أغنية عليم الله - دليل على أن الفرق المستقلة لا تزال قوية

من بعد فايروس كورونا تقريبًا وكل حاجه أتغيرت في العالم، وحاجه من الحاجات اللي اتغيرت دي كان نشاط الفرق المستقلة وتواجدها آخر زفير إللي كانت مختفيه اصلًا قبل كورونا أختفت فترة بعديها المربع بيغير أعضائه وسط البلد نشاطها قل كتير وبيقل أكتر كُل سنة بالإضافة إلى أن الحفلات الكبيرة إللي كانت بتجمع أكتر من فرقة مع بعض مبقتش موجوده تقريبًا وفي نفس الأوقات الراب بدأ ياخد مكان قوي في المشهد وبدأ يحل محل الفرق المُستقله لدرجة أن لأول مره ريدبل ساوند كلاش يبقى بين فرقة (شارموفرز) ومغني راب وهو (عفروتو) أينعم الراب (السبايك) اللي كان عامله قل مع الوقت .. لكن لسه نشاط الفرق المستقله ضعيف .. وأعمالها قليله وبرضه ضعيفه وجمهورها بيقل لدرجة أن أغنية (ساموراي) بتاعة كايروكي نزلت قعدت حوالي سنة الناس بتتريق .. فين جمهور كايروكي .. وفين الفيوز .. لكن بمرور الوقت الوضع بدأ يتعدل تاني .. آه لسه النشاط قليل من الفرق لكن الأغنية إللي الناس كانت بتتريق عليها لكايروكي بقت واحدة من أشهر أغانيهم في السنين الأخيرة وكايروكي نزلوا ألبوم قوي كسر الدُنيا آخر زفير رجعت تعزف اللحن الحزين من تاني (بنشاط أقل لكن لسه متواجدين) وده كافي لوحده يخلي ريحة السما كشاريل مسار إجباري رجعت بنشاط للحفلات والأغاني وأوتوستراد رجعت بمزاج حقيقي .. وده إللي بيميز أوتوستراد عن أي فرقة تانيه عربية .. هم مش بيغنوا عشان يبقوا تريند في (أغاني حزينة) أو (أغاني فراق) أو أي كان .. مش بيحاولوا يصنطنعوا شعور .. هم بيغنوا إللي في دماغهم .. حتى لو دماغهم في فترة فاضيه أو رايقه أو عاليه .. ممكن يغنولك حبيتك بالتركي عادي لو عطلت في الكلمات .. ولا تزعل .. تراباتاتاتي .. ما اهو إحنا جايين ننبسط كُلنا .. الفرقة بتعمل حاجه تبسطها وإحنا كمجهور بنروح الحفلة ننبسط .. فليه نقعد الدُنيا! المميز بقى أن طريقة أوتوستراد إللي مدوروش بيها أنهم يبقوا شبه حد أو شبه فئة من الجمهور .. جابت لوحدها الناس إللي شبههم .. ناس مقدره زحمة الدماغ (الأوستراديه) مش عارف قادر أوصل الفكرة ولا لا .. لكن الفكرة نفسها ممكن المقال ده يلخصها .. مش مترتب ومش منظم بس صادق زي أوتوستراد أوتوستراد كانت عودتها قوية مجموعة من الأغاني الجميلة حقيقي زي أراضيك وبسحب كلامي .. وأخيرًا عليم الله إللي حقيقي مفيش كلام يوصف حلاوتها .. شبه أوتوستراد زمان .. لكن مواكبة للعصر الحالي ومواكبة لنضج أوتوستراد نفسه .. ملخص الرغي ده كله .. استمتعوا بسماع عليم الله .. واستمتعوا بالأندرجراوند إللي لسه شبههنا أو بيحاول يكون .. ونحاول ندعمهم لأن إحنا محاجينهم يفضلوا موجودين وده الأهم.