_______________________ الــريـاش
﷽
𓆩 اســاور حــسين 𓆪
بقلمي رواية : الــرياش
أنه اذَيت ڪلِمن حَاول يَأذيك
ليَش ڪَبال وَادم غُربه تَأذيِني ؟
لطفا لا تنسون التصويت والتفاعل بين الفقرات
⊰ دُر⊱
سراج الدين : لك علي حرگوا المطعم وصل للبيت للكراج
وابن حسن لك ابن حسن وصلت اله الناااااار وهو يلعب بالكراج .
علي الآكبر : لاااااا يا ابوووووو فاضل لاااااااا .
حجاها وهجم على ميز لزگت روحي بالحايط من الخوف
اخذ مفاتيح السيارة والمحفظة راح يحاسب وكفت والدمعة طفرت
من عيني حجيت بس مرعوبة من رد فعله : علي الآكبر .
التفتت منتبه عليه طال النظر وطلع درت وجهي
على ام حسن واشرت بيدي : جنت متأكده ما يعوفوني بحالي
واثقة من اول مصيبة يسوها يعوفني علي الآكبر .
سمعت صوته من ورأيه درت وجهي
ونزلت عيوني على إيده مادها اليه : تعالي .
مسحت دموعي بطرف ايدي ولزمت أيده
سحبني وطلعني من المطعم كلهم يمشون سريع
وهو متمسك بيدي : عفتني ورحت علي الآكبر .
_ ما اعوفچ بس خابرت على اخواني .
دُر : جذاب .
بنظرة خاطفة باوع ورجع يمشي وصلنا للكراج
صعدنا بالسيارة سألته: اهلي السبب مو ؟
_ ماكو غيرهم سهلة بس الرد مني يخليهم يعيدون حساباتهم
اذا ما اخليهممممم من يسمعون اسمي يدررون على رواحتهم
اناااااا كلشي ما افتهم سهلة بس سهلة .
يسوّق بسرعة جنونية وابو يخابر يصيح حتى
يقلل من السرعة وهو طاير مستمر الى ان وصلنا
البيتهم نزّلني وصايرة هوسة بيت جوارينهم
نفس البيت الي گال بي خطيبتي ، درت على مطعم
تالف بس نصه مابي شي ، صاحت ام حسن على شهد
_ اخذي دُر وفوتي انتِ اشوف بيت ام سامر شبيهم يا ستار .
دخلنا وميثاق زوجة سراج الدين من الباب استقبلتنا تصيح
ولابسه عبايتها تركض وتلطم .
_ من البداية مبين فالها خيرررررر على الآكبر شسويت بينا .
شهد : شبيج هاا سلامات .
دفعت شهد وهي تلبس نعالها
_ ولج اريام انتحرت يبوووووووو يا مصيبتنا يبوووووو .
طلعت وبتول زوجة اخوهم عز الدين تضرب على خدها
_ يااا شني هل مصايب الي نزلت علينة .
شهد : قدر قضاء وقدر .
اخذتني شهد دخلتني للغرفة كعدت حيلي كله بهت
وهي طلعت تجيب مي رجعت ميثاق اسمع صوتها
تعارك بشهد : انتحرت البنت من راس اخوج صدمها
بيوم وليلة عشق وقرر يتزوج وهي صار عمر تنتظر بي .
شهد : ما متفاهمين شلون يزوجها عشتو صار اربع سنوات عايفها
تريدين يظل بدون زواج والله شنو اريام تنتحر هذا تصرفها اسمه
قلت ايمان برب العالمين واستهتار .
ميثاق : استهتار البنت تحب چا هو هسة مو تزوج على حب .
شهد : اي استهتار شنو موقفها هسة مقابيل اخوانها وابوها
وكلها تصيح انتحرت لان خطيبها السابق خطب ؟
ميثاق : اهلها يحبوها ما يحجون عليها
وبعدين انتِ شدعوة نافشة روحچ ودافعين وحامية
حتى ابن اخوج ما تسألين علية .
شهد : ميثاق تكفي الشر مبين انتِ نويتي على شر احذرچ
ترا علي الآكبر طگه ونص اذا يدري تعرفين كلش زين شيصير مو ؟
رجعت للغرفة بيدها عصير كعدت بصفي
_ اشربي كلبي اشربي ان شاء الله ماكو شي
الله لا يوفقهم خربوا فرحتكم .
نزلت راسي وبداخلي صوت يجاوبها
متعودين الفرح مو ثوبنا ، دورت على جنطتي
واخذت التلفون من طلعت شهد تنصي صوتهن
لان ميثاق ادردم بصوت عالي تتقصد تسمعني
كتبت واني آحس بفوضى افكار واضطراب مشاعر هاجمتني
كتبت واني اشكي حالي قلقي وصراع عقلي وگلبي
_ اني خايفة يلوموني وحقهم من اول ساعة بعقد زواجنا
صارت مصيبتين شنو ذنبهم نبني حياتنا على حساب تعاستهم .
دزيتها بس ما قراها نزعت كفوفيّ وكملت
_ عقلي متشوش شسوي اني هسة اريد ارجع لغرفتي
ما اريد اسمع ولا اشوف شي اني اوسوس ما اتحمل عقلي .
بس دزيتها شافها ظل نشط لدقايق وطلع من البرنامج
مسحت على وجهي احس بجسمي كله يوجعني من الخوف والقلق
رجعت شهد تبتسم بوجهي تلطف الجو
دُر : بنت جوارينكم عايشة مو ؟
شهد : اي مابيها شي امها بسرعة لحگت عليها الحمدلله
المهم قلبي در تبدلين هذا الفستان مالتچ اخاف متضايقة .
طلبت منها ادخل حمام فتت غسلت حاولت اقوي نفسي
بس اريد اطلع ارجع للغرفة متشوشة كل افكاري
طلعت لزمت الفستان اريد ابدل انفتح الباب دخل
علي الآكبر اشر الشهد تطلع هي بسرعة عافتنا
سد الباب وراها وتقدم بتجاهي لزم رأسيّ باسني
_ حاولت ما اطول عليچ بوية دُر .
_ ابن حسن شلونه ؟
_ الحمدلله كلش زين بس ايده بيها حروق من الشضايا
وهسة يطلع ابو وامه عنده واهلي هناك لا تخافين .
غمضت عيوني حسيت جبل على ظهري
_ اريام انتحرت تدري ؟
_ عرفتي اسمها ؟
_ اي من ميثاق .
_ ميثاق بنت عمها .
_ صدك ؟
_ والله ، المهم الله يهديها .
_ انتحرت لان تحبك .
_ قسمة وما صارت وعيب احجي بيها وهي مو عرضي .
كعدت على سرير احس بعد ماعندي حيل اوگف مقابيله
دُر : يعني ماعندك اي مشاعر اتجاهها ؟
علي الآكبر: لا وداعت دُر من يوم فصخت عقد خطوبتي بيها
طلعتها من كلبي وعقلي واني اذا اترك شخص لو يموت
مقابيلي ما التفت واشوفه .
دُر : حتى اني ؟
علي الآكبر : انتِ مو شخص ولا احد دُرر روحي انتِ يا بعد روحي .
ضميت وجهي بيدي وبچيت ما ادري من كلماته الحنونه اني جنت
اذا شخص يبتسم بوجهي ادمع نرجس اذا تشتريلي شي ادمع
صفية من تهتم بيه ادمع ، شلون اسمع هذا الكلام
وما ابجي ، والقهر على صار ضاعف دموعي
گعد بصفي سحبني علي صدره الأول مره يكون بهذا القرب مني
_ تريدين تبجين هناااا ابجي وطلعي طاقتج
حزنچ ، فرحتچ ، ضعفچ ، قوتچ يمي على صدري
رفع وجهي بطرف اصبعه واشر على باب وكمل
_ بس برا الغرفة ومقابيل كأن من يكون انتِ الثابتة
زوجة علي الآكبر اريد الكل يحچي بقوتچ ويگولون
لبوة اصيلة ومهابة تشبه شخصية زلمتها .
كمل كلامه ورفع ايدي باسها وابتعد
_ تبقين هنا دُر بليل ترجعين .
_ ليش مو هسة ؟
_ بوية دُر بطّلي اعناد واسئلة راسچ اريده صافي
اني احل المشكلة كلهاا ، بس المهم انتِ لا تهملين محادثتنا
شنو يصير وياچ اكتبي بيها .
هزيت راسي بالموافقة ابتسم وطلع .
علي الآكبر: شهد تعالي .
اخذها وراح للاستقبال دقايق واجت سدت باب الغرفة
مالتي وهي تبتسم بـ انتصار ، ثواني وما اسمع غير صوت ميثاق
_ بداعت امك لا دخل سراج الدين والله مو قصدي والله
جنت مصدومة على البنية خطية خفت تموت بعز شبابها .
هو ما ادري شنو يحجي وياها بحيث يخليها تتوسل وترجع
ليوره بس قبل لا يطلع سمعت صوته صار عالي
_ انا طالع اذا ارجع وشهد تبلغني ما صار
المطلوب تعرفين شني يصير البنية مو ناقصها حجي افتهمتي لو لا .
ميثاق: صار من عيوني هي عروستنا وأخيتنا شعندي وياها .
سمعت صوت الدرج وصوت جود يصيح
_ شكو شصاير ؟
وشهد تهدي بيهم بدلت ملابسي رجعت على فستاني
وعدلت شعري على مرايا وبقيت اشوف بتلفوني شصاير
ما صاير صارت اصوات عالية برا طلعت شفت حسن
شايل ابنة عمرة خمس سنوات تقريباً بعده صغير كلش
بس نايم من المهدئات وزوجته من الطم وجهه صاير ازرك
تعبانة كعدت ينطوها بالمي وام حسن تمسح على راسها
وتفرك بيدها وهي تتحسب ، نزلوا علي الآكبر وجود
عمي من شافهم رفع ايده صاح بيهم : هاااااا سلامات ؟
جود : يسلم راسك بوية .
ابو حسن : علي الآكبر أستر علينة بوية شمالك
تصغرها المفروض لو تكبرها شعندك لابس هل ملابس
ايدي على كلبي من اشوفك لابسها .
علي الآكبر : وين صار سيف الدين .
دخل اخوهم مبين هو اصغر واحد وشايفته قبل
_ اجيت وكلشي جاهز بصندوك السيارة .
من شافوني ظلوا واحد يباوع على ثاني
ابتسم علي الآكبر بوجهي وهو يطلع
يحچي سريع ويلبس بلثام : يمه دُر آمانة عندچ .
اريد احجي يركض مستعجل وابو يصيح وراه
_ ولكم على شني ناوين تعالوا .
جود : لا تخاف تاج راسي ما نطول ساعة ويمك .
كمل كلامه وطلع يصيح على علي الآكبر
_ بعلي اذا ماتشغل يا فارس بدر فلا أساعدكم .
ابو حسن : تعالي بنيتي دُر كعدي يمي .
عمتي كعدت تلوب عدها حچي اجيت قريب منه
حسن كاعد بصف راس ابنه والطفل كل شوية
يفز من الخوف وهو يلزمه ويهمس بصوته الدافي
_ بابا حبيبي يمك لا تخاف انت بطل خلصت يا عيوني .
عضيت شفايفي ونزلت راسي وابتسمت بوجع
بعمري ما عشت هل شعور بعمري كله لا بالطفولة
ولا من كبرت دائماً أتوجع وحدي ، شهد تفتر منا
ومنا اخذت تلفوني ورحت للحمام اريد اخابر
علي الآكبر واسمع صوت ريمان زوجة حسن
تبجي وتلطم تحچي هي وميثاق وبتول زوجة عز الدين
ريمان : راح يتعارك يغطي على مصيبته علي الاكبر
وعافها هنا يحمي بيها واهلها يحرگون ببيوتنا وجهالنا .
ميثاق : يدرون بيها راح تگلب حياتنا بس عايفين علي الآكبر
يلعب بكيفه ليش وشني الغز ما ادري لا تقنعني بالحب .
بتول : اي عيني مبين اكو شي ينحاك الوضع مايطمن .
ميثاق : من هسة هاي راح تهجم بيوتنا اخذوها كلمة مني
مبين عليها ملعبه وقوية صاحبة السان نسيتن شلون قبل
اجت وتتحارش بعلي الآكبر بالكلام تمسكنت وتمكنت
وقبل شوية يريدني اروح اعتذر منها لعب لعب بيه
يفور عليها يفور .
فتحت الباب وطلعت عليهن اني قابلية ماعندي اتحمل
واسمع واسكت وكفت يمهن نصيت صوتي حتى محد يسمع
التلفون بيدي وايدي الثانية رفعت اصبعي وحذرتهن
_ شوفي انتِ وياها بعدني لا جيت يمچن
ولا اعرفچن ولا تعرفني واخذتني حاصل فاصل
من اجي شيصير بيچن ، بعدين تعالي عيني ست ميثاق
اني من شوكت تحرشت بعلي الآكبر تتهمين بعرض العالم بكيفچ ؟
ميثاق : ياا حبيبتي شبيچ منو يمچ ؟
دُر : بدون حبيبتي وهل كلمات المصطنعة اني بنية
كافية خيري وشري لا تبقين انتِ وياها لوك لوك
ترا كلنا ما ناقصين قهر الي بينا كافي .
ريمان : اجيتي تطاولين بالكلام بوكت لازم
تعتذرين على صار بأبني بسبب اهلج .
دُر : يا عيني عفتوني اسلم اشوف من دخلت
وانتوا ولا طايقيني ما اتذكر بدر مني تصرف مو حلو .
بتول : كافي يمعودات لا يسمعون وتصير مشكلة
شكبرها كلهم دايخين ومقهورين على طفل وعلى مطعم .
عفتهن ورجعت كعدت بصف ابو حسن
دقايق ودگ تلفونه شاف الاسم وتعجب
_ ابو انور يخابرني ؟
حسن : جاوب .
رد واسمع صوت ابوية يصيح محروگ كلبه
_ مو حلفت مايطلع ولا تسجيل ليششششش
ولدك يتصررررفون بكيفهم موصلين تسجيلات
اثنين التجار يريدون يبلوووني .
نظر بتجاهي خجل يحچي وياه مقابيلي
طلع بس اسمع مقتطفات من الكلام
ابو حسن : انت بديت الحرب من حرگت المطعم والطفل .
ظل يحجي وياه دقايق وسد الخط هو انسد منا خابرني بلحظتها
_ الو .
يوسف : لچ دُر خاااااابري احچي ويااااا ابو يگول بعد ما اگدر
عليهمممم شلون ما يگدر عليهم موووو ابوهم خابري توسلي
بي يستر على تسجيلات لا انعل شيب الخلفووووهم .
دُر : وين يسمع مني ؟
يوسف : ابقي غبية حيووووانه عبالچ يحبچ موووو
لچ هذا يمثل عليچ يريد يحرگ گلبي .
وكفت طلعت للكراج وجاوبته واني اضحك
_ يحرگ گلبك بيَّ وهو يعرف كلش زين شنو انتوا
وتعاملكم ويايه واصلين مراحل من عديمين الإحساس .
يوسف : احسابچ بعدين يا بنت وفاااااااء .
طبگ الخط بوجهي اتصلت اكثر من مرة على علي الاكبر ماكو
رجعت المكاني وكتبت : انتظرتك هواي اريد اروح .
الجو متكهرب ما اريد ادخل هل بيت بهل طريقة
والله صعبة ، ومن جهة اكل بنفسي من اشوف ابن حسن يتعذب
من وجع الحرق الصار بي بسببهم ، اسمع عمي يسولف
لحسن : ابوها يحلف ويتكفر مو هو تسبب بالحريق
يگول هذولي اخوتي وما اگدر عليهم .
حسن : كلاوچي ماينطي بروحه .
دخلوا جود وسيف الدين كلهم ريحة نفط وحريق
صاح بيهم عمي وكف على حيله : وين جنتوا ولكمممم .
دخل سراج يضحك يغسل بيده واحد يغمز للثاني
صار جود مقابيل عمي ويرفع بيده ويشمر عبالك
يشمر حجار ويصوفر : اشتغلناهم وي وي وي مولوتوف
حريقة حريقة سامع ويرموهم بحجارة من سجيل احنا
رميناهم بزجاج من مولوتوف .
اجه علي الاكبر من وره يريد يصعد صاح بي
_ اوووووكف حرگت بيت ابو مرتك ؟
علي الآكبر: لا بيت ياسر عمهم الجبير هو حرك المطعم .
ابو حسن : شلون عرفت يا فهيم .
علي الآكبر : هو يدزلي هاي العبارة مالته من تقترب ومن
تشوف شيب الخلفوهم .
ام حسن : ولكم يمه تريدون تموتوني اروحن منكم اهج
والسبب ولدي بعلي حتى ما اروح لبيت اهلي اهج غادي
اشوف امام مرقد جامع واخدم هناك اكلهم شردت من ولدي .
جود : يمه دخيل بختچ جبتي عمرچ تهددين بنفس
التهديد شوكت تنفذين وتصيرين مثل ولدچ گول وفعل .
علي الآكبر: حتى من تهج نعرف مكانها حافظين لو جامع لو امام .
جود : اهلها ما أندور يمهم .
ام حسن : شفت ولدك بعد انت وساكت تتنوع عليهم .
ابو حسن : شسوي شبيدي واحدهم اطول مني زلم
وشواربهم ترس وجهم اكتلهم تردين ؟
صعد علي الآكبر وجود وراه وسراج ثالثهم
نزلوا بعد حين بس شفته وگفت : لازم ارجع للبيت رجعني .
جود : مثقفة ماتتحمل هوسة نصحتك ما اخذت النصيحة .
اشوف بس ظهره وجهه على براد يشرب مي
كمل وبدون كلام اشر : يلة بوية دُر ترجعين للبيت تعبتي اليوم .
ام حسن : لا والله ما تطلعين مجهّزين الاكل اكعد يمه
تعشوا ورجعها بعد وكت .
التقت عيوني بعيونه نظرت بضياع هو افتهم ما اريد
اطول اخذ المفاتيح وجاوبها : غير مرة يمه مو هسة
يلة بساع دُر .
سلمت عليهم وطلعت ردت اموت بدمي ما متعودة
على هوسة والجمعات حسيت شي غريب ما أتقبله
يمكن لان بالبداية شي جديد بعدين يتغير كلشي
فتح باب السيارة واني اراقبه اريد اشوف هم يرفع
عينه على بيت أريام لو يحترم وجودي باعتبار
صرت خطيبته ، صعدت والتركيز مشتغل سد الباب
بقيت اتبع بحركته من دار على جهة السايق اول ما
صعد صدمني : تردين مشكلة مبين تدورين الزلة .
دُر : لا مو هيج .
_ چا فسري عيونچ ليش راقبتني .
دُر : اشوفك بالشمس حلو لو نضحك عليه .
_ اي شني طلع وياچ .
_ كجسم مقبول بس تسريحتك ماحبيتها
يمكن لو تعدلها منا ومنا وترتب لحيته بهل شكل
واشر على راسه وعلى وجهه وهو يستمع ويسوق
لا عبالك اكو مصيبة ولا غيرها ، بس صرت اني وياه
وحدنا رحنا بعالم ثاني بي تفاهم بدون ملل
ويسألني حتى اتعود احجي وياه بدون قيود .
مقابيل بيتنا نزلني بليل اخذ ايدي بيده الدافية باسها
وتلمس خدي بطرف اصبعه : كلبي مو راضي تفوتين يمهم
خايف عليچ وانا مو يمچ .
دُر : تعودت عليهم هسة بسرعة اقفل غرفتي عليه لا تقلق .
علي الآكبر: لا تهملين محادثتنا .
ودعته ونزلت تقصد يسار يبين اله هو موجود بالبيت
طلع برز نفسه ورجع فات ، انور كاعد بالحديقة صاح
_ مبروك لازم نباركلچ صرتي على ذمة حافي والمصيبة
حتى المطعم راح منه بس تزوجون وراها بيومين جدو
بالتقاطعات لله يا محسنين لله .
باحتقار التفتت على يسار واكف مخلي ايده
بجيب بنطلونه وصافن : كمل اذا عندك شي ضيفه حتى تكمل .
يَسار: مايفيد هذا الكلام ردي بدليل راح اثبت الچ
علي الآكبر يلعب عليچ وانا اعرف السبب المشكلة ممنوع
أحجي شنو الهدف من لعبته .
دُر : لا تحاولون تشوهون صورته بعيوني .
يَسار : وداعت النامت بالتراب وانحرمت منها
بحرف ما اجذب علي الآكبر دخل حتى ينتقم لناس
احتمال بعدين صدك نعجب بيچ بس المهم هو متراهن .
دُر : كملت .
يَسار: راح يكسرج ويعوفچ يا غبية فكري وين اكو واحد يدخل
بهل سرعة بحياة بنية ويتزوجها ركض ركض غير يريد يوصل
لغاية براسه دُر فكري موتيني .
عفتهم ودخلت للبيت شافتني صفية أجّت تركض
حضنتني بكل قوتها فرحانه تباركلي وتشوف بحلقتي
بوستها وصعدت غرفة امي مفتوحة تقربت لكيتها
تعدل بجنطها وكفت بالباب وحجيت وياها : اليوم موجودة .
دارت بتجاهي نزلت عيونها على حلقتي ورجعت ترتب
_ عقدتي مبروك .
دُر : هههههههههههه صدك تحجين لو تشاقين
اني بنتچ والله بنتچ مووووووو غريبة وتباركين اليه بهل طريقة
المفروض بكلشي تشاركيني عوفي الجنط والماركات والفلوس
انتبهي من احجي وياچ شبيج اخذن عقلچ .
وفاء: باركت الج كافي لج بابا شكد تحبين الدراما
تفيدين ممثلة لو مكملة دراستچ نشوف واسطة
واخليچ تمثلين الممثلات مو احسن منچ .
دُر : حسبي الله ونعم الوكيل عليچ ظلمتيني
وياچ مو كفووو مسؤلية انتِ ليش تولدين
شنو من گلب عندچ هل تكبر شووووكت ينتهي .
دفعتني بكُل قوتها من دفعتها وگعت سدّت الباب
هزت الفوك هز والله عدها نقص والله مو بعقلهاااا
وكفت انزل بالفستان اريد ادخل واقفل الغرفة دفع
يَسار الباب ودخل عيونه مصبوغة احمر دم
ومن العصبية برز براسه شريان تقرب ادفع بي
يقترب الى ان عثرت بالتخم گعدت هو نزل اخذ ايدي
بيها الحلقة نزّلت دموعه وبصوت مخنوك يحچي
_ باسها تلمس خدج .
اخذتها منه مسح دموعه ويرجعن ينزلن
_ ما يحبچ بگدي والله ، ماتعب وهو ينتظرچ
من الطفولة وياج لچ انتِ حب طفولتي وتريدين اقبل ياخذچ .
دُر : حُب طفولتك تفوت بنات للغرفة كدامها
تصادق وتعتدي وتضرب هو هذا الحب ؟
يَسار: نسافر اتغير ونسافر والله نبتعد منهم .
دُر : انت صرت مدمن يسار .
يَسار: منهم صرت كله منهم تعبوني اني تعبان ومحتاج وجودج
بس احتويني اسمعي مني نسافر ونخلص بعد ما نرجع هنا .
دُر : ابتعد شوية من تحچي ابتعد
ادري هسة بس ارفض تضربني .
يَسار : لا تحچين بهل طريقة ويايه .
دُر : ما اريدك مواقفك من أتذكرها اريد امووووتك والله
امشي اطلعععععع لا تذكرني بفصولك .
يَسار: راح تشوفين ايام صعبة لو احجي سنة كاملة ما اوصفها
متعبة لدرجة تجين تبوسين ايدي اساعدچ واسامحچ
بس بذاك الوقت اني بيدي ادمرچ مثل ما دمرتيني .
دُر : تحچي وعبالك انت الفقير الضحية هاي بس من تشم
المخدرات ، ومن تصحى تخلصها تحير تختار يا بنية تطلع وياها .
ابتعد وهو يعصر براسه يتذكر موقف اخذ المخدرات
شم منها شوية بعد صار يحرك براسه حيل فتت للحمام
قفلت الباب وگعدت ضربه بكل قوته ويهدد
_ لچ اموووووووتچ قبل لا تذليني امووووووتچ بنت الكلب .
غمضت عيوني من سمعته يشهگ ويبچي ويعاتب امه
_ يسار روح نام لا تغلط اكثر دخيلك كافي تعبتني .
اتصلت على انور جاوبني بدون ما يحچي
_ هذا انهار من المخدرات مو بوعيه ويبچي تعال اخذه .
سد الخط وصعد اسمع صوته يحچي وياه
ويتوعد ياخذ حق دموعه ومثل ما يسار
يبجي يريدها كلها تتعذب مثله .
بدلت وآني هلكانه من التعب غسلت بـ اهمال ذبيت تلفوني
ونمت ما ادري بنفسي بعد الثاني يوم كعدت على صوت التلفون
جاوبت بتك عين وصوتي بعده نايمة واغفي راسي ثگيل
علي الآكبر: صباح الخير دُرري .
دُر : امممم صباح المولوتوف .
_ نايمة ؟
_ اممممم .
_ اجي يمچ .
_ شتسوي يمي .
_ هههههههههههه شنو ما اسوي .
_ منو يخليك .
_ تريدين اجي .
جاوبته بدون تركيز وهو يحچي اغفي ما اركز بالكلمات
_ امممممم .
سد الخط رجعت غفيت وبنص النومة تذكرت الكلام واستوعبت
كمت اكمز وكعت من فوك السرير وركضت للحمام اغسل
سمعت صفية تضرب بالباب تگلي بكل برود : ماما هذا بابا
علي الآكبر ينتظرك وينك .
عطت بيها انخبصت واني اشيل بروحي واركع بيها
_ ولچ صفية لا يعرفون دخلي للصالة بس البس وانزل .
طلعت واني افتح دكم قميص النوم حتى ابدل وما اشوف
غير علي الآكبر كاعد على تخم متبسم بمكر
درت وجهي اسد بيهن كملت والتفتت منزل راسه وضعه
كله متخربط يتنفس بصعوبة : صعدت هنا شلون ؟
جاوبني وصوته ثگل يمسح بالكلينكس بوجهه
_ خابرت ابوج واخذت الموافقة .
لميت شعري وكفت مقابيله
_ ابوية يحجي وياك وانتوا البارحة بالحرب العالمية الثالثة ؟
عيونه ذبلت وهو يركز بيه وكف يمشي بخطوات
ثابتة وگعت عيونه على رقبتي شعري نازل عليها بـ اهمال
حرك شعري رجعه وره اذني وهو يهمس : اسمحيلي للصبر حدود دُر .
طبع بوسة على نص رقبتي جانت جر نفس اكثر من كونها بوسة
مد ايده على خصري دفعني بتجاهه احتضني وهو يكرر فعلته
اهتز جسمي بين ايده غمضت عيوني وايدي على صدره
احاول أبعده وهو مستمر هيمان ذبلان : علي الآكبر
_ ضاع وتاه بيچ .
منعته يكرّرها نزلت نفسي حضني
_ علي الآكبر كافي لا مايصير
بصوت ملهوف يحاجيني
_ انعل ابو الـي مايصير أتخيل اموت
وانا بحسرتچ بشني تفيدني لا مايصير .
سحبت نفسي بصعوبة ، هو يمسح بوجهه
يحاول يصحصح بدون ما يشوفني ينطيني علم : نازل بدلي وتعالي .
طلع قفلت الغرفة رحت للمرايا المكان تحسس من لحيته
رطبتها ورتبت نفسي ونزلت سمعت صوت ابوية من الصالة
يحجي اقتربت استمع صوتهم مو واضح بس الجو مشحون
دخلت عليهم بنص اندماجهم بحيث علي الآكبر يصيح
_ مو تحلف دليني وين الجثة اشوفها بعيوني اريد اصدك .
دُر : جثة منو ؟
علي الآكبر: ماكو شي صاحبي اشتغل عدهم ومختفي
ابوج يكول مات ، كملتي خلينا نروح .
كعد ابوية ايده على راسه دايخ حسيت اكو موضوع جبير صاير
مصيبة اكبر من تخيلاتي ومبين هل شي من سكوتهم وخوفهم
طلع واني امشي وياه اول ما صعدنا هو ساكت يلوب ومبين
عصبي نار صاير : شصاير شنو جنتوا تحجون؟
_ لا تعبين نفسج انتِ عروس فكري بتجهيز زواجنا .
دُر : شسويت على مطعمك ؟
_ من البارحة اشتغلنا بي وهسة عفت
جود وسيف الدين يصبغون بي .
دُر : اعتذر على صار البارحة بيكم بسببهم .
_ بالحديد ولا بعزيز يتعوض كلشي يتعوض .
غير الموضوع ابتسم وهو يتلمس خدي
_ اي بوية سولفي شنو الآلوآن الي تريديها للغرفة
منين نبدي شنو براسچ شنو تحبين ، لو اكلج ورانا تعب
انزلي ناكل ونطلع نشتري .
نزل من السيارة فتح بابها لزم ايدي ونزلني
اشترينا لفات وكلاصات جاي كعدني وهو واكف
ياكل ويسولف بحماس ، وكل شوية يكعد يمي
يوكلني من مالته احتار بيه يرجع شعري لو يلزم
كلاص الجاي ويشربني واني اكل وافهم بي افكاري وهو يستمع .
طلعنا على سوك نختار كم شغلة وداني مناطق ما شايفتها
يريد يحجز الغرفة اسمعه ينطي موعد : مستعجل عليها
لان هل شهر العرس فـ لا تقصّر بالاستعجال خوية .
بس كمل كلامه وكفت مقابيله رافعه حاجبي
_ شهر شنو ترا اني كلشي ما اعرف عليك لازم نتعرف أتأقلم
يمكن ما تناسبني حتى اذا ما نتوالم قبل الزواج نفصخ .
ضحك وهو ياخذ ايدي ويمشي ويجاوبني بكلمات واثق منهن
_ من خوفي اريدچ يمي وتتعرفين براحتچ بعد الزواج .
طلعنا من المحل يمشي على محلات واني احجي وياه
وهو مايقتنع قافل شهر وزواجنا يصير بس نكمل
ترتيب وأغراضنا ويشتري ويفتر منا ومنا من يشوفني اتعب
يخليني اكعد وهو يروح يجيب الأغراض اشوفهم يعجبوني
لو يرجعهن يجيب غيرهن .
وكل ما نفتر يشتري جاي لان راسه يوجعه من قلت النوم
ويفهمني مايحب السوك كملنا نص الأغراض
شفت كرسي كعدت بعد ما اتحمل وذبيت حذائي وهو يمشي سريع
وكف مصدوم رجع مقلص عيونه : هااا سالمين .
_ تعبت رجلي توجعني .
ضحك وتقدم بيده بطل مي كعد يذب عليها مي على بطيء
_ يخسي الوجع ارتاحي لا تگومين خليها تصير زينة .
حاولت ما ابين فرحتي خفيتها واني احس بخوف بداخلي
كلشي زين بهل حياة بمثابة فخ اليه ، ذب الأغراض
وكعد ينتظرني وبين يروح يشتريلي حلويات اخر شي
تقرب : أشيلچ يا حلوة اذا تريدين .
رفعت ايدي بضحكة
_ لا اشكرك .
_ عبالج ما اسويها ؟
_ تسويها والله بس عوفني .
لبست الحذاء وهو يضحك لزم ايدي
ويمشي بهدوء حتى ما اتعب صعدني بالسيارة
نزل جسمه ذب حذائي واني بعز صدمتي ورجع الكرسي
_ مددي ارتاحي دُرري .
خفيت خوفي شكد ما أكدر الى ان وصلت اريد احجي
اريد افضفض بس مو العلي الآكبر شفت صفية
بس مشغولة صعدت هو اخذ الأغراض وياه للبيت
ذبيت على نفسي مي وجوة الدوش بجيت الى او تعبت ومليت
طلعت بدون تردد كتبت : اني خايفة منك ومترددة احسك جذاب .
رفعت راسي جريت نفس صحّ خجلانة بس بنفس الوقت لازم احجي
_ هذا احساسي ولازم احجي ماعندي احد اشكي واعبر عن خوفي
وينصحني بس علي الآكبر والله خايفة منك .
فتح الرسايل قراها بدون رد كالعادة ينتظر اكمل
_ عندي شكوك من تصرفاتك وتعاملك ليش هيج تتعامل
ويايه يعني مو معقول احبس انفاسي من اكون وياك
لااااا ما مرتاحة ابتعد اريدك تبتعد افكر بالموضوع اكثر
هذا زواج مو لعب جهال عقلي مشوش .
سديت التلفون ونزلت طلبت اكل اكلت اني وصفية
وصعدت اعدل بغرفتي لليل نمت والثاني يوم تلفوني
سويته مغلق ، وحبست روحي بغرفتي بعد والثالث يوم
والأسبوع مر واني على هل حال بين اقتنع هل انسان
هو هذا تعامله واسلوبه متعود على محبه مو مثلي متربي
بين اسرة حنونه وامه كالت ربيتهم يحترمون النساء
ويرجع عقلي يرفض كل تفكيري وينتفض بكلمة هل انسان فخ .
اهلي رجعت ما اشوفهم اله صدفة وحتى يسار وانور مختفين
ريان اخر مرة شفته وسمعت اخبارة بيوم نقل امي للمستشفى .
ايام وليالي مرت وخلص موعد زواجنا فتحت خطي ماكو رسائل
بس مكالمة وحدة ، بمجرد ما فتحت الخط رن تلفوني تحمحمت
ورديت اول ما وصلني صوت سديت عيوني واكلت اظافري
_ ربع ساعة وتنزلين انتظرج مقابيل بابكم .
سد الخط قبل لا اجاوب حرت وترددت بين اروح وبين اظل
لبست ورشيت عطري وبقيت بداخلي رهبة رن تلفوني
باوعت من شباك الصالة شفته نزلت كل شوية اوكف بوسط
الدرج واتراجع بس صار هواي حتى موعد الزواج خلص
وهو اختفى وصلت للباب طلعت شفت يسار واكف وياه
يسار : هل ايام ما الك نفس شنو الظاهر تراجعت على خطتك .
طبطب علي الآكبر على كتفه وبـ ايده الثانية
يضرب على وجهه بكُل هدوء
_ بابا ما علمك من يكطع النفس يستهدف القناص .
_ علمني استهدفك
_ انتوا ماتعرفون تستهدفون مثل الزلم
هسة دورنا نستهدف مثل الزلم تعلموا واجهوا .
_ راح ادفعك الثمن غالي يا علي الآكبر .
دار علي الاكبر عليَّ واشر اليه
_ يلة بوية تأخرنا .
رحت وياه تحت انظار يسار يريد يهدد ضرب علي الآكبر
على سيارة وصاح بي : لك يسار اذا ما تسكت مني بهل ساعة
انعل سلفه سلفاك واطگك بغمه عمرك وحياتك ما تنساها .
ركب السيارة ساقها وهو ينافخ ويستغفر الله
ويهز برجله عبالك قلق : شبيك .
_ صدك شبيه؟
_ اي والله حتى ما سلمت .
_ منو غلق تلفونه اني لو انتِ ؟
_ اني .
_ شنو السبب ؟
_ قلقت بموضوعك شو طيّب بتبذير .
_ دُر .
_ ها .
_ لچ .
_ زعلت مو ؟
ضرب على جام السيارة وهو ينافخ لزم راسه
جر نفس وساق بكُل سرعته شخط السيارة بفرع
من الأفرع وصاح ومبين خلص الصبر عنده
_ لااااا انعل ابو الصبر لابو يوم العرس تعالي راح اموت تعالي .
جر ايدي انضربت بي صار وجهي تحت قبضة ايده
سحب شفايفي وطبع بوسات رغبة ، لهفة فصلها وهو
يجر النفس ويحچي بصوت متلهف
_ هيمان انا بيچ لچ دُرري تحرميني منچ ليش ؟
لزم رجلي وهو يحجي بتعب واستعجال يجر النفس
بصعوبة عيونه كلها رغبة دارني بتجاهه
_ احچيلي فهميني شنو تريدين وتأمريني .
دُر : مو شوف من تتعامل ويايه كُلش زين اني مو بيدي
ما متعودة انصدم واحس بخوف شسوي اترعبت گلت ابتعد .
تلمس خدي بحنية وهو مركز على شفايفي جاوبني
_ دُرري انتِ ما تليق بيج المعاملة العادية
لچ انا بس وياچ ذبيت الخجل وارتاح بعدچ ماتعرفيني دُر .
دُر : هم حجيت بهل طريقة والله تخوفني احس اني بنهاية العالم.
علي الآكبر: هههههههه لچ غير مشتاقلچ لعد شلون احچي .
باوعت بعيونه وعيوني مدمعه
_ كلبي يوجعني ما مرتاحه .
_ شنو براسج تريدين تعوفيني ؟
_ اني اريدك بحياتي .
_ اي خلص .
_ مو احساسي يگلي راح انصدم اني ما مكتوب اليه افرح .
جر نفس قوي ومسح على وجهه
_ اني اريدها يمي وهي تصيح خايفة منك .
_ مو بيدي .
_ دُر اني لأن هذا تعاملي مو بيدي منّ أشوفج
الكلمات تتسابق وتصرفاتي ما أتحكم بيها .
_ علي الآكبر لا تأذيني بيوم اذا تأذيت بيوم
محد يساعدني ولا يوكف ويايه اني مكسورة من اهلي
ما اريد انكسر مرتين حيل ماعندي .
_ سامعه شي ؟
_ ليش اكو شي ؟
_ لا بس ليش تحجين هيج دُر تتخيلين تتضررين مني .
_ اريد تخليها ببالك هل كلمتين
علي الآكبر اني يتيمة عاملني على هل اساس وخاف الله بيه .
لدقايق هو صافن بوجهي ما ينطي رد فعل انتبه
على نفسه آخذ ايدي يبوسها ويجاوبني
_ وحگ اخو زينب ما اعوفچ لچ شيلي هل فكرة من راسچ .
بعدها نص ساعة وهو يحاول يطمني ويفهمني هذا طبعه
بس ويايه هو مو هيج وبس ادخل بيتهم اعرف شنو يقصد
ختمها : اسبوع الجاي عرسنا واي اعتراض ما مقبول .
_ بعدني كلشي ما حضرت .
باوع وهو رافع حاجبه ويعض بأصبعه
_ انتِ نايمة حقج واني افتر صار ايام هلكت وحلگي نشگ
حتى اكمل كلشي مثل ما تريدين ، اشتريت كلشي طلبتي للغرفة
ومتأكد تعجبج رتبتها وقفلتها ، حجزت قاعة تليق بيج
تبقين انتِ اريد بـ اسبوع تجهزين
نفسچ تكدرين دُر مو تبقين تتحججين .
دُر : احاول .
اخذني المحل بدلات حتى اختار بقيت بس اباوع محتارة
ما اعرف اختار التفتت على علي الآكبر : منو احلى .
_ والله عيوني اي شي حلو عليج اختاري اللي يناسبج
بس اهم شي محتشم ماتطلع الحبشكلات .
رحت اشوفهم عن قرب وحدة والثانية والثالثة
اريد اروح على ستاند الثاني ودخلت بنية بعمري
وياها اخواتها اثنين وامها يساعدوها وتاخذ رأيهن
وحده تنصحها هاي تطلعين بيها قصيرة وهاي سمينة
وهاي مو حلوة كل وحدة تنطيها رأيها وهي تصفن
وعلى نصيحة تختار المناسب تمنيت اني بمكانها
ضاق النفس بريتي عفت المحل وكفت هو يباوع
_ وين دُر اختاري .
نزلت راسي مهضومة
_ ما اعرف خليني ارجع للبيت واخذ افكار من التلفون
وباجر اشتري ما اريد استعجل .
شفّت بعينه حزن يخفي ببتسامة هو يمشي رجع ايده
حتى الزمها لزمتها وصرت امشي بس مقهورة
رجعني للبيت من شافني ما حجيت شي .
حبست نفسي بغرفتي واحاول اجمع افكار من التلفون
للعصر دك تلفوني بـ اسمه ومبين مستعجل
_ دُر انزلي اني جوة .
بدلت بدون نفس واضطريت انزل شفت امي
طلعت من الحمام وياها وحدة تجي كل فترة
تسوي الها عناية بالجسم وحمام مغربي على مساج
تجاهلت وجودهم ونزلت طلعت واعدل بشعري وألبس حذائي
ركض ركض فتحت الباب الخارجي بقيت متعجبة هذّني منو ؟
نزلوا اثنين بنات ما اعرفهم وياهم شهد يشبهنها عرفتني عليهن
_ اخواتي شمس وشوق .
بوسني وصعدت وياهن كلامهن حنين وتصرفاتهن تدخل القلب
نزلنا نفس محل البدلات نزلوا البنات لزمت ايده بخجل
_ شكراً لأن تفهمني قبل لا احجي .
ضحك بغرور ونزل ونزلني ظل بالباب والبنات ويايه
يحجون ويختارون وينصحوني الى ان ثبتت على بدلة
لغيت يوم الحنة لان وضعي مايسمح اسويها بيتنا
اخاف على عالم من اهلي .
حجزت بمركز حتى يجهزوني ، وطلعت وياهن يوم بعد يوم
اجهز ملابسي من أماكن مختلفة وجانت اول مرة ادخل سوك
سبع ايام كملت جهازي ، ورجعت على بيت اصفي بالملابس
الموجودة بالكنتور نصهم جديدات رتبت كلشي بجنط اني
وصفية وعلي الآكبر مخبوص بيتهم وينتظر مني اتصل
بليلة الحنة صارت بس رجالية الشباب مسوين حفلة توديع
العزوبية وللساعة بـ 12 بليل فرغ يجي ياخذ الجنط فاتت
صفية تنطيني علم وصل واني بالحمام قفلت الباب وصحت بيها
_ خلي علي الاكبر ينقلهن اني أتأخر بالحمام .
صار ينزل بيهن بدون ما يضايقني ولا يصدر صوت نزلهن
جوة كملت وطلعت لكيتهم بعدهم يصعدون بيهن
وجود وياه يسحل بيهن ويصيح
_ ولك خوية اخاف بيهن انور شمه الثكل ماصاير بوووية
حتى بنطلوني راح ينفتك .
ذبها وكعد عليها ضربة بغمه وهو يصيح
_ ولك تعبت انتَ تعرس وانا اتعذب .
علي الاكبر : اشتغل وانتَ ساكت يا ملخلخ يا ماااايعععععع .
خلصوهن وراحوا قبل لا انام فتحت تلفوني وكتبت
_ باجر يوم جديد وبداية جديدة اتمنى كلشي يتغير .
سديت تلفوني ونمت كعدتني صفية من الصبح مجهزة اكلي
امي اجت وراها : ها راح تروحين مركز تجميل ؟
_ اي تجين ويايه .
_ اشوف ابوج .
عافتني وراحت بدلت وشربت كلاص عصير برتقال من ايد
صفية ونزلت خابرني جود سلمت على صفية بوستها
_ صفية اذا ما رجعت ديري بالج على نفسج .
_ ماما لا تعوفني وتروح على طول تعال .
حضنتها وبجيت على بجيها شلون راح تستمر هنا وحدها
_ صفية شكراً على كلشي صبرتيني وتحملتيني هووواي
ما انسى كلشي حلو سويتي ويايه اني هواي احبچ .
_ وانا احبك ماما .
بستها براسها وطلعت احاول أتظاهر بالقوة
والحقيقة اني هيكل متهالك من الداخل اكلتني الهموم والتفكير
جود : يا هلا بزوجة اخي عروستنا العقربة الجديدة .
اشرت على نفسي واني اصعد بصف شهد وشمس
وشوق بصفه كاعدة تضحك
_ إني عقربة اني .
جود : شلون ما اشوف راح تعبر العقارب القديمات .
شهد : ميثاق ماكو احد يسبقها .
شوق : هذا علي الآكبر يخابر لحظة
هاا عيوني علاوي ، اي اخذناها ، لا محد شافنا، اي مابيها شي
هسة أسألها ، عيوني دُر اكلتي شي ؟
دُر : فد شوية اكل توني كعدت شربت عصير برتقال .
شوق : صار اني اوكلها تدلل حبيبي بيباي .
نزلنا للمركز حجز من الصبح للعصر نركض منا ومنا
الى ان كملت طلعت روحي لبستني شمس وشهد البدلة
رتبوها والتول جملها اكثر .
شمس : ما شاء الله تبارك الرحمن عين الله تحرسچ .
شوق: اللهم صلي على محمد وآل محمد دخيل جمالج .
شهد : الله يساعد اخوي اليوم .
شمس : باجر الصبح علي الآكبر يصيح اخ ركباتي اخ مفاصلي .
شوق : هاي اذا تشوفي غير اخذ الحب عيني .
شمس : ابن حلال هذا اتصل ، ها علاوي ، اي خلصت ، نازلين حبيبي .
لزمتني من ايدي تنزل قبلي واني انزل على درج رافعة فستاني
اختاريت فستان ملكي محتشم لان العرس بالقاعة
عدلت بدلتي ورفعت عيوني حتى تقابل شريك حياتها
جذبني بقيت بمكاني اضحك والبنات مايعرفون على شنو اضحك
وهو يضحك ويايه فاهمني نزلت هو عيونه تلمع حجيت بصوت ناصي
_ رجال مؤدب وتسمع الكلام مرتب شعرك ولحيتك مثل ما احب .
_ شطالعة دُرري توكفين كلبي تريدين .
قدم التول يغطي بيه وهو يبوس راسي يهمس
_ انا اغار عليچ انتبهي على تفاصيلچ .
_ ترا اني هم اغار دير بالك رايحين عرس عينك ما ترفعها .
_ تغارين من البنات ؟
_ اي .
_ وانا راح اخلي البنات تغار منچ .
رجع يبوس براسي وايدي رغم مبين شكد خجول
وحذر مقابيل أخواته مايبدر تصرف مو حلو بس
تصرفاته ونظراته مفضوحات ، صعدنا بالسيارة
حاجزين عند مصور اخذنا لقطات وحدة احلى من الثانية
وهو كل ما تلتفت المصورة ياخذ بوسة ويبتعد
لمساته جانت كفيله تشرح حُبه واشتياقه اليه .
خلصنا بعد ما تعبت كلش صعدني وراح يشتري
عصير وكيكة وكلني من شافني خلصت حرك السيارة
عدلت حمرتي نزل البنات وفر السيارة على باب الخلفي
ركن السيارة وركض شال بدلتي ودخلني الغرفة الأنتظار .
دُر : دقايق وندخل متوترة .
حضني لدقايق ابتعد رفع وجهي
_ لا تخافين يمج والله .
دُر : شوف علي الآكبر من ندخل خلي ظهرك مستقيم
وامشي هيج شوف .
حجيتها وصرت امثل شلون يمشي وهو يضحك
اجه يقلدني وخربان ضحك
_ شبيك علي الآكبر حباب ركز مو وقتها .
_ شني هاي بوية كل عقلج امشي هيج اصير مضحكة .
_ هاي مشيت العرسان والامراء بالافلام .
_ مو مشيت عرسان لا والله مشيت ابو جودت
الموجود باب الحارة هو يرجّع ظهره ويقدم كرشه .
_ هههههههه لا والله لا شوف هيج ظهرك مستقيم وايدك بيدي .
_ دُر هاي مشيت بطة شبعانة حوصلتها .
_ والله الامراء هيج يمشون .
_ وانا علي الآكبر مو امير امشي مشيت الزلم وبس
سوالف الأجانب ما احبها بوية .
انضرب الباب فتحه فاتت منظمة الحفلة
_ صار وقت دخولكم .
كعدت رجلي ثگلت راحت وهو كعد مثني ركبه
_ ايدي راح اخليها بيدج طول الوكت اخذي قوتي وامشي
انتَ حرمتي راسچ اريده مرفوع افتهمتي بوية .
_ علي لا تعوفني ولا دقيقة اموت ترا من الخجل .
سحب ايدي وباس راسي وهو يجاوبني
_ بعيوني يلة نتوكل .
هزيت راسي بالموافقة اخذني وطلعنا واكفين وره الباب
بس انفتح دخلنا اصوات الهلاهل والتصفيق يهزون القلب
وسعت عيوني من شفت كل ابوية وامي وانور موجودين
درت وجهي على على الآكبر متعجبة
_ شلون گدرت .
_ غير اهلج لازم متواجدين العالم ماتسكت اذا ما يتواجدون .
لزمني بـ استحكام وسيطرة وكعدنا الكل يبارك ويسلمون
هو يمي ما ترك ايدي ثانية ، اخوانه موجودين وباقي الزلم
مايصير يدخلون ، بعد وقت مو قليل صعدوا اخوان علي اخذوا
يرگص وياهم وابوهم وامهم يهوسون فرحانين وشهد طالعة
لعابة تجي يمي تاخذ صور وتركص وتروح للعالم وتجيني شمس
ومن تروح شمس شوق تشوف شنو احتاج .
امي تباوع عليهم بالعين الصغيرة كلشي ما عاجبها
اجت يمي تأشر عليهم وتحجي باستصغار
_ لچ وين راح تدفنين نفسچ شنو هذولي ولا واحد لابس ماركة .
دُر : بشنو تفيد الماركة تريدين اصير مثلج اعيش
واتزوج واحد يخوني يهين بيه واسكت والله لان عنده فلوس .
عافتني ونزلت ساعة وطلعوا هي وابوية عبالك غربة من الخجل اريد
اشرد العالم تعجبوا ليش راحوا ، طلع على الآكبر بقينا
بس بنات ركص على ضحك على سوالف وصور
صار اليل وبدت الحفلة تنتهي تعبت بس اهله ما حسسوني
اني وحدي البنات صاروا اخواني واكثر ، احتواني وام حسن
كلماتها دافية تخليني انسى كلشي واندمج وياهم .
اجه علي وهو خجلان يدخل بنص النسوان الموجودات
اخذني من بيناتهن وابو وياه باس راسي وقبل لا ياخذني
علي الآكبر صاح : خلي عينك بعيني علاوي بوية .
رفع علي الاكبر عيونه ثبتها
ابو حسن : دُر بنتي حالها حال شهد اذا تجيني بيوم تشكيلي
منك اوكف وياها ضدك وحگ ربك .
علي الآكبر: واذا هي الغلطانة .
ابو حسن : هم وياها انت لازم تشغل عقلك حتى لا تزعل منك
دير بالك عليها امانة الله ومحمد وعلي دُر بوية علاوي .
_ وراسك الغالية بوية اخليها بطن عيوني هاي تالي تعبي .
بست راسه وراس ام حسن وطلعنا اول ما صعدنا
وتحركنا حضني فرحان والدنيا بكبرها ما واسعته
_ دُرري من صدك صرتي اليه بعد هاي هيه يعني .
بقيت ساكته خجلانه وكلبي يدك بصوت عالي يريد يطلع من صدري
بعد وقت كدرت احجي وعبالك لساني مبلوع
_ وين رايحين ؟
_ اول ليلة حجزت فندق غرفة بكربلاء نخلصها هناك
وباجر الصبح نسافر للشمال راح اسافر اول سفرة بحياتي وياج .
_ ما مسافر ابد ؟
_ ابد .
_ حتى للشمال ؟
_ سافرت على اربيل اني وجماعتي وبعد ما عدتها .
نمت بنص الطريق من التعب بس جوعانة بطني
أطلع صوت ، كعدني اول ما وصلنا نزلني سلم
المستمسكات واخذني بالمصعد هو يمشي ويلتفت
_ اميرة انتِ دُرري كلبي من اباوع عليج عبالك يهبط
تنسحل روحي سحل .
بدلت الموضوع لان راح اتخربط بكد ما استحي منه
_ الجنط عفتهم جوة .
_ بس تدخلين للغرفة انزل اجيبهن .
طلعنا من المصعد يمشي بخفة اول ما دخلنا
سد الباب اريد امشي سحبني من ايدي دفعني
على الحايط عيونه على شفايفي يحجي بخدر
_ شراح يصير بيهن .
بس كمل كلامه صار يبوسني يفصلها ياخذ نفس
ويرجع يبوسني فتح السحاب واني نزلت نفسي
ومشيت من بين ايده احجي وايدي على صدري
لازمه البدلة : اعصابك بس اعصابك .
دخل للحمام غسل وجهه ويريد يطلع
_ اجيب الجنط حتى نتفاهم على سالفة الأعصاب .
_ يا اعصاب ؟
_ اريد تفتهمين اني اليوم تسقط كل قوانيني واعصابي گدامج .
طلع وعافني اباوع وراه لثواني استوعبت اني وين
عزا اني عروس وعلي الآكبر زوجي غمضت عيوني
صرت اتفحص الغرفة مرتبة وأنيقة بشكل دورت على
كيبل شحن تلفوني انغلق، خليته على ميز ركبت الشاحن
ورحت اباوع على المرايا وحهي تحسس رجعت على صوت
شعارات التلفون فتحته كلهن من يسار تسجيل صوت .
فتحته بفضول وياريت حذفتها وتجاهلتها
صرت استمع للكلام من بدايته الى ان
خانتني قوتي وگعت على الأرض
كل ما يخلص التسجيل ارجع افتحه
ودموعي تتسابق على خدي
دخل علي الآكبر سد الباب
وصار يستمع وهو يتقدم
ذب الجنط على ارض
رفعت عيوني اعيد بالصوت
هو ثبت ما يتحرك منه
شي غير عيونه ترمش
ايده بجيب بنطلونه رجعت
فتحت الصوت نزل راسه ، ضربت على وجهي وامسح
بدموعي حيل حيل بكل قوتي صرخت وملخت روحي
دُر : مووووووووو حلفتك لاااااااا تاذيني
لاااااا تأذيني وصيتككككك اني وصيتك .
ساكت ماكو جواب عيونه ثابته بعيوني
ضربت علي صدري بجنون وعليت صوتي اكثر
دُر : يتيمة اعتبرني يتيمة مو هيج وصيتك ليش تكسررررررني
لككككككك ليشششششششششش احجي احجي فهمني
علي الآكبرررررررررررررررر .
يتبع ...
ثقل ميزانك بذكر اللّٰـه:
- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد