_____________________ الــريـاش
﷽
𓆩 اســاور حــسين 𓆪
بقلمي رواية : الــرياش
نظرة عينك قادرة ع اسقاط جميع دفاعاتي.
لطفا لا تنسون التصويت والتفاعل بين الفقرات
⊰ دُر ⊱
انــور : علي الآكبر البنية وين اختفت ...
بعدنا بعز الصدمة وتلفون علي الآكبر رن
_ ها ريــان اي وصل انــور ، شنوو منو خابرك
ياسين شوكت طلع يمعود ، وابوك وين يدري ، شلون اخذوها
يعني شنو هيَّ راحت اكووو واحد يروح للموت برجله .
نسد الخط من علي الآكبر دفع باب البيت وهو يصيح
_ انووور لا تروح دقيقة وراجع هذا ريــان
راح الياسين برجله .
يريد يصعد انــور استوقفته اتوسل بي رهبة صارت بنص روحي
_ لا ترررروح انتظررر فدوة انتظر .
_ ريــان راحلهم وطلع ياسين وراها تهديدات صار اسبوع توصل .
ابو حسن : انتظر ابني لا تتهور خلي يجي اخيك وياك
جــود انت هم فوت لعلي الآكبر جهز نفسك وروح وياهم .
هز راسه جــود ودخلوا وسيف الدين ركض وراهم
دقايق بس دقايق وطلع علي الآكبر لابس اسود بـ اسود ولثام بيده
طبطب عمي على ظهرهم وكلهم صعدوا سيارة انــور .
اخذتني شهد فوتتني للگراج وعمتي اجت تغسل بوجهي
ام حسن : شني بيت الرياش ما ناوين يملون خبلوا ولدهم
هل بنية راح تموت بس من الخوف والمصايب كل يوم والثاني .
ابو حسن : الظاهر ياسين واخوانه الشر تارس راسهم الله يعين اولادهم .
حُــرة ...
بعد ايام ضغط وتهديد يوم بعد يوم من كُل جهه ومن كُل صوب
اسمع كلام رنيم ، وفاء ، رسائل ، صور ، نشر ضغط ضغط صار
نظرة ريــان ، وبعده عني بكُل صورة تطلع وتنشر احس استحقرني
كرهت روحي وصار وقت تنكشف كل الأوراق مليت لهنا .
دخلت بيت اهلي بكامل قواي العقلية ، ادري الرياش نهج موت
نهج عداوة ، نهج قتل وكره وحقد وتجبر وغطرسة
صار لازم يصير الرياش نهج حقيقة ، كعدت بالاستقبال
اشوف صورة ابوية ادري الرجال واكف برا نبهه بوجودي
بس يحب يلعب بـ اعصابي يمكن يظن اني بعدني مثل فبل انفعل
بتهديداته ، انتظرته ورحت للمطبخ اخذت ماي شربت وعصير
البيت فارغ حتى من اتنفس اسمع انفاسي ، رجعت الاستقبال
اول ما خطت رجلي ودخلت شفت ابوية بنفس التكبر والتعجرف
متوسط الاستقبال وگاعد على اكبر تخم موجود بارز نفسه بدلته
الرسمية وعيونه الحادة مليانة شر وتباهي
_ اجيت بنفسي .
_ للاندثار.
گعدت مقابيله اتكتم على رهبتي من صوته ونظراته
حجبت عيوني ما ارفعها اريد بعد قلدت گعدته وضحكت
_ يگولون بنت ياسين قوية انت شنو تشوف يا بابا .
_ ذكية ، فهيمه گدرتي تضحكين على عقل ريــان الفطن .
_ ما ضحكت والدليل اني لليوم مرته على ورق وبس .
نزلت امي انذهلت من وجودي بيتهم
_ قاتلة اخوچ مات بعز شبابه وتفوتين بدون خوف تجين هنا .
_ يمه انتوا موتوني وموتوا اخوية زرعتوا الكره بگلبي وگلب اخواني .
اعتاب ، لوم ، وحقد ، ولين ، وتهديد ، انضربت منها من عاتبها
مرضي تمرضت من ضرب ابوية عادي عدهاااا ؟
درت اشوف ابوية صرخت متحيرة من سكوته
_ ما تنقهر انشليت من ضربك اني بشنو أذنبت
شنو غلطي واجهني حاجيني ، مو بيدك زوجتني ابن اخووووك ؟
رفض رفض قطعي يجاوب بالأصل ما مهتم لا لكلامي ولا لوجودي
براسه غاية ويريد يوصلها ، وكشفتها بلحظة ما تعالت الأصوات
برا وتجلجل الباب بصخب ، دخل ريــان هائج توجهه على ابوية
لزمه من سترته ويهز بي بكُل ما عنده من قوة
ريــان : شووووكت اخلص منك من اموووووتك فهمني انت شنو غايتك .
ياسين : انت تعرفنا كلنا من نحقد على بشر أدمره دمار شامل
وانت بـ افعالك واغلاطك وبكل مرة ادخل سجن من راسك
تخليني ازيد بحقدي وكررررهي عليك طلگ بنتي لك فاشل .
اضطربت تحركات وافعال ريــان وهو يرد على ابوية
_ مووو لعبة بيدك اني شوكت مايعجبك تزوجني بنتك
ومن يجي بعقلك ننفصل اني اجي انفصل منهاااا .
ياسين : متمسك بيها .
_ وليش ما اتمسك بيها مرتي وبيني وبينها كل خير انت بس اطلع منها .
_ عناد بيك ما اخليها الك .
ريــان : وعناد بيك ما اعووووفهاااااا حرررررة تخصني .
دفع ابوية ريان واني بس اشاهد طلع من جيب البنطلون
صور واوراق اثنين فرشهن على ميز متوسط المكان
من شفت الصور رفعت عيوني اشوف رد فعل ريــان
يضربني ، واحتمال جبير يعوفني ويطلع ، ويمكن يموتني
بس دائماً ريــان يكون نهج مُغاير عن باقي افراد الرياش
ريــان : الصور شايفهن ، وماضي حُــرة مايهمني
المهم عندي هسة اني احبهااااااا ، واريدهااااااا
لو مو هل صور لو اشوف خلاعي ميهمني يا عمي مايهمني .
رفع ابوية صورة مصعوق من رد فعل ريــان ما قابل يريده
يضربني لو يأذيني راح يمووووتني بتصرفاته معقولة ما ينقهر عليَّ
ياسين : زانية ؟
ريــان : انت الظاهر ماتفهم بالكلام ، بس حسب علمي تعرف
ويامن تحچي يعني اكيد تعرفني مو غبي وما اخلي زوجتي
ويايَّ بنفس البيت وعلى ذمتي بدون ما اسأل واكشف تاريخها
من الطفولة لهذا يومك ويوووومهاااا .
گعدت ريــان صرخ بيَّ
_ لاااا تگعدين طالعين احنا طالعين من هل قذارة .
ياسين : عوفها برضاتك لا تخليني اقيم القيامة عليكم .
ريــان : ياسين نصيحة من ابن اخ تكفاني تفاداني
ورايَّ زلم يزلزلون ارضك ، ويهدمون حيلك واملاكك
بظهري اسود ياكلون حتى عظامك ويمحون اثرك
عندي سباع تخليك تلاوي خيالك من خوفك وندمك .
لزمني من ايدي سحبني نريد نطلع واخواني اثنين صاروا بوجهنا
_ ليش عبالك من تفوت للنار انت وهل زانية تطلع منها سالم .
ريــان : بعدني بحافتها واگدر اخذ بيدك واشمر راسك وراس
اخوك وابوك وكل من يطلع وراك بنص هل نار واطلع منها
اني وهااااي اختك عرضك شرفك وتاج راسك وراس كل رياش
منها مرفوعين الراس خدش مابينا .
ياسين : شوفوا شغلكم بيهم ولدي .
ريــان : الظاهر ياسين ما تريد ترسي على بر
وحالف على خراب واني احب اكسر سفينة مرساكم
هو باقي عندك هل كم ولد اخليهم ينامون بصف اخوهم احسن الك ؟
بعدهم واحد يهدد بالثاني وفات انــور لزم واحد من اخواني شمره
وفات على ابوية فلش الطبلة الگزاز وكزازها تناثر مثل
ملامحهم المرعوبة ، رفع اصبعه بتحذير بوجهه وبصوت خشن حاد صاح
_ ياسين لأخر مرة ادخل بيتك وأحذرك واني تربيتي
على ايدكم يعني اسحگ ، واسلب ، اخطف ، واصلخ ، واذبح
بگلب ميت لا انقهر ولا التفت مقهور افتخر بموتكم خلصوا من شري .
ياسين : شوف الصور واحجي ضميرك مو حقي اريد اموتها
شوف الصور الس اوك شافهن وراضي عليهن قابل اخوك بهل زنه .
انــور : هاي بنتك وهاي نسلك انت قذر شنووو يطلع منك غير قذارة .
ريــان : انوووووووور ايااااااك لك ديررر بالك تعيدهاااااا .
انــور : شووووف صورهااا ولك شوفهاااا .
لزمت ايد ريــان بكُل قوتي اخذ قوتي من قوته
وخايفة من كلامي لازم احجيها ميصير اطلع منا بدون ما احجي كلشي بكلبي
حُــرة : صور بيني وبين زوجي ، وانت عقدت النا صح لو غلطت
بيوم طلعت شاردة منك من شربتني ورحت عنده دخيلة
ما قبل تصير كلمة مو حلوة عليَّ مصطفى خاطر بحياته
ولم كل العگل بعشيرته واجه يمك هما بيتك طلبني وبلغك اني
عدهم بالحفظ والصون وبيومها هو وكُل اخوانه ما عتبوا عتبة الباب
يخافون احصل كلمة مو حلوة ، واذا طلبتوهم حلف يمين اني شريفة
ومحد داخل وكاشف عليَّ يحلفون ما يترددون ، وهذا الصار .
يريد يهجم يضربني وريان خلاني بظهره ما احس غير
بضربة صارت بين راسي وبين رگبتي اختل توازني وگعت ابجي
بدون صوووت ، بس جبرت روحي بدوختي وضعفي وقلة حيلتي اكمل
حُــرة : صح انجبرت توافق بس لى مصطفى بس احيت
وانت عقدت اليه بموافقتك .
ياسين : باطل جبرررروني كل عمامه جبروني .
حُــرة : المهم عقدت وانت بقيت تماطل بزواجنا
صح جنت اطلع وياه بس حافظ عليه وحبني بدون شروط
مو مثلكم جان نهج مغاير عنكم كلكم .
انــور : والصور هاي شنووو ؟
حُــرة : جنت التقي بي صح وكم مرة
سكتت انهضمت نظرت لريان مايريد يسمع
قللت صوتي وحجيت بس هو اريد يسمعني استحي منهم
_ ردنا نتمم زواجنا وبكل مرة يسون ملعوب شكل وياخذون صور
وبأخر ملعوب موتوا مصطفى مات بين ايدي والله هو ابوية موووته .
ياسين : زواجج باطل هاي جذابة ممثلة لا تصدك بيها .
حُــرة : زواجي مو باطل اقسم بكل حرف بكلام الله
حقيقي وبوجودهم ابوية واخواني وعمران الحقير .
ضحك يشككهم بكلامي بس يريدهم يكذبوني
ياسين : بشري بشررري زوجج تممتي زواجج منَّ
ولو هل خرررروف مركب گرون مايهتم متممة لو لا جلب كلشي يسحگ .
دفرةانور على رجله وصرخ بينا نطلع ، اخذني ريــان طلعتي
يسحل بيَّ ، بمجرد ما صعدنا بالسيارة شفت ثلاثة ملثمين
بيدهم شيش مولوتوف شمروهن على بيت اهلي زلزلوا المنطقة بصوتهن .
من اقتربنا رفع ريــان ايده الهم وحرك السيارة مبتعد عن المنطقة
كلها ، وانور بسيارته ورانا يمشي وصل قبلنا ، فتح بابي لزمت
ايد ريــان صحت بفزع
_ ريــان صيححح بـ انووووور .
انــور : امشي انزلي امشي .
من شفت ريــان نزل وهوَّ كتله من الثلج بارد لأبعد الحدود
اضطريت انزل بمجرد ما عتبت رجلي الباب ركضت صعدت فوك
قفلت غرفتي وگعدت اتنفس بتعب ، سمعت صوت انــور يعارك ريــان
ورنيم تسب بيَّ وفاء تغلط عليهم لان دخلوا علي الآكبر وأخوانه
سديت اذني والافكار كالكابوس داهمت عقلي ، حقيقة ، واقع
اثنينهم ما أتقبلهم لا الماضي ولا المستقبل مليت واني ارفضهن .
بقيت بغرفتي اليوم كُله ما طلعت ولا شفت احد والبيت
صار بيت اموات ساكن لا صوت ولا حركة ، واليوم يتبعه
يوم بعد يوم ، طگت روحي وحدي كله وحدي بهل غرفة
گعدت من الصبح بعد ايام من الكسل والعزلة فتحت شبابيك
غرفتي وبابها غيرت فرشها كلها وغسلتها عطرتها خليت العطر يهفي
واخذت كلشي نزلته صفية تغسل ، اخذتهن مني واني فتت على مطبخ
قررت اجهز غداهم بيدي ، گعدت من العشرة الصبح للساعة 3 الظهر
اطبخ بدون ملل المقبلات والتمن بريان وفخذ خروف
كملت كلشي نقلته على ميز الطعام بوقت رجعتهم على بيت
من سمعت السيارات ركضت للمطبخ حتى ما يشوفوني
وتجيهم لحظة عناد وكبرياء ، بس بقيت أراقبهم من شافوا السفرة
واحد صفن بوجهه الثاني ، متأكدة عرفوني اني طبخت لان صفية
من المستحيلات تطبخ هيج طبخ ، غسلوا واول ما گعدوا يوسف اجه وياهم
وخربتها الخايسة رنيم من اجت مطورين صايرة تگعد ما تتعارك
بعدهم يگولون بسم الله واحترك كلبي ولا واحد سأل عني
اخذت صحن المقبلات اريد ادخل عليهم وانور سأل ريــان
_ مرتك الثانية عايشة على ضوء .
_ صعدت بابها مفتوح وماكو ، أكيد واكفه بالمطبخ تتسمع وتشاهد .
تحمحمت وشمرت شعري ودخلت عليهم بالماعون من
شفت نظراتهم ودعت العافية ابتسمت بتصنع هيج
لو بيدي ابجي منهم ومن عيونهم
حُــرة : هلو .
حجيتها وگعدت بكل شجاعة وقوة هيج شامخة ورافعه الراس
اشرت على اكل لان كلها وكفت ما تاكل صافنين بيَّ خطية
يمكن مشتاقين يشوفون وجهي الحلو
حُــرة : يلة گولوا بسم الله واكلوا عيوني ادري مشتاقون .
لزمني انــور من التيشيرت ورفعني
_ تاكلين وانتِ ساكته وهذا لسانچ يگصر اريد حرف ما اسمع .
رفعت ايدي اشر اله اعصابك وجاوبته بكُل لطف
_ اوكي ريلاكس عيوني ريلاكس اگعد اكُل من اكلي اگعد .
عافني وگعد اول ما اكل ابتسمت وسألته
_ رأيك الصريح مو عالمي طبخي ؟
_ طبخ صفية اطيب منه .
باوعت صفح واكلت بدون ما احجي بعد وارفع راسي
حسيت بروحي انقهرت من شفت ريــان متجاهل تواجدي وياهم
وقبل الكل هوَّ خلص وصعد بوجهه فوك ، عفت كلشي وخدرت
جاي اخذت گلاص مليان بصينية صغيرة من شافتني رنيم احتقنت
تريد تهجم وانور عاط بيها
_ حركك منچ واگول السفرة اخليها براسچ .
واني على درج دزيت بوسة طايرة لنونو
ابن العم الورد ضد الحرارة والبرد .
وصلت قريب من الباب خليت الجاي على ميز عدلت روحي وارتب
بملابسي ، غميت الباب غمه وراها غمّه اريد ادفر الباب وصاحبه
بس اخاف يطلعني سحل ، اخذت الصينية وبلا احم ودستور فتحت
المهجوم فارغ المكان يا وين راح دخلت بيها خليت الجاي على ميز
ورحت اشوف اغراضه موجودات والسترة على سرير
استداريت اريد اطلع واشوفه صار مقابيلي مكتف ايده ورافع حاجبه
_ هاي انت هنا .
هز راسه بـ اي
_ صار شكد هنا .
_ من عدلتي هل شعر الخايس والملابس الطافرة وشبعتي الباب غم .
ابتسمت وين انطي وجهي ، وتقربت اضيع الموضوع
رفعت روحي على اطراف اصابيعي ونزلت راسي وصحت
_ شعري مو خايس شم شم عطره غيرر يذبح من النظافة
والعطر الطيب الفواح هاي مرتك خايسة عبالك كل النسوان مثلها .
رفعني من ملابسي وخلاني على صفحة دخل للغرفة اخذت الجاي
ورفع ايده يأشر اطلع وراح على لابتوب يشتغل
بعدني بمكاني ودخلت رنيم بدون مايرفع راسه وجهه الكلام الها
_ رنيم فوتي وسدي الباب وراچ .
دارت وجهه بضحكة شماته ضحكتها بوجهي ودفعتني
رنيم : يلة بدون مطرود مايريد يشوف وجهچ ولا يسمع صوتچ
بنت ياسين العرمة ام الصور الخلاعي .
بعدها تريد تحجي وضربتها براشدي رن بالغرفة كلها
سحلت شعرها وعطت بوجهه
_ عيديهااا وتجاوزي واخليچ تعرفين ان الخلاعي شنو تگدر تسوووي .
ريــان : شنوووووو تسوين ؟
_ اهججك من البيت انت وياهااااا ، لازم راضي على كلام الخايسة مالتك .
ريــان : اطلعي ارجعي للغرفة مالتچ واقفليها عليچ .
_ ممنوع تتأمر والغرفة من حجيت هيج بعد ما افوتها
وراح اظل احوم وافتر براحتي وبمزاجي واشوف واحد بيكم يحجي .
كملت كلامي وطلعت وبيدي طبگت الباب عليهم
اريد املخهم اكل واشرب من لحمهم الحيووووانات
هو وهل خايسة متراهمين ، واني انزل ادردم واسمع
انــور يحجي ويتعارك بالتلفون
_ شهد ليش تخليني اتخبل واتهور وافوت على بيتكم
احترمي روحچ ومن باجر اشوفچ بالدوام لا .
من شافني سكت اشرت اله بيدي يكمل واجيت قريب منه
خليت ايدي على خدي انتظر اسمع وهو صفن بوجهي
_ راح تبقين هنا .
_ كمل عبالك ماكو كمل ، شبيها وياك شهد .
سحبت التلفون من ايده وصرخت بيها
_ شبيچ وياه ام عطوب تقهرين ابن عمي تريدين يموت موو ؟
شهد : شوف هاي الثانية اجت الهوسة .
_ لچ اذا ما داومين باجر اجي على اهلچ اگول الهم شهد
تخابر ابن عمي وتشلع بگلب گلبه واخلي السحل مالتج من كل مكان.
اني احجي وهذا رافع حاجبه وبعده مسوي الحركة من جان لازم
التلفون واخذته عود مصدوم هذا هم خايس شمه
ذبيت التلفون من وگف غطاني سدني سد شمرت التلفون
اريد اخلي على ميز وگع بالگاع على مرمر صار كسر
بالشاشة كُلها من الطول للطول ، اريد احجي ما اكدر وهو متحضر
للهجمة طفرت من بين ايده وطگيتها بركضة فوك وهو يصعد
سريع مثلي يريد يلزمني .
شهد ...
سديت الخط من عنده وطلعت من الحمام والتلفون بصدري
اخاف امي تشوفه وتسويلي مصيبة مو بس مشكلة
دخلت للغرفة فلك كاعدة تدرس ، من شافتني سألتني مترددة
_ شهد شوكت يرجعون كلهم .
_ ساعة بالكثير ان شاء الله كلشي يصير مثل مايريد سراچ الدين .
_ يمكن من زوجته تدري تسوي مشكلة .
_ الله اعلم .
_ شعجب علي الآكبر ودُر راحوا وياهم همَّ مو متعاركين ؟
رفعت اكتافي بمعنى ما ادري واشرت الها على كتاب حتى تكمل
وتبطل اسأله لان راح اخربط ملامحها من اسألتها الي ماتخلص
عبالك طفل وتستكشف الدنيا بعدها كل خمس دقايق عدها سؤال .
اخذت جهاز الضغط شفت هبوطي صاير زين
انفتح الباب فاتت امي ماقبلت تروح وياهم
لان اني ماقبلت اروح عبالها متعمدة بس اني
الهبوط بهل فترة دمرني دمار اوكف وادوخ واگعد
_ تعالي ساعدني بالأكل راح يوصلون وبعدني .
رحت وياها على اعصابي فلك كل عادة تبرز روحها
قبلي وقبل الكل عدها سباق وترتب وتنظف وتطبخ
تفرنا فر تربات عرب بعد ، گعدت على كرسي اشوف
ستوري دُر ناشرته قبل عشرين دقيقة تصور الشارع
بس تصويرها يجنن وجود طالع بالتصوير يرگص
شافت اني الفديو وكل عادة ماتقبل على نشر
تكره هل فقرة من ننشر اي شي يخصنا بس دُر
هوايتها تصور وتنشر وامي كل ماتحجي هي وعلي الاكبر
بهل موضوع مايقبل تكمله ويغلس مرات من يسمع حتى مايجاوب .
دخلوا كلهم بفرد دقيقة صار هجوم ، امي تسأل وتستفسر
ودُر صافنه عقلها يجمع مدري يرست مافهمت موضوعها
رحت يمها قريب سألتني شلون صرت واني سألتها على حالها
دُر : اسمعيهم وتعرفين .
ابو حسن : وطلعت البنية نفسها صديقة دُر بـ ايام المرحلة الأولى
قبل لا تتزوج من علي الآكبر، بنية مؤدبة وخلوقة ومثلنا مثل نمطنا .
ام حسن : منو صديقتها ؟
سراج الدين : نرجس .
يا هل صدفة والصدمة ، بس السؤال الي حيّرنا طرحته دُر
_ هناك ما گدرت احجي ، شلون تعرفت عليها .
سراج الدين : اجت فترة من سافرتي واخبارچ واخبار اخوانچ
احنا ما نعرفها والبنية عجبني بيها اهتمامها وطيبة گلبها
تجي كل يومين او كل اسبوع تسألني عليچ ، الى ان اخوها مل
وماقبل بعد يجيبها ، فـ اخر مرة اجت اخذت رقمها والله شاهد
ماجنت مفكر بيها ولا بذرة ، صرت اخابرها بين فترة وفترة تعرف
اخبارچ قبل لا ترجعون ابوها مات الله يرحمة والبنية اعتكفت على روحها
هنا لا ارادياً صرت اسأل عنها ومرات اطول وياها بالمكالمة
تحجيلي عن ابوها واهلها والصار بيهم من بعده ويوم بعد يوم
الصراحة تعلقت بيها وانتوا شفتوها البنية تنحب .
دُر : للأمانة نرجس صدك وردة نرجس ماشفت منها اله كُل خير
واني من راح تلفوني رقمها ضاع مني ، ومن داومت سألت عنها
ماكو هوووواي سألت عنها وحتى علي الآكبر شاهد بس ضاعت اخبارها
طلع ابوها ميت خطية وشايلين البيت ثاني وانقهرت من عرفت
تركت الجامعة بسبب حالتهم المادية .
ام حسن : ابو حسن ما حجيت شنو رأيك ليش ساكت .
هز راسه عمي ما مقتنع ورجع وجهه سؤاله السراج الدين
_ بوية سراچ الدين انت مقتنع البنية اصغر منك بهووواي
_ بوية انا وياك ، صحيح انا اكبر منها بس متفاهمين
وهي البنية من ناحية الالتزام بالدين مثل ما احب
مو متطلبه، خلوقة وتصوم وتصلي وتحبني وانا رايدها .
علي الآكبر: احنا طلبناها ما كسرنا بخاطرك تظل الموافقة
بعد بيد اهلها كلشي حجينا، على رجعت زوجتك وجهالك
وفرق العمر بينكم وهمَّ قرارهم بعد بيدهم .
حسن : الله يكتب الي بي خير الك واذا زواجك منها
بي سعادة واستقرار من بعد تعب وهم وغم والصار وياك
مو قليل الله يعوضك بيها ، وهي البنية هم مكسورة الله يعوضها بيك .
مدت امي السفرة من الطول للطول وكل نسوان اخواني واخواتي
ساعدونا بالمطبخ وترتيب السفرة ، اجتمعنا على سفرة وحدة
جــود گاعد بصف دُر ما ادري شنو يحجي ويضحكها
وهو متقصد يغيض بعلي الآكبر لان دُر لليوم ماتقبل تصالح علي الآكبر
وهو مستمر يخرب ليش لان علي الآكبر جبره هو يجهز طلبيات العالم
وتعبه ومن يومها حقد عليَّ واستغل دُر وسيلة .
كملوا كلهم خليت الكل يشرب چاي واني ودُر بالمطبخ نتعاون
على مواعين صايرات مواعين عشيرة ، ساعة نغسل
وفاتت فلك فرتنا فر بدقيقتين لا كاونتر يلمع صار والطباخ گزاز
خليت دُر تروح للشقة وبقيت استعد بيها مو هيَّ تساعدني
بس صار اليل نمت من وكت لان باجر ضروري اداوم
من الصبح كعدت بدلت وروحي بخشمي صايرة
وصلني علي الآكبر بطريقة هوَّ ودُر ، نزلت سلمت على
مديرة لا ترزلني بديت من اول درس اخذهم واعوض ايام الغياب
والطلاب يتجاوبون ويايَّ ، نص الدرس وفات انــور گعد
بالرحلة الأخيرة تصرفاته موتتني ، تجاهلته ولا عبالك موجود
وكملت شرحي على اتم وجهه وبأخر خمس دقايق صحت بيهم
طلعوا اوراق امتحان امتحنتهم بالدرس على سريع واي واحد
اخذ درجة قليلة رجعت اشرح اله الموضوع وافتر عليهم واحد واحد .
بس رن الجرس طلعوا كلهم للساحة بديت اسجل درجاتهم
واشوف منو تحسن مستوى ومنو يحتاج دروس اضافية
حتى يضبط المادة اكثر ويتقنها ، بنص هوستي مرتبكة
من وجودة ونظراته الي تلمع من تنظر اليه
انــور : تبقين على هذا التجاهل .
شهد : نعم استاذ .
انــور : بيچ مرض التجاهل انتِ ؟
شهد : محتاج شي استاذ .
انــور : احتاجچ شهدي .
لملمت كلشي وطلعت من الصف ما اريد اضعف وتجاوب وياه
دخلت للمديرة سلمت وقعت على كم ورقة ، وبديت احجي الها
النواقص وشنو نحتاج حتى توفرها بنفسها لان مدرسة اهلية
مو حكومي ونعتمد عليهم يذلون المعلم والطالبعلى ابسط متطلباتهم
كملت كل ورقة الأشياء الي نحتاجها سلمتي الورقة اول ما طلعت
من عدها خابرت على ابوية
_ كلبي بوية المديرة تريد اطلع اني ومعلمة ويانا معلم وسام
نروح نشرري احتياجات المدرسة .
_ اخلي واحد من اخوانچ وياچ ؟
_ لا يا عيوني مايحتاج مو تدري كلشي قريب من المدرسة .
_ بس اخابرچ كل شوية مو تزعلين مني بوية اخاف عليچ .
_ تلفوني باقي مفتوح حبيبي شوكت ما تريدني تخابرني .
سديت الخط فزيت من شفته صافن اشر على تلفون
_ حبيبي صاير بيها حبيبي منو حبيبچ ؟
_ ابوية امي اخوية انت ؟
_ شهد اني انوررررر وانت تعرفين منوو انــور .
_ منو انــور صانع الهواء والماء والغذاء ؟
حجيتها وعفته ورحت بلغت معلمة ويايَّ وأستاذ وسام
سلمته الورقة ، شغل سيارته واخذنا من نزلنا للمحل
اختارينا الأغراض نريد نصعد وصل انــور ما يحجي
بس نظراته تتوعد بالشر ادري بي شراني
وسام راح قريب منه يحجي يريد يسأله وهو ترك كلشي
وفات جيك ما ناقصنا شي رجع وصعد سيارته وراح
طلعت للبيت ما رجعت للمدرسة من الفرفرة دخت ونمت
گعدت على حلم مو حلو وصوت ميثاق مسموع بكل البيت .
طلعت على عمه وجهي شفتها ملخت روحها تملخ
وتتبحرث بالگاع امي حضنتها تبجي على بجيها
بس على صار بينا من راسها وعذابنا كرهتها وگلبي
حقد عليها ، حالتي وشك اهلي بيَّ بداك الوكت
وعذاب جــود وعلي الاكبر وحالة دُر كفيله تخليني من اشوفها
وحتى لو هي بهاي الكسرة اگول تستاهل اضعاف .
من شافتني اجت لزمتني من ايدي وتصيح من كل گلبها
_ انتِ بنية مثلي وتخافين الله تقبليها.
ردت احجي امي اشرت اليه من وراها اسكت
عفتهم ورجعت للغرفة واسمعها تصرخ
_ والله اروح واعتذر من دُر وشنو يريد ويأمر اني جاهزة
بس لا يكسرني هل كسر لا يخليني الزم روحي وهل جهال
واموت انا وياهم .
فاتت دُر مرعوبة من الصوت من شافت ميثاق تكهربت
تريد ترجع على بيتها تركض راحت ميثاق وكفتها
وعلي الآكبر طلع من ممر البيت سحب دُر منها
_ روحي منا ميثاق لا تكبريها وتصير مشاكل .
_ لو اريد اكبرها اخابر عمامي .
_ ويجون يضربوني مثل المرة القبلها ههههههه غدر يأخذونه
لو صاروا زلم واستفادوا من غلطهم الفات .
امي خابرت على سراج الدين عاف محل الحلاقة مالته
واجه علينا من شافها تريد تحجي رفع ايده وابوية فات وراه
_ هو حل ماعندي غيره ثاني ، ترجعين معززة مكرمة بيت وحدچ
لو تگولين ما احدر وتروحين تشوفين حياتچ بعيد مني .
_ لا تتروج لا تكسرني هيج سراج الدين بيني وبينك عشرة عمر .
_ عشرة عمر من هم ومشاكل ورن كلام باطل .
_ بعد ما احجي وصوتي ما ينسمع بس لا تتروج .
يريد يجاوبها ابوية گلبه طيب ما يتحمل اخذها وفوتها
جوة للبيت وامي تشربها بالماي تنقهر عليها
اله اني والله من اتذكر حالة دُر والدم شلون يجري من راسها
وتخاف ومثل المخبلة تگمز ، وحيرة اخواني ودموع
علي الاكبر احقد اكثر عليها .
بعدها تحجي عي وابوية واسمعها تتوسل
_ اني اعتذر من دُر وكلشي تريدون اسوي غلطت
ليش يهدم بيتنا عمي .
ام حسن : چا انتِ ما انقهرتي من هجمتي بيت اخو يا يمه
ماتقبلين بيتچ ينهجم وهجمتي بيوتنا .
ابوية صاح بـ امي علي الآكبر اخذ دُر وراحوا من يمها
وسراج الدين مايقبل حتى يتناقش بالموضوع قافل
واني عفتهم ورجعت الغرفتي وهي تتوسل ترجع لهذا البيت
ابوية واهلي كلهم رافضيها .
هي راحت وابوية جمع اخواني كلهم بالاستقبال
يريد يشوف حل لحال ميثاق وكل شوية
اسمعه يصرخ بواحد بيهم
_ ليش نصلي ونصوم ونكسر گلب بنت وام احفادي هاي
صح غلطت بس كلبي ما ينطيني انام على مخدة ظالم .
لمهم كلهم وراحوا على بيتهم بس علي الآكبر بدون لف ودوران رفض
ظل بالمطعم وبين البيت وامي تروح تحجي وياه على صار هو بس يستمع .
بقيت اكمل بشغل الثاني يوم رجعت داومت
بس دخلت للساحة صار گدامي يلهث من النظافة ابن الرياش
رحت اريد اشتري اخذت كم شغلة اريد ارجع الغرفة المعلمات
وهو يخابر من وصلت قريب منه سد الخط همست
_ اليوم الصباح مو خير دام صبحنا بهل وجوه .
_ نيال بختچ لو صبحتي بوجهي ، صباحچ صار بوجهه
علي الآكبر هذا شايل خرزة مشاكل يعني بالصافي اربع مشاكل اليوم .
_ نعم منووو حاجي وياك ؟ وليش تحجي على اخوية .
_ اخ منك يالساني شلون يريد يسطر حجي ، انتِ تتحارشين امشي منا .
اشرت على نفسي ورجعت عليه رافعه حاجبي بتحدي
_ هاي عليَّ امشي منا .
_ امشي منا يلة امشي توكلي .
اريد احجي عافني وهوَّ راح بقيت بحالة ذهول بس صافنة
دگ الجرس عقلي مو متزن واختنگت اريد هذا هذا النفس شنو النفس
بعد ما اگدر اجره عود شنوووو هيچ يعملني اول مرة يسويها .
صار الاصطفاف بكل مرة يحوم عليَّ هل مرة حتى صفي ما يشوفهم
لو ينزل راسه لو يتكتف ويرفعه ليفوك ويحك بطرف انفه
ما صدگت شلون خلص ورجعنا للصفوف ، واني اشرح اشوف بالشباك
ماكو مايفتر كل يوم ياخذ الساحة فر اذا ما يدخل على صف
يخابر هناك مقابيلي باقي گدام عيوني ، بس كملت الدرس طلعت
هوَّ هم طلع من صف صاير مقابيل صفي تبعدنا الساحة
من شافني نزل راسه وضحك بغرور ، ومصيبتي كالشريط مرت
يعني چان يراقبني ادور علية واطلع براسي حتى تدريس بي خير
ما درست انوووب متشمت ابن اااخخ مني اخخ .
رحت للمديرة شفته گاعد غيرت طريقي صاحتني ردت اطم روحي
سلمت وفتت وهوَّ گاعد يشرب جاي ويتريگ وياها
_ ست شهد عزلت الج الأقلام والسبورة الجديدة والرحلات
ومن باجر يطلعون عمال اثنين يصبغون شعبتچ مثل ما طلبتي عيوني .
_ شكرا ست خولة مقصرتي واني هل يومين اكمل الفصل
حتى مثل ما متفقين اخذ الاجازه .
انــور : ست خولة الكادر كله مايطلب إجازة من
اجيت لليوم بس ست شهد .
خولة : هههههههه عدها ظروف وابوها صديق عزيز .
انــور : شعدها ظروف شو رجل وماكو اطفال ماكو .
شهد : شلون عرفت رجل ماكو اصلا اني اخذت اجازة
علمود اجهز خطوبتي الخميس الجاي استاذ انــور ومعزومين كُلكم .
حجيتها وداخلي يون ويغم بيَّ وهوَّ وجهه صار ينطي ألوان
عضيت شفايفي من استوعبت حجم الجفصه العميقة وتمنيت
انخطب ولا اطلع جذابة گدام هل مدگدگ ، ضحكت بوجهه
حتى ابين الموضوع حقيقي وهمست بس صوتي الله يسلمه اعتزل
_ اترخص منكم كملوا اكلكم هني ومري ان شاء الله .
خولة : اگعدي ويانا ست شهد ليش تروحين .
_ لا عيوني سبقتكم أكلوا أكلوا بالعافية .
طلعت رافعه راسي رديت الصاع صاعين بس وگعت روحي
بمصيبة ، طلعت امشي لا مو امشي اركض للحمامات
خابر على دُر مشغول ضربت على خدي انفضحت
سبقني خابرهاااا راح يعرررف يبوووووو عليَّ وعلى الشماتة
بقيت اخابر بيها الى ان جاوبت جسمي فقد من الخوف احجي عبالك
اركض وخطودي تطلع منها نار الخجل
_ دُر منو يمچ ؟
_ بعدني بالجامعة شصاير شهد ؟
_ انــور خابرچ ؟
_ اني وياچ على مكالمة وهوَّ دا يخابرني شبيكم ؟
_ لچ دُر اذا عندي خاطر يمچ بداعت علي الآكبر
بشنووو احلفچ حبابة دُر حبابة لا تفشليني وياه .
_ خليني اگعد الواضح شي خطير صاير.
_ دُر جذبت جذبة جبيرة من وراه هذا اخوچ گلت الخميس الجاي
خطوبتي مو خطوبة سراج الدين ، واذا بعرف جذب يسوين مضحكة .
_ يوووو والنبي تصيرين بلسان انــور يلعب لعب .
طلعت من الحمامات واشوفه اجه بتجاهي يمشي سريع والسترة
تهفي ردت اطم روحي من الخوف رفعت راسي واني احجي وياها
_ يمههههه اجاني لچ اجاني دُر القران عليچ حلفتچ بعد .
وصل يمي اشر بيده منو وصار بصفي كلششششش
_ ها شبيك حامي وشايط وفايت هيچ امشي منا يلة امشي .
_ يا خطوبة بنت صفوان يا خطوبة غير اخلي منطقتكم
والعراق كله يسولف بيكم .
عفته اريد اروح صاح بيَّ بقيت أتلفت خجلانة
_ اووووكفي من احجي وياچ انتظرررري راح افقد عقل عقلي هسة
اني اريد ارتكب كارررررثة لچ حاجيني .
_ اسمع استاذ انــور أتفضل .
_ تحبين تنخطفين انتِ اكسر خشمچ هذا خشمج اكسره .
_ خوفتني اوووووي لا عليك الله رجفت .
_ ارجفچ وارجف عشيرتچ كلها .
_ شدعوة .
_ اليوم يا شهد يا بنت صفوان بنت امچ وابوچ
اطلعي من المدرسة اذا مو من بابها تنسحلين وتنخطفين .
_ يا ابن يوسف انت ابن امك وابوك اخطفني اليوم من الباب .
رفعت راسي سلمت وتعديته وهو يريد ينفجر
واني امشي صرت بعيده رفعت التلفون واسمع ضحك
دُر تريد تحچي ما تگدر لزمت خاصرتي احس بعد ما اگدر امشي
_ دُر اخاف يسويها صدگ هذا المدگدگ .
_ لچ عوفيني بصدمتي طلعتوا تطورات واثنينكم واحد
مقابيل القاني طول فترة الدوام وهو يتحدى وانتِ ومشاحنات
وحُب ينبث بالكلام اووووووويييييييي گزگزت انااا گزگزت .
هزيت ايدي وامشي بالممر واحجي وياها
_ يا حب لچ يريد يخطفني وهذا شاطر بهل سوالف غير مجربته .
_ عوفي الموضوع عليَّ اني احلها ، اطلعي وانتِ رافعه راسچ .
_ دُر مو تتفقين وياه ويخطفني يموتوني اهلي .
_ قابل غبية ما اعرف اهلچ ، وترا اني هم اخاف على اخوية
فـ كملي دوام طبيعي واني ارتب الموضوع من يمي
ومن ترجعين معزومة على غدة يمي اليوووم وكلشي اعرررف
ينام علي الآكبر ونگعد اني وياچ ندردش اوكي .
_ صار .
رحت على صفي اخذتهم درس ثاني ومر الثالث
والرابع وهل مدگدگ مختفي مبين يخطط المخطط مو هين
اخابر ابوية هسة اخلي يجيني قبل لا يخلص الدوام
ليش گلت مخطوبة ، بالعباس يستاهل ينقهر ادري بي يحبني
خلي يحرك بروحه ليش يحرك كلبي من الصبح حتى يتوب .
كمل الدوام اريد اطلع اتصلت على دُر
_ لچ عيني كلبي يگول لا تطلعين .
_ واسكتي مني ورطتيني بلسان علي الأكبر
وخليتيني اتنازل واتغزل بي واني صار شگد
رافعه خشمي عليَّ هل ابو الديسكو ابو المارشميلو .
_ واكيد ساح وتسرسح اخوية مسربت اعرفه .
_ خطية عباله راح اخلي ينام بالغرفة اليوم بالحلم خليّ المارشميلو يفيده .
جريت نفس وطلعت بقيت من الخوف مبتسمة واني اشوف
جــود وسيف الدين وسراج الدين وعلي الآكبر ينتظروني بالباب كلهم
ملمومين يسولفون وما ادري بشنو يتناقشون الواضح موضوع مهم
نزلت دُر جام السيارة ولوحت بـ اصابعها بقيت اباوع منا ومنا
واشوف انــور طالع من السيارة فاتح عيونه ضحكت ومشيت
يمهم طبطب جــود على ظهري وصعدني بسيارته هو وباقي اخواني
وعلي الاكبر راح صعد وياها ، فروا السيارة الطريق شارع المطاعم
نزلنا كلنا بالگراج واني باقيه بعز صدمتي وصلت رسالة
"وراچ وراچ بنت صفوان "
كتبت بستفزاز
" سد شفايفك لا تفوت ذبانة يا فووووار "
دخلونا على مطعم گدت دُر بصفي ولزمت ايدي
_ سودة علية انــور يريد يخطف راد يموت متت من القهر
_ جذابة احسچ تتشمتين بي .
_ والله مو اتشمت بس اريده ينسحل .
_ يمي خليها اني ام السحل .
_ خايفة هوَّ يسحلچ يحظي .
_ شلون قنعتي على روس .
_ هيَّ على اقناع سهلة لچ عيني خليت علي الآكبر يعزمهم
خطية يشتغل منا واني اجي اصرفهن ما راح يلم للمستقبل
من ورايَّ ، بس لو نجي الحقيقة ما اريد يلم هذا اذا يلم يتزوج
خلي مفلس دوم مفلس ، من يجمع اني موجودة اصرفهن .
طلبوا اكل والكل معزوم بحجة نخطط الخطوبة سراج الدين بعد
ما حصل الموافقة من اهلها ، كُل واحد طلب طلب شكل وعلي الآكبر
شغل جگارة وصافن عليهم شلون يتخيرون، اخذت دُر المنيو
ما ادري شنو حجت وشنو طلبت
دُر : بلازحمة اريد الروزيتو الإيطالي بالدجاج .
جــود : شنو هذا مال مثقفين .
دُر : اي جرب .
جــود : اريد سوالف مثقفين العفو اريد الروزيتو الإيطالي.
علي الآكبر: بيش هذا بكلية ؟
دُر : بيعها دللنا لو احنا مو مارشميلو .
اشر على جــود وهو يرجع ظهره على كرسي
_ الله لا يوفقك ولو هو الله ما موفقك بس هم الله لا يوفقك
ما اگول غيررررها لا والله ، هو ليش اجه ويانا .
دُر : اني عزمته .
علي الآكبر: طبعاً البلبل مالتچ .
دُر : حماية السبع .
جــود : ويا فارس بدر يا حيدر يا فارس بدر .
نزلوا الأكلات واخر شي جــود ودُر نزل صحون اثنين
بيهن مدري شنو تمن فطر صلصة ودجاج وخضرة مدري شنو
جــود من شافها كشت روحه وصار يغطي بوجهه ويتحرك ويطلع لسانه
_ عادي اتراجع .
علي الآكبر: حل اكلهاااا كلهاا اكلهااا ماكو غيره .
دُر : والله يعجب طعمه لذاذه جربها اكُل اكُل شبيك .
جــود : اريد كباب .
اني وسيف الدين وسراج الدين وعلي الآكبر سحبنا
المواعين حتى ما ياكل ويانا
علي الآكبر: العباس علية الي يخلي جــود ياكل وياه .
سيف الدين : هو مثقف ياكل اكل مثقفين يتحمل .
جــود : ورطتيني زوجة اخي النازوكية .
اشرت دُر على اكل رفع تمن بي مدري شنو صلصة بيضة
غمض عيونه ونزل راسه يريد يبجي وهلاها بحلگه
شهد : ها بشر .
جــود : لا تحاجوني خلوني لا اموووت روحي خلوني .
واحنا ناكل ودُر تاكل متعودة على هيج اكل بس اني بمجرد ما شفته
ما تقبلت ، بعدنا ناكل ورفعت راسي اشوف انــور فات علينا
احس عقلي صفن وكلبي بعد ما يدگ عزا عود ليش اخوف اخواني يمي
لا هو اني اخاف من اخواني ، خليت ايدي على خدي وهو تقدم
علي الآكبر انتبه علية طگ رگبته وضحك
انور : دُر هنا .
دُر : هلوو انــور شنو هل صدفة .
انــور : شلونهم الشباب .
كُلهم سلموا احتراماً الدُر ، نزل على جهة دُر واشر على تلفونها
_ مو اخابر عليچ ليش ما تجاوبين .
_ گلت بس ارجع البيت اخابرك ماتشوف هوسة صايرين .
هز راسه وهو يرفع روحه غمز بتلاعب وكأن يگول صبري
درت بس عيوني وهو راح صار بعيد گعد ورفع ايده
سجلوا طلبه نزلوا اله ما ادري شنو
جــود : هذا اخوچ شنو طلب انوب.
دُر : ستيك لحم بصوص الفطر هذا رهيب .
طلب علي الآكبر جاي خلص قبلنا كلنا اخذه وراح على طاولة انــور
شهد : بس لا يسأل يمه راح اموت طلعوني منا طلعوني .
غطت دُر وجهه وضحكت الفاهية ، شوية والكل وكف
راح علي الآكبر دفع الحساب وطلعنا من المطعم
دز رسالة بس صعدت
" يعني صدك الخميس الخطبة، اني موجود وانتِ موجود
اذا تصير وتم على خير ازين شاربي اني اعلمچ
تريدين تعذبيني انتِ ناووووية ارتكب جررريمة تريدين تخليني
اصير مجرم شلون لزمت روحي هسة بمعجزة خفت
عليچ منهممم بي اني اعرف علاجچ "
قريتها وسديت التلفون ، بحيث وصلت للبيت اهلي نايمين كلهم
بدلت واريد اختل بفراشي وانفتح باب غرفتي
دُر : امشي صار ساعة انتظرچ گدامي .
طلعت وياها علي الآكبر ماكو بالبيت والظاهر متجادلين
گعدتني اني وياها حجيت الها كُل المواقف الصارت بيناتنا
ومن ضمن هل مواقف الوشم وشنو يعنيلي .
دُر : عمووو تعال اسمع بنتك عموووو تررروح بيهاااا يبووووو
ابوها يتعارك على وشم وهيَّ تگول احبه علمود الوشم
وانور بين مارها ونار ابوها .
بقيت يمها لليل رجعت للبيت اسأل على امي واتذكرت
اليوم اخذوا سراج الدين ونرجس يعقدون بكربلاء مثل دُر وعلي الآكبر
رجعوا اهلي واحنا كلشي مخلصين احنا على سفرة وامي تسولف
النا الصار وشلون عقدوا وتتغزل بنرجس
ابو حسن : ان شاء الله الخميس الجاي حجزنا بقاعة يريدون
يسون حفلة عائلية بسيطة ومنا ياخذ زوجته ويسافر بيها كم يوم .
ومن هل يوم صرت اروح ركض للدوام أتجنب انــور وهوَّ صار
يغيب اكثر مني ، بيوم العرس ما داومت من الصبح گعدنا
اني واخواتي ترتيب وتنظبف بالبيت واخذنا سرة على حمام
تلفوني قفلت الكنتور عليَّ ، للظهر اجت دُر افترت علينا اني
واخواتي مكياج واظافر وشعر تشتغل بمكياجها اضبط من
الف مركز تجميل ، وعلي الآكبر يفتر على أخواني واحتياجاتنا
والسيارات والتجهيزات ، كلها التمت اقاربنا والبيت صار مهرجان
ودُر وعلي الآكبر بعدهم يفترون بتراكات البيت كملوا كلشي
وراحوا البيتهم ، كل احنا كعدنا فاتحين ديجي ونركص
جــود وسيف الدين بالگراج هز خلصوهااا بلا تعب وملل
وريمان كل شوية ادردم
_ صار ساعتين ضبط ننتظر ست الحسن والدلال هي وعلوكي
يخلصون هاي لو احنا جان سويتوها علينا عزا وتخلونا وتروحون
بس هاي تختلف دُر لازم كله على راحتها .
خواتي عافوا امي وهجموا عليها بدون محد يحس جاوبوها
شمس : ما شفتيها لبنية حتى وجهچ ضربته مكياج وترتيب
وبقت هي كلشي ما مسويه مز غززز .
بتول : اسكتي عيني محامين الدفاع كلها موجودة .
شهد : اي والله اسكتي انتِ وياها لا يصير تاليتكم حالچن حال ميثاق .
شوق : نزوجهم مثقفات هههههههه .
شهد : يوم اليه اتزوج مثقف ههههههههه ياكل ستيك لحم .
لميت فستاني وطلعت اقكفر بيدي ارگص اني واخواني
وابوية يشوفنا ويضحك ، وامي تشمر جكليت على راسنا
جــود يهز جتف وسيف الدين يهز شعر ، وسراج الدين يصفك
باقي اخواني برا خواتي ويانا يرگصن وكلها تصيح لجود يوم الك
واحنا بنص الركص التفتنا على علي الآكبر ودُر طلعوا من ممر بيتهم
وكان امير واميرته ، فستانها ذهبي وجسمها ضعيف مقسم
هي مو محجبة بس خلت شال مفتوح طالع شعرها الـ امامي قليل منه
والشعر اسود بسواد اليل يلمع والحمرة احمر صارخ بارزه
وعلي الآكبر بدلة رسمية اسود بأسود طالع يلمع لمع من الجمال والترتيب .
جــود اول ما شافهم دار وجهه على ابوية وضرب الحايط بيده
_ خطيتي بررررررگبتك كلبي وجعني كلبي بعد ما اتحمل
شفتتت انت جااااي تشووووووف بس انااااا ما عندي مثقفة
تلزمني من ايدي والبس رسمي ونطلع انا وياهااا گدام العالم
وارفع راسي بيهاااا مثقفة متزوج مثقفة .
ابو حسن : علي الآكبر ودُر ماشايفين خير بحياتهم من عين هذا
الخايس الحيوان عينه عليهمممممممم هل ولد .
گعد جــود على كرسي وجتف ايده يباوع عليهم والأغنية مشتغلة
راحت دُر اطك بـ اصبعها وتضحك فاتت جوة والعيون صارت كُلها عليها
علوها للأغنية ورجعوا يرگصون راح علي الآكبر على جــود
سحبه من ايده وصار يصفك وياه ويرگصون سوية
طلعت دُر تضحك رفعت تلفونها تريد تصور صار علي الاكبر صنم
راحت يمه اني ارگص واسمعها تصرخ
_ ارگص الخفيف ابووو الديسكووووو ارگص اريد اصورك .
_ تنشريني مثل اهلچ .
ابوية خرب عليهم من الضحك درت على باب من سمعت ابوية يرحب
شفت حُــرة دخلت علينا بفستان بسيط وهي ناعمة وشعرها مفتوح
طالعة عبالك باربي صغيرة كُلشي بيها بسيط وناعم حتى ملامحها
شفتيفها صغار وخشمها نتفه مخليه ملمع على شفه اني بنية
عجبتني ، خلت الكُل صافن بجمالها ، راحت دُر بوستها وفوتتها يمي
ريــان سيارته مسويها للعرسان اخذ سراج وحرة
ودُر وعلي الآكبر وراحوا قبلنا كلنا اخذوا العروس للتصوير
بين ما نقلونا على قاعة ، صارت مختلطة ساعتين ودخل
سراج الدين ونرجس البنية عيونها ملونه ناعمة الى درجة
جان فرق العمر واضح ببنها وببن سراج الدين والحب بنفس
الوقت بارز روحه ، بدت مراسيم الحفلة من رگص وسلو
بين كُل اثنين متزوجين ، محد رگص غير سراج الدين ونرجس
ومن بعدهم كسروها دُر وعلي الآكبر راحوا يرگصون
دقيقتين واشوف ريــان لزم ايد حُــرة وراحوا يرگصون وياهم .
جــود : هسة شنو هل تعذيب النفسي اذا ما اروحً
اخلي ابو الديجي يشغل اخت امي ساجدة عبيد واخليهم صافنين
شلت المثقفين هذولي الخيااااااسسسسسس
يمممممممممماااااااا هاي ام الريلاكسسسسس ذبحتني يمااااااا .
بعدهم يرگصون وجود نفذ كلامه من سلوا الساجدة عبيد
ودخل مداهمة ردح بنصهم ، كلهم رگصوا وياه رحت وياهم
واسمع جــود المسموم يگول الدُر
_ اكلچ عيوني مارشميلو موجودة ذيچ ام الرسمي الجوزي
طالعة تشگ الحلگ وعيونها على زلمتچ يمممممكن الله لا يجذبني .
راحت دُر بصف علي الآكبر يرگصون سوية وما ادري شنو همست بـ اذنه
وبرطمت بحزن رفع ايدها وباسها وصار يركص وياها ويضحكون .
تأخر الوكت صارت توزيعات الاكل امي قبل الكل اخذتني
اني واخواتي بس ورجعنا جــود على بيت حتى نرتب كلشي
عدنا اليوم هطار يباتون من غير محافظات ومن ضمنهم
اهل فلك كلهم اخوانها وابوها ، دخلنا للبيت صوت ابوية
عصبي طالع من الاستقبال، ركض جــود فتح الباب واحنا وراه
رفعت فستاني اريد اشوف ورجلي بعد ما تشيلني خرطت العافية
وعيوني غوشت بطني لوتني لوي واني لشوف انــور گاعد
مقابيل ابوية بتشيرت بارز كل الوشوم .
اريد اشرد منهم حيل ماعندي حيل للمشاكل والله تعبت من هل موضوع والضغط سحبني ابوية من ايدي ودخلني بنص الاستقبال وطلعهم كلهم
وسد الباب انــور عيونه ما شالها مني واني اريد امشي
بس الفستان وكعب عالي اتعثر رجلي تررررجف رجف
سحبني ابوية خلاني مقابيل انــور بالجهه الثانية وگعدني
_ هذا انت مووووجود وشهد مووووجودة وراح اسألها
بوجودك وتسمع بـ اذنك عايل ويااااااااك انا ؟
انــور : لا حشاك ماتقصر .
ابو حسن : شهد بوية انــور اكثر من مرة طلبچ من عدنا
وهسة رجع طلبچ مني على سنة الله ورسولة تقبلين بي ؟
يتبع ..
ثقل ميزانك بذكر اللّٰـه:
- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد ..