على ايدي وگعد
بتعب ملامحة ، وارتعاش ايده ، وقلت نومه ، وحرب اعصابة
وضغطهم ومضايقتهم علية ، يداوي بيدي بحذر ، هو يعقّم بالحرگ
وروحي خلصت من الوجع خليت راسي برگبته
وقف ومكث لدقايق عاجز يكمل
بعّد حين استوعب واستكمل لف وتعقيم
حالما انجز وتمم معالجة گعدني وهو يطوّقني
وطئ جسده على تخم منا ومنا يثبت بيده
نزل يركز بعيوني : داويت حرگ ايدچ
وانه ياهو يداوي حرگ كلبي .
مسح دموعي بطرف أصبعه وكمل
_ من رحتي ضاع حيلي يا كل حيلي .
يتبع ..
ثقل ميزانك بذكر اللّٰـه:
- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد ..