41

_____________________ الــريـاش

﷽

𓆩 اســاور حــسين 𓆪

بقلمي رواية : الــرياش

وهل يُبتلى الأنسان

الا في من يُحب

لطفا لا تنسون التصويت والتفاعل بين الفقرات

⊰ حُــرة ⊱

دفعني على السرير من الخوف وبلا وعي وگعت روحي

صرخت من ايدي حيلي صار كله على عكسي

من سمع صرختي اجه يريد يشوفني نزل واني بلا تفكير

رفعت ايدي وفريت وجهه براشدي ، لزم وجهه ودار عيونه

صارت دم دم دم وأعصابه انهارت ترعش وجهه صار مخيف

هجم عليَّ واني ثار جنوني تهسترت املخ بروحي بوجهي بجسمي

وارجف دفعتي على سرير يسد بشفايفي وينزل راسه صاح بأذني

_ صوتچ لا افقدددددد وامووووتچ صوووووتچ .

دفرته برجلي واذب بروحي بالأرضية اخلص روحي من بين ايده

زحفت ورجلي تشنجت رفعت ايدي ولزمتها گعدت بالزاوية اناشغ

_ رجلي رجعت رجلي .

اجه قريب مني گعد بمستواي ولازم ايدي حتى ما اضربه

وبـ إيده الثانية يتفحص رجلي شبيها وليش كل هل بيجي والخوف

_ تشنجت لو بعد ماتحسين بيها ؟

لزم اصابيعي يحرك بيهن وجف رجلي يهز بي يشوف رد فعلي

اريد امسح دموعي واني منهارة لازمني حيل مايقبل حتى اتحرك

حُــرة : بسيطة ريــان بسيطة لو تموت بعد ما اظل وياك انتظر

وشوف بعيونك اخلي بعيونك تشوف بس انتظر بسيطة .

عاف ايدي من رفعت رجلي على صدري ارجف نهضت

رحت امشي بعيد من عنده اخاف من كل گلبي اخاف من

شكله اذا صار عصبي يفقد ريــان يصير مو نفسه البارد

_ خايفة مثلي مثلي خايفة لوووو تخافين ما تضرررربين

لو تخافين تفكرررين قبل لا ترفعين ايدچ وتضررربيني حررررة .

جاوبته بنبرة صوتي التعبانة بدموعي بقهري بشهگاتي

واضرب على صدري روحي تحترررررك روحي ادمرت

_ اكلك لا تسوووي هيج وياي لا تستغل ضعفي وتقترب

لا تجي يمي لا تحبني لا تتعلق بيَّ تتعب تتعب اني مو الك كلبي

مو ملكك روحي حتى روحي مو ملكي ما افكر بيك ولا اريد افكر

اقتنع كافي اقتنعععععع .

رفع اصبعه على شفايفه وفتح عيونه

_ اشششششش كافي اشششش بعد لهنااا وكافي ذليتيني ولچ

ذليتيني كاااااافي شسوووويتي بيَّ خليتيني ذليل الچ بس على شنووو

انعل ابوووو مشاعرررري لچ جوة رجلي اخليهن مشاعري وكلشي شنو

حب شنوووووو هل وكت مو مال حب ابددددد مصالح كلها مصالح .

_ اني مـ ...

_ ولاااا نفسسسسس اششششششش .

بقيت بمكاني اشوفه شلون يشغل بالجگارة يشرب بيها

ويطلع نفس هيج من گلبه ويهز برجله من العصبية

ما يگدر حتى يضبط اعصابه وكل شوبة يهز براسه قلقني موتني

رجعت ظهري على حايط وبكل هدوء نزلت على ارض تعبانة تعبت

ماعندي حيل اني العلاج اخذ كل حيلي وهوَّ يدي كلشي يدري ويتعبني

فوك تعبي يتعبني بهاي تصرفاته وعناده وعصبيته .

دار وجهه شافني رفع حاجبه ورجع يكمل الجگارة

خليت ايدي على راسي بالله هسة هذا هم وضع

تأففت بملل ورفعت راسي شفته صافن بيَّ مد ايده

ويحچي بهدوء عكس العاصفة المر بيها قبل شوي

_ تعالي هنا يمي تعالي احجي وياچ .

_ اسمعك .

_ بكلشي لازم تعاندين وتشلعين گلبي ؟

بلعت ريگي بخوف وتوتر رحت حتى لا تصير مشكلة ويرجع يصيح

ما لزمت ايده رغم باقي يمدها گعد بعيد بنهاية السرير

عض شفايفه بنفاذ صبر وبلا مقدمات مد جسمه لزمني من رجلي وسحبني

طخت رجلي برجله وجهي قريب من وجهه اريد ابتعد مايقبل

يبس راسه ويايَّ فرد مرة ، وبكل تباهي يرفعلي بحاجبه

وينظر على مسافة الصارت بيناتنا مبتسم .

خليت ايدي على صدره امنعه يقترب اكثر

حُــرة : انت شبيك بابا شبيك .

ريــان : حلالي يمي انتِ حلالي يعني شيصير بيناتنا حلال .

برطمت شفايفي وعيوني لمعت بدموعها تعلن هزيمتها

رفعت ايدي افهم بي بهدوء هيج اكثر من هل هدوء ما اكدر

حُــرة : ليش هيج تسوي تقهرني ريــان تقهرني تصرفاتك هاي .

ريــان : لچ ميت عليچ انتِ شتحجين .

غطيت وجهي احارب بروحي حتى ما اتخبل هسة واخلي

فضيحتنا الدول تحجي بيها سنين ما تنساها رجعت

لملمت اصابيعي واحجي بنبرة حذر من كل تصرف يبدر مني

حُــرة : مو اخذت منك كلمة ريــان ليش تكسر كلمتك عيب .

_ يا كلمة ذكريني بيها ما أتذكرها .

اشرت بعيد على باب وهوَّ عيونه تمشي ويايَّ تركز بيدي

ويصفن بشفايفي وينزل نظراته يحفظ بتفاصيلي

حُــرة : مو اخذت منك كلمة زلمة تعتبرني اختك وتحميني

وتخليني اكمل دراستي وننفصل واخر مرة گلت من تصيرين زينة .

_ نعال على كلمة الزلمة نعالات مو بس نعال .

ردت اروح من عنده لزمني يثبتني بتملك سيطر على حركتي

_ وين حراير وين .

_ اني قويت بيك ريــان انت خليتني بدائرة امان وهمتني انت وهمتني

گلت اعتبرچ حالچ حال اختي دُر ، ليش تغيرت ليش ريــان .

_ شمسوي اني شسويت حُــرة فهميني شسويت .

_ شوف تصرفاتك ريــان اني افكر انت احسن شخص عاملني

من بعد مصطفى وماعندي ثقة بغيرك ادري والمواقف ثبتت

روحك هاي روحك اذا احتاجها ما تعزها عليَّ .

_ اخذتي روحي صارت بيچ روحي صارت بيچ حراير .

واني رافعه اصابيعي افهم بي هيج طبگتهن بعلامة صبر

وما اشوف غير باسهن بقيت جامدة ودموعي تجري

حُــرة : ريــان انت تعرف بنفسك شنو جاي تسوي ؟

ريــان : لا والله لا ، هيج اني ضايع صاير بنص دوامة

محورها واساسها انتِ ماكو غيرچ بعقلي ودوامات تفكيري ومرتاح .

حُــرة : راح تجبرني اخطي خطوات اني ما اريدها لان ادري

وراها اضيع تخليني اضيع روحي لك ريان .

سحب باكيت الجكاير اخذ وحدة وذب حسرة طويلة

وهوَّ يشغلها يحاجيني ضايع كلش ضايع

_ سولفيلي شنو الحل حتى لا تضيعين ولا اضيع وهل خرط .

_ واني اگول ريــان مثقف واعي ماتطلع منه هيچ تصرفات .

_ على لساني الحجي واگول عيب خليك اسمعهااااا بس تخربطين هووواي .

_ ريــان راح تموتني بس عوفني خليني اخذ مساحتي لك راح تخبلني .

_ لالا ابقي قريبة مني من تروحين بعيد اصير عصبي عليچ .

لزمت عكسي يوجعني ورجعت اريد احجي وياه

ثبتني وثبت عقلي من باس راسي ويعدل بشعري

_ اسف .

_ لا تعتذر بس شيلني من راسك .

_ وگلبي ؟

_ ريــان اعتبرك اخ غيرها ما اكدر لا تتأمل بشي اكبر

شلون دُر تشوفك اني اشوفك .

_ اششششششش اريد اغير هل نظرة وراح اغيرها

ما نرجع باقين هنا انتظر تغيرين هل فكرة وبعدين نرجع .

_ لا نرررجع ما اكدر افتهم لازم ارجع حباب رجعني .

_ والقران ما ارجع زين لو مو زين براسي شي اتأكد منه وارجع .

ضربت على رجلي ورفعت ايدي اريد اضربه لزمها وحذرني

_ قبل شوية لزمت روحي عنچ تعيديها اتصرف بطريقتي .

_ اصحيك على زمنك اريد اصحيك .

راح يطفي الأضاءة كلها ورجع نام على سرير

_ تعالي نامي .

_ اليوم انام على تخم .

_ تعالي .

_ هنا اريد ما اريد انام اشوف تلفوني .

_ تعالي .

_ نعالي ونعالي غيرررر كافي يبطل .

اريد اگعد صاح بصوت عالي

_ تعالي حررررررررررررة .

_ اجيت امري لله اجيت.

اخذت بطانية من الكنتور ونمت تغطيت بيها حتى ما اشترك اني وياه

بنفس البطانية ، بقيت اتحرك بمكني افكر بمستقبلي وتالي شيصير بيّّ

غفيت بقمة حيرتي وخوفي ، ماحسيت بروحي لثاني يوم افز حركتي

مو تمام فزيت خفت رجعت لنفس حالتي فتحت عيوني هاي اني وين

رفعت راسي وجهي صار بوجهه ريــان وراسي على صدره

لازمني بكل قوته حتى وهَّ نايم مدري ما نايم ، اريد احرك روحي اريد اطلع

مايقبل هيچ مثبتني عبالك لاصق

_ شوف شوف شلوو يتصرف تصرفات زعاطيط .

قبضت ايدي ورفعتها صربته على گلبه بكل حيلي

_ عوووووفني راح ارجع اضررررربك .

_ اريدها من الله تضربيني .

رفعت ايدي رجعت ضربته على گلبه

_ ضربي على گلبي ضربي بلكي يوگف وتخلصين واخلص.

_ اصرخ الم العالم عليك ؟

_ حضنيني وارجعي نامي احسن .

درت وجهي اريد اصرخ ضربني براشدي خفيف يدفع بي بوجهي

_ نامي بنت الكلب نامي .

_ يخليني اتخبل عليَّ يجبرررني لك عوفني .

_ مرتاح هيچ خليني اكمل نومتي للصبح گاعد .

_ شسوي گاعد للصبح .

_ كلشي سويت .

نزلت عيوني اشوف روحي ابتسم بتلاعب

_ النية بنتي النية شبيها خرطي .

رفعت راسي وشوية من جسمي حتى احجي بس

هوه لازمني من خصري مقيد حركتي كلها

_ تجني على روحك تريد موتك انت تريد تموت ؟

_ نعسان .

_ أدفنك؟

_ بحضنچ ياريت .

ضربت وجهي حيل حيل فتح عيونه واشر على عقله بمعنى مخبلة

_ يممممممممممه ما جنت هيچ انت هيووو انت ماجنت هيچ .

_ محترم محترم وضعچ جنت .

_ وقبلها ؟

_ مانع نفسي .

_ وهسة .

_ فارض نفسي .

_ اطيح حظ نفسك هسة اصبر.

سحبني وگعني على ايده ضربته وخليت ايدي على رگبته اخنگ بي

بكل قوتي وهوَّ ولا عبالك مغمض عيونه يريد ينام

_ راح اموتك .

_ براحتچ .

حسيت بي صار يغفي رفعت ايدي وضربته على وجهه بكل قوتي

هيَّ ثواني وريان شمرني على سرير ورفع ايدي فوك راسي

ومثبت رجلي بين رجله ورفع بس ايده يريد يضربني

_ اضرب وبعدها والقران اتخبل لو اموت روحي لو اشرد منك .

_ لااااا تضربيني ليششششش تضربين بنت الكلب .

_ تجبرني .

_ اني ما اضربچ انتِ شلوووون تضربين عيب لچ عيب .

مد ايده تلمس من شاف ماكو مني جواب غمضت عيوني

حسيت بـ أصابعه تتلمس رگبتي أخذ الگلاده يشوف ويعدل بيها

وأصابعه بعدها تتحرك على رگبتي وهو نازل

ثبت عيونه بعيوني نزل روحه حاير هيمان عيونه ذبلانه

تنفس بضطراب ونزل على مكان الگلاده باسها بضياع بوسات متفرقة

ثگلت عيوني اول مرة احس بعيوني وحيلي بعد ما احس بحيلي

فقدت السيطرة على نفسي وبلا عقل رفعت راسي اترك اله مساحته

وما ادري ليش هيچ سويت غلطت غلطت وغلطت الشاطر ما تتصلح

من شاف ردت فعلي زاد وتجرأ اكثر واكثر صحيت على نفسي بأخر

دقيقة واني اتخيل ردت فعله بعد هل غلطططط يموووتني راح يموتني هنا .

قلصت روحي اريد ادفع نفسي منه صرخت وبعلووو صوتي

واضرب بي بكل قوتي حتى يصحى على نفسه مثل ما صحيت

_ رررررررريااااان ريــان لااااااا بس احجي رررررريان .

_ حراير ابقي يمي هيج ابقي بين ايدي اريدچ بحضني تبقين .

_ عزززززززااااا لك عيني راح امووووتك .

_ اروح فدوة لعيونچ .

_ رررررررريااااااان ولكممممممم يااااااااااا ناااااااااااسسسسس

سااااااااااعدووووووني يبووووووووووووو .

أريد اصرخ بعد سد شفايفي وشمرني يتحرك بـ ارتباك

اندك بابنا عض اصبعه وقبض ايده واجه عليَّ يريد يضربني بوكس

_ شسوووووويتي .

_ شسويلك ازمال صرت .

ضربني على ايدي بس مو حيل بس هم صرخت

عافني وراح فتح الباب اجه الامن اثنين يستفسرون

وهوَّ يجاوبهم واشر الهم على غرفة ورجع يحجي كلشي ما افتهم

دخل سحل روح طويل صاح

_ لبسي الله لا يوفقني وما انحسبت على زلم اذا ما ارجع اربيچ من جديد .

لبست الروب وافر بيدي يجبرني ويصير عصبي حتى ما يعيدها

ريــان : اذا يحجون وياج سوي نفسچ زمال يا بنت الزمال .

حُــرة : اگول الهم يريد يغتصبني .

ريــان : خليهم يروحون واني اعرف اتصرف .

حُــرة : اروح وياهم مبينين خوش ناس .

ريــان : ررررربي لو تاخذها لو تاخذني رررررربي .

ردت احجي بس شنو راد يلطمني على حلگي بلعتها وسكتت شسوي

امري لله ، دخلوا شافوا المكان ويحجون ويايَّ من صدك ما افتهم

عليهم يهذرون براسي صار هوَّ يترجم كلامهم

ريــان : يسأل على صوتچ الرنان بنت الـ***** .

_ جاوب مو تعرف الجواب ابن وفاء الـ***** .

جاوبهم بكيفه بحيث بسرعة طلع واخذ صاحبة

بعده يسد بالباب قفلت الحمام عليَّ

_ اطلع اليوم لو اني لو انتِ .

_ تخلي راسك براس طفلة والشوارب .

_ حرررررررررة لج حرررررة بس افتحي الباب فتحي .

_ لا يسمعوك عبالهم اغتصبتك هههههههههههههه .

_ لج صاررر فترة مخلص من هل رعيددددد لسانچ

لووو ادري ما سفرتچ ورجعت الضيممممم على راسي .

_ اطلعهن من عيونك اصبرررر اصبرررر. .

_ اذا انتِ بنت امچ وابوچ اطلعي .

_ والله الصراحة ما متأكدة اذا اني بنت امي وابوية فـ ما اطلع .

ضرب الباب ضربة من يمي ايدي وجعتني

_ اني طالععععع اني اطلععععع اشووووف حل وياچ .

_ احجي گلبي احجز حتى نرجع شوية تخلص مني وترجع

اكيد اشتاقيت لزوجتك ام ابنك ، وهم اني اخلص منك گول امين .

_ امين موووووو خووووش حُــرة النملة اذا ما ادوسچ بالقندرة .

_ النملة تموت بـ اصبع هههههههه .

ضرب الباب حيل ودفره

_ تضحكين عليمن ولچ مسويتني مضحكة بنت ياااااسين

صاااايرررر مضحكة اني للزعاطيط وسففففففه .

_ ويا حسافة ههههههههههه .

_ خرررررررب صدك تحجين .

_ هههههههههههههه .

ما سمعت صوته بس دقيقة وانضرب الباب البرا عرفت طلع

گعدت بالحمام دموعي بدون ما اريد ابجي تنزل واكرر ومن

كلبي اگولها اسفة جرحته انقهرر قهرته وهوَّ تعب ويايَّ

شلون اخلصه مني ومن هل عذاب اذا نظل سوية يتعذب

شنو ذنبة ما يستاهل اكثر انسان ما يستاهل يتعذب ريــان

غسلت وجهي وطلعت وبعدها دموعي تجري ، دورت تلفوني ماكو

عرفت اخذه وياه ، شفت جنطة المستمسكات ماكو استغربت

وحتى جنطة ملابسة ماكو ، اريد اطلع الباب مقفول شكووو ؟؟

رجعت اخذت بسكت من الثلاجة اكلت وحده وشربت ماي

حتى اشرب علاجي بس اخذته فتت للحمام سبحت

وطلعت فتحت البلكون اشوف العالم تمشي ناس تركض مستعجلة

كل بشر عنده شي مانعرف منو مرتاح ومنو تعبان

رجعت للغرفة نمت بفراشي شغلت التلفزيون طلعت روحي

من الملل ، للعصر انفتح باب الغرفة بقيت گاعدة على تخم

وعلى عبالك موجود نزل بوكس اكل فتحته وطگيت قوطية الببسي

اكل بيها وهوَّ يفتح بالجنط يلملم بملابسنا اريد اسأل شكو ؟

وين رايحين ؟ وين جنت بس اخاف من ملامحه مبين عصبي

ما طايقني ولا طايق روحه ، عليت صوت التلفزيون

وبقيت اكل كملت وفتت اغسل بس طلعت مد ايده على جرباية

مجهز حتى ملابسي ورجع يسد بالجنطة

_ بدلي .

_ شنو راح نرجع ؟

_ اي .

استغربت معقولة بهل سهولة ، اخذتهن ورحت بدلت بالحمام

وطلعت ريــان ماكو والجنط نزلها ، لبست حذائي واني مبتسمة

رجعت احس برجلي بعد ايام وشهور محرومة من هل نعمة

رجع فات يتأكد من الغرفة ما ناسين شي

_ يلة تحركي اطلعي .

_ اوكي .

ما ادري شنو دردم ما سمعت طلعت ونزلت وياه تشكر من ادارة

الفندق وطلعني شفت صديقه نفسه الي استقبلنا بالمطار

صعدنا بسيارته يسلم بـ احترام ، طلع بشارع اشجار ورد

نازل على على شارع وبيوت قليلة موجودة بالمنطقة

لا مو بيوت هاي يا بيوت كوخ بيوت صغيرة اي هاي بيوت

صغيرة بنص مزارع كوخ عن كوخ يا كوخ شاليهات

شي بعيد عن شي طگيت رگبتي وقلصت عيوني الشك صار يلعب

براسي لعب بس لا اكو ملعوب ، اذا لبالي صحيح اقرا على روحي السلام

اله يشنقني ومحد يدري لو يسمع ، وكفت السيارة صرت اطگطگ

وافر بشفايفي ولساني نبلع وريگي يبس ، نزل وفتح بابي نزلني

خشمي حكني يمكن من عظمة مصيبتي وبلائي الجديد .

هوَّ ينزل الجنط ، واني وراه اخرمش بخدودي استحي احجي من الولد

هسة صرتي تستحين من دهر دهرني على بلوتي ، صعد الولد

بسيارته بقيت اباوع عليه اريد اصيح عليَّ يبات عدنا خطية

اسويله اكل بس يظل ، هوَّ راح وريان دار وجهه عليَّ يضحك

ضحكت الشيطان لان هوَّ شيطان ابن شيطان ، واني مثل الشاطرة

ضحكت بوجهه بغباء هز راسه وعاف الجنط ويمشي بيَّ اخذني

ويمشي للبيت ويحجي بس شنووو يحجي هيج بطريقة اطلع الروح

ريــان : اليوم تموتين من الضحك تعالي .

ذبني بالكوخ مدري شنو هذا الضيم انــور لا هوَّ بيت ولا هوَّ شاليه

راح افتر على بوب سحب المفاتيح كلها منهن انشحطت بقيت اگح

وارعش رجلي ما اكدر اوكف عليهه بس گعدت كالاسد مو حُــرة تنهز

طلع فوت الجنط وفات البيت ينزع بالسترة شمرها على تخم

ومد ايده على دگم القميص يفتح بيهن ويتقدم

حُــرة : خطية مستحر حارة عليك انزع انزع البيت بيتك .

سحب الحزام من البنطلون رحت للمطبخ ركض اصيح

_ صدك عطشت اشرب ماي وين الماي يمكن ماعدنا روح جيب .

طك الحزام طلع منه صوت عالي حكيت راسي وابتسمت

_ تأبرني ابن عمي شو طالع حلو .

_ لا تبتسمين اضحكي بصوت عالي اضحكي وصيحي .

_ لا عيوني قابل مخابيل شعندي هوَّ بس اني وياك .

_ صيحي بنت الـ***** اضحكي بررراحتچ اضحكي .

_ فديتك تحب تضحكني .

صعدت فوك ركض اريد اشرد بس اني ما اسويهاا وابين خايفة

حُــرة : اشوف شنو ما شنو فوك غرف سطح .

اني وصلت فوك وبس اكمل الدرج صارت گدامي غرفة

نوم على طول الفوك والسقف نازل تصميمها تركي

ما احس غير صرت بين ايده حاضني ويهمس بـ اذني

_ وصلتي لعرين الأسد .

_ ليش عريان الأسد .

_ اي صيري غبية احب الغبيات .

_ هوَّ هذا ليقرا روايات تأثر عليك عرين الأسد شلون اسد .

_ تعجبني صلافتچ بنت الصلف .

رفعت نفسي على اطراف اصابيعي وهمست وجهي بوجهه

_ حاول تجبرني على شي ما اريده ، وسوي كلشي براسك

ومن بعدها حُــرة تصير حلم ومر بحياتك اروح واخليك عمرك

كله تتمنى ترجع تلمح ذيال ثوبي .

_ ولا نفس .

فتحت ايدي رفعت راسي هوَّ مو يحب هل ركبتي خلي

_ يلة سويها يا اسد سويهااااا وشوف حُــرة شسوي بيك .

جرني من ايدي شمرني على سرير وصاح

_ وتالي هاااا والتالي ؟

_ طلگني .

_ ما اطلك ، غير حل اريد حل .

_ ماتحصل لا تفكيري ولا حبي انساني ارجع لبيتك

رنيم انت مو موتت روحك عليها ارجع ابدي وياها من جديد

ابنكم جاي بالطريق ليش تخلي يتربى بدون اب

ويعيش مثل معاناتنا اني وياك .

ضربني بـ اصبعه على كتفي وايده الثانية بجيب البنطلون

_ تعلميني شلون اتصرف بحياتي .

_ مو گد المقام ؟

_ لا تدخلين .

_ تدلل لا ادخل ولا اجي يمك وانت عوفني .

_ الكلام سهل .

_ الأفعال ؟

_ اني مو گدها .

اريد انزل واني بنص الدرج وكف من فوك يحجي بس

صلب كل جسمي خلاني ارجف قبضت ايدي وسديت عيوني واني اسمعه

_ اليوم الصبح من تقربت منچ ، اول دقايق تقبلتيني بعدين نفرتي

اثبتي اليه وراچ قصة ، عندچ شي ما اعرفه وتخافين اعرفه

وهل شي لا عبالچ يخليني اخاف اكتشفه لو ابتعد لااااا ورب العرش لا

بالعكس دخلتي الراس الصياد والصياد اذا يخلي شخص براسه

يجيب راسچ وراس الي خلفووووچ ، مو الصياد يمشي عمياوي حُــرة .

نزلت بدون ما انطق بحرف دخلت للمطبخ وسديت الباب

مقابيلي باب كزاز عبارة عن خضار ، كعدت وظهري على باب

دايخة راسي يفتررر شسوي برررروحي بعد شسوي

شلون اخلي يمل مني ويطلعني من راسه شلون اني اعرفه

هذا ما يرتاح اذا ما يعرف الصغيرة قبل الجبيرة

بقيت على حالي لليل ، تعبت وسمعته طلع شفته مر من المطبخ

لابس رسمي وكاشخ على اخر حباية وصعدت بسيارة

طلعت برا قافل كل البوب ، فتحت الثلاجة سويت لفة جبن وجاي

وصعدت فوك شغلت التلفزيون اشوف مسلسل واكل

شربت علاج اليل بي نسبة منوم ، نمت بدون ما احس على روحي

وتقصدت نومتي تصير على تخم حتى يضطر ينام على سرير ما اكعد

ساعة والثانية والثالثة وهوَّ ماكو النص اليل رجع يتصرف طبيعي

دخل بدل ملابسه وطلع لابتوب الشغل يشتغل بدون ما يحجي

اخذ بالساعة يشتغل تحركت على صوت التلفون جاوب بسرعة

_ رنيم ، اي زين وانتِ ؟ هواي يهمچ ؟ اي وياج ، زينة

هواي يهمچ حُــرة وين ؟ نايمة هاي گدامي ، لا تدخلين

حفظت الكلام رجال عايش وحدي اني وبنية صغيرة والبنية

زوجتي اكيد وطبعاً اضعف واتزوجها رسمي افتهمت والله غيره

ماكو غير كلام نوعي بالتوقعات .

سد الخط يمكن بوجهه بس اسمعها تصيح وتسب

ذب التلفون وزاد عاف كلشي واجه يمي نزل يتلمس بوجهي

وباسني بنص خدي

_ ميصير تنامين هنا جسمج تعبان يحتاج راحة .

_ عوفني هنا .

رفعني بـ اثنين اديناته ويسوي روحه يوگعني

_ حضني رگبتي لا توگعين .

_ ما خليني اوگع عادي .

_ على اقل بس مسافة الغرفة حضنيني اوصلچ والله بس اوصلچ.

اضطريت اطوق رگبته بيدي وصلني على سرير ونزلني بحذر

غطاني وگعد يمي يرجع بشعري ويحجي بسكون

ريــان : عادي تحاجيني بدون صياح وغلط وتحترميني

حُــرة اني ما احب الصوت العالي ، واحب الشخص من احجي وياه

يحترمني يجاوبني بأدب ، انتِ تصرفاتچ تعبتني اخر فترة .

بنظرات الخجل جاوبته

حُــرة : اني هيج والله مو بيدي ريــان صوتي عالي احب اتصرف على

طبيعتي بعز تعبي وقهري اضحك ما احب امثل لو اتصنع هاي طبيعتي

صح صوتي عالي ، ومن احجي ابد ابد ما احسب حساب للكلام

من يطلع مني ، واجفص هواي ومرات ما اعرف اتصرف

وزادت هاي التصرفات وياك ما ادري ليش ترا اني انقهر من اقهرك .

ابتسم بوجهي وعلى كلامي رفعت نفسي وغطيت روحي وهوَّ

گاعد بمل هدوء ، بقيت العب بـ اصابيعي واحاول اتفاهم وياه

حُــرة : اسمعك .

_ بدون جفصات .

_ احاول والله .

حجيتها وخليت ايدي على شفايفي وضحكت

_ عادي اجفصي اني أتحملها الي يحب يتحمل .

_ تحبني مثل دُر ادري ادري.

_ اجذب اذا اگول اي ، حب اخوي ما احبچ .

_ بس انت .

_ وعدت وخلفت ما كدرت الحب مو بيدي حبيت بعد شسوي حبيت كفرت ؟

رفعت ايدي جريت نفس وزفرته

_ اي تنفسي بدون صياح حاولي حاولي .

_ اني ما اشوفك غير شخص جبروني عليَّ وطلع قوي

وحباب وعتبرني مثل اخته ويحميني وطلع صياد يصيد الحقراء .

_ واصيد حُــرة اذا وجب .

لزمت ايده وملت راسي اتوسل بي

_ حباب الخاطر الله ريــان لا تسوي هيج شوف بعد وكت

تكدر ننفصل ها وبعد ما اخليك تشوفني وبمرور الوقت تنساني .

_ محفورة حفرررر بگلبي انتِ شلون انساچ .

_ تنساني احسن من ما تتعب ، وتكرهني ، وتضربني

ما اريد يصير هيج ظل بعيوني انقى واقوى

واحسن انسان من بعد مصطفى .

رفع اصبعه على شفايفه وابتعد مني

_ لا تفكرين ننفصل فكرة شيليها من راسچ .

نزل جوة رفعت الغطوة ورحت وياه احجي

_ اسمع اني من عرفت مشاعرك كرهتك .

_ هوَّ اريد نظل هنا تتعودين عليَّ واتعود عليج افتهمچ وتفهميني .

_ ما اريد رجعني حباب رجعني .

_ احاول وياج اصبر واتحمل .

_ لك ريــان لاااااااا تحجي هيج .

_ الحب لا بيدي ولا بيد بشر .

_ يا حب اني احب مصطفى .

_ ماااااااااااااااااات مصطفى مات مدفوون جوة الترررراب مدفون .

_ عايش بگلبي مدفون بروحي ولا انت ولا غيرك ياخذون مكانه .

قبض ايده بوجهي ورفعتي من ملابسي يهز بيَّ بكل غضب هاجت اعصابه

طبگني على حايط درت وجهي من منظره المخيف والرهبة

يضرب ايده بكل قوته بالحايط خلاني اسمع صوت إعظامه

ريــان : ترررررريدين اموووووووتچ لچ اني زوجچ زوجچ

شلوووووون بيچ شلوووووون تحجين برجال غيري گدامي حررررررة .

_ أنّت آصحى على روحك .

_ لچ اموووووتچ افقد وبلااااا وعي امووووووووتچ ما تخاااافين .

_ موتني مايهمني .

_ واني يهمني يهمني انتِ شنوووووو من بشررررر

من شنو مخلوووووقة صلافة وعرامة عندچ اذا تتوزع على عراق ماتخلص.

رحت كعدت ظل بمكانه دقايق يفكر اخر شي راح شرب ماي

وما ادري شنو اخذ لان بعد ما باوعت عليَّ وقبل لا يصعد يحاجيني

_ ما اغير رأيي وباقين هنا واحاول وياچ ما امل ولا اتعب

بس اكو نقطة اذا وصلت الها نرجع ومن نرجع كلشي يتغير

مو بس اني اتغير لاااا لاااا كلشي يتغيررر وماكو شي اذا يتغير يرجع

على حاله بذاك الوكت خسرتي حُــرة اعتبري روحچ خسرتي .

صعد واني بقيت افكر بكلامة لا ساعة ولا ساعتين

بس ماكو شي يگدر يغير رأيي اني اتخذت قراري وخلص

يكرهني هيچ ولا ياخذ نظرة مو حلوة عليَّ ، سحبت مخده

صغيرة نمت عليها الثاني يوم الصبح فزيت على صوت الباب

وحركة بالمطبخ ، فركت وجهي ورحت اشوف شصاير

شفت الباب الكزاز بالمطبخ مفتوح وميز طعام صاير بوسط الزرع

درت وجهي على طباخ مر من يمي ريــان وگرص خدي

_ صباح الخير على حلوة .

_ شصاير هنا شمسوي بالمطبخ .

_ انفجار صح بس النتيجة تعجب تليق بحراير .

اخذ ماعون البيض مسوي اومليت وطلعني برا

مرتب الميز ترتيب حتى بالمطاعم ما شايفة هيج

ريــان : هم مهندس ، وهم صياد ، طباخ .

_ زوج رنيم مو شوية نيالها عليك .

_ مو بيدها اذا ما تخرب تموت .

_ قابل جذبت ولولت عليها وبجيت بجي العجايز

تالي ما تالي من رجعت وتزوجتها صارت كخ

والله انتوا الزلم ما تملي عينكم غير الترررراب .

_ لا تحجين شي انتِ ماتعرفين كلشي بي اني اعرف

شغلات ومتفق اتفاقات ومتصرف تصرفات انتِ ماتعرفينها .

گعدت مقابيله وهوَّ صب الجاي اكلت وكملت وتذكرت اني حتى

وجهي ما مغسلته من النوم للأكل ام بطن اصلية

بس كمل عاف كل الهوسة والمواعين والانقلاب وصعد فوك

كمل شغل وطلع حتى ما ينطيني خبر يبدل ويكشخ بهل بدلات الرسمية

ويطلع ، صعدت دورت عالجت بس تلفوني وين تلفوني مختفي

رجع بليل من الباب عطت بي

_ وين تلفووووني يعني خليتني وحدي من الصبح لليل

ما گلت اكوووو حيوانة بالبيت ؟

_ خلصت شغلي .

_ تخلص شغلك عندككككك شغل ترجعني وترجع وحدك تخلص شغل .

_ خلصت شغلي حتى أتفرغ الج وباجر نطلع

تتعرفين على مدينة هنا وتشوفين جمالها .

قلصت عيوني عباله انقهرررر لوووو اغير من ردت فعلي

_ منو گال اريد اطلع وياك ؟

_ اني قررت .

_ والمطلوب انفذ .

_ حُــرة صوتچ عيوني صوتچ ماكو داعي للصوت العالي .

_ اووووييييي شوفوني اني ريلاااااكس وانتِ همممممج .

_ واقع حال .

صعد بدل ورجع جايب اكل رتبه بالصالة واشر اجي

رحت يمه تخصرت وصحت بي

_ تلفوووني عيوني انت تلفوني .

_ اكلي تعالي نشوف مسلسل .

_ تريد تعيش الحظات السعيدة انت وانسانة غلططططط

بيك خيرررر سفر مرتك حامل وابدي وياها صفحة جديدة .

اكل وهوَّ متجاهلني گعدت مقابيله ما خلّيته يتهنى بالأكل

_ مبايلي .

_ ناكل ونام باجر ورانا طلعة .

_ اشرد منك بس اطلع .

_ تقضين على روحچ هناااا تروحين بيها .

_ لا تدخل .

_ سكتي كافي .

رحت على اكل سديت التغليف مالته اخذ كلاص الببسي سحبته

من أيديه وخليته على ميز راد يكمل منعته

_ تلفوني .

_ والله يا حُــرة لازم روحي ما ادري شلون على اعصابي

تعرفين شنو على اعصابي ، وخايف هسة اني خايف لا افقد

عليچ واطلع روحچ من الضرب .

_ اضرب عود انت زلمة اضرب .

_ غصباً ما عليچ وعلى اهلچ كلهممممممم زلمة .

شلّت الأكلات بالمطبخ وبعده ما ماكل هز راسه وراح غسل

رحت للمغسلة سديت الماي منه وطفيت كلشي

_ ترجع تلفوني لو اهجم البيت هجمممممم .

_ هجمي بقت على بيت هجمي وخلصيني .

_ اخسرك اخليك تدفع فلوسه .

_ دروحي من وجهي .

ذب نفس وصعد فوك لزمت الحصان مخلي على ميز

وفلشته تفلش خليته يتناثر بكل مكان وصرخت

_ راح امشي على كزاز .

_ مابيها شي جربي اعصابچ شلون صارن .

_ ياااااااا ربي راح اخلي يهجججججججج.

شكد حاولت صيحت صرخت استفزيته بالكلام بارررررد بارررررد

صعدت شفته نايم بسابع نومه واني محروك كلبي والطم

سحب الغطوة وشغلت سبلت ابرد شي والمنطقة هنا باردة

اخذتهن كلهن واخذت ريموند التحكم مال سبلت ونزلت تغطيت بكلشي

وبعدني جامدة ، اكو يمكن دگمه فوك هسة يطفي السبلت

بقيت واني جامدة البيت صار مجمدة ثلججججج ثلججججج .

صعدت فوك وبعده على حالة ونفس نومته نايم

طفيت السبلت واني امسح بدموعي ورجعت غطيته

واحس بتأنيب الضمير صفنت بوجهه وبجيت من كل كلبي

ضربت على وجهي ملخت روحي تملخ ونمت بالگاع اريد أعاقب روحي

اقل من الخمس دقايق واجه رفعني صعدني على فراش

ضميت وجهي بصدره واشهگ من القهررر

_ اسفة .

_ احب البرد .

_ خليتك تثلج .

_ ميخالف .

غطاني وهوَّ هم نام بس مبتعد مني لزم ايدي مدها يرسم بخطوطها

_ شنو تريدين ؟

_ تلفوني حباب .

_ بالبنطلون مالتي اخذي .

_ ها ؟

_ اخذي مو تريدي اخذي ؟

_ بهل سهولة .

_ كل ما تصيحين وتعلين صوتچ وتعانديني

ازيد اكثر منچ بالبرود والعناد والتجاهل .

_ والحل يعني خبلتني .

_ اذا تطلبين كلشي تريدي بهل نبرة وهل عيون الي تلمع

وصوتچ الناصي وتحترمين عيوني شنو عيوني تاخذيها

روحي هاي روحي ما اعزها عليچ .

غمضت عيوني لزم وجهي وتلمس شفايفي بطرف اصبعه

_ ليش تنامين اخذي التلفون .

_ تعبت .

_جربي تنامين على ايدي ؟

_ لاااااا ابدددددد .

_ نامي لا تصيحين صوتچ طبگ كافي .

تنفست بتعب وكورت جسمي فتحت عيوني شفته صافن بيَّ

ورجعت غمضت اريد بس انام لزم ايدي باسها وحضنها

بقاها بصف شفايفه كل شويه يبوسها ، غفيت من التعب

والحركة والصراخ هلكت روحي هلاك .

الثاني يوم كعدت شبعانة نوم ، بس ريــان ماكو بالغرفة

اتلفت مختفي كعدت واني ارفع بشعري شفت تلفوني

بصفي موجود ومشحون 100 فتحته ايدي ترجف

عبالك صار عندي ادمان ركضت ايدي على فيس

بحثت بالاسماء على اسم مصطفى دائماً موجود هوَّ موجود

بالبحث بس البوم ماكوووو وينه وين راح ، ابحث حاولت

لا حسابه يطلع ولا اخوانه انكفخت على وجهي من الصبح

اخذت التلفون واركض اريد انزل البيت نظيف من الكزاز

صرخت من شفته گاعد على تخم ويشتغل على لابتوب ، دموعي

تتسابق على خدي رفعت التلفون حتى يشوفه

ورحت قريب منه ارجف رجف مخيف

_ وينهاااا صفحته ماكوووو ما تطلععععع مصطفى

ريــان ابحثها ماكو ليش ماكو مو بيها الصور مالته .

اخذه مني سد التلفون على تخم وگعدني قريب منَّ بطل ماي

فتحه وشمر بوجهي حتى اصحصح

_ جاوبني انت شنسووووي ليششششش ماكو صفحاتهم

كلهم حتى اهله اخوانه هوَّ كلهم مختفين مني .

_ غلقتهن .

_ انت .

_ اي .

_ مني غلقتهن مني ؟

_ لا من الفيس كله .

ضربت على وجهي لزم ايدي حيل وثبت وجهي

_ كافي كل يومية عندج مصيبة .

_ رجعهااااا رجعهم كلهم رجعهم .

_ ميصير بعد .

_ يمهههههه امووووووت لك امووووت ريــان .

_ حُــرة اني هنااااا مو صديقتچ تجفص كافي الى متى اتحمل .

_ تعرف شيصير اذا ما ترجع .

رفع راسه يستغفر وراح رجع يكمل شغل

تذكرت كلامه حاولت والله حاولت اهدي واحجي

بس اعصابي تلفت واصيح بلا وعي اصررررخ

وارجع اصررررخ حتى صوتي خشن

_ امشي نطلع غيري جو اطلعي منا راح تتخبلين .

_ كلبي راح يوكف ريــان رجعهم فدوة رجعهم

ماعندي بس هل ذكريات منه .

_ اذا تبقين هيج ما تنسين لازم ينحذف من عيونچ .

_ كسرت گلبي ررررريان كسررررت گلبي .

صعدت وهوَّ صعد حاول بس اطلع وياه رفضت

طلعت للظهر رجع شافني نفس حالتي

شعري مخربط ملابسي ملختهن وجهي تعبان

حالتي حالة ، اجه يمي باس راسي دفعته

_ اذا عبالك بهاي تصرفاتك تنسيني مصطفى تحلم .

_ تنسي احاول وياچ .

بس نزل خابرت دُر جاوبتني بسرعة

حجيت وياها ابجي كلشي ما تفتهم

نزلت التلفون حتى تحجي وياه وتقنعه نرجع

يسلك وياها بالكلام ويغير الموضوع

سد الخط ورجع التلفون شمرته قريب من رجله

_ بعد ما ارررررريده اخذه .

رفع راسه وزفر انفاس فقدان الصبر

رجعت صعدت لملمت الجنط كلها ونزلت جنطتي وگعدت

على ارضية دگيت رجلي هسة ترجعني

وهوَّ عاملني معاملة الحايط ولا عبالك يشوفني

ابجي اصرخ ما يهتممممم ابدددددددد

_ تجبرني اغلط وياك عفية .

حجيتها ورحت على لابتوب سحبته من ايده راد يلزمني

جريت روحي ظل لازم ملابسي سحبت روحي حيل اختل توازني

وبلا سيطرة على روحي وگعت اني ولابتوب .

صاح بخوف وسحب لابتوب صار شاشة سوده رحت اريد اشوفه

وياه دفعني هيَّ دفعه ورجعت بكل حياي على ميز زرفت ظهري

شاغت روحي بقيت ارافس رفعني من ايدي شمرني على تخم

يسد بشفايفي ويصرخ بوجهي

_ نفسسسسسسس لا تتنفسسسسسسين تعبتيني ولچ تعبتيني

شتريدين مني انت تمووووتيني ترررريدين .

_ بس رجعني ابوووووس ايدك ما اريدك ما اتحمل

اني وياك بمكان واحد ما اتحملهاااااا .

_ لچ من وراج اسب بشخص ميت كررررهتيني بي والله كرهته

شنوووو تتخبلين عليَّ لان محذوفة صفحته ولچ من اكسرررر

عينچ هسة احد يلووووومني .

غطيت راسي وهوَّ يشيل بالغراض ويفلشها بصفي خفت

ركضت فوك اضم بروحي من عصبيته ظل جوة يسب بيَّ

صعد بعد ما تعب رفعني من ايدي

_ مووو احجي جاوبيني شنووو براسچ .

_ أحسن شي نرجع وننفصل خلص مني .

_ اخليچ ذليلة بيد الرياش والله حُــرة والله تضوگين المررررر .

_ قابلة بس رجعني بس عوووفني .

_ عندچ شي انتِ موووو خالية والله مووووو خالية .

_ صح والله صح وما احجي هسة لو تذبحني هناااااا

رجعني وخلص مني ما محبور بيَّ .

_ خلصصصص صبري لچ نرجع والله باجر من الصبح اشتغل عليهاااا

ونرجع اذا ما اخليچ تندمين ياااا حرررررة اني **** .

طلع حتى ما صبر هج من البيت لليل رجع صرخ صراخ غلط غلط

بحيث سديت اذني وبقيت كعاعدة بالگاع بصف السرير

وهوَّ يلملم على سريع بالملابس صاح

_ جهزي روحچ طيارتنا الصبح .

بقيت بمكاني من نزل رتبت كلشي لوجه الصبح هوَّ طالع

رجع اخذتي بدون ما ينطق بحرف ويتصرف عبالك وحده

يخليني امشي وحدي واجر الجنطة وحدي صعدتها وحدي

ورحت بالطيارة وحدي كعد يمي ودار وجهه نام ما ادري

هو مايريد يشوفني ، وصلنا اخذ كلشي هوَّ من شاف انــور سلم

وبكل برود طلب منه

_ رجع الجنط للبيت.

وجان يقصدني اني وياهن .

عافنا وراح ما ادري وين وانور يمشي ويسألني شكو

بقيت ساكته ومن نزلت للبيت شفت دُر اول ما شافتني بجت

_ رجعتي تمشي رجعتي على رجلج .

علي الآكبر يمها واكف سلم وسألني على ريــان ما عرفت شنو اجاوب

فتت جوة يريدون اكل ماعندي نفس صعدت فوت شبه منهارة

سمعت صوته جوة طلعت اشوفه بدون ما يحس شفت دُر شالت ايد

ريــان وتضحك وعلي الآكبر بصفها وريان مصدوم

_ يعني راح اصير خال تجي بنوته تگول خالوووو .

دُر : اي اي واحلى خال بالدنيا .

ريــان : علي الآكبر لك علاوي .

علي الآكبر: ابو جبل بعد ماكو علي الآكبر .

ضحكت ورجعت انتظرت دُر من تصعد باركت الها ورجعت لبيتها

دقايق وفات انــور عليَّ اعصابه وبيده تلفون فر الشاشة عليَّ وصاح ...

يتبع ..

ثقل ميزانك بذكر اللّٰـه:

• سُبحان اللّٰـه
• الحمد للّٰـه
• لا إله إلا اللّٰـه
• اللّٰـه أكبر
• سُبحان اللّٰـه و بحمدهِ
• استغفر اللّٰـه
• اللهُم صلِ على محمد وال محمد ..