_______________________ الــريـاش
﷽
𓆩 اســاور حــسين 𓆪
بقلمي رواية : الــرياش
جميعنا عالقون في لحظه نتمنى لو نبقى فيها الى الأبد
لطفا لا تنسون التصويت والتفاعل بين الفقرات
⊰ دُر⊱
دك تلفونه شفت الاسم مكتوب يوسف متريش
_ هذا ابوية ؟
_ اي .
_ شكو شنو يريد ؟
_ يدور على ابنه انور .
_ يدور انور يمك .
_ انور اخوچ بين ايدي .
بلعت ريگي وابتعدت منه كعدت على تخم تخربط كل وضعي
ذبيت العباية من راسي اختنگت جريت النفس بصعوبة
_ شبيچ .
حرت شلون اعبر خفت يفتهمني غلط حقه هو حقه بكلشي يسوي
_ مابيه شي بس دخت .
_ من البخور .
_ يمكن .
ضغطت على اعصابي حتى ما أبين مشاعري
كبد الكلام يجيني بأوقات اني امس الحاجة احجي واعبر
فتح الكنتور رجعت العباية بمكانها ونمت على فراشي
شال التلفون من الميز وبكل هدوء وبدون ما يرفع عيونه بعيوني
_ عبري براحتچ بالمحادثة .
_ وين رايح .
_ اشوف جود واخواني وارجع .
بس طلعت كعدت سندت راسي على ظهر السرير وجريت حسرة واني اتذكر انور من جنت صغيرة مرات ينقهر وينجبر هو يدير باله عليه من اريد
اشتري او اكل تغير بسببهم كرهوا بكلشي صار يشبهم دخلوا بطريق السوء نسوان مخدرات الرحمة والاهتمام والحب كلها انعدمت عنده
ضميت وجهي بيدي وشهگت هو أذاني بس اني ما اتحمل اخوية يتأذى يستاهل بس كلبي اخ من كلبي ما يتحمل يفكر مجرد تفكير اخوية بخطر .
سحبت التلفون مترددة بس ماعندي احد غيره اشكيله براحتي
بدون ما اخاف واتقيد ، جبرت نفسي اكتب ومترددة متخوفة
من ردت فعل علي الآكبر بس لازم احجي لازم
" حاولت اسكت لان حقك انت صاحب حق اخوانك بمعجزة
رجعوا للحياة ، تحبهم ادري ، واني احب انور "
بس قراها طلع من المحادثة ودقايق وصعد
ما كدرت اكتب واعبر اكثر لفيت نفسي من الخجل
حسيت بحركته بالغرفة دقايق ونام بصفي
سحبني من خصري نومني على ايده ورجع شعري
حتى يترك مجال برگبتي يطبّع بوسات متفرقة بي
_ تريدين يطلع ؟
درت وجهي صار وجهي قريب منه ونفسنا واحد
_ اي ومستعدة شنو تريد منـ .
قاطع كلامي رفع أصبعه على شفايفي ضربها
ثلاث ضربات خفيفة وعيونه مركزة بيهن
_ باجر يطلع .
_ والله .
_ لجل عينچ تكرم الف عين .
خانتني دمعة من دموعي نزلت على خدي باسها وابتعد
_ ما يستاهل تنزل دموعچ علية .
_ اخوية علي الآكبر انور اخوية مو بيدي .
_ من اتخيل شلون يرفع ايده ويضربچ
واتخيل شكلچ اموت والله اموت كلبي ينزف منه .
_ سامحته .
_ ما اسامح كل شخص سبب الج أذيه راح أندمهم اتوبهم
اخليهم من خيالهم يخافون ، ياسين من عرف
خطبتج ضربچ كل ما اشوفه أكتله وابو فاضل .
عدل نفسه بحيث راسي صار على صدره صرت ارسم
دوائر بدون ما احس على عضلات جسمه ردت احجي
مغمض عيونه يتنفس سريع عاقد حاجبة
_ علي الآكبر .
_ اممممممم .
_ شكد تحبني ؟
_ مهوس بيج .
بقت قريبة منه هو يحاول ينام رفعت راسها من صار يتأفف
_ بيك شي ؟
_ شوكت ينتهي عذابي .
_ عذابك ؟
_ دُر نامي انا اريد اطلع ساعة وارجع .
_ وين رايح .
باس راسي واخذ ملابسه وطلع بدون ما يزيد كلام
بقيت انتظر الى ان نمت من كعدت شفت ملابسه
ولثام على تخم ، رحت شميت ريحتهم ماكو ريحة مولوتوف
غسلت وبدلت ونزلت جوة جود هو وشهد يسولفون وهو ماكو
دخلت للمطبخ شفت عمتي كاعدة
_ صباح الخير .
_ صباح النور يمه تعالي عاونيني .
كعدت يمها تلف كبة تمن بقيت صافن على ايدها وهي تلف
ام حسن : علي الآكبر وين اليوم ما بين .
_ اني اريد اسأل عنه مختفي .
_ چا مو وصيتچ البارحة ابقي وياه ليل كلة يفتر على روسنا
كضي شني ما تكدرين علية .
_ قابل صغير وين اكدر علية اذا يخلي شي براسه يسوي
بعد ابنچ وتعرفين عناده .
_ اي صدگ ما ينگدر انا امه مرات بودي الزمه وارجع اربي .
واحنا نحجي فاتت شهد فتحت الكاونتر وطلعت دبس وراشي
صبت بالماعون وعمتي تصيح بيها
_ راح تنفجرين انتِ وذاك جود من البارحة لليوم تاكلون صخول تعلف .
_ نصرف طاقة .
_ شني شغل عمل تصرفون طاقة .
_ مراقبة العالم والتحشيش والحجي هذا كله صرف طاقة .
لفت الخبز بالدبس سوتها شكبرها واكلتها والباب اندك
ام حسن : لچ اركضي هاي بنت الخياطة جابت دشداشتي
عندي واجب واريد البسها واروح اركضي لا تروح .
شهد ..
سحبت شال من يدة الباب نخلي شالات احتياط هنآ دائماً
وأخذت خبز خليت بيها دبس وراشي وركضت لبست
تك من نعالي وتك من نعال امي وصرخت
_ اجيت وثول اجيت شبيچ .
ام حسن : ولچ عيب .
_ چا ما خلتني اشوف دربي اطير .
فتحت الباب وبهتت انبلع لسانه الطويل وتسرب
من شفّت أنور اي هذا انور اخو دُر ظل متعجب
مقلص عيونه عبالك شايف بزون ميته لعبت روحه بعلي يبوو
من الفشله خليت ايدي على شفايفي ومستمرة اكل بلگمتي
انور : انتِ منو ؟
_ خدامتهم .
_ عدهم خدامه ؟
_ سالمين ماتدري ؟
_ عايش وياهم شلون اعرف ؟
_ راح تظل تسألني وارجع اسألك اختصر .
_ اريد دُر ؟
نزل عيونه على شفايفي من وخرت ايدي تذكرت وجهي
ما محفوف والشمس تضرب على وجهي يعني بالضيم
- شتريد منها ؟
_ اختي .
_ ادري اختك شتريد منها ؟
_ شعليج امشي انطيها خبر بلغيها بوجودي يلة .
_ لا تتأمر
_ ترا مليت امششششششي .
_ على هذا اسلوبك ولا أصيحها .
_ شنو هل صلافة بابا صيحي اختي .
_ خابر علي الآكبر اذا قبل تشوفها اصيح عليهه.
طلع رقمه اتصل بي دقايق وسمعت صوت علي الآكبر
_ ها شمه رحت .
_ اي بس هاي خدامتكم ماتقبل تصيحها .
_ خدامتنا ؟
- اي .
_ ماعدنا خدامة .
_ لعد وهاي منو ؟
_ ياهيه ؟
_ احجي خلي يسمع صوتچ .
شهد : ها علاوي .
_ شهد هههههههه ، صيحي اخته وممنوع أطولين بالباب
انا راجع ، ودُر خليها تحجي وياه بالكراج وتخلي شال على راسها .
سد الخط ضم التلفون وشغل جگارة جر نفس ورجع الباكيت
_ گلتي خدامتهم ؟
_ انتظر هنا ، اصيح اختك .
ركضت فتت شو هذا فتح الباب ودخل بالكراج
يباوع على نعالي من اكتل روحي بيهن اخد يلومنب يمه صخام
فتت شمرت روحي بالگاع الطم على وجهي وامي ودُر مصدومات بيَّ
_ يمه اني ليش هذا حظي بالحلوين جني مخبلة وطلعت للزلمة
اختلس مني ، من اطلع حلوة ومرتبة حتى الذبانة ما تشوفني
شافني بهذا حالي الخايس لا والمصيبة
جذبت وطلعت جذبتي بدقيقة صخام بوجهي راح اموت من الفشلة يبووو .
ام حسن : ولچ اكلتيني اكل شكو فهميني .
دفعت ماعون الدبس والراشي وحجيت الهن كلشي
دُر من عرفت بـ اخوها وكفت تباع قبل لا تروح
شهد : حتى اكل بعد ما أكّل انسدت نفسي من الفشلة .
ام حسن : هيج وصدك نفسج المفجوعة بعد توكف من الأكل .
طلعت دُر قبل لا تروح صحت بيها
_ لچ دُر .
_ ها .
_ اذا يسأل منو انا تعرفين شنو تجاوبين ؟
_ اخت علي الآكبر .
_ لااااا ديري بالج .
_ لعد .
_ جذبي عليه .
_ يا .
_ گولي اقاربهم مخبلة مو بعقلها .
_ ههههههههه .
عافتني وراحت بس شكلها خايفة رحت للاستقبال
جود شافه من فتحت البردة وبي ما بي صاح
_ هذا شمه شعنده هنااااااا ؟
لزم الجرح وفتح الباب وطلع بيدة جداحة حديد
شمرها بوجهه وصاح بعلو صوته
_ لك شعندك هناااااا عار .
لزم اخوها وجهه واستند على حايط وكعد بالگاع
دُر : لااااا تضرررربه لا تضرب .
ساعدته يلزم ايدها وهو لازم مكان الضربة ودايخ
دُر : انور شبيك أخذك مستشفى .
_ لا بس دخت يمكن لان ما ماكل شي .
_ صار شكد ما ماكل ؟
_ يومين يمكن اكثر ما ادري .
جود : دُر علي الآكبر يعرف هذا الحيوان هنا .
انور : حسن ملافظك لا اعدمها الك .
فات علي الاكبر تعجب من شافه كاعد ودُر تساعده
_ ها شبيك ؟
جود : هيلب علي الآكبر شمه طلع رجيج من جداحة يوگع .
انور : هيلب شنو ؟
جود : شوارب اختك .
علي الآكبر: ههههههه كافي ، وانت تعال فوت لازم ترتاح
وتاكل ميصير تسوق السيارة وهذا حالك .
انور : ما افوت اريد اروح .
علي الآكبر : اي طبك مرض .
دُر : ترتاح وبعدين وين ماتريد تروح روح .
انور : لا تلحين .
لزمه على الآكبر ورفعه دفر باب الاستقبال ودخله وهو يحجي
_ من تحجي وياك اسمع كلامها لا ارجعك وين ما جنت .
رحت للمطبخ بس صوتهم اسمعه
نزلت ميثاق وباقي الحبايب : منو عدنا .
ام حسن : اخو دُر .
ريمان : چا اهل در مو وصلوا ولدچ للموت ؟
شهد : علي الآكبر قابل اذا عندج اعتراض روحي
احجي الحسن يشوف حل .
ريمان : اي اروح شنو مدخلين عصابة بنص بيتنا
يروحون يكتلونه احنا وهل جهال المساكين .
ميثاق : هذا علي الآكبر بعد طغى تخبل كلش
ملفي مافيا وعصابات اشكال الوان برا منهم الله يسترنا .
ام حسن : انتِ طغيتي يا صلفة گدامي وتحجين على ابني .
_ هاي الحقيقة عيوني ميصير هل استهتار .
ماحست غير ضربة صارت وراها كمزت ودارت
شافت علي الآكبر مستند على باب غمز الها
تريد تحجي رفع اصبعه على شفايفه
_ اششش اششش جهزي صينية مرتبة من ايدج
للخطار يلة لا هسة بصرخة اخلي طشارچن ينحاد حود بعلي .
راحت ريمان تحمي الأكل وهيه تجهز بالزلاطة وهو يباع
عليهن ويجاوب على اسئلة امي
_ شعنده هنا .
_ يشوف اخته مشتاقتلها خطية .
_ يا من شوكت هاي يشتاق ويريد اخته
اللي عرفته من ابوك علاقتهم مو زينة .
_ بس دُر تحبهم وتهتم بيهم .
_ وهو ما يحـ .
_ وهو غصباً ما عليه يحبها ويحترمها اخته هاي اخته .
اخذ الصينية وفات اسمعه يحشش هو وجود
_ اكل من خيرنا اكل .
انور : تعيرني ؟
جود : بلكي يغزر .
علي الآكبر: بالجلب يغزر ومايغزر بـ انور شمه .
انور : اهوووو اريد اروح اجباري اكل مو حالة هاي .
علي الآكبر: اكل لا اوكلك بيدي بعلي تريد تروح هيج
ودُر يظل بالها عليك تشغل عقلها تريد ابو شمه .
انور : منو تسبب بحالتي هاي ؟
علي الآكبر: عمايلك الخايسة انتَ وذاك خيسه .
انور : صار يومين لا اكل ولا شرب مشتغلينه تعذيب
انت وذاك صياد الكلب اذا اعرفه اشرب من دمه .
رفع علي الآكبر تلفونه واتصل على رقم شوية وصاح
_ لك صياد انور شمه يريد يشرب من دمك .
استمع للصياد بس ما ينسمع صوتهه وجاوب وهو خربان ضحك
_ هههههههه انور الصياد يگول رجعه لهل مصاص الدماء .
انور : ما تخوفون جلبي .
علي الآكبر: شجاع نونو مايخاف .
انور : طالع على لولو .
جود : لولو تقصد علي الآكبر .
انور : نعم جوجو .
جود : انا جوجو .
_ معجبك ابدله دودي .
جود : ولك شو انت صلف بيتنا وتجاوز .
انور : اخوك بلش لك .
جود : اكلك هذا يگلي لك مايخاف .
علي الآكبر: أكل وانت ساكت محترمك لخاطرها اكل .
دُر ..
سحب الصينية ياكل منها طلعت لزمت شهد
_ عليچ الله علميني شلون اسوي لبن حتى تروح الدوخة منه .
وكفت خلطت بسرعة كلاص اخذته ودخلت
_ اشرب لبن هسة يروح وجع راسك .
_ مابيه شي هذا لولو صار يومين حابسنا ودخت من التعب .
علي الآكبر: نونو يومين ورحت سياح لو مطول تفطس يا خاوي .
كمل اكل ووكف رفع بنطلونه عدله وهو يخوزر بيهم
علي الآكبر طابك رجل على رجل فات عمي ما صدك
_ اجيت والله جابك ابو حسن ابنك خاطف ولد الرياش كلهم .
علي الآكبر: هههههههههههه .
ابو حسن : صح هذا الكلام .
_ اي بوية صح كلهم عندي اربعة من ولدهم .
_ تريد تموتني بوية ؟
_ يومي قبل يومك يالغالي .
_ رجعهم .
_ مو عندي وحگ ربك بيد الصياد وهذا ما يطلعهم بسهولة .
_ ياهو هذا الصياد ولك خبلتني بي .
_ هذا زلمة العيالة راح يرعد عليهم رعد ماصاير بتاريخ الرياش .
انور : هاي مقابيل ابوك ما اسكت على كلشي سويته وراح تسوي
والله اخذ اختي منك واذا تطلع عن كلمتي احسبها ميتة
شوفي دُر زوجج هجم حياتنا هجم اذا راضية ابقي
واذا عندج ذرة كرامة ماتبقين وياه لحظة .
علي الآكبر من سمع كلامه تخبل لزمه من ملابسه
وطلعه صحت صرخت وهو ولا مهتم ، صعد انور سيارته
هو يهدد ويتوعد ، من دخل قطعت طريقة
_ شوفي لخاطرج متحمله هل قذر .
_ مو دايخ ليش تضرب وتدفع بي .
_ مايستاهل حبچ لچ مايستاهل تنقهرين ما اريد اذكرج لج اصحي .
_ هو اجه حتى يشكرني .
_ اني جبرته يجي حتى تطمئنين علية هل شمه .
بقّيت ضايعة اقترب مني واشر على باب
_ روحي بدلي حتى نروح للجامعة وترجعين للدوام .
_ اجازة .
_ لا ارجعي كافي .
صعدت ابدل واشكال الأصوات والكلام جوة وهو مستلم الموضوع
بحيث من نزلت ولا شخص بيهم يحجي كلها سكتت اخذ
سيارة عمي وطلعنا بيها يسوق بدون ما يحجي مبين الف شغله براسه
_ اذا يقبلون ما اداوم اليوم على باجر .
_ ألي تريد براحتج .
_ وين جنت ؟
_ عندي شغل .
_ من البارحة شغل مايخلص شغلك ؟
_ ليش محتاجة شي .
_ لا .
_ مشتاقتلي ؟
_ لا وين .
نزلنا بكراج الجامعة نزلنا على إدارة اجراءات وكلام مطول
يحجي وياهم وهمَّ يسألون وبلغهم زواج ومشاكل ومستشفيات
بعد تعب وافقوا وكدرت اكمل حلمي ، طلعنا من الإدارة حظن
ايدي بين ايده ويمشي بثقة لفت نظري ما يرفع عيونه بوجهه
بنية اذا تقابلنا يشوفها بس اول نظرة بس ترمش عيونه
بعد ما يرجع يشوفها يستحرم .
_ زين ما تباع ؟
_ هههههه مركزه .
_ لا بس انتبهت .
_ حجيت قبل ما ركزت بأحد غير امي واخواتي وانتِ .
_ انت شنو مكمل ؟
_ شفايفج حلوة .
_ شنو ؟
_ كملت سادس اعدادي وتركت .
_ والجامعة .
_ مو جوي .
_ يا .
_ وداعت هل ابتسامة الي شالتني ورگعتني بالگاع .
رجعني للبيت حجيت لعمتي والظاهر الحبايب من عارفات راح اكمل
متعاركات وصاعدات بغرفهن ، تجاهلت الدنيا كلها وضربتهم
بعرض الحايط مو مهمين الأهم علي الآكبر قابل ، صعدت بدلت
ونزلت ساعدت عمتي اني وبناتها ، وعلي الآكبر فتح المطعم
بعد ما شفته ، للعصر سمعت صوت بالمطعم رحت استمع
هذا ابوية ، يهدد وعلي الآكبر يهدد وعاف المطعم وطلع
رجعت للبيت مرعوبة شنو تالي هل حرب وشلون تخلص .
بليل طلعت كل ملازمي والأقلام رتبتهم وطلعت ملابسي
اسمع صوت مطر فتحت الشباك حتى اشم ريحة الحايط من ينزل المطر
دقايق وانفتح الباب دخل علي الآكبر : تعالي .
_ وين .
مد ايده رحت لزمتها بدون تفكير بيده علاگه صعدني
الدرج فتح باب السطح صار حايط بسيط
يمنع المطر يوگع على راسنا ، فرش بساط صغير
كعدت وهو بصفي : تحبين المطر .
_ اموت علية .
_ ادري ، وانا أموت عليج .
ضحكت اقترب مني اكثر باس طرف شفايفي
_ دائماً اضحكي اريد اعوضج على كل يوم بقيتي بي وحدج .
ابتسمت ولا أراديا خليت راسي على صدره هو يتلمس
بشعري وحاضني بكل قوته .
بعد ما مر الوقت خف المطر عدلت نفسي بحماس حجيت
_ اشم ريحة اكل طيبة .
_ شهد گالت ما اكلتي .
_ جوعانة .
_ يخسي الجوع .
فتحت الاكل بيدي هو بس صافن بحركاتي تصرفاتي وكأنه مهوس
مجز صينية بيها كص نوعين وكباب نوعين ومشاوي
وماعون ثاني معجنات صفگت بحماس ميتة من الجوع
اكلت اني وياه واني مندمجة سألته : احجيلي موقف سويته قبل لا اعرفك.
علي الآكبر : يخصج
_ اي
_ هواي .
_ اريد واحد .
جر حسرة يباع على نهاية السطح
_ اتذكر بكُل مرة تحتاجين ابوية بليل اطلع وراه أراقبكم
اظل اتبع تحركاتج وين تروحين وين ترجعين شنو تحبين اكلات
وشنو تكرهين محل الملابس تشترين منه بستمرار اعرفه
قياس ملابسج عرفته من اشتريتي رحت گلت اله اريد نفس قياس
البنية ، من تروحين مطعم وتطلبين اكل اروح اخذ مثله حتى
اعرف شنو اكلتي وطيب لو لا وجنت دائماً انقهر من اشوف تاكلين
من مطعم تخليني بقلق عليچ ، عرفت تحبين كل يومين تروحين
على سوبر ماركت تشترين حلويات واندومي حتى تاكليهن بليل
حيوانچ المفضل طيور الحب والكتاكيت .
_ انت فصختني مو بس مركز .
_ ماكو احسن واحلى منج اركز بيهم .
كملت اكل لزم ايدي وسحبني جوة المطر
_ تتذكرين اخر مرة لعبتي جوة المطر .
_ اتذكرها اكيد .
_ جنّت اتمنى اخذج بحضني هيج
كمل وسحبني على صدره ملت راسي بتعب وكان هو بيتي
نزل راسه بركبتي وهمس : كافي تحرميني منج ما استاهل والله .
بقيت على وضعيّ لدقايق والمطر ينزل علينة رفعني صعدت
على رجله صار يتحكم بمشيتي رفعت راسي صارت عيوني بعيونه
_ بوسني هنا .
اشرت على خدي غمض وهو يخلي شفايفه على خدي
ابتعدت ورفعت اصبعي على شفايفي باسها بهيام
وهو يحضني احس يريد يدخلني بصدره .
واحنا فاصلين على العالم انضرب الباب وصوت طبه قوية صارت
التفتت اني وياه على مصدر الصوت شفت اثنين واحد فوك الثاني
نزلني وراح يركز : جود شهد شكو هناااااا ؟
شهد تشهگ لازمه راسها وجود واگع عليهه
_ شيل هذا مني راسي فشخ راسي .
جود : هيلب يمعود ابو الرومانسية .
رفعه وجود كعد بمكانه بصفّ الأكل
_ مسوين اجواء مطر وحب ورومانسية والله وطلعت مو هين .
علي الآكبر: شسوي هنا ولك .
جود : ملينا كلمن بغرفته عود نريد نغير جو انا وهل مسكينة
طلعتوا يوجّهنا خفنا .
شهد : استحينا مو خفنا .
جود : اي انضربت بيها وهي انضربت بيه ومثل ما تشوف حالنا .
علي الآكبر: انت مو مريض ؟
جود : طبت هسة ، اكلك شني الغرفة بعد ما تكفي صاعدين هنا ؟
علي الآكبر: لا تدخل لك صوتك ما اسمعه .
رجع لشخصيّته تحمحم وصاح
_ يلة دُر نزلي .
_ ها .
_ انزلي ها شنووو هااا .
_ هسة شبيك تصيح .
حجيتها ونزلت وصلت نص الدرج وما احس غير رفعني وصرت
بين ايده وهو ينزل سريع ويضحك
_ عزا نزلني عيب لا يطلعون .
_ للحمام يا حلوة اخذي حمام دافي حتى ما تتمرضين .
_ تذكرت قبل من تبللت بمي المطر استحيت تحجي وبقيت تتحمحم .
_ خفت عليچ من الذنوب بوية .
وكفني باب الحمام وراح دخلت سبحت من سديت المي
انضرب الباب خفيف فتحته شفته ينتظرني مديت ايدي
خجلانه اخذت الملابس وتوترت من نظراته عيونه ذبلت
وصار يتحمحم ، طبگت الباب لبست ركض وطلعت
لزمني من ايدي تذكرت صديقاتي بالابتدائية
قبل يسولفون على امهاتهم من يسبحون تشيلهم
وتركض على الصوبة ما عشت هل مواقف بعمري كُله
بس علي الآكبر كسر كل ذكرياتي وصار يبني بيها من جديد .
علي الآكبر : شغلت الصوبة تعالي هنا يمها بوية .
كعدت قريب منها ادفي بيدي وهو يفتح بالجرارات
اخذ سشوار ربطة بالكهرباء وسحب الكرسي
بصف الكهرباء : تعالي أنشف شعرج وارجعي للصوبة ركض.
رحت بكل هدوء كعدت افتقد الاهتمام اريد أعيشه
صار ينشف بشعري ويسرح بي ويرجع يعدل
من نشف عافني وراح المجر الجوارب طلع مالتي
واني كاعدة على صوبة نزل لبسني وطلع من جيبه
علاج : اشربي .
_ بس مو مريضة .
_ احتياط حتى اخاف تريدين تتمرضين أصدمه قبل لا يصدمني .
_ منو ؟
_ المرض اخاف يريد يتعبچ أتعبه .
ضحكت وهو ضحك وحضني ملابسه مبلله
_ كملي تجهيز الملابس للدوام انا اروح اسبح .
عافني وراح لزمت تلفوني بقيت اشوف شصاير ما صاير
بالمنشورات شفت ابوية ناشر عمي ياسين بالمستشفى
معقولة تأثر وتمرض لان ابنه عند علي الآكبر
من دخل شوفته الصورة : بعدهم عندك .
_ اي كملتهم خمسة وما اعوفهم اذا ما ارجع اربيهم من جديد .
_ يستاهلون .
_ امشي نامي باجر دوام .
_ وانت تنام ؟
_ صياد من الصبح وياهم لازم اروح استلمهم وهو يرتاح .
_ عليك الله منو صياد .
_ الخاطر الله لا تسأليني هيج اسئلة .
_ ما عندك ثقة بيه .
_ لو السالفة تخصني ترخّص روحي الدُر
بس الموضوع خطر على صياد اقل غلط يخسر حياته .
_ زين الصياد شخص أعرفه شايفته .
_ أحمم لا استغفر الله اي تعرفي لا تباعين هيج لا احجي
القصة من البداية للنهاية عوفيني اروح .
_ مبينه موضوعكم خطر الله ينصركم اهم شي تظل بخير .
رحت للفراش والرعد والمطر مستمر قبل لا يطلع همست
واني مطلعة بس عيوني : علي الآكبر .
_ يا راحته امريني .
_ تعال يمي .
_ مقلب .
_ من انام روح الرعد يخوف .
_ ما يحلى الدلع بس لبنتي بوية اظل واذا تريدين
ما اتحرك منجّ دقيقة وطز بالصياد وطز بالرياش كلهم .
اجه يمي سحبني على صدره عطره نظافة وجسمه دافي
بس حسيت بالأمان نمت وهو عافني براحتي حتى ما يتحرش
يحارب نفسه الخاطر راحتي .
الثاني يوم كعدت على صوت المنبه بس نسيت اسوي
اريد اطفي مكتوب على منبه "صح النوم بنيتي ضحكي حبيبي "
ضحكت لا ارادياً وغلقته تحركت بنشاط ابدل واضحك اجهز واضحك
صنع يومي كله قبل لا انزل خابرني وصوته تعبان
_ ها عمري كاعدة .
_ ها مطورين بيها عمري .
_ عمري وكل حياتي ضحكتي وفرحتي شعندي غيرج بوية .
_ من الصبح عندك طاقة غزل .
_ قشمريني بكلمة على اقل بس هلو حبي .
_ لا هاي هيه وبعد ماتريد حبيبي عمري كلبي .
_ الله الله الله الله الله اموت هسة .
_ اسم الله عليك اريد انزل احجي .
_ ههههههه قفلي باب غرفتنا قبل لا تنزلين
بيتنا بي حيّه وعگربه خاف سحر ما سحر .
_ هههههه تصدمهن قبل لا يصدمنك حذر الأستاذ .
سديت الخط ونزلت كاعدين كلهم يتريگون ويسولفون
طبطب عمي على مكان قريب منه رحت كعدت
جود : نوم العوافي زوجة أخي لعبتوا لعب البارحة .
ابو حسن : شبيك ؟
ام حسن : شكو ؟
دُر : كُلشي ماكو قابل شكو .
درت وجهي غمزت لجود وهمست بخجل
_ والله اخابر علي الآكبر عليك .
جود : دوريلي على مثقفة أتزوجها واسكت .
_ اي والله بس اسكت .
جود : هيلب علي الآكبر.
دُر : شواربك هيلب .
اكلت وهو خربان ضحك طلعت بسرعة وعمي وصلني للجامعة
_ صرتي جنتي بعد تگعدين يمي .
صعدت شهد ويايه تعجبت
_ وين تروحين ؟
شهد : اني اشتغل بروضة اطفال بس من المشاكل عفتها اليوم ارجع .
وصلها عمي وبعدين وصلني للجامعة دخلت للجامعة متوترة
لمحت جوري من بعيد من شافتني رفعت التلفون اتصلت ما ادري على منو
من اجت يمي غيرت طريقي ورحت للقاعة شفت نرجس كاعدة تراجع
حسيت كلبي طلع من مكانه صحت ودموعي نزلت
_ نرجس .
هي شافتني ونزلت راسها زعلانه مني وتمسح بدموعها
رحت يمها كعدت دفعت ايدي ودارت جسمها
_ اسفة والله لو تعرفين شنو صار ويايه .
_ تنطيني بلوك شسويت وتنطيني بلوك .
_ اني انطي بلوك لا والله والقران شوفي اخذي .
اخذت التلفون فتحت قائمة الحضر رقمها موجود
بقيت مصدومة وهي رافعه حاجبها تخزرني
_ مو اني والله مو اني .
_ لعد ابوية .
_ ما ادري بس مستحيل لج انتِ صديقتي الوحيدة
وحتى تعجبت لان ما تخابرين .
_ اخابر شلون اخابر وبلوك على رقمي .
بقيت احجي وياها واسولف على صار ويايه
وشلون تزوجت من علي الاكبر ختمتها هي بجملة نزلت بيها دموعي
_ عوض الله دُر بعلي الآكبر .
استلمنا محاظرات من لحظتها بقيت اقرا وهي تشرح
وتساعدني افتهم شنو فاتني والدكاترة عبالك عدهم انذار .
شهد ..
استلمت شعبتي ادرس بيهم والعب الأطفال وكل شوية
الكلمة المعروفة عدهم ست عندي حاجة
كملت وطلعتهم يلعبون برا سمعت صوت الباب انضرب
رحت فتحته ولي امر طالب قفلت الباب ورحت للمديرة
طلعت تتفاهم وياه ورجعت انتبه على اطفال .
للساعة بـ 11 رجعت سمعت صوت الباب من فتحته ولي امر
اريد اقفله لمحت انور اخو دُر واكف بعيد يراقب انقبض
كلبي قفلته وفتت بسرعة لزمت التلفون اريد اخابر على اخواني
بس خفت عليهم يتعاركون وامي تروح بيها والله .
صبرت نفسي وعلى اعصابي خلصت الدوام ورجعت
بقيت بغرفتي تعبانة وللعصر طلعت بالكراج جهال المنطقة
يدخلون يمي يدوخوني بـ اخبار المنطقة لازم كلها اعرفها
الفضول ذابحني ذبح ، رجعت التهيت اني والبنات بالمطبخ
ولليل ملمومين على سفرة وحدة ناكل نضحك هدوء حياتنا صارت
بعد الخربطة الصارت بـ أيامنا الفاتت .
ثاني يوم من نزلني ابوية وراح انتبهت على نفس المكان
بعده موجود هو والله نفسه ليش يراقب شنو براسه
دخلت والتهيت بالأطفال نص الدوام واجت المديرة عليه
_ شهد أقاربكم جوة يريد يحجي وياج روحي اني موجودة .
_ يا اقارب يجي للدوام ؟
_ ما ادري حبيبتي ينتظر جوة .
نزلت وقبل لا اوصل للغرفة دخلت المطبخ الروضة صغير
يصير جوة الدرج سحبت سجينة وخليتها بالبنطلون
كلبي نغزني من دخلت شفت انور ضحكت بستهزاء
_ نعم .
_ عندي طلب يمج .
_ تفضل .
_ انتِ تفضلي حتى .
_ مرتاحة كمل كمل .
_ اريد اشوف دُر اذا اروح تصير مشاكل .
_ وانت شنو حبيت دُر تالي وكت .
_ شنو اكرها ؟
_ ماكو شخص يحب شخص يضربه .
_ لا تدخلين بهل مواضيع .
_ انت اجيت عندي انتبه انت وين لو مشمشم وماكو تركيز .
_ احترمي نفسچ .
_ مو انت تعلمني احترم او ما احترم وبعد ممنوع
تجي لهنا وتطلب تشوفني لا والله ابلغ اخواني ويشوفون شغلهم وياك .
اريد اطلع ولزمني من ايدي دفعني بالغرفة
فتحت عيوني مصدومة من سد الباب
خليت ايدي على اذني وصرخت صراخ
هزيت الروضة على راسه طلعت السجين
وضربته بالجهة الثانية من السجين على راسه بكل قوتي
من الخوف اضرب بي وارجع اضرب يلزم بيه بس يريد
اسمت منه ويصيح : لج ما اسوي شي بس احجي وياج بس نتفاهم
واني اضرب بي فقدت ما احس على نفسي وعيّت واستوعبت الصار
من شفت الدم ينزل من راسه وگع ورافع ايده
_ كافي شهد كافي .
لزم الدم ورفع ايده يشوفني الدم صاح
_ راح افقد كافي .
ضربته راشدي واني اصرخ مرعوبة
_ لا تسد الباااااب لك لااااا تلززززززمني .
طلع والمديرة دخلت متعجبة لزمتني غسلت وجهي
جسمي كله يرجف حضنتها من الخوف وابجي
طلعت اريد اغسل لمحت من جوة الباب حذاء
تقدمت اكثر وكل جسمي صار ينفض من شفت
انور مشمور بالگاع والدم ينزل من راسه
صحت على مديرة ساعدتني غسلت وجهه
خفت بس لا يموت ياربي بس لا يموووت .
المديرة تضرب على وجهه كعد ما يكدر يفتح عيونه
يون من الوجع ضربت على وجهه وصحت
_ عفية اكعد اسفة والله مو قصدي .
انور : ساعديني اريد اروح للسيارة .
المديرة : اصعد هنا مضمد قريب نروح
يضمد الجرح اني اجي وياك استاذ .
راحت وصاحتني تحجي بصوت ناصي وهو يصعد
_ اخاف اروح وحدي لازم اني وياج نروح عيب اصعد وياه غريب.
شهد : اهلي ما يقبلون .
_ قريب المضمد بنفس شارعنا ما نتأخر لچ عيني لا يموت ونبتلي .
صعدت اني وياها ليوره وهو يسوق بصعوبة
مايشوف زين من وصلنا للمضمد صاحت
_ هنا عيوني بس هذا معزل خليني اصيحه بس ادك بابهم.
نزلت تضرب على باب وهو لازم راسه اخذ كلينكس
مسح عيونه ومد ايده على نقطة حمرة سمعت صوت
قفل السيارة فتحت الباب ما ينفتح كلبي بلحظتها حسيت
من كثر سرعته راح يوكف كلبي يمممممه وينج .
فقدت واني اضرب على شباك هو شغل السيارة وحرك
بكل سرعته درت وجهي على مديرة واضرب بالجامة
وهي تركض على السيارة .
_ لااااا شتريد مني حرام عليك والله اخواني يموتوك والله .
_ عدنا حساب وهل حساب لازم يخلص بأقرب فرصة .
_ اعتبرني اختك ، عرضك لا تكسرني .
من شفت ماكو فايدة منه رجعت اضرب بي
لزم راسي وسحب السلاح من خصره ضربني بطرفة
على راسي دخت بس بعدني ادافع على نفسي واحاول اخلص روحي
رجع يضرب بيه لحد مافقدت ماحسيت بعد بالدنيا بس اسمع اصوات .
دُر ..
كاعدة اني ونرجس وتلفوني يرن شفت رقم غريب
فتحت خط وياريت ما فتحته وسمعت اقذر صوت سمعته بحياتي
ياسين : زوجت علي الآكبر .
_ شنو تريد شكو تخابر الظاهر تريد تنكتل من علي الآكبر .
_ ههههههه هل مرة هو ينكتل زوجج شاف روحه ما يدري اني
بتك اصبع افره هو واهله كلهم .
_ اختصر ليش مخابر ؟
_ علي الآكبر منعناه من عرضنا وهو اخذج ويدري ما موافقين .
_ احسن واحن واعظم منكم تروحون لعلي الاكبر فدوة لكل
خطوة يخطيها زلمة وحادكم حود دوخكم .
_ ههههههههه دُررررر دُرررر اسمعيني اخت زوجج عدنا
بالحفظ والصون عندج ساعة اذا ما تجين وتكسرين
هل كلب ابن الكلب اكسرهااااااااا تفوت لغرفة بشرفها
تطلع متجردة من شرف بيت علي الآكبر .
_ شهد ؟
_ اي اي شهد عدنا بس لا تخافين عليها خطار اخت علي الآكبر .
_ لا عليك الله ابوس ايدك لا والله يموتوكم والله لا تسوي
هيچ الله يخليك البنية شنو ذنبها شهد فقيرة حباب.
جانت اخر كلمة منه قبل لا يغلق الخط
" أنقذيها "
تخبلت صرت املخ بروحي ايدي ترجف وكفت اريد بس اطلع
وكعت على وجهي ونرجس تلزم بيه تريد بس تسيطر على حركتي
_ لج اهلي مجرمين نررررررجسسسسس اهلي دمروني
وراح يدمرون بنية بريئة ما الها ذنب بكلشي صااااار .
اريد اوكف الدنيا كلها افترت بيه ورجلي انشلت
اهتز كلبي بمجرد اتخيل ابلغ علي الآكبر بالصار
يموتنا كلنا والله يموتنا خلاص فتحت تلفوني
اريد احجي ما اشوف ولساني ثگل : نرجس اسم ريان اخوية .
عيوني تنگلب واصحي روحي بلطم يا مصيبتنا
شوية وسمعت صوت نرجس تحجي
_ السلام عليكم حضرتك ريان اخو دُر .
_ اي نعم .
_ دُر تريدك بالجامعة ضروري ضروري تجي .
اخذته منها قبل لا تكمل حضنتني بجيت بحضنها
واني احجي بخبال : شسوي اروح الهم لازم اروح
بس علي الآكبر حلفني ما اهدمه اذا اروح اكسره
ما يستاهل والله ما يستاهل .
نرجس : لج بس انتظري خليني افتهم .
جسمي تصلب وكلبي دكاته عبرت الطبيعي
من القهر صرت ما اعرف شنو احجي واسب
الى ان رجع تلفوني يرن جاوبت نرجس وصفت مكانه
دقايق ودخل ريان لابس رسمي من شافني بهت
اقترب مني رفعني كعدني عدل على كرسي
والتفت على نرجس وهو يحجي : شبيها شصار و..
يريد يكمل وصار وجهه بوجه نرجس حسيت بريان
بدقيقة ايده صارت قالب ثلج والرجفة هزتني هز
ملامحه كلها صدمة وتنفسه صار عالي مخربط
همست بخوف : شبيك ريان تسمعني ؟
يتبع ...
ثقل ميزانك بذكر اللّٰـه:
- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد