_____________________ الــريـاش
﷽
𓆩 اســاور حــسين 𓆪
بقلمي رواية : الــرياش
شناقَصني وانعَاف بوكت ِ
رادوني اعوفَك كل هلي .
لطفا لا تنسون التصويت والتفاعل بين الفقرات
⊰ دُر⊱
نزلت ازحف وصلت النص الدرج شافني ابوية الدم
ينزل مني خجلت من نظراتهم صرت اشهگ مثل
الميتين حسيت روحي تطلع مني صعد ابوية يركض
مديت ايدي ومن الوجع وقلة الحيلة بست ايد ابوية
فتحت عيوني على وسعهن من الوجع والرهبة وكمية الظلم
_ راح اموت نزفت ابوس ايدك لو تموتني وتخلصني من الوجع
لو تاخذني للمست اني بنتك حرام عليك والله حرام .
يوسف : اوكفي اخذج امشي ويايه .
ياسين : وين وين نعِم ماتشوف الأثار بجسمها تريد
تورطنا يعني اتعجب على الغباء عدكم تشترون غباء انتوا ؟
يوسف : شوف هذا لك ماتشوف راح تموت تريدها تموت ؟
ياسين : طبها طوب هي رادتها عوفوها تتعلم من أغلاطها
هي هاي البنية من تطلع عن شور اعلها وعمامها وتروح تاخذ واحد
مو من ثوبها لا يناسبها ولا يناسب اهلها .
يوسف : هسة اذا يصير بيها شي علي الآكبر يخسف الگاع
علينة ويدفني اني وياكم بصفها ، عود من تنفصل منه
احجي هذا الحجي مو هي مرته .
صرخت لازمة بطني وجسمي من قلة الأكل يهتز
ياسين : اذا تجيب اسمة هنا بعد اشوف شغلي وياج انت وخلفتك العارية.
يوسف : راح اخذها وشسوي سوي يلة .
ياسين : جرب تطلع وشوف شلون اذبحكم بالطريق .
ابو يسار : كافي أنطونا مجال عندي دكتور صاحبي أخابره
يجي يكشف على وضعها وتفض لا تتعاركون .
لزمني ابوية يصعدني فوك لزمت ايده وصحت
_ والله راح اموت والله الوجع ما ينحمل تعبتوني .
دخّلني الغرفة ثلج صايرة ركضت للحمام فتحت الماي الحار
وفتت حتى اشرد من البرد يخف رجفتي والوجع ويصير بخار بالحمام
كعدت بالگاع وذكرياته تمر براسي بعز دماري
رفعت راسي على ابوية مصدوم لان فتت جوة الماي
دُر : راح اذكر الك موقف واحد من علي الآكبر وقارن بينكم وبيه
بوكت مطر والدنيا باردة ثلج سبحت طولت بالحمام هو منتظرني
باب الحمام شوكت اطلع بيده منشفة وملابسي من بدلت اخذني
للغرفة مشغل صوبة كعدتي ينشف بشري ويلبسني بالجواريب
بيده يوكلني بيده يگلي بوية بنيتي انتِ ادلل بنيتي ، مو مريضة
بس شربني علاج يگلي اخاف المرض يريد يصدمني ويتعبج اتعبه
وين توصله انت واخوانك وووووين انت وهووو وين .
رفعت راسي وصرخت بعلوووو صوتي خليهم يموتوني
اني اريد يموتوني : انتوووووا حيوووووانااااات حيووووانات
ماااااا اريدكم اني ما اريدكم اكرهك اني يابه اكرهك انت مو اب
انت شيطان اكرهك والله اكرهك .
وجهه احتقن احمر ضاغط على ايده يتنفس سريع
ما كدر حتى يحجي عافني وطلع من دار وجهه
شفت يسار واكف سمع كل كلامي لميت روحي
وبقيت جوة المي امرد بروحي من الوجع وخلص دمي ودكتورهم ماكو .
خلص الماي الحار طلعت ارجف نشفت روحي ولبست ملابس
ونزلت ابوية من شافني وجهي صار اصفر وروح مابي بهتت
عبالك ميته وجسمي شوية شوية يصير قالب ثلج ما تحمل
صاح بيهم واني اصيح من الوجع وگعت على درج ارافس
واتوسل بيهم : بس اخذوني لو تموتوني وتخلصوني ولك تعبت تعبت.
دخل يسار رافع حاجبه يخوزر صعد ابوية ونزلني حتى
عمامي الشياطين من شافوني ما كدروا يرفضون
صعدني ابوية بالسيارة ولد ياسين صعدوا ويانا
ويسار بالصدر يحومي علية مثل الجن الاسود
قبل لا انزل سحبني من ايدي وهو يهدد : لچ راح تنزلين
حرف واحد لو حركة منچ انعل خيرچ طلقة وحدة اخلص بيها عليچ .
اخذني أبوية لدكتورة نسائية المراجعات من شافني كلهن
صارن يتهامسن ومركزات بيه وبولد عمي وحدة تگول
بس لا عروس وطلعت مو بنية ويمكن ضاربيها
وحده تهمس يمكن كامشين شي عليها والحجي كثر
وماكو احد عاش عيشتي وعذابي وياهم .
دخلتني السكرتيرة حالة طارئة الدكتورة من شافتني ضربت
على صدرها وشهگت لزمت ايدها واني استنجد
_ ابوس ايدج بس نوميني خلصيني من الوجع دخيلچ .
نومتني على السرير تمسح بوجهي فحصتني وهي
متعجبة من النزف الصار دفع الباب يسار وفات
غطيت نفسي وصرخت بي يطلع هو خايف احجي
دخل ابوية وسدت الستارة وبقت تفحصني
_ مضروبة ؟
بقيت ساكتة بس هزيت راسي الها اخاف احجي وياخذوني
بدون علاج ادري بيهم ما عدهم رحمة اقل كلمة اني اكل عذابها
_ رحمچ متضرر ماما ليش هيچ ؟
_ دكتورة اريد مخدر مسكن نوميني عليج الله من يروح الوجع اكعد .
بقت تهز براسها وطلعت لأبوية
- تحتاج عملية حتى نوقف النزف .
دخلت ضربتني إبرة نمت بس بيه وجع
وطلعت تكمل كلامها شي اسمعه وشي ما اسمعه
حسيت بيسار يشيلني وطلع يمشي سريع والنسوان اصواتهن علت
خطية وشصار بيها وليش هيج وهو يمشي سريع ما مهتم
صعدوني بالسيارة اسمع صوت دكاترة يحجون وشي صار على خشمي
ماجنت اعرف شنو يصير بس اريد اخلص من الوجع هذا كل همي .
كعدت وعيت على نفسي بالبيت بس نايمة على فراش
ومقابيلي صوبة كهربائية واكل بصينية وماعون صغير
بي اربع حبات علاج ، جسمي جامد ارجف من الجوع
ويمكن لان فقدت دم هواي ، مديت ايدي اكل واني نايمة
ودموعي تجري على مخدتي ما وكفت ثانية ، شربت علاجي
والمغص ما عافني جنت اصارع الموت وحدي ومن يصير اليل
الموت اهون لا بيه اروح للحمام ولا اكدر اكعد واساعد روحي
مشلولة اقل حركة مني اموت بيها الف موته .
بكل ساعة اعاتب ربي على حياتي لا اني ميتة ولا مرتاحة
شنو فايدة حياتي ، اهلي لو ميتين واني يتيمة ارحم على اقل
اگول يتيمة وهيج صار بيه عمامي ما رحموني بس اني
اهلي كسروني اشتروا الفلوس وهدموا بتهم هدم .
علي الآكبر ..
شتاء معتم ، ظلام في ظلام يسود الايام ، انتظار يتبعهُ انتظار
خطوات كالتي مضت ، كلمات تتردد لا تنتهي ولا تنسى
" ما عدت وماتعدي كتلتني وماخلت حيل عندي "
نزلت من سيارة صياد اشوف الشباب صحت بيهم
_ ها ولا ***** منهم شرفنا .
جود : كلها اختفت .
صياد : علي الآكبر خلينا ننسحب حتى يرجعون لبيوتهم ونلزمهم.
علي الآكبر: بحلامهم بعد مايفوتون بيوتهم مطلوبين دم .
صياد : هذا قفلته خلت قفلتي لا شيء شبيك مطي بعقلك .
علي الآكبر: تسكت لو اكتلك اختار براحتك ؟
كعد هو والشباب يشربون جاي من الصبح نفتر بلا راحة
لا اكل ولا شرب بس نريد واحد بيهم مثل الجريدي اختفوا
بقيت افتر مريت من بيت يوسف المريش مقفول بسلاسل
وعلى طول الحايط مكتوب بلون أحمر" مطلوب دم "
امشي وتتراوالي ضحكتها ، فرحتها ، دموعها ، صوتها
براسي صار صياد بصفي مسح على ظهري
_ ترجع ايدي بيدك والله ترجع .
ضحكت موجوع حيلي كلبي ينود اريد اسمع خبر عنها
اخذت جگارة ورثها صياد وجريت حسرة وانا أدندن
_ امس لو ما عيونچ عرضن گبالي
چا صوت الفشك للصبح ظل عالي
چا مريتلچ موش بصحه سكران
واكتل كل بشر خرب الحب مالي .
ذبيت الجگارة وتحركت مستعجل والصياد
ورايه وهو يصيح : لك وين رايح ؟
_ ادورها بعد ما اكدر والله ليش واكفين شني انتظر يوصل خبرها .
_ شوكت واكفين ولك نفتر صار ايام واسابيع بس ناكل ونطلع .
_ كمل اكلك وخابرني .
طلعت اخابر وادور على كم مكان مشكوك بي
بس المشكلة كل املاكهم فارغات وين راحوا اختفوا فص ملح وذاب
دورت وافتريت الحد ما تعبت رجعت لبيت تابع للصياد
اول ما دخلت وجوهم ماعجبتني نظرت الهم بشك وسألت
_ شبيكم شصاير ؟
جود : مصاير شي .
_ اهوووووو شبيكم والله صاير شي سامعين شي حاجوني فهموني ؟
صياد : لا تعرف احسن .
_ ليش ؟
صياد: اخاف عليك .
_ موتوها حاجيني دُر ماتت ؟
_ لا بس اذا ما نعرف مكانها تموت .
علي الآكبر : اجيني شنو سامع ؟
صياد : شفت مو بس سمعت .
_ شوفني وياكم .
_ لا تشوف والله صعبة .
_ شووووووفني .
_ والله يصير بيك شي والله .
_ صياد بداعت هدم گلبك شوفني .
_ دُر مسوية عملية .
_ عملية شنو ؟
_ ما ادري بس عدها نزف .
تخبلت رفعت ايدي اشمر بيها واصرخ بيهم
_ أطلعوا كلكم وانت احجي اطلعوووووا ولكم اطلعووووا .
كلها طلعت بقيت بس انا والصياد لزمته من قميصة
وصحت شاغت روحي اريد اسيطر على عصبيتي ما اكدر
احجي مقابيلهم شلون اسأل وكلها تباوع
_ ولك نززززف شنووووو نزف حاجيني .
_ ما ادري عندي واحد من ولدهم صغير بلغني
واصلين النفس المكان بي دُر يگول مسويه عملية ودز صورتها .
خفت حتى اطلب الصورة لزمت راسي اروح وارجع
عقلي قفل اريد افكر ما اكدر جريت نفس طويل وحجيت
_ ما اريد اشوفها اموت وحگ علي لازم ما اشوفها
بهذلتني دمرت حالي خلتني مربط من راحت الهم
كسرت كلمتي ولك نصحتها وكسرت كلمتي .
صياد: باعت روحها حتى تشتري راحتكم
وجودها وياكم خطر عليكم دُر اختارتكم .
_ ليش تنزف عقلي من الأفكار راح ينفجر .
_ ما ادري والله .
غصيت بالكلمة وانا انطقها مو هينة لا وحگ الله
_ اغتصبوها ؟
عافني وهو مخنوگ صحت بي وهو يريد يطلع
_ اشوفها اريد اشوفها .
_ علي الآكبر انت لا اكل ولا شرب ولا نوم اذا تشوف تروح بيها .
_ راح اكعد واشوفها هنا على تخم واشوفها ماعندي حيل بعد والله .
كعدت لازم طرف التخم كل قوتي متمسك بي فتح التلفون
سلمني بيده اول ما صدت عيوني على صورة شمرته
بلحظة فقدت عقلي ضربت على راسي وانا اصرخ بعالي صوتي
_ لااااااااا ولكممممممم لااااااااا بنيتي لا تضرررربوهااااا لاااااا
بووووووووووية دُرررررر بوية كون انا بمكانچ عايفهم يضربون
بيچ وانا كاعد هناااااااااااااا دُررررررررررر .
لزمني بكل حيله دخلوا اخوني يثبتون بيه ماحسيت بروحي
وماجنت اسيطر على ردت فعلي اضرب بروحي وبكلشي
يصير مقابيلي سحبني حسن بكل قوته نزلني بالأرض
_ لك كافي راح تمووووووت كافي .
_ عساني حلفت احميها منهم ولكم مووووتوهاااا
بنيتي مابيها حيل تنضرب ضرررررربوهااااااا .
دفعتهم مني وعبرت على كراج روحي تريد تطلع مني
اذني تصفر وكلبي دكاته تريد تطلع من صدري
دفرت الصندوگ اخذت نفط وطلعت اخواني وصياد يلزمون بيه
صياد : الخاطر محمد انتظر يمعود مو تخرب شغّل ألأيام الفاتت كلها .
_ انعل ابو شغلنا .
_ لك راح نوصل الهم لا تستعجل .
_ انعل أبو الانتظار .
_ اصحى .
_ انعل عقلي اذا صار عاقل بعد .
_ لك غايتهم يخبلوك وتتورط .
_ انا تورطت بيهم ولك هدموني هدهم .
صياد : وسفه عليك علي الآكبر لك شوف احنا منتظريهم
وهمَّ شاردين من عدنا خايفين انت حايدهم حود سابيهم سبي .
علي الآكبر: تعبوها ضاربيها هووواي ولك ثلج
ماي بارد وثلج يشمرون عليها يضربوها
ويگعدوها بماي بارد وثلج الله اكبر مجرررررمين شسوت هيه شسوت .
صياد : اضعاف قهرك مقهور ودمي يغلي اذا اشوف
واحد بيهم ادخل بي اعدام والله بس خفف الخاطر الله خفف .
علي الآكبر: وحگ داحي باب خيبر ما اخفف واليوم بيوتهم تحترگ
مثل ما كلبي احترگ بيوتهم تحترگ كلهن كل بيوتهم اليوم تصير رماد .
دفعته مني وصعدت سيارة ركض ورايه وصعد واخواني ورايه
بالسيارة وصلت بيت يوسف رفعت الثام وجهي ولبست كفوف
تسلقت الباب وصياد يصيح : لك قرد اوكف بس اوكف اصعد وياك .
طفرت وكلها تصيح حتى افتح الباب ما اشوف مقابيلي
وما اريد اورطهم خليتهم ينتظروني اخذت كرك فلشت
الشباك ودخلت على صالة فتحت النفط اني امشي ارش بالبيت
حگها مايبرد بس اخذه اخذه ، خلصت ونزلت كعدت خليت بالبطل
الكزاز نفط ومواد المولوتوف وصله صغيرة نگعتها بالنفط وشغلتها
وطلعت من الشباك شمرتها بلحظتها البيت كله اشتعل نار
مثل كلبي ومابردت ، طلعت وسديت الباب الدخان والنار صعدت
ركبت بالسيارة وكلها تباع ضايجين لان ما افتح الباب .
حسن : وين تولي هسة رجعنا لا يلزمونا .
صياد : بعد بلشنا خلونا نكمل مانرجع .
علي الآكبر: كفو هيج اريدك .
صياد : افزع بينا عد عيناك الاكبر اسكندر الحامي .
وصلني على بيت ياسين نزلنا اني وجود والصياد عبرنا
واخواني يحمون ظهري برا ، فلشت الشبابيك ودخلنا
انا اوزع النفط بالبيت وجود والصياد يجهزون المولوتوف
طلعت وهمه شغلوا المولوتوف وشمروا بكل مكان بالبيت
اشتعل بقيت اباوع على نار كون اخلي بيها ياسين واخوانه كلهم .
طلعنا بسرعة وخليت النار تاكل وتشبع بالبيت
بس مابردت ختمتها بيت ابو يَسار اول ما دخلنا
عايف سيارة بالكراج حركت البيت والسيارة وياه
جود ما ترك مكان ما تلوحه النار ويصيح
_ خلوني ادرر على هدوم يسار العار ابن العار .
طلعت هو إجه ورأي لزمني يضحك لان كملنا عبالهم برد كلبي
صعدت السيارة والنص الطريق وكفت نزلت نزعت التيشيرت
احس حتى الملابس صارن ثگال علية مشيت شمرت روحي على
اقرب رصيف اريد اجر الهوا سندت راسي على حايط وافر بي دخت
الدنيا بكبرها تفتر بيه فر لزم الصياد راسي : آخذك مستشفى ؟
علي الآكبر: انا مو زين تعبان .
جود : انعل ابهاتهم بس اشوفهممممم .
صياد : امشي ارتاح دخيل ربك .
علي الآكبر: خايف جانت تگول خايفة هسة انا خايف .
صياد : علي الآكبر ينخاف منه ما يخاف .
علي الآكبر: اخاف ما اشوفها بعد هسة هي وين اكلت
نامت شربت كعدت وينها زينة بيها وجع لو سكنت
كاعدين يضربوها اخاف يضربوها سوت عملية تعرف شني عملية
يداروها يكعدون يمها لو وحدها ولكم التفكير دمرني تعبت .
غمضت عيوني ثگلت رفعني جود والصياد وصعدوني
نزلوني للبيت : لاااا ما اريد بيتنا .
طلع ابوية اخذني منهم ودخلني للبيت وهو يغلط
_ شمسوي بروحك امك اذا تشوفك هيج تمووووت .
_ ضربوها بوية ضربوها .
صعدني للغرفة نومني على جرباية وكعد يمي
_ لك راح تضيع روحك .
_ قابل بوية بس المهم ترجع واشوفها حتى لو دقيقة .
_ ولك بوية راح تموت بس كافي .
_ لحد اخر جرة نفس ادورها وبعدين أحاسبها على بهذلتي هاي .
غمضت عيوني بعد ما اكدر افتحها بس اسمع صوت ابوي
على راسي يقرا قران ، وامي فاتت يسكت بيها خلصت
ليلي بين النايم والگاعد عقلي يفكر بس عيوني ماتريد تگعد .
الثاني يوم حسيت على امي تفتر يمي كعدت اجتي بصفي
_ يا بعد عيون امك صباح الخير .
عصرت عيوني بيدي افرك بيها هزيت راسي وكفت
دخلت للحمام سبحت وطلعت وهي تنتظرني
_ بغلاتي عندك تعال اكل انت وأخواتك كلهم جوة .
_ يمه والله عندي شغل اريد اطلع مستعجل .
_ حتى امك ماعدها خاطر يمك ولك يمه لوعت كلبي .
_ لا تبلشين هيج تحجين يمه الخاطر الكائنات حال الضيم حالي
لا تزيديها علية ماكل خرفان انه ما اشتهي والله .
عافتني ونزلت بدون ما تحجي مكسور خاطرها
بدلت ونزلت شفت شهد تغسل وجهه على مغسلة
من شافتني نزلت راسها خجلانة مشيت يمها
رفعت راسها وبستها : إبقي مرفوعة الراس اخت
على الآكبر ماينزل راسها .
شهد : بزودكم ماينزل بس سكت الي يحجون دخيلك .
علي الآكبر: شهد انتِ ما جذبتي علية مو ؟ ماصار شي .
شهد : والله ماصار شي بس شگگ قميصي وكشف على جسمي
اريد تاخذ حقي على هبطة والخطف الصار وهل المسمومات سكتهن مني .
حضنتني وهلّ حياية مطلعات راسهن دخلت سلمت على ابوية
واخذت شهد ويايه كعدت وخليتها بصفي بعدني اريد افتهم منهم
وباب الشارع تفلش تفلش من الضرب ، طلع ابوية يركض وحسن
فتحت البردة وجود يغسل وجهه يصيح : سالمين شكوو ؟
سراج الدين : هذا يا نعال .
عز الدين : من نعلت الله ولكم شكوو .
سيف الدين نايم فز على ضرب
_ ما انام صخام بوجوهكم كون دهر الدهركم من بين العوايل .
شفت زلم لابسين عسكري من المكافحة بقينا واحد يباع على ثاني
طلعنا واحد بيهم يصيح : علي الآكبر صفوان وين ؟
_ انا علي الآكبر .
تقدموا اثنين كلبشوا ايدي ونزل على رجلي يكلبشون بيها
_ عليك امر القاء قبض بتهمة التجارة بالمخدرات والممنوعات .
دُر ...
أصوات مختلفة عن المعتاد اكو اروح كثرت بالبيت
لزمت بطني وكفت استمع للحركة، فتحت الباب صارت
زوجة ياسين مقابيلي من شافتني تعجبت : هاي شصاير بيج .
_ زوجج الخايس هيج عذبني ، فرحانة متزوجة وابو ولدج ياسين ؟
_ اشش لا يسمع ويجي يكمل عليج روحي باقية اخر حلقة .
سمعت صوت بجي بالغرفة الصارت مقابيلي رجعت الغرفتي
والصوت مستمر ، للعصر حركة أحذية رجالية تتحرك بصوت عالي
خفت لا يدخلون يضربوني اموت بيدهم والله الجرح ما طاب بعده
رجعت ظهري على حايط ودموعي تنزل من سمعت صراخ بنية
تنضرب وتبجي وتستنجد مثل ما اني استنجد وماكو واحد بيهم بحالي .
ساعة كاملة وهي ماسكتت ولا هل حيوانات انتهوا
الحد ما انگطع صوتها صرت اشهگ من الخوف
سمعتهم طلعوا يحجون سوية : ذاك العار مات ؟
_ اي مات كل يوم ***** وحدة جايبة حثالة المجتمع تريد يناسبنا .
بس نزلوا وكفت بيه ما بيه امشي بصعوبة
بعد ما مر على عمليتي كم يوم ، طلعت من غرفتي
الغرفة البنية فتحتها سرت رعشة خوف بكل جسمي
مشيت بسرعة ارفع براسها وشعرها كله واگع متناثر بالارض
وصايرة صلعة مزينين شعرها الله لا يوفقهم ما اكدر حتى ارفعها
كعدت بصفها اطبطب على وجهه ودموعي ما نشف على حالها
_ عفية اصحي لا تموتين الله لا يوفقهم بعدج صغيرة .
بقيت يمها من جرت نفس عرفتها كعدت من شافتني
انضربت بالحايط : م من منو انتِ .
_ اني دُر بنت يوسف انتِ منو ؟
_ حُرة بنت عار الزلم ياسين .
لمت جسمها كله كدمات ضرب وبيدها سوار
لزمته متمسكه بي وتباع عليه ما شالت عيوني
_ مات موتوا كدامي هو وحدة مايكدر عليهم كلهم .
_ منو ؟
ضمت وجهه بيدها وصاحت
_ عوفيني وحدي عوفيني ما اريد اسمع صوت عوفوني .
حضنتها انصدمت رفعت راسها عيونها ترمش سريع
حُرة : حضنتيني ؟
_ اي .
_ امي ماتقبل تاخذني بحظنها .
_ سودة علية .
_ مات لان يحبني مات لا تجين يمي هم تموتين .
_ لا مو لان يحبچ لان همَّ كلهم يكرهون الحب انتِ ما الج ذنب .
_ تعبانة اني تعبانة مات بسببي حذّروني ما ادري ينفذون ما ادري .
كعدت بصفها وأني أتألم اكثر منها وجع العملية يموت
مديت رجلي ولزمت ايدها سحبتها نومتها على رجلي
_ ارتاحي نامي اني يمچ .
_ يضربوني .
_ اني احميچ لا تخافين نامي .
خلت راسها ترجف من البرد رفعت راسي امسح بدموعي
وارجف عليها شمسوين بيها الله لا يوفقهم كون حوبتي وحوبتها
تكسر ظهرهم مثل ما كسروا ظهرنا شنو ذنبنا وليش صار هيج بينا .
اقل الساعة وصوتهم جلجل الفوك اصواتهم خشنة مخيفة
صارت مثل مشاهد الرعب عنيدي شوفتهم ، يدفرون بالبوب
ويصيحون : هل **** وينهااا ولكمم وينها شردت ؟
بس دخلوا على غرفة من شافني يسار هجم يريد يضربني
رفعت ايدي وحُرة رفعت ايدها تحمي نفسها دفرها حتى
تگعد من رجلي ولزم شعري سحبني : يسار عمليتي راح تنفتح لك يسار .
دفعني وصاح وهو يأشر على باب
_ شلون * اثنين ملمومات وحدة دگول للثانية اني * اكثر منچ .
دُر : مو على اساس تضرب بينا حتى تحافظ على شرفك ؟
ما اشوف هيج كاعد تفشر مقابيلنا حالك حال ولد الشوارع تروحلهم فدوة .
لزمني من ايدي وسحبني للغرفة دفعني بيها لزمت بطني وصرخت
_ كافي لك كافي .
_ ليش تعانديني ليش تجاوزين ؟
_ تستاهل .
_ بسيطة اذا ما اعلم كلبي يكرهچ حتى بيدي اذبحچ .
_ ههههههههههههه ضحكتي خرب بيك .
_ تضحكين مووو هههههه سهلة .
_ كلامك يضحكني والله .
_ اني اعلمچ على ضحك الزين .
_ والله لو علي الآكبر يقبل اخلي يدرسكم كلكم ويعلمكم شنو الحب .
_ لااا صدك مايقبل ؟
_ مع الأسف مايقبل لان اذا يلزمك
يحودك حود واكيد تعرف شنو قصدي ؟
_ شنو قصدج .
_ قبل اخذك للمركز الطريق كله يغم بيك
هل مرة ياخذك يدفنك ويغم بيك يخيسه .
بيده التلفون شمره بنص وجهي شاغت روحي اريد اكمز من الوجع
لزمتني بطني سحبني من شعري ونزل على رگبتي يريد يبوسني
دفعته بس ماعندي قوة دفعت روحي على حايط ولطمت على وجهي
_ لك لا تجي يمي لا تلزمني تلعب نفسي منك ولك حرام عليك
اني متزوجة اني زوجة علي الآكبر يالقذر لو يدري بيك يموتك
يشششششششرب من دمك لك يسااااااااار .
جرني من ايدي وباسني بخدي ملخت خدي الحد ماطلع الدم
هو من يشوفني هيج يتخيل بالزايد ، رفّع روحه يدفر بيه
لزمت بطني ودرت روحي يضرب على راسي وظهري فاقد
وكفني اخذني من ايدي يسحب بيه بحقد نزلني جوة
مسوين اجتماع الشياطين كلهم كاعدين مثل غراب البين .
التلفزيون مشتغل يكرر مشهد واحد لا غير
علي الآكبر مكلبش والمكافحة لازمي يصعدوا بالسيارة
وأخوانا وابو كلهم موجودين وعمتي تلطم على وجهه
وهو يأشر على امه حتى يدخلوها من شفته وشفت حالة
استوعبت وتذكرت كلامة من يحلفني
"لا تهدميني بس انتِ تگدرين تهدميني دُر
لا تهدميني اذا تسويها اموتچ واموت روحي "
كعدت كل ما يتكرر الفديو اركز بي اكثر
انضربت دمار براسي صرت اخذ نفس بعلو صوتي
هزيت راسي واني على حافة الانهيار
_ اني مو يمكم ليش ما تعوفوهم بحالهم ؟
ياسين : تهمة التجارة بالمخدارت والممنوعات .
يسار : يخلص الشباب بالسجن المسكين .
دُر : موووو اني يمكم ولكم بعد شنووو تريدون راح تخبلوني .
ياسين : اهله تبهذلوا وانتِ السبب .
يَسار : إخته اخوچ انور اغتصبها وخرب مستقبلها .
دُر : حرام عليكم والله حرام والله مايستاهلون الصار بيهم .
ابو يسار : حرام عليج انتِ دخلتي هل ضعفاء بنص حياتنا .
دُر : اي مو اجيت برجلي عليكم عوفوهم كافي واني والله
ارجع مثل قبل حتى ما اخليكم تشوفوني واذا تريدون اسافر .
ابو يسار : ها بابا يسار شنو براسك ؟
يَسار : تنفصل عن العار ابن العار ونتزوج ونسافر .
دُر : اعيش وياك جسد بس كلبي وعقلي عند علي الآكبر
حبيته وبعمري ما راح احب غيره حلم حلو واتذكره بكل ثانية اعيشها وياك .
ضربني على وجهي بوكس فر راسي طگت رگبتي وشهگت
_ اذا تقبل تتزوج وحدة تتمنى تحضن حب حياتها دقيقة
وبعدها تموت عادي اقبل بكلشي .
يسار : منووووووو حب حياتچ ولچ .
جاوبته وعين بعيونه جاوبته واني رافعه راسي
دُر : تاج راسك علي الآكبر .
يسار : لاااااااااا ما اتحملهاااا لاااااااا .
رفعني من ملابسي وهو يضرب بوكسات سحبه
ابو مني وياسين يدفع بي حاولت اوكف امشي
وگعت ما كدرت ، ركبتي طگت صرت ارجف واشهگ
وهو يشيل بروحه ويرگعهاااا يصيح : ولكممممم تحبه تحبه
خرب اهلچ واهله بنت وفاء ام الززززززززززلم لچ ادمرچ والله ادمرچ
قابل انطوني هل ***** اتزوجها واموتهاااااا بيدي امووووتها .
لزمت وجهي مكان الضربات شكد احاول ابين اني ما اخاف
بس رجفتي تفضحني ومن الوجع عيوني تبجي ياريتها تنشف
وما تفشلني وتبين ضعفي مقابيل قوتهم ، رجع ياسين علية
وكعد مقابيلي على طبلة گزاز جبيرة متوسطة بنص الصالة
_ يومين بعد وعندج حضور بالمحكمة رفعنا دعوة
طلاق ضرر تتنازلين على كلشي وتنفصلين منه ونخلص .
ابو يسار : اذا تنفصلين بدون مشاكل اني أضمن يسار
يحبچ بكلمتين حلوات يلين وياچ ويعاملچ زين بعد انتِ وشطارتج وياه .
دُر : اذا اطلك يطلع من السجن .
ياسين : اي وروح ابوية يطلع .
دُر : واذا ما يطلع .
ياسين : لاااااااا تصيرين حيووووانة گلت يطلععععع
بس تنفصلون وتسافرون وبعدين يطلع .
بكلبي كعدت اسب بي وبأبو على هيج تربية خايسة
هزيت راسي وصعدت فوك ردت ادخل على حُرة بس خفت
رجعت للغرفة غطيت نفسي ونمت تعبانة ساعة وسمعت
بابي ينقفل ، ورجع صوت صراخ حُرة يزلزل بالبيت وبكلبي .
حُرة جانت عكسي شكد ما تنضرب تغلط عليهم من اسمعها
واستمع الصوت الضرب مبين تريد تنتحر بيدهم وتخلص
من طلعوا منها اسمعهم يحجون على بيوتهم كلها محروگة
وياسين ينطي اوامر : عدنا شغل من هسة نروح للدوام نخلص
هل اثنين بعد مابيهن حيل يلعبن بكيفهن نلتفت على شغلنا .
شهد...
ناس داخله وناس تطلع اهل امي واهل ابوية كلهم سامعين
بقصة علي الآكبر وبالمصيبة الصارت وياه ، امي كلام الناس
صار يأثر عليها بيت الرياش ضيعوا ابنج ، دخّل بتهمة مايطلع
بعد منها اذا مو معجزة ، وامي من تسمع تتخربط عزلتها
اني وابوية بغرفة ومن احد يجي علينة ابوية من الباب يحلف
بيهم مايحجون شي خطر ويطمنون امي بكلامهم بس الكلام
ماينتهي ومانخلص من السان العالم .
بيتنا نهجر لا نطبخ ولا ناكل ولا نطلع ولدنا كلهم بالشارع
بليل يرجعون وبس ابوية والنسوان والخطار موجودين
بنات خالاتي عدنا اثنين وبنات عمي بعد ايام من العذاب
قنعوني اطلع من الغرفة اكعد وياهن اكل ، كلهن عبالهن
حالي هذا بس على قهري على علي الآكبر مايعرفون دماري
ومصيبتي الصارت ، يوم الخطف مو هين عليه ومايروح من
بالي كُل ضربة منهم تاكل بروحي ليل ونهار .
عيونهم وغلطهم ولمساتهم كلها كرهتني بروحي وحرت شلون
انسى والخاطر اهلي وكلام اخواني ارجع اوكف على حيلي
طلعت للمطبخ مجهزات سفرة كعدت بصف بنت خالتي اكل
اني وياها بفرد ماعون ونسولف
_ لو علي الآكبر اخذ من ثوبة ولا متورط بيت الرياش ارحم من عذابه .
_ تبهذل هل بيت الرياش بهذلوهم .
جاوبتهن واني افهمهن
_ علي الآكبر حب دُر وين الغلط خطية هي هم تعذبت من اهلها .
اني حجيت هيج لو عبالك سبيت ميثاق وريمان دخلن على مطبخ
تشيل بروحها ميثاق وترگع بيها : حبهاااا ؟؟ بهذلنا تبهذل وبعدچ
ادافعين على هل **** ، لچ هذا عذابنا كله منكم على ساعة
يصير بيتنا فاتحة ودافعين الست دُر .
شهد : وانتِ منو داس على ذيالچ كملي مشي الحية .
ميثاق : لچ هي واهلها ضخموا وجهج اخوها
مو اخذ شرفچ يا جلبة يا عار صرتي عار على اهلج من وراها .
البنات كلهن يباعن بوجهي مصدومات وبيهن
الي تشهگ من الصدمة والثانية تلطم على وجهه
وكفت واني افور عليها فشلتني الله يفشلهاااااا
لزمتها من شعرها وسحلتها وهي كمزت على
جسمي تضرب ضربتها على وجهه وازلغ بيها بكل
حيلي ذبيت ضيم كلبي بيها ، صار وجهه انور المدگدگ
گدامي فقدت واني اضرب بنات خالي يسحبن بيه
واني ما اكدر حتى اوخر منها ملختها تملخ وقبل
لا اوكف لزمتها من وجهه عضيتها من خدها خليتها ترافس .
ابوية فات يصيح ويغلط لان عمامي موجودين وأصواتنا
وصلت للشارع ، عفتها واني الطم على وجهي واصرخ
بخبال : جذابة لج انتي جذابة اني اشرف من الشررررف .
لزمني ابوية ملخت روحي واني اصرخ
_ بوية انا مووووو عار عليكم موووو عار والله
محد لزمني بوية ما طخني هو ما طخني الله لا يووووفقهممممم .
حضني وهو يخزر بميثاق هي سحبت جهالها وركضت فوك
طلعت امي اخذتني كلها تسأل بيهم شنو هل حجي شصاير
وشنو قصدها ميثاق وليش شهد انهارت ، فتت للغرفة
امي تلزم بيه اني بعد ما كدرت اسيطر لطمت لطم ايام
راحت واني اكتم ضيمي وقهري من الصار .
نومتني امي على رجلها تبچي على حالي وتشهگ
_ ربي لا من ولدي ولا من بنتي ربيّ راحوا كلهم من ايدي
هجموا بيوتنا ربي شلون بيه وين انطي وجهي .
_ يمه ما طخني ليش تگول اغتصبني اني موووو عاااار .
_ هي عار ولچ يمه ميثاق عار علينة بس يرجع سراج يطردها .
لليل بقيت عدها ثاني يوم التهت عني بالخطار ميثاق بعد ماشفتها
بس اسمع صوتها تفتر بالبيت ظل الها براحتها تفتر الحقيرة
للعصر عرفنا بالدعوة اللي رفعتها دُر ابوية من عرف صاح
_ مستحيل دُر تطلب تنفصل هل عارية جابرين البت .
ام حسن : والله هي خلصت من مصايبها ذبته سجن گالت هاي
هيه خلص شغلي وياهم خليني اروح بعد بتهم تعذبت
ولدهم شبعوا ضيم شبعت هي من عذابنا وراحت .
_ لا تحجين هيج على بنية وتظلمين بختچ .
_ ابنك راح ياكلها يخلص شبابه بالحبس
ويموت من الهوس الصار براسه منها الله لا يوفقها هي واهلها .
_ ام انتِ ما اكدر الومچ محروگ كلبچ واي وحدة مكانچ تسوي مثلچ .
فتت للحمام اسمعها تحجين بصوت ناصي
_ اريد اخذ شهد على علوية ام زينب تقرا على راسها
تنطيني ورقة ماي تسبح بي البت خايفة ليل كله تفز تتصارخ .
_ اخذيها بس لا تتأخرين لا يجي خطار علينة .
رجعت للغرفة شفتها تبدل وطلعت ملابسي
_ شهد تعالي ويايه يمه .
_ ما اروح سمعت وين تريدين تاخذيني عوفيني بظيمي يمه دخيلچ .
_ اغضب عليچ وحگ علي خليني اطمئن على حالچ وبعدين
اشوف طريقچ اريد تساعديني ولچ مو حيل بعد ما عندي .
بقيت بمكاني وهي تتوسل استسلمت واني مترددة بدلت وطلعت
وياها ميثاق وريمان كاعدات عبالك ما شفتهن عبرتهن ورحت
وراه اني اركض مثل الطفل الله لا يوفقهم خلوني اخاف من خيالي
وصلنا على بيت العلوية كعدت يمها امي تسولف وياها على خوفي
بليل وحالتي شلون صايرة واني بغير عالم والله ما اريد اسمع
صوت بشر بس نفسي انعزل بس منو يخليني كلها تفتر على راسي
انطتني حجاب ينلبس بملابسي ، ورقة مكتوب بيها دعاء اسبح بيها
ولارم اقرا سورة الواقعة كل يوم الصبح وقت الفجر ، طلعت منها
واني ادردم على امي واحجي ليش تحرجني بهل سوالف
_ غير اخاف عليج ولچ .
_ يمه اني تعبانة ومصدومة عوفيني وحدي افك دخيلچ .
_ امداج يا خايسة مو هاي دُر تتحسر على خوف وحنان امها
اللي عندي بالعكس تريد اعوفها وحدها جيل هل وكت ما راضين على شي .
عفتها ومشيت شوية بعيد عنها ما احس غير سيارة طبگت
لون اسود عالية وصوتها مخيف انفتح الباب ونزل منها اخر بشر
أتوقع اشوفه بعد بحياتي انور شمه الحقير المدگدگ
فتحت عيوني وجسمي كله بهت التفتت على امي وصرخت
_ يمهههههههه يمهههههههههه .
سد دگم السترة وطلع ما ادري شنو من جيب البنطلون
يريد يحچي واني وضعي كله تخربط خليت ايدي
على راسي وغمضت عيوني صرخت بكل علو صوتي
_ لااااااا يمممممههههه راح يخطفني يممممممهههههه .
دُر ..
وساعات ويوم ويومين يمرن وهمَّ ماكو
بيوم موعد المحكمة دخلت بنية نفسها تجيب اكلي
خلت ملابس وجنطة بيها مكياج : جهزي نفسج وانزلي ينتظرون جوة .
لزمت الفستان قصير يجي طول تسعين ومكياج حتى تخي اثار جريمتهم
بدلت وشعري عدلته ونزلت : زين اختارت تخلص حب حياتها .
ياسين : شلون صرتي .
دُر : وجهك ينگط حقارة لا تحاول تصير زين .
صار يسار وهو يطلع وياسين وابوية موجودين
ولد ياسين اثنين صرنا سيارتين كلهم بخواصرهم
مسدسات مو اهل والله مو اهل تذكرت ميثاق من
تگول مافيا صدك عبالك مافيا ، قريب من
المحكمة قبل با ننزل صار ياسين : ديروا بالك مانعرف شنو يصير
ابقوا مركزين بكلشي ولكل حركة .
لزمني ابوية من ايدي ، ويسار يمشي بصفي
درت وجهي على ابوية وهمست : ولدك وينهم ؟
_ علمي علمچ انور عمامچ طالبي ، وهذاك دوم مختفي
يطلع بس بالمصايب ابن المصيبة .
دخلني للمحكمة ناس هواي ، أباع بالوجوه التفتت على ابوية
_ علي الآكبر يتواجد .
_ لا بس تبلغ وهو بالسجن رفعتي علية دعوة طلاق ضرر
ويدري اليوم المرافعة اليوم نخلص من شرهم بيت علي الآكبر دمرونا .
ابتسمت بقهر وجاوبته نفس نبرة صوته
_ لعبت انت والشخص الخطا علي الآكبر مايسكت من يطلع
راح يدمركم دمار شامل الله لا يستر عليكم منه .
يوسف : ليش تريدين تنضربين لج بابا اسكتي لا يسار
يذبحج انتِ واهل على الأكبر كلكم .
دُر : هههههههه يسار هههه عود خوش زلمة .
مد ايده يسار على ظهري گرصني درت وجهي وصحت
_ خيسة والله اصيح وافضحك .
_ حتى يضيع القذر مالتج .
_ تروح فدوة الطوله .
_ بالبيت من نرجع منو يفيدچ ؟
_ انت بعدين منو يفيدك لك عندي احساس راح يطيحون حظ حظك .
_ طول إلسانها بنت الـ****** .
دخل ياسين احنا كعدنا وهو يفتر وكلهم لابسين رسمي عود شخصيات
بيت الرياش ، اجه المحامي يفهمني قبل لا ادخل شلون احجي
واني امشي سمعت صوت عالي يصيح : 1,2,3
بكل خطوة وصوت من كعب حذائي عبالك يحسب خذواتي
لزمني يسار من ايدي يتلفت
_ لحظة انتظري لا تتحركين .
من وكفت وصوت الكعب توقف بعد ماكو الصوت راح
اخذ ايدي يمشيني بكل خطوة الصوت يحسب : 1,2,3,4,5,6,7,8
سحبني ياسين وكلهم يتلفتون متعجبين
_ شنو هذا الصوت ؟
يسار : ما ادري .
باوعت من فوك شفت ريان لابس اسود بـ اسود
رفع ايده اشر بعلامة لا تحجين .
بس صوته بعيد مو صوته مو ريان يحسب ، رجعت امشي وتكرر
صوت الأرقام من كعدت تغير الصوت وصرت اسمع شخص
يدندن بصوت واضح : يا فارس بدر يا حيدر يا فارس بدر .
وكفت ايدي على شفايفي اتلفت كلهم دخلوا انذار
يسار فتح عيونه وصاح : اخوان علي الآكبر هنا .
ياسين : وينهم ؟
يسار : دائماً يقراها اخو علي الآكبر عمي استعجل .
ياسين : لا تشيل هم بنص المحكمة ما يكدرون يسوون شي .
باوعت عليهم واني اضحك بثقة احس روحي صرت ارفرف
دُر : وراح تبات بالمحكمة بعد ما تطلعون منهاااا ؟
ياسين : انتِ من نرجع للبيت حسابچ ثگيل .
دُر : اذا رجعت ، واذا طلعتوا سلامات .
يسار : لعبت بأعصابي اسكتي لج اسكتي .
دُر : سكتت لا تخاف شبيك .
يَسار: اني اخاف تخسين انتِ وياهم .
دُر : لا ماتخاف بس زوعت العافية تخاف من الزلم
لان انتَ ما تگدر بس على النسوان .
ضرب الكرسي ويريد يضربني ياسين وكف مقابيله يمنعه
_ اسكت لك راح تفضحوني جماعتي هنااااا عيب .
_ خليهاااااا تسكت .
كعدت صح خايفة بس بمجرد ما عرفت داير ما دايري موجودين
ارتاح يصير عندي امل بسيط اخلص منهم هل حيوانات .
دخلني المحامي للقاضي مارفع راسه بس يشوف بالأوراق
شوية وصار يسألني : زوجج بعده لليوم متهم فقط ليش
طلبتي الطلاق بهل سرعة ؟
_ ما نتفاهم اني وياه علاقتنا مشاكل وماعندي ثقة بي .
_ احتمال يطلع بريئ .
_ اعرف بس ما اريده .
طوّل بالاسئلة يسألني واجاوبة دقايق وخلص
من اريد اوقع شفت صورة علي الآكبر غمضت
عيوني ما اريد يشوف دموعي بس صارت تتسابق
كعدت واني ارجف كلبي يمردني مرد ما اكدر والله ما اكدر
نزلت راسي وابجي بعلو صوتي واني كاعدة عبالك خشمي
انفتح بوري صار ينزف سحب كلينكس مسحت الدم ويرجع يطلع
رفعت راسي وكل شهگة تطلع مني تگص صدري گص
_ مو تريدين طلاق ليش هل بجي بنتي .
_ اي اريد .
حجيتها وتفكيري بي خايفة مرعوبة ما أريد يتأذى بسببي
علي الآكبر مايستاهل اخلي يعيش ما يندفن بالسجون .
وكفت وقعت وطلعت وجسمي كله ينفض نفض
كعدت على كرسي ما اكدر انزل الدرج رجلي ما تساعدني
ادور بعيوني عليهم وينهم ليش ماكووووو تعالوا خلصوني
ولكم تعبت مليت بس ساعدوني طلعوني من اهلي .
فتح ابوية بطل ماي اخذته منه شربت واني احجي عليهم
_ الله لا يوفقكم ولكم الله لا ينطيكم خربتوا حياتي .
_ علمود مصلحتچ بابا من تكبرين تفتهمين على تفكيرنا .
ياسين : من اليوم اريدچ نسخة من قوة وفاء مثلها بكلشي .
دخلت للحمامات غسلت وجهي ايدي تهتز بشكل مخيف
هلكوني هلاك الله لا ينطيهم ، طلعت اتلفت بعيوني
امشي ضايعة افكر بعلي الآكبر اذا يعرف وقعت شيصير بي
راح يكرهني ويمكن يحقد علية بس والله اني سويت كل هذا
من خوفي مابيدي شي تأذيت وهو تعب مثلي واهله تبهذلوا بسبب
اهلي شلون نبني حياتنا على حساب عذاب غيرنااا .
يريدون يطلعون خايفين يتلفتون حاسين اكو شي غريب
لزمني يسار من ايدي وهو يمشي مبتسم
_ راح تصيرين مرتي .
_ كرامتك ما ادري وين نايمة .
_ انجبي .
_ شوكت تكعد كرامتك فهمني ماتشبع نوم .
دقرني بالسيارة لزمت عمليتي حسيتها ذبت دم
صرخت وهو صعد خيف يتلفت : لكككك مخبل انت مخبل .
صعدوا ولد ياسين وابوية راح هو وياسين
بسرعة يسار خابرهم : عمي الوضع ما يطمن احس اكو احد
يراقبنا جهز السلاح وارمي شكو واحد يصير مقابيلك .
بنص الطريق اول ما دخلنا بفرع ضيق حتى على اساس
يضيعوهم اذا مراقبين طريقنا مايدرون ارتكبوا اكبر خطأ بحياتهم
وكفت سيارة بداية الشارع يريد ياسين يرجع ما يكدر لان
سيارة يسار تمشي وراهم ، فتح يسار الباب ولد ياسين يريدون
ينزلون ، ركضوا اربعة ملثمين من نزلوا من السيارة اتجاه
سيارة ياسين ووشفت من بعيد واحد عرفته
من ملابسه هذا ريان نفس ملابسه والله هو بس وجهه
ملثم ماينشف منه اي شي بس عيونه من اقترب
ركض بكل سرعته والثاني عرفته من المحبس جود هذا محبس جود
يَسار رجع صعد يرجع بالسيارة وهمه فتحوا باب ياسين
ولزموا من ملابسة طلعوا دفره بالگاع ورفع سجين
وبطرف السجين جرّ صدره بجرح من بداية للنهاية .
ياسين : لك انت منوووووووو ؟
_ ولك انا الصياد واجيت أصيدك .
يتبع ..
ثقل ميزانك بذكر اللّٰـه:
- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد