_______________________ الــريـاش
﷽
𓆩 اســاور حــسين 𓆪
بقلمي رواية : الــرياش
أصابعكَ التي خسرت نعيم لمسيّ
ستبقى تعيسةً للأبد ولو لمست بعدي الحور ..
لطفا لا تنسون التصويت والتفاعل بين الفقرات
⊰ دُر⊱
ساكت ماكو جواب عيونه ثابته بعيوني
ضربت علي صدري بجنون وعليت صوتي اكثر
دُر : يتيمة اعتبرني يتيمة مو هيج وصيتك ليش تكسررررررني
لككككككك ليشششششششششش احجي احجي فهمني
علي الآكبرررررررررررررررر .
شغلتها وصرت احفظها تنطبع براسي كلمة كلمة
صوت علي الآكبر وهو يحجي وحتى مبين صوته مثل النايم
علي الآكبر: عاشت ايدك نستخدمها ورقة رابحة نضغط
عليهم بيها ، اشتغلهم على بارد لان اذا نكشف كلشي بسرعة
ما نستفاد شي يكدرون يشتكون علينة وبيباي للسجن
الثار اخذه من عيونهم اعتمد عليه
انا علي الآكبرافوز بالرهان وتشوووف .
رجعت راسي على تخم الدنيا كلها تفترّ بيه
ريگي يبس ودگات كلبي صعدت الراسي
غوشت عيوني صرت اسمع بصوته بس ما اشوفه
انعدمت الرؤيه بعيوني حسيت بإيده ترفعني
على جرباية ويضرب على خدي غسل وجهي
ما اريد اكعد اريد افقد شلون اواجه شنو الراح يصير بحياتي ؟
ما عندي طاقة اتقبل اي حقيقة .
صار بعيد يخابر ومنفعل يسب ويهدد ويتوعد
سد الخط واسمع يصيح : يوسف ابن اخوك يسار خيسه
هو سبب كلشي راح يصير بيكم افتهمت .
سد الخط ورجع يتصل وينتظر جواب
_ جود وزع صوتياتهم كلها على تجار
موووو شغلك وزعها ، خليهم شيسون يسوون
فكرت لك جوووووود هذولي شياااااطين .
كعدت ادور على جنطة شفتها بصف الحمام
وكفت ورجلي صايرة خيوط ما تشيلني بعدني
بالبدلة امشي واسحل بيها من شافني سد الخط
اريد اوكع من طولي اوكف واوگع نزع السترة
وكف ردن القميص صرت اخاف منه بمجرد
ما فكر يقترب مني رفعت ايدي احتمي بيها
سحبها من راسي يمسح بدموعي دفعت ايده
اخذت الجنطة اريد افتها حيلي راح اخ يا نار كلبي .
ذبيت كلشي بس سحبت ملابسي اخذهن من ايدي
وشمرهن على تخم شالني صرخت كعدني على
جرباية وهو سحب التخم الصغير صار مقابيلي
علي الآكبر: غالية وقدرچ عالي عندي غصباً عليه
اكعد واحجي وابرر لحد ما اروي عقلچ وگلبچ .
دُر : سألتك وما جاوبتني قهرتني فوك قهري
كسرتني وجنت ادري راح انكسر منك ردتني
اتعلق بيك حتى شنوووو هااا شنووو غايتك ؟
علي الآكبر: ركزي بهل مرايا شوفي حالچ
اطلع ****** اذا ما اخذ كل دمعة وكل صرخة
وكل وجع صار بيچ من بطن عيونهم كثر ثارهم
كثرررررررر حقدي كثررررر .
جزعت وهاجت جروحي ضميت وجهي بيدي بضعف
_ اهلي حتى ما يحبوني شلون تكسرهم بيه
انتَ ماكسرت احد غيررري .
ضرب على صدره بكل قوته سمعت صوت ضلوعه
_ لچ انا صاحب خوات شلون اكسر بنية مثلهن
انا رباني زلمة لو عندي ثار اخذه من شوارب زلم مو نسوان .
بقيت الوب ادور على تلفون واني كاعدة اريد اشوفه
_ والتسجيل هااااا شنو معناه ما راح اصدك بيك بعد ابد
علي الآكبر انا احساسي مايخيب جنت حاسة وراك شي .
علي الآكبر: وراي ثار لا يبرد ولا ينام وزاد اليوم
ثاري تضاعف وخلي شيصير يصير .
ضربته على صدره وكفت صرت بعيدة منه احجي مستهزئه
_ ما اوصيك خابرهم بشرهم فزت بالرهان .
علي الآكبر: بعدني ويني وين الفوز الرهان تحت التنفيذ .
دُر : استخدمني ضدهم .
علي الآكبر: مو علي الآكبر اللي يستخدم عرضه
حتى ياخذ ثار احترمي وثمني كلامچ دُر .
دُر : لا تبيع بطولات براسي على فعلتك هاي
تروح فدوة اليسار عمي طلع فقير بصف افعالك ابو الرهانات .
ظل ساكت يخفي غضبه ضاغط على اعصابه
_ انزعي البدلة وفوتي غسلي .
دُر : لا تدخل دير بالك تدخل .
اخذت ملابسي شمرت البدلة من الحبام للغرفة سبحت غسلت روحي
غسل واني اتذكر بمواقفنا بكلامه وتصرفاته
فار دمي صيحت واني بالحمام
_ فوكاها صلف يقترب مني ويلقي شعر مايحجي طبيعي
مثل العالم والناس والله شكيت من البداية وخفت
مبين داهية ورطة انت ورطة وتورطت بيككككك .
نشفت نفسي ولبست فستان رفعت شعري ينگط مي
على ظهري ، رحت ادور على تلفون ماكو
_ عندك التلفون مو ؟
_ عندي .
_ اشبع بي .
اخذت حذاء كعدت البس بيها واتذكر من يلبسها اليه
_ لا ويسوي نفسه حنين وبس هو وبس المتربي
ويخاف رب العالمين ومحب وبس يحلف اربع وعشرين
ساعة يحلف وحگ العباس وحگ الحسين وحگ الله
تالي ما تالي طلع مخطط على بنية لا حول ولا قوة
متراهن يستخدمني ورقة رابحة المتربي .
افتح بالباب مقفول ضربت على حايط ورجعت
_ لو مو تقفل الباب لو تموتني يا علي الآكبر اليوم
يمك ما اظل اطلع يعني اطلع لا تجبرني اصرخ
واخلي الفندق كله يتفرج علينة .
علي الآكبر: دُر راح تتخربطين اكعدي نتفاهم .
دُر : انزع قناع نظرات المحب
وتعال طلع بطولاتك وابرز عضلاتك على ورقتك الرابحة .
علي الاكبر : انتِ مرررررتي موووو ورقتي الرابحة
انتِ مو الرهان ولا المقصودة بالتسجيل .
دُر : جذاب ولا تحلف وحگ وحگ وتنزل الحلفان
وانت من فوك ليجوة مليان ذنوب وذنبي
بركبتك اليوم الدين يا علي الآكبر .
ما ادري شنو يدور براسه يصفن بعيوني
ويرجع يدنك راسه منظرة ثابت بس رجفت
ايده فضحت المستور : افتح الباب .
_ دُر نتفاهم وبعدها وين ما تروحين اوصلچ بيدي .
لزمت بالحايط وكعدت بصف الباب دايخة
_ اخر مرة انبهچ الدنيا تلف بيچ نامي تعالي هنا نامي
ما اجي يمچ ولا احتك .
ضربت على وجهي وارفس برجلي
_ لااااا تمثل الحب لاااااا تمثل دير بالك .
علي الآكبر: حبچ ما امثل بي اعيشه
انهاري صيحي سبيني اذا تبردين من تضربيني ضربي
بس تذكري حلفت بالعباس ابو فاضل بعد اتحمل كلشي
وما اعوفچ لو مهما يبدر منچ .
دگيت ايدي بالگاع اجه بتجاهي
_ لاااا طخني اكلك لا تجي يمي .
كعدني مقابيل الاكل وصاح
_ تاكلين لا قسماً عظماً اسوي
سوايه ما صايرة بتاريخ العراق.
بتحدي صادفت عيونه عيوني
— شنو تحس انتصرت من كسرتني اشرحلي احساسك ؟
استغفر وصار ينافخ فتح الجنطة اخذ ملابس
وفات يسبح ، دورت على تلفونات ماكو بس طلع
شكد ما اني تعبانة بس ما اكدر اكعد عنده دقيقة وحدة
_ رجّعني الأهلي گول الهم رجعتها بيوم عرسها كسرتها
ما كسرتكم بس استغليتها وحققت غاية .
شاف تلفونه ورجعه بجيب التراك
_ غاية ؟
دُر : اي غاية تعجبت اگول اني شبسرعة هذا الرجال
حبني بهل طريقة وين اكو هيج جنت شاكه تمثيل وطلع شكي بمحله .
علي الآكبر: استغربتي من طريقة تعاملي وياچ
ومثل طگت اصبع ربطتي المواضيع وفسرتي كلشي جذب
لا كعدتي ويايه ولا سمعتي ولا افتهمتي .
دُر : ماعندي حجي وياك كلامي احجي اني وابوك
ويمكن هو هم متفق وياك كلشي يصير .
رفع اصبعه بتحذير وفتح عيونه خوفني
_ ديري بالچ دُر تتجاوزين بحرف على ابوية
احجي سبيني اني بس ابوية خط احمر .
دُر : وبنات الناس عدكم خطوط خضرة
عادي عندك احد يكسر اختك مثل ما سويت بيه ؟
علي الآكبر: يخسي اكبر شارب يفكر يتگرب من خواتي .
مشاعر منهارة ، افكار مثل الإعصار وداهمت راسي
من اثر كلماته ضربت علي صدري واني منهارة
_ لو عندي اخ بي خير ما اوصل لهل مواصيل
استغليت نقطة ضعفي وضربتني بيها شفتني
ما عندي اهل افتقد الحنية وافتقر الاهتمام
گلت لگيتها اتقرب منها من هل طريق .
بعد ما كدر يسمع اكثر لزمني دفعني بهدوء
عكس غضبه نزل صار بمستوى وجهي يفهمني
_ دُر ماكووووو لعبة اني حبيت سنتين واشهر وايام
تحملت على اعصابي جنتي حلم ومو حلالي صبرت
وحتى بيني وبين نفسي اخاف اذكرچ .
دُر : جذاب استاذ بالجذب .
علي الآكبر: بيوم الصارت فرصة صارعت روحي
حتى ما اتقرب منچ ، فرق هواي بيني وبينچ
وبأول لقاء بيناتنا حجيت وياچ بيوم المطر تتذكري
حسيتچ تشبهيني نسخة مني وعبالك صار عمر اعرفچ .
دُر : لا تحاول بعيوني انت جذاب .
عيونه بيها حزن الكون ، حضن وجهي بين ايده
ادفع بي ما يقبل يعوفني يريد يكمل كلامه
_ الظاهر جانت افعالي مو كافية تثبت حبي ؟
دُر : تمثيلك فاشل كاشفتك ونازعت حتى ما اشوف وجهك
بس اني غبية ما سمعت كلام انور ويسار ورجعت الك .
ضربت ايده وارافس اصيح بي
_ غير يحس ويعوفني لك عوفني بحالي
شيل ايدك مني شيلها راح تموتني .
رفعها مستسلم كعدت اشهك
_ وممنوع تحجي حرف بعد اسكت مني
اريد استوعب مصيبتي .
بقيت بمكاني وهو كاعد على تخم بقيت افكر الى
ان راسي تخدر غصب عني صرت اغفي
ما اريد استسلم وانام غسلت وجهي ورجعت بمكاني
عيوني ثگلت ، اتثاوب وارح اغسل وارجع
اخر شي استسلمت وكفت بتردد عبرته نمت على
سرير لفيت نفسي وبديت اغفي دقايق وراح يطفي
الإضائة فات للحمام اني نمت بعد ماعندي حيل .
للفجر بكل خفة وسكينة حسيت روحي نايمة على رجله
يمسح على راسي فتحت عيوني مورمات عيونه
لا ما نايم دفعته سحبني لمني بحضنه
_ ماعندي حيل عوفني .
_ ابقي هنا .
_ عوفني ما اكدر ادفعك .
مسح دمعه نزلت على طول خدي
_ كل دمعة نزلت منچ دُر راح يدفعون ثمنها .
_ لا تحچي .
_ ما احچي لان الكلام سهل ، مو يگولون الحب افعال
افعالي من اليوم هي تتصرف وياج خلص الكلام .
_ جنت اعرف الفرح مايدوم ويايه والبارحة ثبتت احساسي .
كعدت واني انزل من السرير احجي وياه
_ لأخر دقيقة البارحة قبل لا اسمع الصوت
واقرا الرسالة تخيلت حياتي وياك راح تصير حلوة بشنو اذيتك ؟
رجع ظهره على السرير ورفع راسه جر نفس طويل وذب حسرة
_ تعبتيني لچ دُر كافي .
_ رجعني ما اريدك بعد بس رجعني وخلص مني .
_ حلفت وما اتراجع على حلفاني يا در يا بنت يوسف
ما اعوفچ لو كلها تصير ضدي واتحارب وانتِ تحاربيني
وياهم أبقى متمسك بيچ .
رفعت شعري فتت للحمام غسلت وطلعت
_ كرهت تمثيلك .
_ كاعدين بمسلسل تمثيل شنو ؟
_ مو راهنت واعتبرتني ورقة رابحة بيدك خلص
رجعني يسار يگول تريد تنتقم ما ادري على شنو تنتقم
بس خلص انت ربحان رجعني .
ضحك وهو يقاوم اعصابه بكل مرة اذكر بيها اسم يسار او انور
احس يريد يفلش المكان بس ما ادري شلون يسيطر على نفسه
علي الآكبر: الظاهر انتوا عائلة تتأثرون بالمسلسلات
اكشن ودراما كلكم بعلي يا انتقام مو مسلسل بالقران مو مسلسل
احنا بالعراق مجتمع عادات وتقاليد.
رفع ايده ياشر بيها ويشرح من كل كلبه
_ عمي احنا ناس اصل وفصل من نحب نوعد ونوفي
واذا اختارينا وتزوجنا بيوم التسجل البنية على اسمنا
صارت شرفنا والشرف غالي عدنا وعيب ينذكر طاريها
يا ثار يا فار تحجين بي هاي سوالف يسار خيسه ماتمشي عدنا .
دُر : اي لعد شنو معنى كلامك بالصوتيات
اذا مو اني يا رهان تقصد ؟ وشنو الورقة الرابحة ؟
علي الآكبر: مشاكل بين الزلم لا تدخلين بيها .
دُر : معناها انت جذاب .
علي الآكبر: بعدين تتندمين دُر .
دُر : فهمني حتى ما أحكم عليك .
انتظر يجاوبني بس بهتت من عاف الغرفة وطلع
بقيت انتظر يرجع تأخر رجعت نمت سمعت صوت
اذان الفجر واني بمكاني تنزل دموعي على المخدة
من خلّص الاذان وراها بنص ساعة رجع .
_ دُر تسمعيني ؟
_ اممممم .
_ بدلي نروح نزور .
_ رجعني شبيك .
_ مو تريدين احجي تعالي نزور
واجاوب على كلشي تريدي .
كعدت باوعت بوجهه عيوني متجمع بيها الدموع
وهو يباوع بقهر كعد ينتظرني مشيت بدلت
قفل الباب وطلعت وياه بس نزلنا من المصعد
مد ايده ماقبلت انطي سحبها هو وحضنها بين كفوف ايده
يمشي سريع واني مشيتي صارت ركض ومستمرة احجي
_ يلة اسمعك ما تحجي .
_ نزور بالبداية .
_ ماتخاف اشرد .
_ اذا يعجبچ سويها .
_ شتسوي اذا اشرد منك .
_ انتظر ترجعين تعودت انتظرچ .
_ بعد استمر بالجذب شوكت انتظرتني ؟
_ دُر احجي عدل هذا اخر تنبيه .
_ شسوي اذا اشرد منك .
_ اللي ما سويته البارحة .
كمل وعاف ايدي وهو يفهمني
_ فوتي للتفتيش انتظرج هناك لا تتأخرين .
ذخلت ويايه نسوان تفتشت من خلصت اكو بردة
بقيت وراها ما طلعت اراقبه من بعيد هو يروح
ويرجع ينتظرني ، تقرب وتعب كعد اخر شي
صار قريب من البردة يحجي بصوت عالي
_ ما تعبتي بوية اطلعي اني من يمي تعبت .
دفعت البردة ومشيت اخذ ايدي وراح على حجية جبيرة
بالعمر كاعدة تبيع بيض سلك وكيمر وكاهي اخذ منها
دفع ورحنا على واحد يبيع عباية صلاة أشتره اليه
وساعدني البسها صافن بوجهي عيونه ما يشيلها مني
دخلنا صرنا بين الحرمين بواحد من الممرات العالم تگعد هناك
كعدت اني وياه رتب الاكل واني بس اباوع عليه
_ من البارحة كلشي ما ماكلين ناكل ونروح نجدد وضوءنا .
_ بالبداية تحجيلي كلشي .
_ اذا ما تاكلين ما احجي حرف واحد .
سكتت ولميت رجلي على صدري سندت راسي عليها
وغمضت عيوني تعبانة وجوعانة وكلشي بيه .
حسيت لملم كلشي بدون ما ياكل وتقرب كعد بصفي
مد أيده حضني درت راسي بتجاهه باوعت عليه
ورجعت اباوع على ضريح الأمام العباس صار بجهته
_ حلفت بي ماتعوفني بس ما حلفت ما راح تأذيني
طلعت مثلهم تشبهم كلكم نفس الطينة .
اخذ ايدي باوعت على ايدي وهو هم
يلاعب اصابيعي جاوبني بصوت باهت
_ خربوا فرحتچ الحيوانات بسيطة بس ارجع
اعلمهم شلون يصيرون زلم ذبلتي اذا ما اذبل ايامهم .
رفعت راسي وصرت اشر اله من كل كلبي
_ بس فهمني انت حاجيني .
_ الصوت صوتي ، والكلام كلامي بس مو انتي المقصودة
الموضوع وما فيه نخوني وطلبوا اساعدهم منو وشنو ما اكدر احجي
هسة اخاف عليهم كلش اخاف عليهم اكثر من ما تتصورين
بوقت شغلي اني وابوج كشفت مصايب تشيب شعر الراس
ومن ضمنها هل قضية لليوم احوم عليها اريد اعرف الحقيقة .
_ قضية الجثة .
_ اي الجثة موضوعها طويل ومشاكل صارت وبيدي
اوراق ضدهم لو هل اوراق مو عندي ترا ما اكدر على أهلج الدنيا صعبة وتمشي بس للناس اللي عدهم سلطة وفلوس مثل اهلج اني والمثلي كلها
تصير ضده بيوم المصايب بس اني اشتغلهم على بارد مو بس اني
اكو ناس يساعدوني وهمه اصحاب القضية ما اكدر اوضح اكثر .
_ واني ؟
_ انتِ اختاريتج تصيرين مرتي خارج قوس
مشاكلي وياهم انتِ بعيدة لا تدخلين ، دُر فكري شنو استفاد من تتأذين .
_ اتمنى اكدر ارجع اصدك كلامك .
_ الأيام بيناتنا وهي تتكفل بكلشي .
_ زورني .
_ امشي .
اخذني وصلني مقابيل الأمام فهمني منين ادخل
وشلون ارجع عفته ودخلت وكفت مقابيل قبر الامام
العباس اكتفيت اشرح الصار بدموعي خربوا فرحتي
ما ادري بمنو اصدك وين اروح كلهم صعبين واني مو كدهم .
سلمت امري ومصايبي وطلعت عيوني مورمه اريد امشي
ما اكدر شافتني حجيه وياها بنتها لزمتني غسلت وجهي
_ وين اهلج خالة انتِ منين ؟
_ برا خالة عفية بس طلعيني زوجي ينتظرني .
_ يمه خطية يمكن ضغطها هبط .
ساعدتني هي وبتها طلعت ادور هو اجه مصدوم يركض
لزمت ايده حيل وذبيت ثگلي عليه
_ علي الآكبر.
_ شصار شبيها .
_ خالة يمكن هبط ضغطها شفتها تريد توكع طلعتها ويايه .
تشكر منهن واخذني على صفحة كعدني يعدل بشالي
_ دُر ابوية شنو يوجعج .
_ اريد انام علي تعبانة .
حاوطني بيده اجر سيارة وصلنا مقابيل الفندق
نزلني صعدني بالمصعد حاضني بكل قوته
واني متمسكة بي اخاف يعوفني واوگع
جريت نفس من دخلني الغرفة كعدني على سرير
نزعني العباية والحذاء ساعدني ابدل ملابسي
فتح القراصة من شعري وعدل المخاديد
- نامي عدلي نفسج دقايق واجي .
_ لا لتروح اخاف اتخربط .
_ لازم تاكلين .
كعد يمي اتصل عليهم طلب اكل وظل كاعد يمسح
على وجهي وشعري ايدي بيده رغم كارهته
عافني من وصل الاكل استلمه واجه سحب الطبلة
رتب كلشي وسندني على مخاديد يسوي لفات ويوكلني
ويشربني بالعصير من كملت اخذ من جنطته حبوب
لوجع راسي شربتها اريد انام صعد على جرباية
وسحبني بحضنه ضربته بكل قوتي هو لزم ايدي حيل
وصاح بعلو صوته : ناااااااااااااااامي ايدج لا ترفعيها بعددددد .
بقيت اقاوم اريد يعوفني ما يقبل لازمني بكل حيله
واني ماعندي حيل خيلت راسي على صدره غطاني
الحد كتفي بديت اغفي هو نزل باس خشمي وحضني
رجع راسه وهو نام على نومتي .
كعدت العصر على صوته يحجي بالتلفون بصوت ناصي
_ ما اريد أكشف اي شي هسة خليها بعدين تعرف
لا لا ليظل بالك يمكن اقتنعت اني اعرف اتصرف وياها
انت شوكت ترجع من السفر ؟
بقيت على نومتي بس عيوني فاتحتها كمل بعد ما استمع
دار وجهه شافني كاعدة رفعت نفسي مخنزره بوجهه
_ شنو اللي ماتريد ينكشف راح تخبلني
بعد ما اتحمل استمر وياك منو يكول بعدين ما تأذيني منووو فهمني .
سد الخط واشر على جنط
_ خلص حجزنا لازم نطلع .
_ لا عبالك اسافر وياك للشمال منو يگول ما تموتني .
_ اني اموتچ .
_ اي
_ شسمه الفلم ؟
درت وجهي بدلت ملابسي كاعدة البس بالحذاء
وهو تقرب كعد بصفي أدنيت منه
_ دُر ميصير نرجع للبيت اني مفهم الكل نسافر .
_ ما اسافر وياك مشكلتك انت شلون مفهمهم .
_ نتفاهم هناك تتعرفين عليَّ واتعرف عليچ .
_ ابد لا تحاول .
_ ليش ؟
_ لان ما اريدك وبس ارجع احجي كلشي وننفصل .
_ اني وياج ننفصل ؟
_ اممممم .
_ اممممماااات .
حاول يقنعني قفلت نرجع يعني نرجع والسفرة تنلغي
اني ميته من القلق والخوف وهو يدور سفرات بدم بارد
_ تدللين نرجع واليوم .
دخلت للحمام قبل لا نطلع غسلت وجهي وجهي صاير
أصفر خجلانه وخايفة أروّح البيتهم وحايرة اشرد البيت
اهلي بس ما راح يسكت لو اسافر قفلت الحمام وصرت
اروح وارجع حتى كليتي وجعتني من الخوف طلعت وبتردد
وكفت مقابيله العب بـ اصابيعي
_ اريد تلفوني .
_ تخابرين منو ؟
_ ما اخابر بس اريد اكتب .
طال النظر لدقايق طلع تلفوني من جيب بنطلونه
سلمني الجهاز واخذ الجنط ينزلهن قبلنا
دورت بمحادثة يسار محذوفة اتصلت مسوي حضر
فتحته واتصلت على يسار جاوبني بصوت خشن
_ مساء الخير يا عروس .
_ يسار شنو معنى الصوت مافهمت .
_ كلشي واضح لا تبقين مغمضه عيونچ على حقيقة
مبين ما يحبچ لچ علي الاكبر اكبر لوتي يفر عقل اكبر واحد
انتِ المراهن عليها ونفسچ الورقة يضغط بيها علينة .
_ شلون يضغط عليكم بيه ترا هاي ماتخش العقل .
_ راح تنصدمين صدمة حياتچ بيوم من الايام والله
يريد يوگع الكل ويضرب راس براس هذا هدفة ينتقم .
_ ينتقم على شنو بس فهمني ليش ينتقم .
يسارّ يحجي وعلي الآكبر دخل رفع اصبعه
على شفايفه بعلامة اسكتي جر التلفون
يستمع للكلام ويهز براسه وهو يسمع
رفع وجهي ردت احجي سد شفايفي بيده
علي الآكبر : امشي لك ابو براطم باباتي جايك
اني راجع حتى سفر ما اسافر راح افرغ روحي الكم
اذا ما اخليك حتى تحلممممممم بـعلي الاكبر لك يسار تسترجل براسي
ولك ويامن ورطت روحك انت يعااااار على الزلم .
سد يسار الخط شمر التلفون على سرير
ويريد يحجي يتعارك يصيح ظل بس يوكف
يمي يشنج بروحه وينتر : لچ اااااااااااااااااخ منچ ااااااااااااخ.
دُر : لا تقبل تسولفلي ولا تقبل احد يحجيلي .
_ اشششششش ولا صوت
_ لا تگول اشششش .
_ دُر تكفي شري .
_ انت دير بالك مني واحترمني اني مو جعويط .
_ جعويط ؟
_ اممممم .
- اني بيا حال شوفي اذا بعد تخابرين هل حيوان ابن الحيوان
اكسررررر ظهره وظهر اهله كلهمممممم .
_ صاير تكسر شنو تايهين .
_ لااااااااا تدافعين الهمممم ديري بالچ .
_ تعال بعد بس تضرب وتكمل .
اخذت التلفون يريد ياخذه خليته ورايه
ولزمته من بطنه ادفع بي سحبه مني
اخذ باقي الجنط يمشي مقابيلي قبل لا يطلع الباب
ذبها بقت عيني عليهن وارجع اشوف شبي
مد ايده سحبني من خصري وباس راسي
وهو يجر نفس بحسرة حضني وهو يمسح على شعري
علي الآكبر: الله وحده يعلم ماجنت آريد هيج يصير
بـ اول ليلة سوية ، بس هذولي شياطين مايعرفون منين يوسوسون .
بطرف اصبعه رسم خط على طول انفي
غمضت عيوني ورجعت فتحتها
_ بس نطلع هل باب ونوكف على باب بيتنا
تبلش حياتنا من حق وحقيقي كزوج وزوجته
كل الصار بهل غرفة يندفن بيها .
حاولت احجي سكتني وكمل
_ نروح للبيت مشاكلنا ما تتعدى بابها
شيصير ويانا ممنوع يطلع لأي كائن
نتعارك ونتصالح ونتضارب كلشي بغرفتنا .
دُر : لا تنتظر مني حياة حلوة وانتَ بهذا الغموض ويايه
اذا ما أكشفك ما ارتاح .
رفعت نفسي على اطراف اصابيعي واشرت على عقله
_ احفر كلامي هنا ، باقية وياك حتى مثل ما سويت بيه اسوي بيك
اقهرك مثل ما قهرتني واخليك تصرخ نفس صرخاتي
مو دخلت حتى تنتقم واني باقية حتى انتقم .
ابتسم بقهر وعيونه تاهت رفعها ليفوك
_ حالف ما اجرحهاااا حالف ربي صبرني .
اخذ الجنط وفتح الباب وهو رافع حاجبه اشر براسه
_ اطلعي قبل لا تطلع روحي .
تشكر من الموظف ورحنا للسيارة صعدني
وهو فاير دمه يعيد بكلامي
_ تريد تنتقم عايشة الدور .
_ اي انتقهم قابل شنو بس انتَ تعرف .
_ بالله شلون تنتقمين دُر .
غمزت واني اجاوبه اقلد صوته بالتسجيل
_ اشتغلك على بارد .
رفع ايده دايخ
_ والله ما ادري شحجي وياج صفنتي عقلي .
_ سوق السيارة وخلصني وفر الكلام تحتاجه بعدين .
دار مني يسوق بدون ما يحجي وصلنا بهتت
من شفت اهله كلهم موجودين وبيد سراج الدين خروف
يريد ينزل ابتسمت بوجهم وصحت بي
_علي الآكبر اوكف دقيقة نزلني وياك لا تروح بعيد اوكف يمي .
نزل راسه يباوع بطرف عينه
_ شكد قوية .
- شعبالك .
دار فتح بابي وام حسن رجّت المنطقة بالهلاهل
وسراج وسيف الدين ذبحوا الخروف جوة رجلنا
اشتغلت الاغاني من جوة وجود طلع بوجهه
النوم نزل روحه وصاح : ولكممممممم رجع علووووووكي .
حضن علي الآكبر وهو هم حضنه ومن كل عقله
تقدم صار قريب على علي يهمس
_ وجهك اصفر مبين اليل كله تدحرج جوة الجرباية
علي الاكبر : اي والله يا خوية خلصتها دغلات اليل كله .
جود : والنهار كله لان مارجعت يا سقوطه .
ابو حسن : بوية علاوي اطبع الدم على حايط .
علي الآكبر: شني مشتري بيت ؟
ابو حسن : اطبععععععع اكلك .
نزل طبع ايده بالدم وخلاها على حايط
باوع عليها ورجع ايده بالدم اني لعبت روحي
غير طريقة وما اشوف غير طمغها براس جود
_ يوم الك ابو الجود ابو لعلوم هاي غمه دموية .
جود فتح ايده عبالك ولعبت روحي
صاح : لكككككككك علي لااااااااا يمممممممه .
الجكليت ما ادري منين يجي من بيتهم وحسن
واطفاله يشمرون علينه ويضحكون دخلت
وعلي الاكبر راح يغسل بالمغسلة البرا
كعدنا بغرفة ام حسن ، البنات باركولي
وعلي الآكبر دخل للخطار شهد يمي تسولف .
انتبهت على وجهه بي شخط سالتها
_ شبي وجهچ حرامات صافي .
اجت يمي تحجي بصوت ناصي
_ گلت الهم تعورت بالحمامات بس الصدك
غير هذا اخوج رحت ابدل حذائي وهو دفعني
بدون ما يدري واعتذر مني .
_ اخوية اني منو انور لو ريان ؟
_ ما ادري هو الموجود البارحة ؟
_ هذا انور اعتذر منچ .
_ اي والله اعتذر مني وراد يمسحه بالكلينكس ماقبلت
اخذتها منه واني مسحتها ومايقبل اتحرك اله شافها وكفت دم .
انقبض كلبي من كلامها بلعت ريگي واني اتذكر كلامه وتهديده
_ الحمدلله على سلامتچ ، شهد نصيحة وين ما تشوفين انور
ابتعدي الف متر هو اخوية واعرف بي شنو .
_ شعندي وياه وين اشوفه بعد هو حادث وصار وخلصنا .
ام حسن : شهد صعدي دُر ترتاح بغرفتها وتشوفها .
اخذت الجنط ماتقبل اشيل ولا وحدة صعدتني وهي
تعبر عن جمال العرس وشلون الكل صار يسولفون بي
رادت تفتح الغرفة مقفولة : يااااا علاوي قافلها
انتظريني دقيقة بس اجيب المفاتيح واجي ركض .
هي نزلت واني بقيت اشوف المكان غرفتين
موجودات والثالثة غرفتنا اريد آروح اشوف
الفوك بعد وسمعت صوته : تأخرت .
_ لا .
فتح الباب هفت ريحة عطر طيب من داخلها
دخل قبلي ومد ايده : انطيني ايدج وفوتي برجلچ اليمين .
دفعته من كتفه اخذني على كد عقلي وعبرها
_ الله حلوة الغرفة
حجيتها وسكتت هو ضحك ضحكت
على ضحكته واقتربت منه رفعت نفسي
هو نزل روحه عباله اريد أبوسه استغل الفرصة كملت كلامي
_ حلوة الغرفة اللي راح تتعذب بيها بكُل برود .
ابتعدت هو ظهرت على ملامحه الدهشة مرتب ورد صناعيّ آخضر
بصف الميز لزمت الورقة وكملت .
_ تريدني وحسب كلامك عابر مراحل الحب
قررت اني دُر يوسف انتقم منك بيه ، اكيد عقلك صور الك
نموذج على افكاري مو ؟
طگ رقبته وعاف تلفوني على ميز وطلع من الغرفة
اخذت حمام وطلعت من ملابسي شي جديد لبسته
رتبت نفسي واخذت تلفوني كتبت
( سأكون هوس بهيئة امرأة داخل عقلهُ )
قراها وطلع اندك الباب فاتت شهد
_ يلة دودو الأكل كمل كلهم ينتظرون .
_ ها ؟
_ منتظرين تنزلين حتى ناكل .
_ كلهم موجودين .
_ اي .
حكيت شعري وهمست بصوت يرجف
_ دقايق بس واجي وراج راح اكمل .
عافتني وراحت اخذت تلفوني وكتبت
واني ارجف : خايفة .
دزيتها قراها كملت محتارة
_ بعمري ما مريت بهيج موقف يعني عائلة تجتمع
ولازم ادخل شلون احجي وياهم اني مو اجتماعية
والله خايفة وخجلانة كلش وين اروح لو مسافرة احسن .
سديت التلفون عدلت شعري وجريت نفس يمه
شسوي بروحي هسة اني يا مصيبتي والله قلق
دخل قبل لا اطلع يتصرف وكأن ما قاري رسائلي
_ كملتي .
_ اي .
_ تريدين ناكل هنا .
_ عيب منهم ينتظرون .
_ اني نازل اذا تريدين تعالي انزلي ويايه .
بقيت اهز براسي رفع حاجبة سديت الباب
نزل واني وياه شافتنا امه ضحكت جود اول ما لمحنا
طنگر : شوكت تزوجوني حسبي الله ونعم الوكيل على اهلي .
السفرة ممدودة كل واحد كاعد وعائلته بصفه
راح علي الآكبر قريب من ابو اني ما كعدت بجهته
عبرت : اكعد يمك عمو .
ابو حسن : هلا بعروسة بيتنا .
كعدني وعمتي بصف علي الآكبر
ركزت الكل يسولفون بس هو ساكت
كل شوية يخطف نظراته عليه يشوفني
اكلت لو لا وعمي يشيل بالحم ويخلي يمي
ويحلف بيه اكل كلشي بالماعون
اكلت الحد ما شبعت على سوالف
وعركات عمي هو وام حسن .
ابو حسن : صاحبي ابو مرتضى راح يسافر السوريا
وگال تعال ويايه هم نتونس ونزور ونغير جو .
ام حسن : اجي وياك رجلي على رجلك .
ابو حسن : وين ترحين اكلها انا وجماعتي .
ام حسن : شني معناتها ما تاخذني وياك .
جود : معناتها حاسب امي بس خدامة تخدمك وتخدم ولدك .
ام حسن : من يوم يومه يونس بروحه وعايفني .
جود : وهسة هو راضي عليچ خدمة وحشمة وجمال سودة بوجهي .
ام حسن : من يوم يومه من يشوفني فرحانة يخرب فرحتي
طلع السفرة من جوة الگاع متقصد يريدني اعوف البيت
هسة من اطلگ منه احد يلومني .
علي الآكبر: كل احنا وياچ توكلي على الله يمه .
ابو حسن : ما اروح كافي الله يجازيكم كون يصير
بيكم مثل ما تسوون بيه بهذلتوني براسها كاعدين
وهي تمشي وره حجي ولدها .
حسن : چا بوية متحملتك على الحلوة والمرة وتريد تروح
تتونس وما تاخذها ما مقبولة منك لا وحق الحق .
اندك الباب طلعوا الولد استقبلوهم بالاستقبال
والبنات يلملمون بالمواعين كعدت بصف عمتي
جابوا الجاي شربت شوية وياها تقربت مني
سألتني: شلونه علي الآكبر وياج ؟
_ يجنن .
دقايق ودخلن نسوان عليهم سلمت عليهن وكعدت
يسولفن بالعرس وبالتجهيزات اشرت اليه عمتي
_ يمه دُر شيلي الصينية .
ارتبكت اول مرة احد يطلب مني هيج طلب
شلتها مرتبكة امشي بطيء لمحني على الآكبر من بعيد
وكفت وقدمتها بمعنى تعال اخذها فتح عيونه واشر
بمعنى تعالي انتِ بقيت بمكاني هو يريد ياخذ الجاي
اجت ميثاق تريد تنطي الصينية عبرها مستسلم
_ دقيقة ميثاق .
أجاني اخذها من ايدي وهو يهمس
_ بطلي عناد .
_ امممممم .
رحت امشي وراه ضربت على ظهره كلهن مصدومات
لان اخذها مني واطبطب وما يحجي اخذ الصينية ورجع
بقيت اباوع الهن وهن يبادلني النظرات ضحكت ورجعت
سمعت صوت وحدة من الخطار تحچي
_ حلوة والله فلقة قمر ما شاء الله زين ما اختار
عن حب گلتي زواجهم .
دخلت من شافتني رجعت السؤال
_ عن حب متزوجين ؟
_ اي .
من راحوا صعدت فوك سديت الشباك
دخل على الاكبر شغل تدفئة لان الغرفة
صايرة ثلج ، فتح الكنتور اخذ ملابس
_ وين رايح ؟
_ ما اطول .
_ ليش تاخذ لثامك ؟
_ عندي حساب .
حجاها واقترب
_ حساب ؟
_ اممممم انا واحد خرب ليلة عرسي .
_ تستاهل .
_ اني .
_ امممممم .
باوع على شفايفي وعيونه ذبلت
_ لا تخليني اگطعهن .
دفعته من صدره ورحت كعدت اخذهن وطلع
مقهور من صدي ، سمعت صوت عمي يصيح بي
مديت راسي اباوع عليهم هو اخذ جود وطلعوا .
كلها ساعة ورجعوا من العصبية خفت انطق بحرف
بقيت بمكاني اشوف فديوات بتلفوني سبح وطلع
يضرب بالجرارات فزيت من سمعت صوت ابوية
جوة وبنفس الوقت شعار وصل على تلفونه
فتح الصورة صفن بيها واجه اتجاهي دار التلفون
درت على باب ابوية صوته عالي يصيح
_ علي الآكبر شيرررررريد مني خلي يجي ويواجهني .
رفعت عيوني بعيونه
_ دُر شوفي الصورة ورجعي عيونچ بعيوني .
من شفت الصورة كلشي بيه صار يرجف
رفعت نظراتي مذهولة بالمنظر هزيت راسي
والدموع تجمعت بعيوني : ما ادري بيها والله .
_ طبعاً ما تدرين نايمة .
_ هذا يسار والقران اني .
رجعت اشوف صورة لابسه فستان ابيض قصير
ونايمة ويسار بصفي يضحك ومسوي علامة النصر .
يتبع ...
ثقل ميزانك بذكر اللّٰـه:
- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد