_____________________ الــريـاش
﷽
𓆩 اســاور حــسين 𓆪
بقلمي رواية : الــرياش
واحس بروحي مشتاكـة
اجي اشكيلك وتشكيلي..
لطفا لا تنسون التصويت والتفاعل بين الفقرات
⊰ دُر ⊱
دُر : ريان فدوة تتبهذل حرة اذا تعوفها
وهذولي اخوانها من يعرفون صارت مطلقة ياخذوها .
رنيم : اني هذا شرطي الوحيد حتى لو متزوجها
على ورق ما اتقبل الفكرة اكو طرف ثالث موجود
بحياتنا ريــان الخاطري فكر بالموضوع .
دُر : حبيبتي رنيم شبيچ شنو الخاطرچ يفكر البنية بعدها
طفلة تروح بالرجلين والله بس يطلگ قابل هيَّ شنو تأثيرها عليكم .
رنيم : يعني انتِ تقبلين تتزوجين شخص متزوج وهل شخص حب حياتچ
اني لان حبيته تعذبت السنوات الفاتت ولأن احبه رجعت
فرحتي انكسرت من عرفته تزوج عفية والله الموضوع صعب .
علي الآكبر لزمني من ايدي يريدني اسكت وانتظر ريــان
التفتت على ريــان طلع تلفونه ما اعرف شنو يسوي
دقايق وكف وهو يأشر بيده وجهه محتقن مبين عصبي
_ يلة علاوي نتوكل احنا .
ام رنيم : وراح تعوفها مكسورة خاطر .
ريــان : اني ما اعوفها وهيَّ تدري سنين انتظرها
واني الممنون ما امنن عليهه لان اختاريتها وكلها تعرف
بحبي الرنيم ومقدر الصار بيها هي تعذبت وانا اكثر .
لزمتها امها من ايدها وخلتها بحضنها
ام رنيم : چا اذا تحبها لا تكسر خاطرها .
ريــان : خالتي يعني انا اجبر خاطر رنيم واشمر طفلة
بنص الموت ؟ البنية زواجي منها على ورق معتبرها
حالها حال دُر وراح تبلش تدرس لا بحالي ولا يمي
لا تتحججون بيها دخيل الله .
ام رنيم : نتحجج ؟
ريــان : لو صدك تريدني ما تتشرط وتصدگني
من احجي وتعذرني أنا طلاك صعب اطلگ كلش صعب
ابني سعادتي على حساب حياة طفلة ما عدها احد غيري
تحتمي بي وادري اذا طلعت من عصمتي ياكلوها اكل بسنونهم .
فرت راسها ام رنيم وتمسح على ظهر بتها
تريد تحسس ريــان بالذنب على دموعها
_ اي براحتك يمه بعد هاي اكثر من مرة تريدون
تتزوجون وتوصل للحلگ وتخرب يمكن ماكو قسمة
كلشي قسمة ونصيب .
هي تحجي وريان عيونه على رنيم ويطحل بروحه طحل
يريدها يحبها يرجف عليهه بس والله طلبها صعب
سلمنا وطلعنا منهم وجوهنا ما تتفسر صعدنا بالسيارة
لدقايق الصمت سيد المكان والهدوء يسيطر على جو
قرر علي الآكبر يكسر هل سكوت من حجه بنبرة شك
_ ريــان .
_ ها علي الآكبر .
_ انت تعرف شكد احب امها .
_ وساعدناها هواي .
_ بس اليوم گلبي نغزني منها جانت مكسورة
من رجعت بتها انگلبت شنو الوجبة ؟
_ حظي الحلو شبيك هذا حظي .
دُر : لا ترجعني للبيت عفية علي الاكبر اريد اروح اشوف حُــرة .
_ ماشي ريــان على بيتك نروح .
_ هلا بيكم .
فر السيارة على طريق البيت مالته وشغل وسحب
باكيت الجگاير وقدم العلي الآكبر اخذ وحده وشغلها العلي
وهو اخذ الثانية فتح جام السيارة يذبون الدخان برا
بقيت متعجبة من علي الاكبر مسح على لحيته وحجه
_ ريــان طلك بنت عمك اذا زواجك منها على ورق
واخلي جــود يتزوجها ، وهيج تنحلّ مشكلتكم .
ثبت ريــان نظراته على علي الآكبر مخنزر
اشر على شارع وصاح بي
_ الشارع يمعود راح نسوي حادث .
ريــان : يالعباس بيك بوكس اخرب معالم وجهك بي .
_ هههههههه لك غير احل مشكلتك .
_ حـرة مو مشكلتي بالعكس ، بعدين بنظرك اني
مگرن اطلك بنت عمي وزوجها اخوك .
_ لا حشاك .
_ يا حشاني فگست بالسالفة انت ، شلون فكرت بيها بربك .
ذب الجگارة من الشباك وصف السيارة مقابيل الباب
شفت الساعة بـ1 بليل نزلت البيت مابي صوت ابد
دخلت غرفتها شفتها نايمة مشيت يمها غطيتها
دخل ريــان ويايه رفعت ايدها عدلتها وركزت بملامحها
دُر : حلفتك بالله لا تخليها ترجع العذاب بيت الرياش
والله ضربهم وكلامهم ماينسي هذولي كسرونا
وكسروها حُــرة ضحية البيت الرياش .
ريــان : بدون حلفان كسرتها مثل كسرتي واكبر
بعدها طفلة اني ما انطي طفلة البيت الرياش لا تخافين .
اريد اروح لزمت حُــرة ايدي
دُر : روح شوف علي الآكبر ريــان شوية واجي وراك .
هو طلع وفتحت حُــرة عيونها صايرة دم حضنتني وتهمس بخوف
_ دُر خطيبة ريــان عايشة ورجعت اسمها رنيم .
_ ادري وجنت عدهم وشفتها .
_ شكد عيب اذا تدري بي متزوج .
_ تدري .
_ يااا هسة تعتبرني طرف ثالث خطية .
_ انتِ لا تفكرين ركزي بحياتج .
_ باجر اول يوم دوام عندي بالمدرسة .
_ والله ؟
_ ريــان رجعني وشوفي شنو اشترالي .
شوفتني ملابسها والجنطة يخبلن نازكات مثلها
_ عفية عليچ كملي دراستچ لا تعتمدين على احد ابد .
_ ادعيلي .
_ ماعندي غيركم ادعيلكم كلكم والله .
سمعت صوت انــور هو وعلي الآكبر طالع
بوستها وطلعت مستعجلة فتت على مطبخ
كاعدين على ميز الطعام واحد يجادل بالثاني
من دخلت غيروا الموجه ونهض علي الآكبر
_ يلة ريــان رجعنا .
بعدنا ما طالعين وتلفون ريــان رن فتح خط بلهفة
_ الو ، هلو رنيم ، اي اسمع احجي ، زين ، شنو
علي صوتچ حتى اسمع ، اي افتهم لا تبجين هاي هيَّ
باجر اجي ونتفاهم على كلشي مع السلامة .
دُر : شكو .
ريــان : وافقت على زواجنا .
انــور : زواج منو ؟
علي الآكبر: انت نام معليك هههههه ، الف مبروك خوية .
ريــان : الله يبارك بيك .
دفع انــور الكرسي وراح على علي الآكبر لزمه من
التيشيرت وهزه وهو فاير من العصبية
انــور : انت مشتاق تجرب ضربي
اذا نسيت اذكرك ايدي اثگل منهاااااا ماكو .
علي الآكبر: نزل ايدك لا افجرك .
انــور : قبل انت تفجر بالمولوتوف بس هسة صار الدور دوري .
علي الآكبر: رجفتني كافي ارحمني .
ادخل ريــان بيناتهم يفاكك بيهم
انــور : امدك يعاااار يجي يوم وادوسك بالقندرة .
علي الآكبر: القنادر انت تنضرب بيهم مو تضرب بيهن ههههه .
انــور : من كون الله يحذفكم .
علي الآكبر: لا نحتاج هيلب جووووووود ههههههههههه
يحذفنا شني هههههههههه دعوة مثقفين هاي لو شنو الوجبة
طيح الله حظك يحذفكم ولك تطبيقات ويحذف شمه بعد ماعليك عتب .
ريــان : غير يطلع ويبطل يجادل .
علي الآكبر: اوكف خليني اعرف بينا ضمان استرجاع لو لا ؟
ريــان : عجيب .
دُر : علي امشي نعسانة .
علي الآكبر: اجيت بوية وانا تعبت من الضحك اخوج يضحكني .
صعدنا للسيارة رجعنا للبيت البوب مقفولة دگ
على جــود نزل بسرعة فتحهن من دخلنا لزم
علي الآكبر وهو يمشي عبر ايده على اكتافه
يريد يقهرني عود الحقير
جــود : حب اليوم تنام بغرفتي ؟
علي الآكبر: شسوي يمك الخايس .
جــود : عمرت نرگيلة وحلويات حبشكلات ونسهر حبيبي .
دُر : حبيبي ؟ حبتك وحده تشبه ميثاق .
جــود : لا كلشي ولا الشرف وجمال مرتي .
دُر : علي الآكبر هيلب بليززززززز .
دفع علي الآكبر ايد جــود واجه لزم ايدي وصعدنا نمشي
على درج مثل الملوك إني فتحه ايدي وعلي الآكبر
لازم ايدي والثانية ورا ظهره خلاها
جــود : شووووووووواربچ هيلب يا سنيك .
دُر : شيت اب جووووود .
جــود : حسبي الله عليك يا علي الآكبر من دخلت
المثقفين الحياتي جنت عايش مرتاح قابل زوجتي
تحجي مثل ميثاق تزوج مثقفة وتعذب حالي .
علي الآكبر: مثل ما گالت شيت اب يا خايس اخذ مكان ميثاق .
دخلت للغرفة غيرت ملابسي بشي خفيف وعلي الآكبر
نايم قبلي يقلب بالتلفون اجيت يمه عايفني سحبت
التلفون من ايده وخليته على جهتي
_ علي الآكبر .
_ روحه لعلي الآكبر .
_ اريد انام بدون تفكير .
_ بالخدمة .
سحبني على صدره وغلغل اصابع ايده بين خصلات شعري
يسرح بيهن ويعدلهم فتح الظفيره بيده بكُل هدوء ونزل على اذني
_ احبچ دُر .
بدون احساس جاوبته
_ ودُر أتحب علي الآكبر .
طوق خصري وسحبني اكثر على جسمه وهو يهمس
_ اهيم وادوخ بتفاصيلچ دُر .
غمضت عيوني وكان كل تعبي انزاح مني وغفيت براحه
وعلي الآكبر ما عافني كُل ما افز بعدني بحضنه نايمة
للصبح حسيت بي يغطيني وباس راسي ونزل جوة
شلت البطانية وگعدت سحبت تلفوني واتصلت على ريــان
_ الو صباح الخير ريــان .
_ صباح النور دُر .
_ حُــرة راحت للمدرسة .
_ لا دوامها ظهري حالياً مفعله زر الإزعاج الصباحي .
_ شبيها ؟
_ تغني بصوتها الـ .
حُــرة : اي شبي صوتي .
_ اهووووو عمي حلو بس روحي كملي .
دُر : ههههههههه تستاهل مبين من الصبح
متعاركين الحد ما واصل مرحلة تگول حلو .
ريــان : انتِ وياهااا ؟
_ اي والله خليها ادوخ بيكم .
ريــان : دُر ..
_ اني ما ادخل انتوا حيّروا بنفسكم .
سديت الخط واني اضحك مديت جسمي طگطگ
وبدلت ملابسي رحت غسلت وجهي ونزلت
لكيت علي الآكبر يتريك سحب كرسي
فزت ريمان من الصوت كعدت قريب منه
وهيَّ رجعت تغسل مواعين الريوك مالتهم
سوالي لفه اخذتها من ايده اكلت منها شوية
ورحت صبيت جاي ورجعت اكمل بيها
بس كملتها سوالي الثانية من تأكد اكلتها
راح غسل وقبل لا يطلع حاجاني
_ دُر .
جاوبته واني اشرب جاي
_ ها علي .
طگطگ رگبته وجاوبني مستعجل
_ عندي طلبية فد ساعتين تلاثة تكمل واجه
نروح اني وياج انظف البيت حتى ناخذ الغرفة نشدها هناك .
_ انتظرك .
اخذت الصينية غسلت المواعين وتعلمت من اخلص
المواعين اجلف الطباخ صح مو كلش زين بس احاول
بمرور الوقت اتعلم اكثر ، صعدت لملمت ملابسنا
بالجنط كُلهن وشهد صعدت يمي ما داومت اليوم
ساعدتني بلم الأغراض بس ماحجت بموضوع
انــور ابد بس كملت رجع علي الآكبر ردت اخذ
الماسحة والمنظفات ماقبل لان مشتري بالبيت
طلعت من الكراج مشيت بالممر بعدني ما شايفته
طلع المفاتيح فتح الباب اول ما ادخل صالة ارضيتها
مرمر ابيض والحايط لون ابيض ومن دخلت
مطبخ صغير وبصف المطبخ الخدمات
شفتهم وفتحت باب دخلني على غرفة النوم
كل البيت مترب ويحتاج تنظيف نزعت دشداشتي
وبقيت بتراك خفيف حتى اخذ راحتي
سحبني من خصري صار ظهري عليه وهمس بأذني
علي الآكبر : حلو ؟
دُر :عجبني .
_ بس صغير .
_ جربت البيت الجبير وتعذبت بي هواي وجان بارد
اريد دفو البيت الصغير واعيش بأمان يمك .
_ راح اعوضچ على كل يوم بارد مر بحياتچ دُر بوية .
بديت اني وياه نغسل من الغرفة وهو ينظف اكثر مني لان
اني كلشي ماعرف مقابيل نظافة علي الآكبر صفر دُر
هو ينظف واني اوسخ اخر شي تعب مني سلمني الصوندة
وخلاني بس ارش وهو يجر بالتراب والزاهي والمنظفات
ويضحك عليه وصلنا للممر اخذ الصوندة مني واشر بيده
_ ارجعي للبيت اخذج الواهس طالعة تركضين بهذا الهفاف .
_ هفاف .
_ اي ملابسج خفيفة امشي .
_ بعد احسن .
_ هسة اصيح انــور ينظف ويايه .
_ غير ينسى انــور .
_ الله يحذفه ههههههههههه .
رفعت حاجبي ورجعت للبيت اسمع صوت جــود ينظف وياه
لبست دشداشتي وطلعت مندمج ويضحكون فاصلين
علي الآكبر يرش وجود يمسح وما ادري شنو يحجي جــود
وعلي الآكبر كل شوية يبلل بي بالصوندة ويظل يگمز
دُر :عشاق عيني الحارة باردة عليكم .
جــود : اهوووووو هم ادخلت بيناتنا .
_ عوف زوجي بحالة .
_ زوجج يحبني هو خابرني يريد
يتونس يريد يضحك ما يتونس بس ويايه .
دُر : علي الآكبر صدك أنت خابرته؟
علي الآكبر: اي .
دُر : تتونس وياه .
علي الآكبر: لا أكرب عليه مثل ما كربتي عليه .
دُر : سمعت لو ما سمعت جــود سنيك .
جــود : سنيك موو؟
دُر : اي سنيك يعني افعى انت أفعى ملتوية .
ذب الماسحة عاط بي علي الآكبر رجع يمسح
واني رجعت للبيت اضحك عليه واشيل بالمنظفات
من كملوا دخلوا اخشاب غرفتنا يشدون بيها
بعدهم يشتغلون وعمي فات علينة هو وعمتي
صاحوا على جــود وعلي الآكبر ودخلوا الكاونتر
والطباخ هدية منهم بس رتبوهن صار المطبخ
ململم يجنن والألوان متناسقة مريحة للعين
بعدهم يرتبون بالغرفة ودخل حسن هو وسراج
يدخلون بالتخم وسراج مشتري التلفزيون
وعز الدين جهز كهربائيات البيت كُلهم ايدهم
بـ ايد علي الآكبر يموتون عليه لان بكُلشي
يفزع الهم ويستمع للمشاكل اذا تصير وياهم
وهو يسعي ويحلها ويدخل حتى يصغرها
بحيث مايقبلون حتى يشكرهم ، ويعاملوني
مثل شهد اختهم وبعد احسن من اشوفهم
واسمع كلامهم وتعاملهم ويايه كلبي يرفرف
من الفرح وحبيتهم وصاروا بمعزة علي الآكبر .
بس صار اليل هلكت گعدت وعمتي اجت بيدها
صينية وشهد بيدها صينية گلاصات جاي ودخلوا كلهم
ام حسن : اليوم نتعشى عدكم تقبلون ؟
دُر : هلا بيچ عمه البيت بيتكم تعالي هناا .
فات عمي باس راسي وگعدني بصفه
وعلي الآكبر طلع من الحمام متعجب منهم بدل واجه يضحك
_ ها اليوم هنا ؟
ابو حسن : اول ولد من ولدي يعزل اريد اجرب
شعور اروح البيت ولدي .
شهد : الله بابا والله شعور حلو طلعهم كلهم ببيوت
حتى كل يوم بيت واحد نروح ناكل .
ام حسن : يوم المنى ويستقرون ببيوت .
ابو حسن : غير يلمون روحهم ويشترون شنو بيدي عليهم .
وهمَّ يحجون بالموضوع وياكلون وعمي كل شوية يريد
يوصي علي الآكبر عليَّ وعلى بيت ويضحك
_ ماتحتاج انت اوصيك ابو جبل بعد گول وفعل .
علي الآكبر: لا توصيني علي ام جبل .
دُر : جبل حصاروست لو جبر حراء ؟
لزمني من معصم ايدي وسحبني من عمي
_ لا تحششين على اسم ابني .
_ ما شنو ام جبل خلّصت الاسماء ؟
_ انا قبل لا اتزوج كُلها تعرفني ابو جبل .
_ اي من يجي الطفل عود ويعرفون اسمه الجديد يسقط اسم جبل .
_ اي وشنو تحبين ست دُر ؟
_ فكر لا نستعجل شبيك يا عيني .
_ هسة خلي يجي وحگ العباس اسمي جبل .
_ شوف عمووو شلون يحلف .
شالت عمتي الصينية وشهد وياها وعمي
ابو حسن : بنيتي استخدمي سيطرة ماما دُر .
دُر : ماكو غير حل ههههههه .
طلعوا بعده علي الآكبر يريد يسد الباب ورن تلفونه
سد الباب وطلع بس سمعت يگول الو ريــان اي اسمعك .
بالساعة وهوه يسولف بقيت بقلق يروح ويرجع بالممر
ويصير عصبي وبعدين يلين ردت اطلع خجلت
دخلت للحمام سبحت وطلعت وبعدهم يحجون
سرحت شعري واخذت علبة المكياج فتحتها ودخل علي الآكبر
ذب روحه على السرير وصاح من التعب رفع المخدة استند
عليهه ورفع جسمه كتف ايده وصفن بتحركاتي
دُر : شنو يريد ريــان ؟
تحمحم محتار شنو يحجي عدل حاجبة بقلق وجاوبني
_ باجر يعقد عقد سيد على رنيم ويسافرون .
ضربت على خدي ورحت قريب منه
_ صدك تحجي ؟
_ اخوج خبلني صح يحبها وخايف يخسرها
انتظرها ترجع هواي انتظرها بس هذا استعجاله
معاجبني وكلبي ناغزني منه .
دُر : خوفتني والله خوفتني اكثر من خوفي .
_ هو ريــان لازم يخاف مايفكر صار ساعة اقنع بي قافل
يريد باجر يتزوج ، زين روح اسأل وين جانت شلون عاشت
كلامهم صح غلط زوجها وين اهلك مخافت من اهلك من رجعت .
دُر : أخابره ؟
_ الصياد ماياخذ بكلام إحد آخذيها قاعدة
انصح بي يسمع الي يعجبه وبس .
دُر : وحرة ؟
_ مكمل الطابق الفوك الحرة مشتغل اليوم كله مشتغل
بس حُــرة بعدها كلشي ماتعرف .
دُر : ما اعتقد حُــرة تقبل تظل على ذمته
هيه البارحة گالت ما اصير طرف ثالث .
_ واخوج مستحيل يطلك يبس حلگي واني احجي وياه
عنودي الأبعد الحدود عنودي .
سحبني من ايدي گعدت على سرير قريبة منه
دُر : دخت علي الآكبر شلون فهمني .
_ هذا اخوج ويريدنا باجر وياه انتِ وانور
واني وابوية واشوف منو يمشي وياه .
_ والله علي الآكبر والله كلبي ما مطمئن راح تصير مصيبة .
بعدني احجي وتلفوني رن اخذته من الشحن
ورفعت راسي على علي الآكبر
_ هذا انــور .
_ شكو يا ستار .
جاوبته ومن احجي وياه ما ادري ليش اخاف وصوتي يرجف
_ الو انــور .
_ دُر مقتنعه بهذا النعال اخوج باجر يتزوج .
_ هسة عرفت من علي الآكبر .
_ وعلي الآكبر شنو يگول .
_ ها ..
اخذ علي الآكبر التلفون مني وبقيت صافنة من سلم
علي الآكبر : ها انــور .
انــور : هذا ريــان مضروب على راسه ؟
علي الآكبر: حجيت وياه والله متفق وياهن ومخلص
اموره كلهن اليوم على اخر دقايق ينطي خبر .
انــور : أطيح حظه وحظهن .
شغل علي الاكبر جگارة وبنبرة تحذير جاوبه
علي الآكبر: لالالا دير بالك يروح يخليك براسه .
انــور : اي ادري بي هسة احجي وياه يگلي لا تصير مثل اهلك .
علي الآكبر: اي شوف .
انــور : والحل ؟
علي الآكبر : نروح وياه واهم شي انت واختك
حتى يعرفون أخوانه موجودين اني شاك بشي
واتمنى مايطلع الي براسي صحيح .
سكت انــور لثواني ورجع يحجي بنبرة الشك
_ واني احس اكو ملعوب احتمال يعرفون ريــان نفسه الصياد
لو يشكون بي هو الصياد وخلوها ترجع تتأكد ؟
علي الآكبر: واحتمال يريدون حُــرة لان اول شرط
من شروطها يطلك حُــرة وبعدين وافقت حتى لو حُــرة موجودة
اكو لغز اكو لعبة تنحاك ..
انــور : واحتمال رجعت تنتقم لان اتعذبت من بيت الرياش .
علي الآكبر: كلشي وارد .
انــور : باجر تجون انت ودُر .
علي الآكبر: اي لازم .
انــور : ماشي .
علي الآكبر : الله يحذف بيت الرياش ونخلص من مصايبهم .
انــور : امشي لك لولو .
سد الخط منه واني جامده بوجهه اريد استوعب الصار
اريد اصرخ علي الآكبر وأنور متفقين على شي اخاف احلم
هو افتهمني ضحك واخذني نومني على ايده
_ لا تفكرين نامي اخوانج مو صغار كبار .
_ بس حباب لا تمل وتخليهم وحدهم .
_ انا كلشي اسوي الخاطر دُر .
بست خده وخليت راسي برگبته ونمت من التعب بسرعة .
صحيت الصبح على صوت العصافير والبردة مفتوحة
والشبابيك ادخل هوا بارد حركت جسمي وكعدت علي الآكبر ماكو
وصلت للحمام طلع مغسل وجهه نزّل المنشفه من وجهه
ونزل راسه باسني برگبتي وهمس
_ صباح الخير دُرر .
انبلع الساني ضحك وراح للغرفة لبس تيشيرت
واني غسلت على سريع وطلعت للمطبخ
طلع لحم من الثلاجة وثرم البصل وإني أراقبه
_ جوعانة .
_ اي .
_ تحبين المخلمة ؟
_ سامعة بيها بس ماجربتها .
_ همزين جربيها من ايدي .
كمل ثرم وشغل طاوة يحمس بالمواد ويضيف لمساته
سريع ولا يخاف من النار يهف هف خدر الجاي
وكل خطوة يسويها يعلمني عليهه رتبت الصينية
وگلاصات الجاي صبيت وهو شال الطاوة وگعدنا
بالگاع اكلت منهه طعمها يموت مليانة نكهات طيبة
_ ها طيبة ؟
_ فري نايس عجيبة عجبتني .
نزل راسه مايريد اشوفه يضحك ويتحمحم كمل
اكله وراح غسل واني اخذت الصينية للمطبخ
_ دُر .
_ ها .
_ عندي طلبية اخلصها وارجع جهزي
نفسج حتى نروح قبل بوقت .
_ الريان .
_ اي وجهزي ملابسي .
_ صار .
باس راسي وطلع وتلفونه يرن مبين مستعجل
طلعت اسلم على عمتي عبرت الممر وشفت جــود
باب المطبخ دار وجهه من شافني ضحك
_ هلا بالمثقفة .
_ هلو جــود المثقف .
_ اجت اصبع رجلي المدوحس .
_ منو قصدك ؟
_ ميثاق .
ضحكت وهو ولا يضحك وعمتي تعض بإصبعها
وتجر بالتيشيرت مالته تريد يسكت
جــود : بالعباس سراج الدين ما ادري شنو عاجبه بيها .
وريمان تخزر بينا عافت المطبخ وراحت ضربته عمتي وصاحت بي
_ راح تروح تحجي هل عرمة ولك عيب الخاطر سراج الدين .
سلمت ورجعت للبيت عفّتهم يتجادلون رتبت البيت على سريع
وبدلت وخليت مكياج وشعري رفعته ونسقت شال
لان ادري منطقتهم وحتى اهله مايحبون اطلع واطب بدون شال
وفرحت علي الآكبر من اخلي الشال كافي عندي بس ما التزم
بي اخلي بدون لف هيج بس اغطي شعري .
رجع علي الآكبر سبح وبدل قميص نيلي وبنطلون اسود
رفع شعره ورش عطر اجيت ألبسه ساعة ضحك
_ بعدج ماتعرفيني انا ما احب البس ساعات ولا محابس
ولا زنجيل بس الحلقة لان حلقة وصل بيناتنا واسمج
محفور عليهه البسها .
_ معقولة المعروف الرجال كُلكم تحبون الساعات .
_ عيونچ حلوة .
عدل شالي وتلمس خدي مبتسم براحة رفع ايدي باسها وهمس .
_ رسمة عيونچ تاخذ عقلي ، ولون شفايفچ لون يومي
هسة اني شلون اسيطر على روحي وهل جمال كله مالتي .
بقيت جامدة بس اباوع بعيونه ما اعرف شنو ارد
ما متعودة من ابدل احد يركز على ادق تفاصيلي
عرفني خجلت حضني ملت راسي على صدره ورديت بخجل
_ لا تحجي هيج تخجلني .
_ احب اشوف ملامح الخجل بيچ عبالك طفلة تصيرين بيدي .
ملصت نفسي من بين ايده ادري بي عنده استعداد
يلغي الروحه بكبرها هسة ويكمل غزل گعدت على
سرير البس بحذائي لبستها وطلعنا ، لگيت عمي
ينتظرنا بالباب هو وحسن صعدنا بالسيارة
وجود طلع من المطعم لابس كفوف
ابو حسن : عينك على البيت .
جــود : توكلوا .
شغل على الاكبر السيارة شخطها وطلعنا
دقايق وصلنا على بيت ريــان ينتظرنا هو وانور بالباب
مبدلين رسمي انــور رفع ايده يسلم على عمي
عمي رفع ايده رد السلام وحسن من بين اسنانه يحجي
_ صاير يسلم شمه .
علي الآكبر: أتعالج من الشم هسة بس مدگدگ .
صعد ريــان بسيارته وأنور بسيارة
ابو حسن : چا بنت عمهم وينها حُــرة ؟
دُر : ما ادري والله .
بس وصلنا عمي نزل راح على ريــان وريان يشكر بي
_ بنت عمك وينهم ؟
ريــان : بالمدرسة الساعة بـ 3 هسة بـ4 ونص تطلع
انــور اليوم يرجعها من المدرسة مو اني .
اجيت سلم ريــان عليَّ واني بالي عند حُــرة
دُر : تدري بيك اليوم تعقد على رنيم ؟
ريــان : لا ما حجيت عدها دراسة وماشفتها البارحة .
دُر : ما تحس نفسك استعجلت ؟
ريــان : احتمال بـ اي يوم يطلعون الشياطين من السجن
اذا يعرفون رنيم رجعت ما استبعد يسوي مشاكل
اكبر من قبل ويفرقونه وهل مرة ياسين يلعبها دبل
لان اخذت بنته ، لازم استعجل ماعندي غير حل .
انــور : زواج لا عرس لا تجهيز مثل العالم والناس
والمشكلة اهلها قابلين بالله هيَّ متزوجة قبل عادي عدها
بس انت ما متزوج قبل لازم عرس .
ريــان : لا مو لازم مايحتاج عرس وهوسة نتزوج
ونسافر كم يوم وخلص لا تكثرون كلام دخيل الله
وخلوها تعدي على خير اني مرتاح هيج وهذا المهم .
علي الآكبر: براحتك حياتك مو حياتنا سوي الي يعجبك
من خوفنا عليك ننصح بس دام مقتنع توكل خوية .
دگ الباب طلع رجال كبير بالعمر رحب بينا طلع خالها
ودخلنا اجت امها ترحب وتهلي استقبالها حلو راحوا
الزلم بالاستقبال صغير ودتني على الغرفة الجوة
بس دخلتها شفت رنيم لابسة فستان ابيض
ورافعة شعرها شكلها حلو ودمها محبوب
بوستها وگعدت يمها ايدها ترجف اجت امها
فرحانة تريد اطير من الفرح وتعدل برنيم
ام رنيم : بعد سنين من عذابهم راح يجتمعون اليوم
يمه والله حيلي ما متحملني بنيتي تعذبت واخوج تعذب .
دُر : دامها من نصيب ريــان لو تمر سنين والكُل
يصير ضدهم راح يجي يوم ويجتمعون ريــان
انتظرها يدري بيوم راح ترجع والحمدلله رجعت .
بعدنا نحجي وفات خالها يسوي طريق نزلت البياض
غطتها ودخل الشيخ وريــان وابو حسن
وانور وعلي الآكبر شهود گعد ريــان قريب منها
والشيخ بلش يحجي وصل الكلمة
_ فـ اذا قبلتي قولي قبلت وانت وكيلي .
رنيم : قبلت وانت وكيلي .
عادتها ثلاث مرات ، وانتقل الريان ردد الكلام من بعد الشيخ وختمها
ريــان : نعم قبلت .
_ مبارك الزواج ربي يتمم عليكم بالخير .
سلم ريــان على شيخ وعمي وقعوا العقد وختموا الاوراق
انــور ما بدر منه رد فعل غير بارك الريان وتجاهل رنيم
وعلي الآكبر بارك الهم اثنينهم بعدهم يطلعون من الغرفة
واستدار ريــان حضن رنيم بكُل قوته ونزلت دموعة
وهيَّ تبچي وترجف بجيت على منظرهم وبس رفع
البياض من وجهه طلعت لمحته يبوسها سدت امها الباب عافتهم وحدهم .
رحت على استقبال عمي وحسن ماخذين الشيخ ورايحين
باقي بس علي الاكبر وانور گاعدين ينتظرون من شاف
عيوني مبين نازلات دموعي بعد ما يندل طريقة وكف
يرفع براسي وايده ترجف ونبرة صوته تغيرت
_ شبيچ بوية دُر منو وياج .
دُر : مابيه شي بس من فرحتي دمعت .
_ احجي الصدك لا تجذبين عليَّ .
_ والله مو جذب بس من شفتهم سوية فرحت .
حضني يمسح على ظهري دقايق ومسح دموعي
بطرف اصبعه ويعدل بشالي لزم ايدي حتى نروح
شفت انــور صافن متعجب من تصرف علي الآكبر .
سلمنا على امها وخالها وريان طلع يعدل بشعره
ريــان : رايحين ؟
علي الاكبر : اي رايحين شوكت تسافرون ؟
ريــان : بس اصعد الجنط نطلع للشمال .
اريد انزل البس حذائي بعدني اريد احني جسمي
وانسحبت من ايدي من علي الاكبر مايقبل انزل وكلها تباوع
وهو يحجي نزل روحه لبسني ويسد بالسير مالتهه
ام رنيم بهتت وانور صافن ما مستوعب بس
ريــان متوقعها من علي الآكبر وكمل كلام وياه .
علي الآكبر: اي شي تحتاج بس خابرني .
ريــان : ماقصرت ولا تقصر عضيدي .
_ تدلل .
انــور : تروح بسيارتك ؟
ريــان : اي .
انــور : اروح وياك اعبرك سيطرة الشمال وارجع ؟
ريــان : لالا بس انت مثل ما وصيتك روح رجعها
وخليها امانة عندك بين ما ارجع انــور .
انــور : لا تعيد بالكلام هواي كافي .
طلعنا وريان صعد الجنط من صعدوا بالسيارة
رجعنا على مدرسة حُــرة تمشي وتسولف
هي وبنية نزل انــور اشر الها تصعد البنات
يباوعون عليه لان الوشوم بارزة وشكله عبالك
شارد من فلم مافيا لبس رسم وملامح جدية
من شافتني اجت تركض صعدت يمي
بوستها وسلمت على علي الآكبر وهمست
_ شنو هل جال ولچ ، وانور وعلي الآكبر بسيارة
حلم هذا كابوس اعترفي شلون سويتيها ؟
انــور : ريــان سواها .
حُــرة : صدگ المعقد وينه قالب الثلج المثلج مختفي .
انــور : تزوج وهسة سافر هو وزوجته .
علي الآكبر دار وجهه على انــور ورفع ايده
_ انطيك غمه وعلي .
انــور : شحدك لك ، غير اريد ابشرها .
حُــرة : عود ليش ما اخذتوني وياكم والله اليوم ماعدنا
دروس هواي جان رحت وياكم اغير جو شبيكم .
علي الاكبر : تروحين بعرس زوجج ؟
انــور : اكلك لا تحجي وياها ما اقبل على بنت عمي .
دُر : بس انتظروا ، حُــرة يعني عادي تروحين عرس ريــان ؟
حُــرة : طبعاً عادي غير اخوية والقرآن افرح من كلبي
تدرون ريان مصمم تصميم بيتهم وينتظرها ترجع هاي
بفضل دعائي رجعوا هههههههه .
انــور : لا وريان يگول فهموها على كيفكم
لا تزعل وتتخبل عليكم اذا ما أخابره .
دگ على ريــان بسرعة جاوبه
انــور : هاك حُــرة تريدك .
اخذت حُــرة التلفون وحجت وايده على خصرها
_ ليش ما تعزززززززمني على عرررررسك .
ريــان : شنو ؟
_ عرررسك عرسك ليش بس اني ما موجودة؟
ريــان : احمممم مو بالمدرسة .
_ لو ادري ما اداوم واجي وياكم زعلت عليكم كلكم .
ريــان : لا تزعلين وتخبلين الأمم العربية كلها .
_ ههههههههه لا اني اتخبل بس عليك .
_ امشي لچ ههههههههه .
سكتت ثواني ودارت وجهه تهمس بصوت خافت
_ ريــان .
_ احممممم ها حــرة .
_ اروح البيت دُر ما اريد أبقى بالبيت بس اني وانور .
_ ابددددددد لاااااااا ما اقبل .
_ مو يضربني .
_ الزمي السانچ الفالت بين ما ارجع احممممم
اسمعي روحه البيت دُر ممنوووووووووع .
_ مو و ...
_ اشششش انطيني علي الآكبر .
سلمت المبايل العلي الآكبر استمع دقايق وعاط بريان
_ شبيك تصيح ، عيب من مرتك يمعود ، اي ما اخذها
لااا شنو دُر تظل هناك ، قرار جديد شنو ، منو تخاف حُــرة
هااا فهمت ماشي لا تصيح اشوف انطيني مجال فهمت كافي .
سد الخط ورجع التلفون
انــور : شبي ؟
علي الآكبر: يصيح والبنية وياه ولد الرياش يحتاجون تربية .
انــور : ايباه تعال ربيهم يا ابو التربية والأخلاق .
علي الآكبر: ماعندي وقت ، دُر ريــان يريد تبقين بالبيت
علمود حُــرة مايريدتظل وحدها .
دُر : انت تقبل .
علي الآكبر: اذا تريدين تبقين ابقي عادي يومين ويرجع .
تنفست براحة جنت شايلة هم شلون تظل حُــرة وحدها
نزل على الآكبر مقابيل بيتهم وطلع جــود شافنا بالسيارة
رفعت ايدي سلمت عليه وهو صاح بصوت عالي
_ شلونچ ريلاكس .
انــور : مو أنزل أسويك ريلاكس انت واخوك .
حُــرة : اوووي زينة اني زينة .
انــور : يا بنت الكلب .
علي الآكبر: انتظروا لا تروحون دقايق .
راحوا على مطعم وانور طلع تلفونه يراسل شوية
ولمحت رجلين جوة الباب من حماسي نزلت اريد اشوف منو
فتحت الباب شفتها شهد من شافتني كمزت
_ لچ شهد .
_ اجيت اضربه بالنعال شبيچ .
_ شلون عرفتي احنا هنا .
_ راسلني المدگدگ يگلي اطلعي اشوفچ مشتهي نعال مبين .
_ انتِ فد جذابة الله يستر منج طالعة تركض تريد تشوفينه اعترفي .
_ لا ولچ لاااا .
عافتني وركضت للبيت وجهه صار احمر دم
رجعت للسيارة وعلي الاكبر طلع من المحل
بيده وجبات اكل عائلية صعدهن يمي
ومستمر يتجادل هو وانور بس سد الباب
حرك السيارة سريع ودار روحه يريد يضرب
حُــرة شالت الجنطة اجت الضربة بيها
انــور : هسة اخابره اخلي يعرف مرته تسلم على الزلم
وتصيح ريلاكس وزينة واووووووي وعلوووووووي .
دُر : انــور فدوة انتبه على طريق شبيك .
انــور : انتِ اسكتي .
دُر : احجي عدل ولا تبيع إسلاميات وعيب وحرام براسنا
وانت تراسل بـ اختهم تريدها تطلع تشوفها .
گطع النفس من عرفني كشفت الموضوع بعد لا يحجي
ولا يتعارك بس وصلنا فتح البوب دخلنا وقفل كلشي
وصعد فوك راحت حُــرة غسلت واني اخذت تراك منها بدلت
ملابسي وكعدت اني وياها ناكل وتسألني على شكل رنيم
وردت فعل ريــان وين راحوا وشوكت يرجعون بس كملت
كعدت تدرس الحد ما غفت خليت مخدة جوة راسها وغطيتها
وبقيت الكتب يمها طلعت للكراج اتصل علي الآكبر يسألني
اذا انــور يتعارك لو يضرب شوية وراح طلعت مسلسل
شفتها ونمت بنفس غرفة حُــرة وجهه الفجر حسيتها
كعدت تقرا وترتب بالدفاتر بقيت نايمة للظهر شفتها تبدل
دُر : وين رايحة ؟
حُــرة : للمدرسة جهزت اكل اذا تجوعين اكلي .
من طلعت رحت وياها تعجبت من شفت انــور ينتظرها
هو اخذها رجعت وحدي بالبيت راسلت علي الآكبر
وساعدت ميمي للظهر رجعت حُــرة وراها بدقايق
وصلت اخشاب غرفتها الجديدة انــور استلمها
ودخلهم يشدوها بالطابق الثاني ، بس طلعوا نقلت
حُــرة اغراضها وملابسها فوك كلهن رتبتهم
ساعدتها تأخرنا الى ان خلصت سبحت وميمي
ادك الباب عليَّ : ماما بابا يجي هنا .
طلعت انشف بشعري عادت كلامها رحت على استقبال
سديت الباب من شفت علي الآكبر حضني يشم بعطري
ويبوس بشفايفي بلهفة گعدني على رجله وراسه برگبتي
_ شلونچ بوية دُر .
_ زينة اليوم الصبح راسلتك ماكو .
_ من راسلتيني عرفت تريدين تشوفيني واجيت .
حضنته لدقايق وسولفت يومي بالتفصيل گعد
_ لازم اروح .
_ شبيك .
_ مابيه .
_ احسك زعلان مني ؟
_ لا بالعكس .
_ والله زعلان حتى ماتحجي كلام حلو .
_ بس بيتنا احجي كلام حلو ما اريد تتعودين على غيابي .
_ رحت برضاتك .
_ صح برضاتي بس من تريدين تسمعين كلام حلو ترجعيلي .
بقيت اعدل بلحيته نهض وگعدني بمكانه وراح عنده شغل
لا تحركت ولا طلعت وراه بقيت بنفس مكاني وحرة ادور
عليَّ اجت يمي تحجي على مدرستها ودراستها رحت
وياها اكلنا وانور ولا ينزل ولا نشوفه يوم والثاني والثالث
نفس الروتين باليوم الرابع بدلت حُــرة وراحت للمدرسة
انــور وصلها ، رجعت للبيت واسمع الباب الخارجي يدك
طلعت صحت بصوت عالي
_ منووو ؟
_ انا خالة دُر انا ام رنيم .
رحت فتحت الباب دخلت بوستني وفاتت للبيت
بدون حتى ما اگول تفضلي گعدت بالاستقبال
صحت على ميمي تقدم الضيافة وهيَّ تتفحص بالبيت
_ هذا بيت ريــان ؟
_ اي خالة بيت ريــان .
_ زين ليش كلكم وياه يعني اقصد بيت
ابوكم ليش ماتروحون هناك ؟
_ ريــان يرتاح هنا اكثر وباقين كلنا وياه ليش السؤال ؟
_ لالا ماكو شي بس هيج سألت ، اي شنو جهزتوا للعرسان .
_ ليش راجعين .
_ يا اي اليوم راجعين على وصول كلهم ماتدرين .
_ لا والله ما ندري كلنا .
_ چا هسة يرجعون تعبانين وجوعانين شلون يظلون بلا اكل .
رجع انــور طلعت بلغته بريان وقبل لا يصعد جاوبتي
_ هسة نطلب من مطعم مايحتاج تطبخون .
هو صعد واني رجعت يمها لگيتها لازمة الكوشة تتفحص بيها
ما ادري شسوي من شافتني ذبتها
ام رنيم : ها بشري .
دُر : انــور طاب من برا دقايق ويوصل .
راحت تفتر بالبيت حسيت بيها ادور بعيونها
على حُــرة بس غلست عنها من صعدت نص الدرج
سألتني ؛ بنت عمكم وين ؟
_ بالمدرسة .
_ وين تنام .
_ بغرفتها هاي الثانية .
صعدت تريد تدخل غرفتها بس الحمدلله مقفولة
خلتني افتر وراها عبالك مخبلة اريدها تثبت بمكان
ولا عبالك يمها احد وعيب ، نزل انــور من شافها
بالمطبخ راح أستلم الاكل ودخلهم على ميز الذعام ورجع فوك
رتبت المطبخ والأكل على ميز الطعام وسمعت الباب
وتلفون ام رنيم رن جاوبت واخذت جيس جكليت وطلعت تركض
اجه انــور طلعنا بالباب كلنا فتحنا ونزل ريــان وراح على
جهة رنيم فتح بابها ونزلها وام رنيم هلهلت بعلو صوتها
وشمرت جكليت عليهم سلم ريــان عليها ورنيم باست امها ودخلوا
من شافني اجه حضني وباس راسي
ريــان : شلونچ دُر .
دُز : من شفتك فرحان صرت زينة الف
مبروك تستاهل كُل خير .
ريــان : حبيبتي .
تقدم انــور سلم ودخلنا راحوا اثنينهم يبدلون
واني وميمي بالمطبخ اجهز الصحون
دخل ريــان علينة ابتسمت بوجهه ورجعت اشتغل
ريــان : احممم دُر .
_ ها عيوني .
_ حُــرة بالدوام ؟
_ اي راح انــور يجيبها .
_ تمام .
فاتت رنيم هي وامها يمي وريان طلع للكراج بقيت أراقبه
من سمع صوت سيارة انــور وگف وره الحايط ونزل نفسه
حتى ما ينشاف عرفته يريد يفرزها بس فاتت اشرت الها
من بعيد هو يري يكمز وشمرت الجنطه على وجهه
وضحكت بصوت رنان بحيث ضحكتها فضيحة
فزت رنيم موسعه عيونها بصدمة تشوف شنو هل ضحك
وريان يضحك وشال جنطتها بدون شعور وانور يرزل بيها
ريــان : شلون عرفتي شيطانة .
حُــرة : يمههههه صدمتك تموووت هههههههه .
مشت وهو وراها التفتت وهي تكمز
حُــرة : امتحنت اليوم احزر شكد اخذت ؟
_ 100
حُــرة : شنو هكر .
_ هههههههه لعد ؟
_ 50 اشك بالخمسين المعلمة دافعتني بيها بدرجة
اني استحقاقي 49 والله بس انقهرت عليَّ .
_ طيح الله حظ عقلچ .
_ الف مرة ههههههههه .
دخلوا يضحكون ريان ناسي وحرة ماتعرف شنو ينتظرها
بقت ثابته بمكانها من شافت نظرات رنيم عليهم
وخرزاتها بلعت ريگ وضحكت وياها
حُــرة : هلا عروستنا الحلوة الف مبروك يعمرررري .
راحت تريد تبوسها فشلتها ودفعتها من كتفها وراحت
للغرفة اباوع على امها تخوزر بحرة والبنية خجلت وبهتت
فرت ايدها وراحت بغرفة بنتها
حُــرة : دُر اني شسويت ؟
حضنتها وبست خدها
دُر : كُلشي ما سويتي والله بس بعدها عروس وتتحسس .
طبطب ريــان على كتفها التفتت اله وعيونها تلمع
ريــان : روحي بدلي حتى ناكل .
حُــرة : لالا اني اكلت بالدوام اريد انام .
ريــان : تصعدين تبدلين وتنزلين لا تخليني .
دُر : اني اروح وياها بس انت روح راضي رنيم .
اخذت حُــرة بدلت وحاولت اخليها تنسى الصار
ادري بيها من النوع ما تحقد بسرعة تنسى
على نياتها كل تصرفاتها طفولية بدون تخطيط
نزلنا لگيت رنيم تصب ساعدتها وحرة راحت تغسل
گعدنا على ميز الطعام وحتى انــور موجود
بس اجت حُــرة گعدت يمي وكفت رنيم تريد تروح
سحبها ريــان من ايدها بقوة رجعها بمكانها بدون
ما يرفع راسه ويشوفها بقت نظراتها ثابته على ريــان
انــور بغير عالم مكتفي بالسكوت وياكل بهدوء
شال ريــان اكل بماعون رنيم وهمس
_ اكلي .
امها بس تشاهد وتخوزر تجاهلتهن حُــرة ولا عبالك موجودات
وتصرفات على طبيعتها هي تحب تحجّي اندمجت
اسولف وياها على دوامها ودراستها وريان بلا سيطرة يركز
ريــان : ما شفتي ابو خط زين ؟
حُــرة : انــور خوش خط يروح سايلنت ويرجع سايلنت .
انــور : عندي شغل اني ديررررررر بالك تكلفني بهذا الموضوع .
حُــرة : هاي لو ذولاك الناس جان رحت تركض ركض
ابو المراسلات اطلعي اشوفچ موووو ؟
ريــان : ها شصاير مبين لازمة عليك لزمه .
انــور : ختولي هل مخبلة.
ريــان : انت مخبل .
حُــرة : اي والله .
دُر : احمم حُــرة الله لا يجذبني رنيم وامها راح
يهجمون ميز الطعام على راسنا .
التفتت شافتهن تحمحمت ودفعت الكرسي
_ الحمدلله .
دُر : ما اكلتي شي .
حُــرة : راح انام من اكعد اكل الجدورة كلها لا تخافين .
صعدت واني غسلت كلهم خلصوا راحوا للاستقبال
بس رنيم وجهه ما يتفسر بعد دخلت ميمي الجاي
وزعت علينة طلع ريــان شوية ورجع صاح
_ دخلوا جوة .
انــور : شكو ؟
_ علي الآكبر اجه .
راحت رنيم وامها بقت ما تحركت من مكانها
دخل على الآكبر سلم وظل گاعد وام رنيم
تتشكر منه وتحمد بي يعني تعرفه
دُر : شوكت عرفتها ؟
ام رنيم : من اخذوها الرنيم وريان دخل سجن
وابوها مات رحت على ابوج ابجي وعلي الآكبر
جان السايق عنده من رجعوا ابوج عافني وفات والله
يرضى على علي الاكبر انقهر على حالي وشربني ماي
غسلت وجهي وشكيت حالي وهوه حلف يتكفل بالموضوع
ومن يومها عاند وطلع ريــان من السجن وصار ثاري
نفسه ثار علي الآكبر حارب أبوكم وتعاون هو وريان
ومن يومها ما عافوني وحدي بكلشي ايدهم بيدي فدوة اروح الهم .
علي الآكبر: تدللين يمه بالخدمة اي شي تحتاجين انا ابنچ .
_ واعز والله يا يمه ما انسى معروفك طول عمري .
بارك الهم علي الآكبر واشر بعيونه
_ يلة دُر نروح .
ريــان : عوفها اليوم .
_ ليش انت تتزوج احنا نتورط .
صعدت بدلت وسلمت على حُــرة وحلفتها تتجاهل رنيم
ونزلت طلعنا وريان يشكرني وانور مبتعد بس يشاهد
رجعنا للبيت من الباب وشاف شيوخ عدهم
_ مبين ابوية عنده خطار .
_ اي واضح .
رحت على مطبخ سلمت على عمتي وكل البنات موجودات
بس ميثاق من شافتني صعدت فوك ومبين عليهه قلقانه
عفتهم ورحت البيتي دخلت من الممر وطلعت المفاتيح
فتحت الباب ودخلت اول ما داست رجلي حسيت شي
نمرد جوة رجلي نزلت راسي واشوف بزون لون اسود
بدون راس وذيل ودجاجة لون اسود بلا راس
وحمامة لون ابيض بطنها مفتوحة ودست على اعضائها
وجلد حية مصلوخ ملفوفات بي وحدة مربوطة بالثانية
كفختني ريحتهن صرخت بعلووو صووووتي صراخ
مجانين من هول المنظر جسمي يرعش ورجلي
كلها دم بلا وعي اضرب برجلي بالحايط واملخ بروحي من الوجع .
يتبع ...
ثقل ميزانك بذكر اللّٰـه:
- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد ..