_____________________ الــريـاش
﷽
𓆩 اســاور حــسين 𓆪
بقلمي رواية : الــرياش
لو جرح واحِد سَهل عثرة ونرد نگوم
بس انَه گلبي وطَن مِن كُل كتر مَلچوم .
لطفا لا تنسون التصويت والتفاعل بين الفقرات
⊰ دُر ⊱
ياسين : تزوج عليج وقابلة عايشة وياه عادي .
ريــان : تطلعون لو اشتكي عليكم .
ياسين : مو تزوجت سقط حقك من بنتي اريدها طلك حُــرة ريــان .
دفر ريــان الطبلة انضربت برجل ابوية تقرب
منه لزمه من قميصه ورفع وابوية جن جنونه
ريــان : احنا مووووووووو لعبة بيدددددددددكم مووووو
لعبة افتهممممممممممم موووووو لعبة بوكت الي تريد تزوجنا
وتعوفني وياها كل هل فترة وتررررريد اطلك بكيفك
موووووو بكيفك وانعل شيب ابهاتكم اذا ماتطلعون هسة منااااااا .
يوسف طفر من مكانه يدفع بريان ويضرب بيده
حتى يعوف ابوية الزين فقد يعت بي عت وهذا يضرب
ما اسمع غير سحب اقسام المسدس شلت عيوني من
ريــان للمسدس بيد اخوية وضغط على راس ريــان بي
_ حركة منك يا ريــان واطشر راسك .
شال ايده من ابوية ودفعه واستدار بكُل جسمه على اخوية
ريــان : اذا انت زلمة ابن امك وابوك اضرب .
يوسف : نزل السلاح يااااااسين ما متفقين هيج خلي ينزل المسدس .
ريــان : اضرررررب جبان اضرب .
ياسين : طلگهااااااا ريــان أريد اخذها .
ريــان : على جثتي على جثتي وهم ما تطلععععععع .
ما ادري شلون وابوية عبرهم ولزم ايدي وضربني
براشدي حسيت وجهي خدر بعد ما احس بي والمحبس نبت بخدي
هي صرخة والريان التفت على صوت شاف الدم يجري
من خدي مشخوط دفعت روحي على حايط من ريــان شمر روحه
على أبوية هو يضرب وابوية يدفع بي وانور من جهه يتضارب
هو واخواني اثنين ، ادور بعيوني على اخوية الثالث وماحسيت
غير انسحلت من ملابسي وانمسح بيَّ البيت والمح اخوية
يجر ويسب ويتوعد ، انفتح باب الأستقبال وطلعوا كلهم
يريدون يروحون هاي هيَّ اخذوني خلص شغلهم بعدهم
بنص الكراج وكلها جمدت بمكانها عبالك فلم رعب
ويستمعون الصوت عالي صار بالشارع ورا الباب
" الملاحم من يطبها ساواها وگلبها والملاحم من يطبها
سواها وگلبها وبيمينه شطبها وبيمينه شطبها علي
بكُل وقت يلفي ويزأر يا فارس بدر يا حيدر "
انــور : زلمة ابن زلمة بيكم يفتح الباب ..
ياسين : انعل والدي والديكم شنوووو تخوفوني عبالكم ولكم
جلبي شنووووو جلبي متخوفون جلبي .
انــور : انتوا تخافون اكثر من جلابكم .
يوسف : انــور ريــان منا العالم لا تخلوها تصير دم .
اجه ريــان ياخذني من ايد اخوية مايقبل رافع المسدس براسي
_ افجرررر راسهااا عوفها .
ريــان : ياسين انت بعقلكككككك شتريد منها مو إنت زوجتنا شتريد بعد .
ياسين : انت رحت رجعت هاااااي بنت الفگر وتريد بنت ياسين
تعيش وياها تقارن مستوى عائلتي بهل عائلة الزبايل .
ريــان : ماكووووو غيركم زبايل رنيم واهلها تاج على راسكم .
ياسين : تخسي نعال برجلي ما البسهم لك احنا الــريـاش
تاجات على روس العالم كلهاااااا يخسي الي يصير تاج راسنا .
رجع يسحب بيدي واني عيوني تلالي بدموعها وجسمي
يرجف بس بجي من الخوف ما اكدر ابجي مقتل مصطفى
انرسم بعيوني ورجعت بنفس شعوري وموتي بذاك اليوم
وريان يحجي وياهم ويلتفت يشوف حالتي ويريد بس
ياخذني من ايدهم ، من بيت العرك الباب اندك
وابوية من شافني صفن گلت راح ينقهر على حالي ويعوفني
بس موتني الف موته من اقترب من ريــان وضحك بخبث
ياسين : تدري بيهااااا تشتغل من وراك وتريد تشتكي على اهلها ؟
خنزر ريــان بعيونه وجاوبه بنبرة برود تجرح
_ تاخذ حقهم منكم كفو منها ذيبة .
ياسين : هههههههههه تدري بيها راحت للفندق الي
مات بي مصطفى مقتووووووول تدري لو نايم ورجلك بالشمس .
ريــان مايدري خليت ايدي على گلبي احس بعد ما اكدر اجر النفس
وعيوني نطت من قهرها وياريتها تنعمي وما اشوف ابوية هيج
يذل بيَّ ويريد بس يوگعني والمفروض اذا غلطت هو يسترني
ياسين : رحتي اطلعين الكاميرات موووو اني عندي سحبتهن
يمي اخلي يشوووووف الصلافة عندددددچ شلون تنزلين
راس اهلچ وتفوتين بكل ثقة على فندق انت وعشيقچ ؟
فر ريــان قميص ابوية على ايده وثبت نظراته بعيونه
_ وين ترررررريد تووووصل لكككككك ياسين .
ياسين : لازم ماتعررررف بنتي نزلت راسي ولگيتهاااا
بغرررفة برأيك شيسوون وحدهم جانوا هاااا ؟
ألتفت ريـان يشوفني بعين الغضب ضاغط على فكه
ومن العصبية شريان براسه ظهر ونزل على رگبته
هزيت راسي بـ لا خفت ماردت ارجع وياهم خفت
ادري ياسين عنده استعداد يموتني حتى ما اضرر سمعته
ويخاف اشتكي ادري بي يخاف تطلع مني وافضح
الصار بذاك اليوم وابين حقيقة القصة المفقودة والي
حوروها بتفكيرهم القذر .
انــور تسلل من بينهم فتح باب الكراج صار علي الآكبر وأخوانه
مقابيل اهلي الي الله لا يرضى عليهم لزمني رياني جرني
من قوة السحب انضرب وجهي بصدره تجاهلت الوجع
وجلبت بقميصه ارجف وصوتي يرعش بخوف ونبرته خافته
_ لا تعوف ايدي لا تعوفني ما اريد اروح ماروح وياهم اني ما اروح .
_ اششششششش ..
_ راح ياخذني .
لف ايده على ظهري وسحبني اكثر صرت بقرب منه
جسمي من الخوف والارتباك ينفض نفض .
علي الآكبر: الحمدلله على سلامتكم ظلمتوا الدنيا بطلتكم .
ياسين : اجه العار .
علي الآكبر: مو نتخارب واذا نتخارب نتضارب .
يوسف : سوي طريق يلة .
جــود : سوي درب الأبو الولد خلووو يلعب جولة .
فات بس علي الآكبر اخوانه باقين برا ما ادري اذا كلهم
او نصهم بس هوسة والجوارين طالعة على أصواتنا
ياسين : اذا ما اربيكم كلكم من جديد .
علي الآكبر: ربي روحك حتى تربينا انتوا كبار منكم نتعلم .
ياسين : نابص روحكككككك انت بكل مشكلة .
علي الآكبر: هوايتي اطيح حظكم ، راجعين بحيل صدر
لازم تريدون اكشف المستور على اخر اوراق عندي عليكم
هااا هل مرة تعذروني مو اوراق تسجيل صوت وصورة .
ياسين : سهلة مثل ما طلعنا من هاي نطلع من الي اكبر منها
فلوس وموجودة اغرگ الحكومة فلوس اخلي الوزير يطلعني .
علي الاكبر : لك جوووود عيب لا تجر زيج ، لك يعاااار الزلم
يعااااااااار الزلم من الوزير يجي يطلعك ليش خست انت وياهم
هل فترة كلهاااااا هااا ليشششششش ؟ زين ليش طلعت وعفت
ابن اخووووك يسار خيسه بالسجن كبش فداء ؟
ما اشوف غير فار ابوية وضرب علي الآكبر
على وجهه وهذا بعده ما مستوعب الضربة
ونام على ابوية يضرب بي بوكسات ويوسف
يسحب بي يريد يشيله منه وهو قافل يضرب بكل حيله
واخواني يريدون يغدروا ويضربوا وفاتوا اخوانه
تلاثة ما اعرف منو يضرب منووو بوكسات صارت
وأني صافنه بصدمة ما احس غير جرني ريان ودخلني
للبيت وقفل البوب بقيت بس اني ورنيم سحبت
البردة اريد اشوفهم وهي تقربت مني ودفعتني
_ مووو متزوجين على ورق ولا تريدي ولا يريدچ
ليششش هل مشاكل لچ ليششش صوتنا طلع جان رحتي
وياهم وخلصتيهم وخلصتيني شتريدين مني والله سممتي حياتي
فارضه نفسچ جبرررتي عليج شلون يخلص منچ .
دفعتها انضرب ظهرها بطرف الكاونتر شاغت روحهااا
صرخت صراخ خلت رجلي تثگل من شفت على صوتها
اجه ريــان يركض بقيت الزم بالغراض وامشي بكل
ما تبقى من قوتي صعدت على درج دخلت للغرفة
واسمع صوتها يصيح بعلووو صوته
_ ششششششبيچ رنيم منووووو وياچ ؟
_ ضربتني هااااي الي تتعارك وانضربت علمودها وانفضحنا بسببها
ضربتني كله منك انت ما خليتهااااا ترررروح انت بيدك
راح تخليني اشرررد منك لان اني تعبانة وحيل المشاكلكم ماعندي .
ما سمعت صوته بس اعتكفت جوة الباب جسمي يرجف
بس دموعي رافضة تنزل ، وين جنت اني هذا المكان
مو مكاني المفروض اني ومصطفى هسة صايرين عائلة
وين راح حلف يخلصني من بيت الرياش عافني حتى مصطفى عافني
تجرأت من بعد حرب بين عقلي وگلبي ادخل على فيس بوك
وكتبت " مصطفى محمد " طلع اول واحد بس صورته ماكو
مغيريها صورة لافتة صغيرة ما تنشاف دخلت على صفحة
فتحت الصورة وعيوني اجرمت بدموعها ياريتني ميته قبل لا اشوفها
" انتقل الى رحمة الله المغدور مصطفى محمد اخ كل
من احمد وعلاء وستقام الفاتحة في منطقة ****
في تاريخ * ، الساعة** "
لطمت على وجهي لطم بنية وصل خبر موت ابوها
ملخت روحي تملخ وبلا صوت ما اكدر اصرخ
خفت يضربوني شكد حاربت روحي ما افوت على صفحته
ادري بروحي انتهي اموووت والله امووت ارجع بالصور
ضحكته الحلوة وتصرفاته الرجولية دمه المحبوب
شبابه الضاع كشخته كلهااا كلهااا ماتت وياك ومني
اني سبب موتك مصطفى خليتهم يعرفون مكانك ادري بيهم خطر
وبقيت وياك سودة عليهه انت جوة الترررراب دفنووووك
مصطفى عااافني وراح جوة التراب خلاني وحدي مكسورة .
نزلت بالمنشورات اخو ناشر ويطلع بصفحته نشر مشترك
فديو مصطفى گاعد واخوانه وجماعته يضحكون وبيده جگارة
وبداية الفديو صوته يضحك ويتشرط عليهم
" ولكم بيوم عرسي اذا ما تسدون الشارع من الطول للطول
وكلكم على فد هوسة تهوسون ازعل عليكم افرحوا واني افرح وياكم "
خلص كلامه وطلع فديو شايلين التابوت وكلهم التشيرتات
مشگگه ويكمزون ويلطمون على نفس الضربة والشارع
من الطول للطول مسدود فوج من العالم تمشي ومكتوب
" خوما قصرنا بالهوسات خوية مصطفى سديت الشارع
بيوووم شيعناك لبستك جفن ابيض وزفيتك وبالتراب غطيتك "
وعلى طول الفديو مشتغله اغنية توصف فاجعتهم
"شوف الدنيا بفراگك اشسويت لي بعدك بعدك و الله سبع ضلوع
كسرتلي بقى منك ارماد بخت ذيج الناس و لك هاي المصيبه
وين جانت لي ، قاط ابيض ردت تلبس ما ردتك جفن تلبس
لساني بفرقتك اخرس و سفة تروح و سفه
طولك شبر اشبر بيك شما تلتفت هيبة الگيك
هضيمة للگبر تاليك و سفة تروح و سفه
يا ابن گلبي عجب شو قصرت وياي
مال الموت صاير يل جنت ما لي "
وحدي وبغرفة لا احد يمي ويواسيني ولا گدرت
اسيطر على وجع روحي يخلص الفديو واعيد بي
وارجع انهار والطم واملخ بروحي انتهيت خلصت حيلي
انتقمت على روحي وگعت لا اكدر اشيل ايدي ولا ارفع رجلي
رفعت عيوني ودموعي من عيوني تمشي على خدي
_ ربي گلبي ربي ألم وخذلان وخوف متروس .
هزيت راسي حيل حيل حيل وغمضت عيوني واني اردد
_ انام وگلبي مكسور متروس حجي ومواقف ما تنسي
احسن حتى اكسر حُــرة الضعيفة من اگعد
اصير انسانة ثانية انتقم منهم كلهم دمروني موتوني بيدهم موتوني .
بقيت بمكاني للصبح گعدت اريد أشيل روحي ما اگدر
جسمي مشلول اريد احس بأعصاب فقدتها بس ما خفت
ولا نزلت دموعي ولا صيحت واستنجدت بـ انسان
بقيت بمكاني الساعة والساعتين والأربع ساعات
وما شاربه ماي ولا متسحرة بس صمت واني نايمة نويت الصوم
وضعي هذا إني استاهله كلشي يصير بيَّ حنيني سببه
انطي للناس اكبر من حجمها وبعدين انصدم بيهم
ما اتووووب ليش ما اتوب منهم لازم اتوقع الصدمات
من الكل ما استثني بشر حتى لو هل انسان ملاك ويايه
ما استبعد هذا الشخص راح يجي يووم ويكفخني على وجهي
ويخليني اوصل مرحلة من انهيار ، واخلص دموعي
والحجي ياكل بروحي ، كلهاااا كلهمممم بيوم راح نعاتب
روحنا على فعل ، وكلمة طلعت من عدنا وخلونا نتندم عليها .
اذا ما أعاملكم معاملة الكفار بس خلوني ارجع بحيلي
اخلي كل جرح بروحي ينزف ضعف ينزف بيكم
سهلة والله سهلة عرفت بعد العبها على مخفي
أندمهم والله أندمهم على الصار ، بعد فترة بديت احس
بـ رجلي وايدي بيها خدر ، حاولت اساعد نفسي الى ان كدرت
اسند روحي واسند نفس على كنتور وبقيت اسوي تمارين
حتى الخدر يفك من جسمي ، بعد ساعة من المحاولات نهضت
بعدني بملابس المدرسة شصاير بيهن القميص والصدرية
شگگتهن بدلت غيرهن وبدون دراسة حتى ماصار عندي
وقت اقرا على الجدول اخذت كتب والباروكة ثبتتها
واخذت الجنطة على ظهري قبل لا انزل غسلت وجهي
بدون ما اشوفه بالمرايا ونزلت شگد عندي برود بس
جسمي يرعشششش وهل رعشة اصعب شعور يمر على انسان
من انت بارد بس جسمك فاضح انهيارك والحرب بداخلك .
وصلت للصالة صاير بيّن الاستقبال والمطبخ اريد اطلع
ورنيم هي وامها گاعدات امها هي شافتني وكمزت عليَّ
_ ولچ شلون وياچ حاجيني .
رنيم لابسه تراك فرتها ورفعت التيشيرت تشوفني الضربة
مزروف شوية وصايرة دائرة جبيرة لون ازرك
_ ماتخافين الله انتِ زين ما خفتي ريــان يشوفها .
حُــرة : ما اخاف من اكبر واحد .
_ حتى من ريــان .
_ وليش اخاف منه بشنو غلطت ضربت بنتج
مو عبث ولا اني مخبلة السانها علميها من تشوفني
تبلعه لا طلعه عليَّ لا اطلعها تفتر بشوارع العراق مخبلة .
هددتها وعفتها تحجي وتتحسب وتدعي
بس استغربت شعجب ماتضرب رجعت
للصالة ما اريد اروح من المطبخ سادات الطريق
رحت على استقبال اول ما دخلت ثبتت بمكاني
من شفت ريــان گاعد لابتوب مفتوح
واوراق وبيده قلم ظهره عدل وايده بس ايده تتحرك
ترسم دوامه على حجم الورقة محاوط بالهدوء والسكون المخيف
عرفت سمع وكشفت غايتهن من حجيهن ويايه يريدن يسمع
شوف على اساس فقيرات واني الي ما استحي وما احسب حساب .
خليتهم كلهم ورايَّ لا بررت ولا بدر مني رد فعل كملت
طريقي واني رافعه الراس ، طلعت وسديت البوب ورايَّ
وبقيت امشي اريد بس اوصل للشارع العام واخذ تكسي
بعدني بنص الطريق وكفت سيارة انــور بس وگف صعدت
بدون ما انطق بحرف وصلني للمدرسة وراح دخلت
معتكفة اخاف من كلشي حواليه دخلت للدرس المدرسة
تريد تحضير اعتذرت منها وتعجبت حتى ما رزلت
او حجت شي ، دخلت الكل الدروس اركز بيهن
وبنص درس الرياضيات تشرح وياها اكتب
بس عيوني وحدها أدمّع وتنزل على خدي بس
مظهري ثابت صامد ما ينهار ، واني اكتب
شفت مدرستي ذبت القلم واجت يمي رفعت راسي
_ شبيچ ماما .
_ مآبيه شي .
_ ليش تبجين .
_ ما ابجي بس عيوني تبجي وحدها .
اخذتني برا تعدل بشعري وتحجي بصوت خافت
_ صاير وياج شي تريدين تحجي اني مثل امج .
"مثل امي " يعني هذا مثال حلو الام شي حلو تقارن نفسها بي ؟
_ مصاير شي بس مريضة .
حاولت ما اخذت مني كملت الدروس على اعصابي
طلعت بعدني بالباب واجه رجال جبير بالعمر يمي
_ حُــرة ياسين مو ؟
_ اي صح .
_ اتفضلي اني ابو الخط .
_ شلون يعني .
_ استاذ ريــان هو طلبني خط الج .
اجه ابوية على بالي منو يگول مو من طرفه
_ وشنو يثبت .
هو الرجال ما مفتهم عاندت ماقبلت تروح وياه
والرجال يمشي ورأيه واني اركض صاح
_ اخابر استاذ ريــان حتى تتأكدين ؟
_ ها .
_ اخابره ؟
_ اي يلة .
اتصل وفتح خط ريــان بنفس الدقيقة جاوب
_ ها ابو عماد .
_ اختك ماتقبل تصعد استاذ .
ريــان : ليش ؟
اشرت اله حتى يسد الخط غلّق الاتصال رحت امشي للسيارة
صعدت من تأكدت منه ، يسوق بحترام مارفع راسه ابد
لمحت ريــان بالباب من تأكد رجعت دخل مايريد اشوفه .
اني دخلت للبيت وبوجهي صعدت كرهت البيت واصحابه
قفلت غرفتي وعدت نفسي ما انام اذا ما اخلص دروسي
درست الحد ماسمعت اذان المغرب فتحت بطل الماي
بالجنطة شربت ورجعته ورجعت ادرس من دخت
خليت الكتب على نفس الهوسة ونمت بفراشي
جريتها نومة الثاني يوم كعت وبدلت وطلعت للمدرسة
ونفس الروتين تكرر يوم ويومين اصوم بدون فطور ولا سحور
اكتفيت بالعصاير نفسيتي انتهت ما اطيق اكل شي
شريت عصير من اذن وجريت كتاب وإني متمدده اقرا
ما احس غير وگع على وجهي سديته وغفيت
للفجر اسمع صوت ميمي تصيح بأسمي وحت فتحت الباب
بيدها صينية أكل رفعت واسي وغمزت الها
_ شنو هذا ؟
_ سحور ماما اكل بسرعة قبّل آذان .
طبگت الباب بوجهه وقفلته ورجعت بفراشي النوم بعيوني
اريد ارجع انام وانضرب باب غرفتي من قوة الضربة
فزيت من مكاني وركض فتحت الباب وگلبي يدگ بجنون
ريــان : صااااااااار ساعة ادگ الباب شكوووو ماتفتحين المهجوم .
ملت راسي على طرف الباب بدون اهتمام نعسانة بمعجزة مقاومة
_ نايمة بسابع نومة .
_ واضحححححححح .
_ واريد ارجع انام .
_ حلوووو حلوووو .
_ تحتاج شي ؟
_ والسحوووووور ؟
_ شبي .
_ لغيتي ؟
_ اي .
_ والفطووووور ؟
_ هذا هم شبي .
_ نهيتي منّ حياتچ .
_ سربت اسراري .
_ عجيببببببببببببب ؟
عفت الباب مفتوح ورجعت بفراشي غطيت روحي
دخل وگف فوك راسي يتأمر ورافع حاجبه ومكتف ايده
_ امشي انزلي اكلي حرام تبقين بدون اكل .
_ ههههههههههههههههه ..
_ شبيچ شنوووو كلامي يضحك ؟
_ لا تتعامل ويايه بهل طريقة عاملني مثل ما تعامل
اختك دُر ، تاكل ما تاكل اخر همكم ، تضحك تبجي وشنو يعني
انتوا بعالم وهيَّ بعالم لا تغير من نفسك .
_ يا بنت لاااا تحجين كلام اكبر من راسچ .
عدلت نفسي وابتسمت ...
_ يا ولد ما مضطر تسمع روح اطلع انزل روح مناا .
_ مو خوفاً عليچ بس اذا يصير شي بيچ اني ابتلي
وتعال وين جنت وليش وشكو وشلون وندخل بسين وجيم .
_ مزين شعرك اممممممم .
_ شنو ؟
رفع حاجبة متعجب وهيج صفح ينظرلي
طلعت عصير شربت ورجعت بين الكتب
_ بطلي عناد تعبتيني .
_ يمك شايفتك شايفني .
_ هي هناااا المشكلة .
_ مافهمت شبيك ريــان .
عافني وراح يريد يطلع لثواني هو لازم الباب متردد يروح
ريــان : حرام تصومين بدون اكل .
اندفر الباب جفلت هو اندفع شفت انــور عصبي وعيونه حمرة عاط
_ امشي انززززززلي امشي لا اطيح حظچ وحظ اهلچ .
من الخوف من شكله اتجنب اشوفه عيوني صارت على ريــان
_ هذا شبي ؟
انــور : مووووو احجي وياج امشي يلة ما اتحرك اذا ما تنزلين .
حُــرة : عندي دراسة شوف الكتب شبيك .
انــور : احسب الرقم 3 يا بنت ياسين اذا ما اشوفچ
جوة اشمرج هسة من فوووووووووك يلة راح ابلش 1 , 2
بعده ماخلص ومريت من يمهم المشكلة هذا البارد قالب الثلج
واگف مكتف ايده واخذ وضع المشاهدة نزلت وإني أتذمر
وصلت للمطبخ رنيم گاعدة عيونها تريد تنط من العصبية
بس دخل ريــان ضربت الميز بيدها ضربة حسيتها انكسرت
رنيم : يعني جبتها واجيت ؟
دخل انــور أخذ قوطية ببسي من باب الثلاجة
طگها بصوت وجاوبها قبل لا ريــان يحچي بكُل برود
انــور : عوفي مايطيق ياكل اذا مايشوف وجه حرته .
بنفس الوقت اني وريان التفتنا على انــور فاتحين عيونه بصدمة
رنيم : ريــان سمعت ؟
انــور : من تزوجها لليوم عودته يگعد ياكل وياها
ويضحك على تصرفاتها صار كم يوم ياكل وياچ مجبور
عبالك گاعد بفاتحة هسة حرته تخلي يضحك .
ريــان : انوووووور تخبلت .
انــور : واحد من شروط الدين اذا عددت بالزواج
تعدل بين نسوانك صار كم يوم تنام بس بغرفة رنيم
مايصير اليوم بات بغرفة حرة .
ريان : عجيب لك راح اشمر الجاي بوووجهك
انور : اريد مصلحتك احسن متخلص ليلك
يا صاعد يا نازل جنك وحدة عدها ولادة .
ريــان : منوووو اني ؟
انور : لا ابوك ، المهم صيام مقبول انت ونسوانك .
ردت اصعد وياه دار وجهه ورفع رجله بمعنى ادفرچ
رجعت للمطبخ من شفتهم تذكرت ذاك اليوم شلون انشليت
وحدي بجيت وحدي وبسببهم كل مشكلة اكبر من الثانية
اخذت گلاص جاي صبيت النفسي وگعدت على نفس الميز
وهيَّ على اعصابها تهز برجلها بحيث الميز ينهز من غضبها
اخذت توست سويت قشطة ومربى اكلت وعفتها عبالك ما موجودة
بعد ايام تاركة الأكل بس اكلت انفجعت اكل وارجع اكل
الحد ما صاح امساك رحت اغسل وقبل لا اصعد
وكفت باب المطبخ وايدي على خصري واشر بيدي على ريــان
وهوه وجهه مگلوب رنيم متعجبة عرفني افكر اجفص بيهم
رد نتر بعصبية
ريــان : شبيچ ؟
حُــرة : يلة امشي اصعد اليوم يمي .
اني حجيت هيج والضحكة غصباً علية وعلى اهله بينت
على وجهه وبصوت عالي يضحك اكتافه تهتز وصار احمر
يغطي وجهه بيده ويهز براسه ويسوي بيده حركة مخبلة
ضحكت على ضحكته وملامح رنيم الي دفعت الكرسي تريد تهجم
صعدت مرتاحة لان قهرتها مثل ما قهرتني قفلت غرفتي ونمت .
نمت الثاني يوم الظهر جمعة وماكو دوام ولازم افطر
يعني ضروري ابدع بالأكل ، صليت ونزلت شفت بس ميمي
بالمطبخ بعد ساعتين يصير الفطور والمطبخ يصوفر
_ ميمي شمسوين اكل .
بقت على نفس وضعها تشرب جاي ماتجاوب
_ مو احجي وياك ، راح اجي اشگج شگ والله احجي .
رفعت راسه وبطرف عيونها خزرتني انوب هيَّ من
اصحاب البشرة السمراء خلتني ارجع ليوره
_ امداچ جنچ هذا الي شغلچ هناااااا تعرفي منوو مو ؟
رحت وحدي مثل الشاطرة طلعت لحم من الثلاجة
وشغلت قران بصوت عالي بتلفزيون وبديت اطبخ
واستمع جهزت البرياني والمقبلات ولبن وريحة
الأكل انتشرت بالبيت كُله ، اقلب بالتمن وسمعت صوت
انــور : حُــرة ؟
_ ها .
_ تطبخين؟
_ اي اي تعال انت ما صايم بس شوف الملح مضبوط .
اخذت بالخاشوگة ومشيت صرت مقابيله ورفعت ايدي
نزل نفسه هو يذوق وطلع ريــان يلبس بالساعة مالته
هو شافنا ثبت وملامح الغضب برزت نفسها على وجهه
نزلت ايدي وما اهتميت ورجعت اضحك
_ ها انــور شنو رأيك .
_ 10/10 .
لبس ريــان قناع البرود وهو يمشي وبعدهم اهتمام يحجي
_ ها نروح ؟
_ لا اكل ونروح جوعان ، حرة صبيلي اكل طيب .
عرفت انــور يدري بريان راح يطلع
من غرفته وحركاته متعمد يسويها
صبيت اكل ركض ركض وريان گاعد بالصالة على تخم
وانور على ميز الطعام خليت الاكل والمقبلات وكفت متحمسة
_ اكل اكل الف عافية شوف البرياني طيب .
سحبني من ايده نزلني وهمس بصوت ناصي حتى ريــان مايسمع
انــور : لا ياخذچ الحماس وتگمزين فوك راسي لا اعدم اهلچ .
حُــرة : شبيك اشوف طيب .
انــور : روحي جيبي لبن وصيحي ابن عمي هذا لبن .
حُــرة : ههههههههههه اي هسة .
رحت للثلاجة صبيت لبن ولزمت الگلاص رفعته
_ ابن عمي انوووور الورد ضد الحرارة والبرد هاك احلى گلاص لبن .
_ هههههههههه هلا هلا بيها هلا .
آخذه مني من صرت قريبة كفخني على راسي
انــور : وجععععع شنو هاي ضد الحرارة والبرد اكسر راسج والله .
حُــرة : شبيك على وزن مشيتها اكل تغزل بأكلي شبيك .
من راح صوتنا ماتحمل دخل مكتف ايده يخزر بينا
ريــان : شكوووووووو ؟
جاوبه انــور بنبرة صوت باردة عبالك يقلد بروده
انــور : شبيك ؟
ريــان : شبيك انت تتصرف مثل الزعاطيط .
يحجي وصل للزعاطيط اشر عليَّ رفعت حاجبي وجريت
كرسي وگعدت قريب من انــور اريد بس يگول البرياني طيب
والمنظر موتني متت من الجوع هو يحجي واني صفنت
بوجهه انتظر ياكل وهوه ملتهي يتجادل هو وريان
شافني انور صفنت بوجهه رفع حاجبة ولزم روحه ما يكفخني .
ما احس غير ريــان سحبني من التيشيرت ويمشي
_ امشي اصعدي فووووك امشي من يصير الفطور انزلي .
حُــرة : بعد ربع ساعة على فطور شبيك لازم اجهز السفرة .
طفرت من ثالث بايات الدرج للگاع ورجعت للمطبخ وريان
واگف فاتح عيونه مصدوم خطية من طفرتي .
طلعت مواعين كبار ورتبت البرياني وطلعت دجاجة
من الفرن قطعتها وزعتها بالأطراف فوك التمن
خليتها على ميز صار منظره دمار والريحة تفرفح
والمقبلات والعصاير واخر شي مرق اللحم وزعتها
على ميز بترتيب ، طلعت رنيم مذهولة من المنظر
لو من وجودي لو من ندارتي خطية كفختها على وجهه
گعدت وصوت الجوامع صار عالي ينادي " الله اكبر "
صبيت گلاص لبن وشلت تمر وقدمت ايدي الريان
_ افطر ابن عمي .
لثواني هو صافن بوجهي اخذهن واني رجعت صبيت وفطرت
گعد ورنيم كعدت مقابيلي صبيت بـ ماعوني وبدون ما ارفع
راسي أكل واتلذذ ماكو احد همني منهم ، بنص الأكل وتلفون
رنيم رن رن رن تحمحمت وهي تدفع الكرسي
_ هاي امي اشوفها شنو تريد .
هي راحت وريان بلا وعي قبض ايده وظهر براسه هيج
دمار من الأعصاب يرجف رجف
ريــان : ثواني وراجع .
طلع من المطبخ يمشي وكأن يريد يصيد فريسة
خطواته مدروسة بكُل حذر يخطيها وگف قريب من باب
غرفته يتسمع تعجبت على تصرفه ريــان ثگيل ماعنده
هيج تصرفات ابد ماعنده ، دقايق ورجع المكانه انــور
مراقب حركاته وتصرفاته عن كثب ، بس رجعت حتى
ماترفع راسها وتشوف عبالك عينها مكسورة
خفت من نظرات الحقد الي ظهرت على ريــان اتجاهها
وبلا وعي بقيت اركز بيهم هو يهز برجله من الغضب
وهيَّ تاكل تحاول ماتبين ارتباكها او خوفها .
رفع الماعون يصب آكل ويسأل بيها
_ شنو شبيها امچ حبيبي ؟
رنيم : ها .
_ امچ محتاجة شي شعجب خابرت وقت الفطور ؟
_ ها گالت اكلي زين مو تدري البارحة من خابرتني
بليل حجيت الها على دوخة فـ تريد تعرف شلون صرت .
_ اممممممم عبالي نروح نشوفها خاف تحتاج شي .
_ لالالا مايحتاج ، اكل حبيبي اصب الك اني .
_ ارتاحي انتِ افطري اني اعرف شلون افطر .
انــور ياكل ويختلس النظرات يدرس تصرفاتهم
ريــان استدار بنظراته من رنيم على انــور
خفت من تصرفتهم وعجزت افهمها كملت قبلهم
رحت خدرت جاي اريد اشرب وريان رجع نفسه
ريــان: حراير جاي .
درت وجهي من نطق اسم حراير وضحكت
هو ابتسم على ضحكتي ، دفعت رنين الكرسي
ودخلت للغرفة رجعت اصب بالجاي
وحسبت حساب انــور قدمته الهم واني استندت على
كاونتر اشرب واتذكر " حراير " وابتسم مثل المخبلة .
بس خلصوا طلعوا ريــان وانور واني شفتهم راحوا
عفّت الهوسة على ميمي وصعدت صليت وكعدت اقرا قران
واندفع باب غرفتي ما اشوف غير اخواني اربعتهم دخلوا
واحد ورا الثاني رفعت القران على وجهي ضربني بوكس
حسيت اعظام وجهي تفلشت والقران انشمر وأوراقه تناثرت
بقيت ارفس دفرته على بطنه وكفت من حلات روحي
بس اريد اوصل للباب ركضت وكف الثاني دفرني على رجلي
دفره خلتني بأخر الغرفة سحلني من جادر الصلاة نومني
على سجادة الصلاة وبيده ضغط على رگبتي وهو يصيح
_ تشتكين تررررريدين تشتكين على اهلچ مووووووو
تفتررررررررين بالمراكز والفنادق على شنووووووو
هاااااا مقهورة على حافي على حاااااااافي لچ *****
انعل *** انتِ *** .
واحد يضغط على رگبتي والثاني عيونه يخليها بعيوني ويصيح
_ تشاهدي على روحج وافرحي راح تروحين المصطفى .
نزلت دموعي مثل النار على وجهي واشهگ من منظر اخواني
جانوا مجرمين ، حتى لو داخلين مجرمين حقيقيين يرحموني
اكثر منهم بقيت ارافس لازمه ايده وروحي تطلع بكل ثانية تمر .
دُر ...
نايمة بغرفتي على سريري متغطيه وبس عيوني طلعتها
وعلي الآكبر گاعد على تخم اراقب بـ اقل فعل يبدر منه
_ نامي .
_ لا .
_ تعبتيني والله تعبتيني .
_ خليني اروح منا حتى ترتاح .
_ انا راضي بالتعب بس لا تروحين .
_ صار يومين ما نايم هسة تمل وتستسلم .
سمع صوت الباب راح فتحه ورجع هو وعمتي
_ ها يمه شلونچ ؟
_ زينة .
ألتفتت على علي الآكبر شافت عيونه صايرة دم من التعب
ام حسن :يمه خبلتني مو حتى تمشي وطوطح من النعاس نام .
علي الآكبر : ان شاء الله انام ، وين سراج الدين ؟
ام حسن : من رجعتوا متعاركين انتوا وبيت الرياش ابوك
لعب بيهم لعب هو واخوانك وهذا قافل على ميثاق ماقبل
يفوت للغرفة اذا ما تطلع منها وابوك يصيح ان بعض الظن اثم .
علي الآكبر: اي وهسة وين راح ؟
ام حسن : صعد وهوه وياها عركهم والصراخ
ويمكن ضاربها ما ادري بعد واخذها شمرها على بيت عمها
بس جهالها باقين هنا ماقبلت تاخذهم .
بعدهم يحجون غفيت بدون ما احس على مفسي من التعب والعلاج
راسي ملفوف كله علاج وكريمات تخفف الحساسية الصارت براسي
عجزوا الدكاترة يعرفون سببها بس كلنا نعرف من الشامبو بي شي
دقايق وحسيت صار قريب مني بعدت روحي منه ودرت جسمي
على اشوفه نايم على مخده رفع ايده يتلمس خدي
_ خليني يمچ .
هزيت راسي بـ لا وابتعدت اكثر
_ انتِ مو تأمنين بحضني تنامين .
_ قبل .
_ وهسة .
_ لا تنام اخاف اكعد حتى اذا يصير شي احميني .
_ صار ، بس تعالي نامي بحضني .
_ ابد ما اقبل .
أعصابه تلفت من نفوري ويعاند مايقبل ينام لان اني اعاند
ما اجي انام بحضنه ، درت وجهي منه ورجعت غفيت
خمس ساعات وحسيت يفتح الشاش من راسي موعد
العلاج لازم يخلي ، رفع راسي نومني على رجله ويدهن
بالكريمات ويعقم بالمصيبة الصارت براسي بقيت فاتحة عيوني
على نلفزيون وهو يلف بي بشاش جديد والباقي من شعري
نازل يعدل بي ، رجعني على مخده وراح للمجرات طلع مقراضة
وكعد قريب مني على سرير اخذ ايدي باسها يريد يقرض أظافري
سحبتها منه ودفعته من صدره
_ ما اريد شبيك .
_ يجرحن راسچ لچ مايصير .
_ بعمري ما قرضتهم بس انظفهم كل كم يوم متعودة عليهن .
_ من تصيرين زينة ارجعي طوليهن .
حاول يقنعني يتوسل رفضت واخذت المبرد نظفتهم كُلش زين
هزت كتفي ما قبلت ، ردن تلفونه رد بسرعة وطلع برا
دقايق ورجع بدل يريد يطلع
_ وين .
_ عندي شغله اني وريان دقايق ونرجع .
_ رجعنا السوالف لثام وملابس سود .
_ اتحمليني.
_ رجعوا بيت الرياش ورجع الصياد وعلي الآكبر
يعني ماتفكرون تصيرون بيدهم احسن تصير مصايب .
_ ومنو گال ماصارت مصايب .
_ الله يستر منكم شمسوين .
_ اكو قنبلة موقوتة مخليها اهلچ فخ الريان .
_ يا قنبلة ؟ انــور يدري .
_ الوضع مكشوف بس احنا نجاريهم خطية
يتفشلون ويعرفون احنا كاشفينهم يريدون يعبروها على صياد ههههه .
رجعت غفيت من طلع حتى ما اخاف لا اسمع ولا اشوف
نص ساعة وفزيت على صوت طگطگه بالمطبخ لزمت
كلبي وشجعت روحي اتحرك هذا تخيلات جذب ماكو شي اتهيأ
وهم هذا وهم مو حقيقة ، اخذت تلفوني وكتبت
" اكو احد ويايه بالبيت "
بعدني ما طالعة خابرني واني امشي وصلت الباب الحمام
واسمع صوته مبين فحطان يجر النفس بصعوبة
_ دُر تسمعيني الوووو .
_ اششششششش .
وصلت الباب الحمام مفتوح الماي اريد افوت بعدني اعبر الحافة
والماي من وحدة انسد صرخت ورجعت اريد اطلع انضربت
بالحافة وگعت بكل حيلي على ظهري بقيت ارافس وعيوني
على دوش رجع يرش ماي اريد اگوم واشوفه خط احمر
من المطبخ ماشي على استقبال گلبي حسيت يريد يوگف
_ منوووووو هناااااا منووووووووووو .
من الخوف انفاسي حبستها اخاف اتنفس وصلت لهل مرحلة
ابجي وافرفح ايدي على راسي التلفون شمرته من ايدي
بقيت ازحف اريد اشوف شنو هذا الخط الاحمر شنووو دم هذا دم ؟
دائرة جبيرة بالمطبخ اريد أتحرك واشوف شخص لابس اسود بأسود
گمز من الشباك برا البيت ، كل حيل عندي من شفت هل منظر
راح وانتهى حيلي اريد اجر النفس بعد ما اگدر رجلي ما احس بيها
عيوني من البجي اطلع حرارة بس صوتي ما ادري شلون طلع
وصرخت صراخ واني اصرخ حبالي الصوتية تجرحت
ومغطيه راسي بيدي واصررررخ اصررررخ بخبال
اندفر الباب دخل سراج الدين وعمي احه يركض حضني
_ دُر بوووووية ولكممممممم شنووووووو هذا .
سراج الدين جمد بمكانه عيونه على دم عمتي فاتت وراهم
وجود وشهد يركضون واخر شي ريمان وبتول من شافن
شكل البيت والمصيبة بعدهم موجودين والدوش ينفتح ويرجع
ينگطع وحده افتر جــود بالبيت وراح وراه البيت على بواري
يشوفهن ودخل علي الآكبر يرجف اخذني مو ايد عمي واني دفعته
دُر : لاااا تجي يمي ولكم لا تلزموني .
وكفت اريد امشي رجلي ما تشيلني لزمني عمي ودفع علي الآكبر
ابو حسن : بابا عوووفهاا ماتشوفها تصيح ماتريد احد .
دخلني للغرفة ارجف ايدي على راسي اتخيل الصار واهز بروحي
علي الآكبر: شصار بس فهموني وينكم ماتسمعووووون صوتها ؟
ابو حسن : نايمين والله بوية بالغرفة جوا مانسمع .
سراج الدين : واني وجهالي بالغرفة فوك بس سمعت اجيت اركض .
واني اشهگ ودموعي تجري الرعب بروحي صار
درت نظراتي وثبتتها على جــود وشهد وصحت
_ انتوا مووووو احجوا متفقين انتوا وعلي الآكبر
تررررريدون تنتقمون كلام ميثاق صحيح ميثاق
ماكوووووو حتى تسوي هيج هل مرة براس منو تخلوهاااا .
جــود : دُر لا تغلطين بالكلام احترمي نفسچ
ليش ننتقم شعندي وياچ بالعكس اني احتر .....
بعده ما مخلص وغطيت راسي من علي الآكبر فلش
المرايا تفلش واجه يمي لزمني من وجهي ورفعه
_ اني لچ اني هيج اسووووووووي بيچ مخبلة عاقلة
شلووووون تحجين هيج ويايه ولچ شلون تفكرين علي الاكبر
يكدر بيوم يغلط وياج هل غلططططططط .
يحجي وعيونه تريد تطلع من العصبية قابلته بالبرود واتهمته
دُر : هسة عرفت شنو قصدت بكلامك " اني ما اعوفچ ، انتِ تعوفيني "
ضربت ايده ورجعت ضربت صدره ودفعته وهوه على نفس الصدمة
دُر : قصدك تخليني اكرهك واكره البيت واتعب وامل وحدي اطلع .
ام حسن : يااااااا ولچ دُر تخبلي ؟
دُر : تعذبني موووو ؟ تعذبني حتى تحافظ على صورتك
نفسك تظل ذاك المحب المهووس .
ابو حسن : لا تستعجلين بكلامچ دُر بوية .
عمي يسحب بي حتى مايسمع كلامي ويتخبر وهوه
ما تحرك ولا خطوة باقي بنفس تركيزه وملامح الخيبة
_ شوفوا ما يضربني مهوس هوه زين واني موووو زينة
اي اني مو زينة لان بعدني وياك وين تلفووووني وين
اريد اطلع راح امووووت هناااا طلعووووني الله يخليكم طلعوني .
علي الآكبر: هاي تحجي مو كل عقلهااااااا والله مقتنعه .
عمي يدفع بي حتى يطلع وسراج الدين يصيح
_ عوفها منهارة مو بعقلها ماتعرف تحجي ولك من الخوف حقها .
يصيحون وهو يأشر عليَّ ويشمر بيده يريد بس يوصل يمي
_ ما اطلععععع حاجيني ولچ حاجيني تظلين هيج كل مشكلة
اول واحد تلومي اني لچ اني دائماً تتعاركين ويايه كلهاااااا
ما تحجين وياها تجين عليَّ شايفتني على گد ايدچ شنووووو
مااااااا تستحين فهميني ما تستحين حاجيني احجي .
طلعوا وعمي وعمتي بس دخلوا يحجون ويايه بس الخوف اكلني اكل
يريدوني افتهم ارجف رجف من كلشي خايفة من كلشي انفجرت
من سمعت عمتي تگول
_ بس لا سحر هذا انوب شلون يبطل .
دُر : سحررررررر يا سحرررر اني هل كلام ما يآكل ويايه
تريدون تقنعوني والله سحررر.
على صوتي رجع دخل متفاجئ من صوتي العالي
ابو حسن : هم فات بي مررررض هذا ولك عوفها .
علي الآكبر: خبلتني والله خبلتني مووو سحررر موو ؟
دُر : انت بالذات ماعندي حجي وياك .
دفر ميز المجرات تفلش والمجرات كلها
تكسرن والغراض مشمورات بالارض
رفع اصبعه يحذرني وابو لازمة يدفع بي من صدره
علي الآكبر: دُررررررر لا تنترررررين دُر بطلي نتر .
دُر : ابطل بس من انت تبطل سوالف الانتقام وتصير كفوووو
وتوگف گدامي تگول بعد ما اريدچ نطلگ وانت تروح بطريقك
واني بطريق ليش تمثل هاااا ليشششش تمثل .
يريد يغلط يريد يسبني يريد يضربني يرجع
على روحه يغلط ويضرب ايده بالحايط
ويفلش بالغراض يمشي ويضرب يمشي ويغلط
علي الآكبر: اني حيووووووان ولان اني حيوان متحمل عقلچ
لان ماكوووووووو زلمة يتحمل هيج صلافة ويسكت
لوووووو واحد غيرررري جان هسة انتِ خرابة والدم بطولچ .
لزم ميز التواليت بوكسات ورجع يريد يجي يمي
علي الآكبر: اسمعي لچ اطلع كلب ابن كلب اذا بعد
بعده ما مكمل وعمي ضربة ودفعة حيل يطلع بي
_ كافي لك كافي اطلععععععع تخبلت عووووف الرجفة عوفهاااا
امداك وامده رجفتك كلب ابن الكلب ابن النعال كافي .
علي الآكبر: وحگ داحي باب خيبر مناااااا ما اتحرررك
شنووو براسهاااا خليهاااا تفهمني شنووو براسها .
دُر : براسي انت وجود وشهد هيج مسوين هذا الي براسي .
عمتي مو سمعت صاحت
_ عمي اسكتي شني انوب حجي ميثاق طبع براسچ
ولدي وشهد ما يسوها تربيتي هذولي ما معلمين على حقد .
دُر : شهد على حقد اخوية حقدت ، وعلي الآكبر هوه هددني
والله تعجبت مو سامحني گلت وين اكو هيج بسرعة سامحني
وجود وياه لان اخوووو تمرض يساعده اصلا هو بكلشي يساعده .
ابو حسن : علي الاكبر روح مناااا سررراج خلي يووولي مني .
علي الآكبر: لكككككك يابه جنت بيت ابووووهاااااا
اني جنت بيت ابووووهااااا وشوف شلوووون تحجي ويايه
اناااااا احارب اهلهااااااا لوووو احاربهاااااا اسوووي كلشي
الخاطرررهاااا وشوفهاااا شلون تجازيني ليشششش
ولچ دُر ليششششش هيج .
ماجنت اسمع منه ولا اصدك حرف واحد من كلامة
بعقلي شي واحد مطبوع "هو واخوانه السبب " وكل
ميثاق وماكووو وهل اثنين اعرفهن يخافن
دُر : وين تلفوني عموو الله يخليك طلعوني والله اخاف طلعوني منا .
ريمان : تخافين هنا يعني من تروحين البيت اهلج امان
لازم نسيتي اخر مرة طلعتي من البيت ست اشهر انتِ خارج العراق .
دُر : شكووو تدخلين هناك اعرف منو العدو ومنو الصديق
اله هنااااا ما اعرف منو ويايه ومنو عليَّ منو يريد يأذيني
ومنو يحبني ومنوووو يكرمي كلشي ما اعرررف كلها تلطش بيَّ .
علي الآكبر: انت تحجين بكامل قواچ العقلية؟
_ عموو اخذني .
علي الآكبر: احجي وياج .
_ عمو والله اطلع وحدي والله .
علي الآكبر: دُررررررر احجي وياج .
_ تلفوني وين هناك تلفوني هنا بصف باب الحمام .
سحبني من ايدي دفعني على حايط وبأيده الثانية
لزم وجهي ورفعه حتى اشوفه غمضت عيوني وصحت
_ مووووووو احجي وياچ اني احجي لووووو ما احجي .
ابو حسن : علي الآكبر ايدك منها لا اگضي بيك التوبة.
رفع علي الآكبر ايده وضربني بطن ايده
_ غمه لهذا العقل كون غمه تغمچ غم يا غمه .
لزمت راسي حتى ما مستوعبه شصار شنو هذا الصار ؟
فات جــود يريد يطلعه باوعت بحقد عليَّ من شافني صاح
جــود : دُر ديري بالچ تفكررررين هيج لا تشوفيني ا ..
دُر : اشششش والله ولا اسامحك لا انت ولا اختك ولا هذا اخوك .
علي الآكبر: هوووواي غلطتي هوووووواي دُر .
دُر : اي روح شغل فلم رعب اتعلم منه أنت واخوانك روحوا
وخلوني اني هم اروح راح اتخبل اذا اعيش هنا اتخبل .
جــود : مع الأسف عليچ والله مع الأسف لچ بيوم
ما رجعتي وجان ضايج منچ اني احجي براسه هاي دُر
هاي حبيبتك هاي الي انتظرتها الي تحبها وهسك هيج تحجين ؟
طلعت من الغرفة فتحت الشباك مال استقبال اريد اجر نفس
بعد ماعندي طاقة اتحمل ، عمي يقنع بيهم يحجي ويايه
وحدي اول ما دخل علي الآكبر دخل وراه
ابو حسن : شلون يجبرني اضربه خليني احجي وياهااااا .
علي الآكبر: اسمع هاي كعدت احجي اسمعكم .
ابو حسن : وين تخليني احجي هسة من اول كلمة
بعد ما نفتهم تحودنا حوووووود برجفتك هااااي ابو رجفه .
علي الآكبر: اسمعععع بس اسمع .
لزمني عمي گعدني وراح يجيب بطل ماي
علي الآكبر: ابقي هيج ابقي بهذا الراس اليابس.
لزمت راسي رجع يوجعني فات وقت العلاج يمكن
رجع عمي شربني ماي وغسل وجهي
واجه بصفي لزم ايدي ويهز براسه العلي الآكبر لان حالتي تبجي
ابو حسن : بوية والله حقج بس خليني افتهم منج احجي شصار .
درت وجهي ابجي واناشغ من اتذكر جسمي كله يكرمش
حجيت كلشي بالتفصيل وادير بروحي واشر واروح
للمكان اشرح شلون شفتهم وشلون سمعت وجسمي يرجف .
التفت على علي الآكبر مخنزر عصبي
ابو حسن : يعني صحيح فعل فاعل مدفوع .
دُر : اتفقوا عليَّ والله عمو والله ماعندي أذيه
واني اعتذرت منه وادري بنفسي ماغلطت وشهد وياها اني
وشكد حجيت وياها وفهمتها ما أرضى على فعلت اخوية
هو اني اخته دمرني دمار واجت احتمي بعلي وعلي كمل
علي الآكبر كملها عليَّ وجود هذا جــود اني بشنو اذيته
ماعندي أذيه عليكم والله ماعندي .
رجع لزم وجهي وصرخ بصوت جلجل البيت
_ مووووووووووو اني دُرررررر موووووو اني
والكفل زينب مووووو اني لچ شلوووووون تفكرين اني
هيج اسوووووي وحگ ابوووو راس الحار موووو انااااا .
دُر : اذا مووو انت ومووو ميثاق منوووووو ؟
التفتت على شهد وجود وعمّتي واكفين بعيد
وريمان وبتول مراقبات الوضع
جــود : دير بالك انت وياهاااا تفكرون اني لوو شهد
ترا هووووواي تحملت وسكتت احترموا نفسكم
لاااا اطلع اسووووء صفات خلق الله هسة .
هو يحجي وعلي الآكبر من الضغط الصار على راسه
من جهه اهله ومن جهه حالتي ومن جهه صار كذا يوم ما نايم
وصايم طلعت روحه ركض بتسرع ضرب جــود بوكس
فر بي جــود فر لدقايق بس صوت عمتي تصرخ .
جــود تمالك اعصابه وعيونه تجدح وبنفي الوقت لمعت
من صدمته بعلي الآكبر حتى علي مصدوم من نفسه
عاف البيت وطلع جــود وشهد تركض وراه وعمتي
طلعت وراهم بقينا وحدنا بس عمي يحجي ويايه بس
حسين شال بخاطرة وحيل انقهر من تصرف علي الآكبر
راح وراهم بعد ما تعب من الحجي ، رحت للمطبخ
طلعت المفاتيح اخذت نسخ الغرفة ورجعت بيها
قفلتها عليَّ دموعي تجري وافتح بالشاش
عقمت راسي بس مو مثل ما هو يعقم ويشوف اكثر مني
خليت المرهم شلون ما كان ورجعت اعدل بالشاش
خليت راسي على مخدة اريد اوگع من طولي
ما ادري من الهبطة لو من المرض بيه بديت انسل سل
التفكير بجهه
والمشاكل بجهه
وعلي الاكبر بجهه
واخوانه بجهه عقلي بعد شنو يتحمل بعد ما اكدر حتى طاقة ماعندي .
مر اليوم كله خلص وإني محبوسه بهل غرفة
بس بعد لا سمعت صوت ولا حسيت بعل قريب
الثاني يوم اجه يريد يفتح الباب ما يكدر لان المفتاح الثاني موجود بالباب
_ اطلعي اكلي وارجعي للمهجوم .
_ لارم مجهز فلم جديد
علي الآكبر: دُرررررر .
_ عوووفني بس عوفني بحالي .
_ ضروري تاكلين يلة حتى تاخذين العلااااج .
_ لاااااا تصيح .
_ لااا تاخذين بصووووتي حيووووان اني حيوووان .
_ لا عبالك من تغلط على نفسك اخاف .
_ لااااااااااا تخاااافين اخت انوووووور انتِ يابه لاااا تخافين .
بعد ولا قبلت اجاوب خلص اليوم من صار السحور طلعت
سويت لفة على يريع وكلاص جاي رجعت اركض
لمحته نايم على تخم بلا قميص بس بالبجامة
اكلت وشربت علاجي ونمت وهي يوم وره الثاني
بس عمي صارت تجي تحجي تريد تخليني اسمعهم
وارجع اطلع للبيت انظف أشوف احتياجات علي الآكبر
اظل اهز براسي ومن تروح ارجع اقفل الغرفة .
ثاني يوم گعدت من سمعت طلع للمطعم وقت ظهر
لميت دشداشتي وطلعت للبيت صاير تراب على مواعين
على كاونتر الاستقبال مهجوم هجم وهوه مايقبل احد يدخل
للبيت ينظف ويرجع تعبان بس يسبح ينام بدون حتى ما يتسحر
شغلت الغسالة اغسل بالملابس ورحت للغرفة غيرت
فرشات السرير والبردات ومسحت اخشابها وعطرتها وطلعت
شريت وجبة ودخل على مطبخ لمعته والاستقبال غسلت
شريت البطانية والمخدة مالته ونظفت التخم والجگاير
احير منين انظف بيهن بكل مكان خلصت تنظيف البيت
والملابس وسبحت ، طلعت طبخة من اليوتيوب وحاولت
اطبخ دجاج شوي بالفرن وتمن احمر وزلاطة راقبتها
الى ان ضبطتها بس صار الفطور اخذت اكل هو دخل صفن
بالبيت والآكل تعجب ، عبرته ورجعت للغرفة خليت اكلي
ورحت للمطبخ رتبت صينية مليانة ومرتبة خليتها على تخم
هوه بالحمام بقيت فاتحة الباب شوية من طلع شاف
ملابسه على تخم جاهزات مغسولات والاكل جاهز بدل
وگعد لازم راسه مكسور خاطره .
نص ساعة وهو على نفس الوضع ذب خسرة
وفطر وأخذ الصينية للمطبخ صب جاي ورجع
للاستقبال تلفونه يرن قوس حاجبة وجاوب بعدم اهتمام
_ انــور ، اي اسمعك ، شبيك شصاير .
فز من مكانه يلملم باغراضه ويصيح
_ يعني شبي انــور فهمني لا تصيح خرب اهلك
والعباس وياك وهسة ريــان وين ؟ يعني ابن عمكم مات
حُــرة خررررب اهلكم وينها اي اي يا مركز أنت بالمستشفى
يا مستشفى جاي أني جايكم لا تسوي شي لا تتهور ..
يتبع ..
ثقل ميزانك بذكر اللّٰـه:
- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد ..