________________________ الــريـاش
﷽
بداية الحكايـة
حروفٌ تشكلت بـ عناية
كلماتٌ سوف تُكتب لأجـلِ غايـة
و الغايـة في هذهِ المَـرة هيَّ أساسُ الحكايـة
لن تقرأون في ثنايا حكايتي مثل الذي كُتب قبلها وأُعتاد
ستشهدون إنها ليسَت مثل الذي سَلفَها بإرتياد
غرامٌ جميع مساراتهُ تُكَلل بالإرتداد
طريقٌ شاق كُل إتجاهٍ فيهِ عُسرٌ و وِداد !
الأغصان الهزيلـة كما تُسمى ..
هذهِ المَـرة هُمُ الأوتـاد
أوتادٌ قوية تُحارب الأضداد
لـكـن ...
لـ القَدر حتمًا في الحياة قَرار
قرارٌ يجعلنا نختبئ في ذلك المغار
الذي أساسهُ الهَم والخذلان وبقايا عشقٍ وشَرار
أنا أخشى جدًا مذاق لسعة النـار
وأعشق ذاك الذي مَعي في الصعبات سار
و حارب لأجلي كُل من تَلاعب و ظَلم وحَولي دار
هُنالك شيءٌ سيحدث و يُغير المسـار
الرياش فيهِ هوَّ صاحب القَـرار
سيبقى عاشقٌ ؟ أم يُصبح كارهٌ ؟ أم مُحتار ؟
لا أعلـم ...
لكنني
أقسمت ان تكون حَربي هذهِ نهايتها الفوز والإنتصـار
مهما دارت الدُنيا و صادفتني بمكنونها الأقدار
سـ أكون ساعية لأن لا أعيشُ في المرار
هَـل أُحِل القسم الذي أقسمتهُ سابقًا ، الحيّن ؟
أم إنكسر و أُحَل عليَّ حُكم كفارتهُ في الدين ؟
ما مصيـر ذاك الرابط المَتيـن والعشق الذي تميز فيهِ الرياش الرصين ؟
أحقًا نهايتهُ هيَّ التخلي والإستسلام ؟
أم العيش في العشق بكُل سَلام ؟
لا أعلـم !
امـا الآن ...
لـ نبدا القراءة ونُبحِر في ثنايا هذهِ الحكايـة ..
⊰ دُر⊱
هيكل بارد ، لا بالقصر كل من نظر اله أعجب بجمالة
حيطان قاسية متجردة من ابسط حقوق العائلة تفتقر للألفة
مسحت وجهي بيدي حتى اصحصح بعد ليلة مهلكة
نهضت من السرير فتحت الشباك سحبت نفس يوم
جديد دُر انسي كلشي كالمعتاد وبلشي من جديد
مو وقت انهيار الزعل مايفيدچ ، اتمنى انزل واشوف
كلشي احلم بي متحقق اخذت تلفوني واني انزل
على درج اجاوب على جوري صديقتي المقربة
هل فترة بس تعودت أغير صديقاتي
كل شهر لان حالهن حال اهلي .
دُر : توني گعدت جوري ساعة واوصل للجامعة .
رفعت عيوني اباوع على بيت فارغ من اهله
خاوي مابي روح ، دخلت على مطبخ بس
صفيّة المساعدة گاعدة على كرسي مقابيل
طاولة الطعام : صفصف شلونچ .
_ تمام ماما تريد تاكل .
_ لا بس امي وينها ؟
رفعت ايدها تسوي حركة النايم وتفر بيدها ماعجبها الوضع
ضحكت على حركاتها وهي هم تضحك
_ حتى انتِ صفيّة الوضع معاجبچ .
سمعت صوت سيارة مشيت للصالة شفت سيارة ابوية ماكو
وبس الحارس گاعد يشرب چاي بالباب ، صعدت رتبت
الملازم اخذت المهم ، بدلت وصبغت وجهي بالمكياج اريد
اخفي حزني وأثار الضرب ، وسرحت شعري عدلته
ونزلت اركض من سمعت هورن سيارة عمو ابو حسن
لگيت صفيّة تنتظرني بيدها اكلي أبسط أهتمام من
اي بشر بالكون احس بدموعي تصير بعيوني
اخذتها منها وبست خدها
_ والله يا صفصف انتِ الحب من اروحلچ فدوة .
دفعتني طلعتني عمي ابو حسن يباوع من بعيد ويضحك
_ عمو شلونك .
_ بعد عمچ بخير اذا انتِ بخـ ..
يريد يكمل ونزلت عيونه على معصم ايدي مجرح
سحبت ردن القميص اخفي الأثر وغلست
صعدنا هو يسوق وعيونه كل شوية يتفحصني خايف
_ من اخر موقف حلفت ما ادخل نفسي بس من اشوف
حالچ والله يا بوية وضعي كله يتخربط .
دُر : لا تخاف عمو مابيه شي كلها آثار وتختفي
بس گول اثار جروحهم بكلبي شلون تختفي ؟
كملت كلامي والتفتت على شارع انهي الحديث
نزلني مقابيل الجامعة سلمت على حارس
ومثل كل يوم أنطي اكلي الي اوصي صفية
تسوي كل ضنها اليه ، رفعت جوري ايدها
حتى أشوفها رجعت شعري وگعدت يمها
وهي من اول ما شافتني استلمتني رزايل
_ البارحة ليل كله ادگ عليچ اختفيتي
يعني والله انشغل بالي .
خليت ايدي على خدي اتذكر ليلة البارحة ونقبض كلبي
وعيت من رفل صاحت : تأخرنا ولكم المحاضره بدت .
اخذت أغراضي ورحنا على سريع
دخلنا للقاعة كلهم موجودين منتظرين الدكتور
عدلت كعدتي ودخل سلم وبلش يشرح
وينصح بينا وساعة يصير عصبي ويصيح
انتوا اسوء دفعة صيدلة وبلشت المحاضرة الثاني
بالثالثة لزمتني دوخة تذكرت اني بعدني بدون اكل
نزلت راسي جوري انتبهت عليه حاولت اركز
اجر النفس الدنيا افترت بيه ، ثواني واسمع صياح
الدكتور : وانت شكووووو تگوم من مكانك ؟
ركزت بـ يَسار رافع حاجبه خازر الدكتور وينتر بوجهه
_ كتلك اروح اجيب عصير ماتشوف البنية هبط ضغطها .
الدكتور: طالبتي اني اروح اجيب الها اكعد مكانك انتَ .
هز يَسار ايده وترك المحاضرة وطلع والدكتور
يشيل بروحه ويرگعها شلون يكسر كلمتي
دقايق ودخل يَسار بيده عصير وكف الدكتور بوجهه
ورفع أصبعه: ابد ماتدخل والله .
يَسار : عصيرررررررررر بس انطي العصيييييييير .
الدكتور: شووووو تصيح ولكككككككك .
دفع يَسار الباب ودخل والدكتور يهدد
وهو ولا مهتم وصل يمي وحط العصير يمي : دُر اشربي .
رفعت راسي الطلاب كلها تباوع علينه
دُر : منو صخم وجهك وطلب منك تصير سبع وتجيب عصير .
يَسار : صوتچ .
دُر : ما اريد شي منك ماعندي ثقة بيك .
اخذته جوري من ايده والدكتور صار قريب
_ وراسب انتَ بالمادة مالتي ويلة اطلع برا .
يَسار : خوش دكتور نشوف .
الدكتور: تهددني حضرتك ؟
يَسار : لا حشاك أهددك شنو بس الإدارة
هي ترتب خلافنا افضل مو دكتور .
الدكتور: اطلع برا .
يَسار : جوري شربيها العصير وراح اخابر ابو حسن يجي .
سحبت قمصلته نزل يستمع : لا تخابر احد لا تتصرف
بكيفك مو راح اموتك .
دفع ايدي وطلع والدكتور فتح سجل الاسماء
وبقلم أحمر شخط اسم يَسار ويصيح روحه
مفرفحه لان يسَار مو اول موقف وياه يعاند
_ انتوا جماعته تبلغون هل عديم التربية ممنوع
يدخل محاضرتي راسب بيهاااااا راسب لا يحاول بعد ويتعب نفسه .
القاعة كلها خنست بس كملنا جوري تتوسل اشرب العصير
طلعت وهي تركض ورايه صار بوجهي يَسار
_ ها شلون صرتي ؟
دُر : متت .
_ اني قبلچ .
دُر : خلصت .
_ اشربي العصير .
عبرته ورحت اشتريت عصير وجوري تشرب عصير يَسار
جوري: والله انتِ مدري شلونچ ليش حاقده عليه والله خطية .
ابتسمت بوجهه بستهزاء هي لو تدري هذا شنو هم تحجي هيچ
شفت تلفوني متأمله بعد الصار البارحة امي تتصل تطمئن عليه
بس شايلين الحساسات منها .
ضحكت وتقربت اكثر مني تسمعني : انوب صاير حباب
يسمع الكلام ، يدري تصيرين عصبيه من يگعد قريب من عندج
صاير يگعد بعيد الشاطر .
دُر : دكافي تركزين وياه واقري .
جوري : بالقران اني لو منچ ولا ادرس لچ غبية
انتِ ملكة بكلمة وحدة من ابوچ تشتغلين بأرقى وظيفة
واذا تطلبين مشروع تفتحين مشروع يهز العراق .
دُر : ولازم اعيش تحت أوامرهم طول حياتي
امشي مثل المسطرة موتي اموت عيشي اعيش تنفسي اتنفس .
جوري : المصيبه ماتعرفين تتصرفين تريدن تموتيني لو اني منچ .
وصلت الجملة لو اني منچ شگد سمعتها هل كلمة
بس ما أتمناها لغيري لو يعيشون حياتي ينتحرون
لو يشوفون الي اني اشوفه ، لو يعرفون صعوبة حياتي
المظاهر الناس همها المظاهر يحكمون على مظهر مايهمهم شي
غير المظهر الخارجي، والخراب الداخلي محد بحاله
ماكو احد يهتم لا لحزنك ولا لتعبك ولا لضياعك بعالم مفروض عليك
عايش ويه عائلة روبوتات مسيرة متجردين من الإحساس والمشاعر .
جوري : انتِ عايشة ملكة استغلي ظروفچ ولچ .
هزيت راسي واشرت على ملزمة ذبيت نفس
وقريت للمحاضرة ، رجعلي حيلي كملت محاضراتي
وطلعت لگيت عمي ابو حسن منتظرني صعدت وياه
راسي على جام بس وصلت نزلت البيت فارغ بارد
حتى صفيّة ماكو ، صعدت الغرفتي ذبيت ملابسي
نعسانه اريد انام قبل لا يصير اليل ، نمت بس خليت راسي على
مخدة ، فزيت على صوت صراخ بالطابق الأرضي .
دفعت صفيّة الباب ودخلت لفيت روحي بالحاف
وكفت وره الباب تسد بي حتى محد يدخل .
صفيّة: المفتاح ماما المفتاح .
اريد اركض رجلي ثگلت وكعت من السرير
زحفت للميز دنگت اخذت المفتاح ملزوگ
بلاصق حتى محد يشوفه وياخذه .
وكفت وركضت خليت المفاتيح اريد اقفلها
واندفع الباب اخذ المفاتيح من ايدي وسحبني
_ صاااااار ساعة اصيح عليچ بنت الكلب وينچ .
رفعت أيدي على وجهي خايفة من ضرباته
صفيّة صارت بالزاوية تخاف منه هو بكل
قوته يهز بيه ويدجج بجسمي
بالمفتاح بكل حقارة وحقد : حرام عليك انور
اني مو اختك والله تعبت مليت .
ضربني بوكس حسيت عظام وجهي تفلشت
صرت ارافس وهو يمرد بوجهي يخليني افقد
من الوجع عصرني بين الباب والحايط يضرب
ويصيح : كم مرة نبهتچ تبطلين تتجاوزين على يَسار بنت الكلب
تريدين توگعيني بمصيبة .
سحبني من ملابسي يسحل بيَّ على درج وكل شوية
رافسني : يممممممممه وينچ يمههههههه .
هو اني هيج حجيت لو فقد يرفع بجسمي
يريد يشمرني من فوك وما استبعد يسويها
على صراخي فات ابوية ويَسار وراه من شافوني
ركض يَسار دفع انور مني وسحبني من ايده
صار گدامي : لااااااااااااا تضربهاااااااااا .
زحفت بيَّ مابيه ركضت للغرفة سديت الباب وگعدت
اناشغ وامسح بالدم من وجهي وهمّ اصواتهم طالعة
كلبي يدك بكل سرعته من الخوف انوب اليوم كلهم
مجتمعين والله يموتوني والله .
فتحت الباب اباوع على درج ماكو احد ركضت الغرفة امي
دفعت بابها وفتت أتنفس بصعوبة ، گاعدة على تخم على
اذنها التلفون تخابر من شافتني رفعت ايدها بمعنى اسكتي
گعدت بصفها افرك بيدي وعيوني على ايد الباب اخاف تنفتح
أكلت أظافري بس اريدها تخلص اريد أحجي وهي مستمرة
مندمجة تسولف على ماركات والسفر والدول ولا يمها حالتي .
اول ماتريد تنهي المكالمة دخل ابوية ينزع بالسترة
ذبها على تخم يباوعلي بنظرات باردة ولا عبالك
وجهي كله دم وملابسي مشككها: ها بابا هنا اليوم .
وگفت بضياع أشرت على وجهي وملابسي اريد ابچي
رفع ايده بسرعة : لا تبچين مو تدرين اكره هل تصرفات .
مسحت عيوني بس صوتي يرجف اتمنى ابچي
بحضن ابوية اتمنى احجي وياه واگله يابه اني
احتاجك انتَ وامي أريدكم صيروا مثل باقي الأهل
بس اريد ابجي بس اريد اصرخ بس ممنوع كلشي ممنوع
اشكي ممنوع اعاتب ممنوع لازم ابجي وانكسر وارجع
ثاني يوم اكعد ناسيه كلشي صار .
دُر : انور صاير يزيد بالضرب بابا احجي وياه .
_ ميخالف بنتي اخوچ الچبير من خوفه وحرصه عليچ .
دُر : انور يخاف علية شوكت ؟
_ بابا راسي يوجعني واريد ارتاح مو وقت هل مواضيع
مشاكلكم انتِ واخوج حلوها بيناتكم .
دُر : شوكت يصير عندك وقت حباب بس اريد اگعد وياك
ونحچي والله عندي هواي كلام الله يخليك بابا .
_ محتاجة فلوس امشي وفاء اخذي من الخزنة فلوس
انطيها شگد ماتريد خليها تسد احتياجاتها .
دُر : اني مو بحاجة فلوس احتاجكم انتوا .
وفاء : يمچ طالعين طابين يا عيني دمشي خلي ابوچ ينام .
عصرت ايدي والله حتى صرت استصعب
اطلب منهم اهتمام ، وامان ، طلعت بفشلتي
بضياعي بقهري رجعت الغرفتي غسلت وجهي
وبدلت ملابسي باوعت من الشباك لا انور ولا يَسار
موجودين ، اخذت تلفوني باوعت على ساعة
ب8 بليل اتصلت على ابو حسن بسرعة جاوبني .
_ يا هلا ببنيتي .
_ هلا بيك عمو تگدر تجي تاخذني اريد اطلع .
جاوبني بس صوته بعيد همست بتعب : الو عمو تسمعني ؟
_ وياچ بنيتي بس فاتح الحاكيه بصوت عالي مو اغسل ايدي .
دُر : حاكيه شنو ؟
_ ههههههه صوت عالي يعني بوية .
دُر : سبيكر .
_ اندري بيكم عمو هو مكبر صوت سبيكر شني .
دُر : هههههه والله صدك كلامك عمو حقك عليَّ .
_ جهزي روحچ بوية طلعت من البيت عيوني .
بدلت ملابسي ولبست حذائي وطلعت بدون صوت
نزلت انتظر برا دقايق وصل ضحك بوجهي
شكد ارتاح من اشوف هل انسان وجهه نوراني
طيب بشوش من صعدت شافني بهت : شبيچ بنتي
منو ضربچ شني هذا حالچ ياهو وياچ .
رجعت راسي واني أطلع كلينكس امسح بوجهي
_ اكو غيره انور .
ابو حسن : من الله لا يرضى عليه هل حـ
سكت منتبه على نفسه هز راسه وكمل
_ اعتذر منچ بنيتي انفعلت وعلي مو زلمة مادام يرفع ايده على أخيته
وين ابوچ مايشوف هو شعنده هل بنت شني مستغني عنچ .
دُر : عمو اخذني للمستشفى .
ابو حسن : وحيدچ ترحين .
دُر : مابيه شي عمو بس اضمد جروحي وارجع انتظرني .
وگفني مقابيل مضمد مو مستشفى
ونزل يمشي ببطء رجال كبير بس رزن : نزلي بنيتي هذا خوش مضمد
يعقم ويضمد جروحچ وينطيچ علاج .
بقيت اباوع على مكان مرتبكة وخايفة شيصير هسة لو آميّ موجودة
والله من الضرب حتى من اتنفس أتوجع، انتبهت على صوت
عمي ابو حسن يحچي واني من الخوف عرگت .
ابو حسن : انه وياچ افوت لا تخافين بنيتي .
رفعت شعري كله ليفوك ونزلت وياه
سلم على مضمد ودخل قبلي يحچي وياه بحيث
من دخت المضمد ما سألني شي عقم الجروح وضمدها
دفعت فلوس وطلعنا قبل لا نوصل رفعت صوتي
حتى يسمعني : عمو بس لا جنت نايم وخربت نومتك .
_ لا والله بنيتي كلنا گاعدين بعد وكت
عدنا بناتي المتزوجات صار شهر ما جايات علينه
واليوم عدنا وخالتج ام حسن شغلت هل صوبة
وحضرت هي ونسوان ولدي ذاك العشا الطيب
وگاعدين داير ما داير هل سفرة قريب من الصوبة ناكل .
هو يحچي واني صافنه اريد يكمل هو مايدري هل اجواء
شايفتها بس بالتلفون : وخربت عليك اكلك .
ابو حسن : لا بنيتي خلصت اكلي بس عفت بنيتي تصب بالچاي
هسة ارجع الهم اليوم حالف ما انام اريد اشبع منهن .
دُر : عمو شلون ما اشوف باجر تتأخر عليه .
ابو حسن : هههههه وداعتهن الغاليات انه نومتي عزيزة
هسة شوية ونام اني وامهن والبنيات يسهرن ويه اخوانهن
اليوم ولدي عدهم يوم عيد اخواتهم موجودات .
دُر : عمو اني نسيت انتَ كم ولد وبنت عندك ؟
ابو حسن : ست ولد وثلاث بنات بنيتي .
دُر : ربي يحفظهم الك .
ابو الحسن : ويحفظچ بنيتي .
سلمت ونزلت دخلت للبيت فارغ عبالك مهجور
بقيت صافنة وابتسم والله واجتني فكرة حلوة
دخلت اركض على صفية من شافتني وگفت
تتفحصني هي بالعالم واني بعالم ثاني : صفصف أريد صوبة نفطية عدنا .
_ شسوي بي .
فريت حلگي ودرتها ادفع بيها للمخزن : صفصف لا تدخلين
طلعيلي الصوبة شبيچ صايرة تسأليني هووواي .
شفتها بعيد مسحتها صفية وترستها نفط وشغلتها واني
اصفگ فوك رأسها والمشكلة هي متعجبة وتأشر
على راسها بعلامة مخبلة ، شلتها اني وياها
وخليتها بالصالة مقابيل التلفزيون : صفصف امشي بين مايصير المكان
دافي نسوي اكل .
دخلت للمطبخ واطلع بالأكل من الثلاجة مابقيت كنتاكي
بورك وفنگر من كلشي طلعت كمية صاحت بيه صفية
طلعت روحها مني : مين ياكل ماما ؟
دُر: اني واهلي يلة عفية بسرعة يلة .
تعجبت من كلامي طلعت مواد السلطة وهي بعدها تباع
_ يلة صفية لا تبقين صافنة مو وقتهااااا .
صفيّة: ماما راسك بي شي .
عطت بس اريد تشتغل وتعوف الكلام هسة شكو بيها احاول
ابد ما مسوين هيج اجواء يمكن من اسويها يتغير كلشي
ويصير بعائلتي محبة وقرب ومودة رتبت الاكل بالمواعين
طلعت صفية تريد تخليهم على ميز الطعام صحت بيها
_ لالا صفصف هناا هنا فرشت سفرة ناكل على ارض
قريب من الصوبة .
نزلتهن كملنا كلشي بقيت اباوع عليهن تفتح النفس السفرة
اخذت الها صورة ونزلتها على ستوري حسابي وكتبت
عشاء عائلي ، صعدت واني اتلفت واكمز : صفصف اروح اصيح
اهلي بين ما تجهزين العصاير .
جريت نفس بقوة والضحكه ماتروح مني اريد اطير
دگيت باب اهلي فتحت امي الباب ايدها على شفايفها
_ اشششش اششش ابوچ نايم لا يفز ويصير عصبي .
على نفس الابتسامة تقربت منها وهمست : جهّزت الاكل
تعالي ناكل سوية وإخواني ويانه .
وفاء : اخوانچ جوة ؟
دُر : هسة اروح اصيحهم كلهم بغرفهم .
وفاء : دعوفيهم مو يضربوج وتبچين اذا جوعانة اخذي
اكل للغرفة مالتچ اكلي ونامي بسرعة .
رفعت ايدي اشرت على درج وهمست : مو جهزت الا
طبگته بوجهي قبل لا اكمل كلامي بقيت صافنة احاول ما اخرب فرحتي
رحت على غرفة انور دگيت الباب سمعت صوته
_ ادخل .
فتت واني اخفي بخوفي منّ أخوية تحمحمت
وابتسمت الطف جو : سامحتك لان ضربتني
اخوية الچبير بعد وتمون ، امشي نبدي بالصلح جهزت اكل
يجنن وسفرة بيها هواي انواع والله حتى اخاف ماتحب شي اكو
شي ثاني تحبه .
انور : لچ شگد تحچين خرب روح اهلچ امشي ولي من وجهي
ماتشوفين عندي اتصال بنت الكلب .
رفعني من ملابسي ودفرني برا الغرفة لزمت رجلي
من سد باب المهجوم كون ينهجم على راسك
تفلت على غرفته الخايسه واني امشي اغلط
طيح الله حظك يالوصخ امداك من بين الزلم
شايف نفسه مدري على شنو عايش تحت رحمة ابو
وهو بالأصل نكره لا شهادة ولا فهم ولا علم زير النساء .
درت وجهي على اخر محطة ممكن أتوجه
اطلب منه يجي على امل يوافق استأذنت
قبل لا ادخل مديت راسي گاعد مارفع راسه
اصلا ولا عبالك دخلت : ريان .
وجهه نظراته بتجاهي ابتسم ورجع يشتغل على لابتوب
_ دُر تعالي .
اقتربت اشر على مكان قريب منه فر لابتوب
باتجاهي يسألني: شنو رأيج بالمخطط حلو ؟
بقيت اركز بكل رسم وعلى ترتيب الكلمات وطريقته
بالهندسة وشلون كلشي متقن بتركيز وتميز نادر
_ هذي شركة مو ريان ؟
_ صح .
_ غير تموت تموت تخيلتها تصير على ارض الواقع
والكل راح يعرفون منو صاحب هل افكار المطورة
احلى أخ بالدنيا المهندس ريان يوسف عيسى .
_ دُر شعندج هنا ؟
_ جنّت اتمنى نلتم اني واهلي كلهم وجهزت الصوبة والأكلات
ردت بس مرة نكون عائلة شكو بيها يعني قابل يموتون اذا نلتم .
ريان : الاهتمام لا يطلب ، لا تعلقين نفسچ على اوهام
هل حياة بالذات مابيها حب والاهتمام كذبة والطيب مصلحة
والفلوس هي اساسها تعبي على نفسچ وعوفيهم
لا تعتمدين عليهم ابد ابد دُر لا تصيرين ذليله .
_ اريد احس بالأمان الوحدة دمرتني وخربت شخصيتي .
ريان : تحتاجين تزيدين ثقتچ بنفسچ حتى تبطلين اتكالية
وتحسين بالأمان بوجودهم وبلاهم ترا اهلنا بالذات مو امان دُر .
_ اريد افهمهم صعبين .
_ واذا تفهميهم شنو يتغير ؟ مرات تذكريني بنفسي
من جنت بعمرج واصغر منچ جنت بس اريد اعرف اهلي
ليش مو مثل باقي العوائل اذا مايحبوني ليش يخلفون
عقدوني من التفكير تعقدت بعدين تقبلت فكرة اهلي
هيچ عدهم الحياة توفير فلوس روبوتات تشتغل
اعتبرتهم جهاز اسحب منه فلوس واعيش بحريتي مو بحاجتهم
الى ان صرت مثلهم ، بعدين تتعلمين من يطبعون اطباعهم بيچ .
دُر : اني بنية اختلف احتاج امي دائماً اريدها تنصحني تعلمني
مليت واني اغلط واوگع بالمصيبة واتعلم وحدي .
ضحك واخذ الباكيت شغل جگارته وفتح الشباك
_ شفتي وحسيتي بكمية برودهم ويانا، هذا يتحول نقمة وحرب
وكره وحقد اذا فكرتي تغلطين وتعيشين الحب يعتبروها خرجتي
من تحت رحمتهم يكرهونچ باليوم اللي اجيتي بي للحياة .
دُر : مفهمتك؟
حسيت تذكر موقف ملامحه كلها تغيرت وجهه احتقن
اعصابه تصلبت دار عليه صاح بغضب
ريان : عندي شغل دُر طلعي برررررا لا تخبصيني
بمشاكلچ انتِ وهل حيووووووانات .
رفعت ايدي اشرت بس اريد يهدي
اباوع بضياع : لا لا بس ردت نلت ...
ريان : سدي الباب وراچ يلة .
طلعت مكسورة خاطر صرت بين غرفهم اباوع عليها
كل واحد بيهم گاعد بغرفته وعايش حياته مختلفة عن الثاني
عبالك غرب مو اهل ، نزلت صفية من شافتني افتهمت الوضع
گعدت قريب من الصوبة : تعالي صفية انتِ اگعدي ويايه .
صارت مقابيلي تفرك بيدها بعيونها قهر مقهورة على وحدتي
ضحكت بفشل شنو طلبت اني والله ماريد غير عائلة بيها
محبة ضحك يترس هل بيت وفرحة تحسسني بالألفة
حنان يدفيني واهتمام يحتويني ماريد فلوسهم شوكت
يفهمون الفلوس مو كلشي اني احتاجهم والله احتاجهم .
شهگت بقهر وقلة حيلة ضميت وجهي بيدي وصرخت اصرخ
احس كلبي نكسر للمرة المليون منهم اهلي دمروني اهلي
شوكت ينتهي هل كابوس شووكت مو تعبت .
بعدني على نفس الحال ونفتح الباب دخل يَسار
من شاف حالتي اجه يمشي سريع بتجاهي
_ شكووو شبيچ دُر منو وياچ .
رفعتي اصبعي على شفايفي وحذرته : اششش صوتك ما اسمعه .
يَسار: خايف عليچ دُر .
دُر : خاف مني على نفسك ، صاير رجال عود هههههه
لو بيك خير لا تصير بالوجه مرايا وبالظهر سلايه
گدامي الرجل الحنون ورايه تشحن بالعربانة انور
حتى يضربني وياخذ حقك .
يَسار : انجبي .
دُر : لا والله انتَ انجب واطلع برا البيت
لا افلش المواعين على راسك .
انور : منو يفلش المواعين ؟ وعلى راس منوو تتفلش ؟
بلعت الساني ورجلي ثگلت بس اريد افهمه
هو يتقدم وصفية ترجف تدفعني منه باوعت على يَسار
ابتعد مني وراح گعد على تخم ويحچي بصوت خافت
_ عوفها يمعود هي بس السان شوفها صارت كتكوت مبلل .
انور : هذا السان ينگطع من جذوره ونخلصصصصص منه .
وكفت أريد اعبر صار گدامي لزمني من ملابسي ونزلني
يشيل بالمواعين ويكسر بيهن على راسي دخت والدم
دافي صار ينزل على عيوني وصفية على درج تصرخ
وهو ولا مهتم كل ما يكسر ماعون يرجع ينزلني يذبّ الاكل
وياخذ الثاني يكسره براسي اخر نزله اريد اخلص روحي من ايده
نزل ياخذ الماعون سحبته من أيده وضربته على خشمه
ومن حلات روحي رجعت اخذت ماعون ثاني كسرته براسه
وگع بالگاع يرفس ويصرخ بعالي صوته : ياااااااابه يمممممممه
لكككككك يَسار الزمهاااااا اليوووووم موتچ على ايدي دُرررررر .
دُر : موت ياخذك يا عار تفوووووو عليك وعلى هل شوارب الخايسه
انت وهذا ابن الكلب يَسار ابو النسوان نعلت الله على البطن لحملتك .
ركضوا ورايه اثنينهم باب غرفتي مو امان دفرت باب
غرفة ريان مقفول بس هو بالغرفة دگيت بكل قوتي
_ ريان راح يموتوني رياااااان احميني الله يخليك ريان .
ماكو رد ماكوو ركضت على غرفة اهلي ادگ وماكو جواب
درت اريد اروح لغرفتي توازني اختل الارضيه تهتز عبالك زلزال
روحي فرفحت وشطت من لزمني انور ورگع راسي بالحايط
غوشت عيوني احس بالضرب بس ماعندي قدرة وقوة افتح بيها عيوني
وهو بلا رحمة ملخ شعري ويضرب بوكسات على جسمي
ايدي احسها اطگ من السحب يسحب بيها عصرني عصر بالحايط
سمعت صوت ابوية مصدگته حقيقية لو وهم يمكن فقدت وصرت اتخيل .
_ عوووووف اختك انور .
_ يابه هاي الحشره تكسر خشمي وتضربني ترضاها .
_ عوفك ارضاها وما ارضاها دوختوني ترا اطردكم كلكم
انومكم على رصيف واخلص من دوختكم ومشاكلكم .
بعدهم يحچون اني غبت عن الوعي وفقدت
شگد مر وقت وشلون وصلت للغرفة مالتي
ما ادري بس صحيت وراسي بحضن صفيّة
من گعدت مسحت دموعها : ماما انت عايش خفت تموت .
دُر : صفية راسي يريد ينفجر ايدي توجعني لا مو بس ايدي جسمي
كل جسمي يوجعني صفية راح اموت .
صفيّة: بعيد شر عليك نام ارتاح انا يمك ماروح .
رجعت غبت عن الوعي ساعات وإنّي فاقدة
من گعدت رفعت ايدي الدم يابس عليّة حتى
محد مغسلة، وريحته الدم تلعب النفس
اريد اساعد نفسي واروح حمام فشلت
ما گدرت انقهرت على نفسي وعلى ضعفي
ليش ارادد بيهم محد يفيدني اني محد اليه
لازم اعزل نفسي واتجاهل وجودهم كل
عقلي مخبلة اني اروح اسوي أُلهم أجواء
عائلية وينهم وين العائلة هل فاشلين .
رجعت على مخدتي عزا مشلوله رجلي وماعندي قطرة
حيل هذّني بالأفلام والمسلسلات والقصص من يضربوهن
شلون ثاني يوم يعيشن طبيعي غير جسمي شبه ميت ويصل
صل الوجع يدگ بالعظم .
غفيت والوجع بيَّ لا راح ولا سكن اربع ايام اني لا ليلي
ليل ولا نهاري نهار اناشغ من الوجع والدم هلكني
صفيّة اختفت بعد ماكو ، وامي حتى مافكرت تطمأن على حالي
عبالك مو بنتهم حتى الغريب ارحم من اهلي .
اسبوع بكل ساعة ويوم عشتهم وحدي گدرت اگوم
على حيلي اسبح اغير ملابسي اباوع على وجهي
كله اثار زراق مايل على صفار طلعت ملازمي
وأقلامي هذّني سلاحي هذّني يخلصني من هل عذاب
ماكو احد يفيدني غير دراستي حتى لو ماعندي احد
يفرح على نجاحي وماكو احد يقدر تعبي وينصحني
اني اساعد نفسي وافرح النجاحي حتى اثبت للكل اني
مو بحاجتهم قوية بلاهم ادرس الخاطر نفسي
حتى ما احتاجهم اي اني والله ما احتاجهم .
سهرت ليلة كاملة ادرس وادرس احفظ وارتب
ادوخ صح بس ما استسلم ، افقد الشغف بس احارب
وارجع أتحدى نفسي واخلي منبه بدقايق معينة
لازم اخلص خمس اربع اوراق الى ان انتهيت
سديت الملازم وطلعت ملابس للدوام
اخذت تلفوني عبالي اشوف رسالة من صديقاتي
بس ولا وحدة ذاكرتني هههه شي متوقع
الوحدة صارت احسن منهم .
طلعت حلويات من المجر اكلت شوية حتى اخاف انزل
الله لا يوفقكم يا يَسار وانور شلون وحوش اثنين
بسيطة والله انتقم منكم والله فلا اعوفكم مثل ما اتعذب
يجي يوم واخذ بثاري من بين عيونكم الوصخة .
غفيت الثاني يوم بدلت ورتبت نفسي حاولت اخفي
اثار وجهي بالمكياج شوية اهون بس عيوني صاير
بيهن خسفات من الضعف والتعب وشعري اكوي بي
وهو مگرطف تگرطف ، لفيته بتسريحة بسيطة
واثبت بي وباقي ذاك هو مگطع تگطع الله يگطعهم
استسلمت هو منين وشگد اريد اخفي بس كلشي مبين .
نزلت على صوت الدرج إجت صفية تركض
حضنتني تتفحص بوجهي: صفصف اشتاقيتلچ .
صفيّة: كلب انور يقولNo اجي عندك
ماما دُر ممنوع كسر رجلج اذا تصعدين .
دُر : مو شي جديد لچ عيني صفصف اهم شي انتِ بخير
خفت لا يضربج مثل ذاك اليوم .
رفعتلي ايدها تنفي الموضوع : لالا ضرب ماكو .
حضنتها وأخذت الاكل وطلعت ابو حسن ماكو
رجعت على صفية سألتها: وين ابو حسن ؟
ضيقت عيونها مراضيه
_ يوصل ماما كبير ، بدل امك وعطر اوو عطر يوصل على بلدي
وملابس حلوة وطلع وهو يخابر .
دُر : الله يرزقني برود گلب امي .
طلعت اباوع على السيارة مركونة محد بحالها
اخذت المفاتيح شغلتها وصفية تيشيل روحها
وترگعها ماتقبل : ماما زمان ماتسوق انزل ماما انزل .
جرتني من ايدي ونزلتني سدت الباب وكفت
رفعت ايدها ورجعت تصيح : ممنوع سيارة خطر .
دُر : أسوقها بدون سرعة لازم اوصل للدوام .
اخذته منها بلا اهتمام وشغلتها وطلعت أسوق بطيئ
اكره السرعة ، خليتها بالگراج ونزلت اول ما دخلت
صار يَسار گدامي واكف هو وبنية يسولفون من شافني أنصدم
عافها واجه اتجاهي ، تجاهلته ودخلت للقاعة فارغة ماكو احد
بس بنيّة لابسه عباية راس، كلّها ماتحجي وياها يلقبوها المعقدة
تجرأت وگعدت بصفها باوعت عليها وهمست بخجل : مرحبا .
رفعت راسها وجهه ابيض بشوش بدون مكياج
بس صافي وعيونها زرق بلون السماء ابتسمت
اول ما ركزت بيها ، ردت السلام مستغربه مني
_ عادي اگعد يمچ .
_ انتِ تريدين تگعدين يمي ؟
گعدت قريب منها ودرت اجاوبها
وارتب بالأغراض: اي اني شكو بيها بس لا ماتريدين
والله ولا احجي بس اراجع .
_ مكانچ بصف جوري .
- لا بعد ما اريد اگعد هناك .
_ ليش غبتي كل الايام الفاتت راحت عليچ محاضرات .
_ صار عندي ظروف صعبة اضطريت اترك اسبوع .
هزت راسها وفتحت الجنطه انطتني جكليته
_ أكليها احسچ دايخه ايدچ ترجف .
رفعت ايدي مو بس ترجف تهتز جريت نفس مخنوگه
والله روحي مفرفحه ، عافتني وطلعت دقايق ورجعت
بيدها كيكات اثنين وعصير داليا : نتريك ؟
رفعت ايدي متعجبه اول مرة بنية اجي يمها
وتشتري اليه شي منها بدون ماتاخذ مني
لو أعزمها هي وحدها راحت : هذّني اليه ؟
فتحت العصير والكيك وهمست بصوت خجلان خافت
_ اي اكلي حتى تروح رجفت جسمج ورانا محاضرات .
اكلتهن حتى حسيت طعمهن يختلف
درت وجهي الها اريد ابجي گوه لازمه
دموعي : شكراً نرجس .
ابتسمت وهي تفتح الدفتر تكتب بكل هدوء وبدون صوت
وحتى ماتسولف ،قلدتها واني صرت اكتب وادرس مثلها
دخلت جوري مستغربه من گعدتي تباوع على نرجس وترجع
تباع علية بمعنى هاي ليش گاعدة يمها.
تجاهلتها ونزلت راسي اكمل اجت قريبة
مني وصاحت : منتظرين تجين برا ست دُر حتى سلام عليكم ماكو منچ ؟
دُر : عندي دراسة روحي انتِ طلعي اني اريد اخلص .
جوري : تعقيد لو شنو اسميها هل حركات البايخه .
دُر : يَسار دزچ موووو جوري ؟ لان لو عليچ تبقين ماتهتمين
صديقتچ ميتة لو عايشة مايهمم .
جوري : لچ ردت اجي للبيت يَسار مايقبل لا اجي يمج
ولا اخابرج متخبل صار اسبوع وما ادري شنو عنده حاير
وصاير يخوف بس يهدد ويتوعد ويتأفف .
دُر : والله مسوين للجعويط صيت .
اني حجيت هيج ونرجس وجوري عيونهم صارت شكبرها
وجوري تمتمت بالكلام تباوع على باب القاعة عرفته موجود
بدون ماتحچي عرفت بوجودة وهاي هي غايتي .
اندفر الباب بثواني ركضت جوري تريد تلحگ بي
درت على نرجس تباوع على دفتر : راح ارجع المكاني
قطعت تفكيرج وداستج .
اريد اروح لزمتني من ايدي تمنعني
_ ابقي يمي لا تروحين ادرسي شوية راح تبلش المحاضره.
گعدت ادرس وياها وهي اندمجت تشرحلي اذا مافهمت شي
واني اسألها اذا صعب علية سؤال او فد موضوع
بدت المحاضرات وآبد ماطلعنا جانت هي كل فترة تروح
تجيب حلويات ومن ندرس ناكل الى ان خلصنا رجعت للبيت
اخذت اكل وقفلت غرفتي كملت دراستي اخذت حمام وسرحت شعري
ونمت تعبانة بدون ما افكر بشي الثاني يوم داومت بحماس
اخذت السيارة ورحت اول ما وصلت نزلت نرجس من سيارة
بيها شاب بالثلاثين عمره ابتسم الها وراح .
رحت اتجاها سلمنا على بعض ودخلنا وحدة تحجي
للثاني على خبصتها دخلت للقاعة فتحنا الملازم
شفت بيدها اثر حرق خفت عليهه انكمش كلبي
بس لا اهلها يعذبوها مثل اهلي .
_ شبيها ايدچ نرجس منو وياچ ؟
اخذت ايدها ابتسمت وطلعت باكيت حليب
صغير قدمته اليه : اشربي واحچي .
دُر : ماحب اشرب حليب .
فتحته شربت قليل وهي تضحك
جاوبتني : ولا اني الصراحة بس هذا أمين
اخوية يحلفني اشربه الصبح يگول مفيد .
لثواني بقيت صافنة بوجهه احس بلعومي تجرح
نزلت راسي وهمست : وايدچ شبيها .
ذبت باكيت الحليب ورجعت تگلب بالأوراق
وتجاوبني وهي تتذكر الصار : البارحة گاعدة بأمان الله ادرس
امي كمّلت الاكل وشغلت المعزوفة مالتها محد يساعدني وإني غلطت خلفت
وامداكم وامده امكم والله اهج اذا ما تطلعن تساعدني .
اجت يمي اكثر ورفعت عبايتها من الارض
تنظف بيها وتكمل : طلعت ياعيني وكملت وياها الأكلات
وزوجته لأخوية الجبير هم وياها صحت اخواني الصغار
وملموم وابوية تعرفين بعد الرجل العراقي يتأمر واخواني
وياه شقاهم ثگيل واني ام السان ما اسكت كلمة منهم
كلمة مني عود نضحك وسحبني نزار لأبوية وصاروا
يدغدغ بيه وهذاك يضرب واحد يسحبني ماحسيت
غير ايدي لزگت على صوبة شهرتهم شهيرة
وخطية ودوني للمضمد وحتى نوم ما نايمين يحسون بالذنب .
هي تحجي واني اقرا المعوذات اخاف احسدهم بدون قصد
بقيت اركز وياها بس بداخلي صارت فجوة جبيرة صرت
اتمنى اهلي مو نفسهم اهلي اريد أهل مثل اهلها
_ لچ دُر شبعوني فلوس من البارحة ابوية واخوية
الجبير انطوني معجونيات اثنين
ونزار حلف اليوم يطلعني للسوك .
دُر : استغلي ابشع استغلال هاي فرصتچ .
نرجس : هو هيج .
حجتها ورجعت تراجع واني هم فتحت الموضوع
بس تفكيري تشتت اختنگت اريد بس ابجي
اجر بالنفس ثگل عضيت اصبعي ودرت منها
غمضت عيوني ما اريد تنزل دموعي والله عيب
بس ياربي حقي يصير عندي عائلة والله هذا الشعور
موحلو اهلي موجودين بس عايشة حياة اليتيمة.
كملت يومي بالويل كل شوية اريد اطلع بس اصبر بنفسي
واكمل محاضراتي ما اعرف شلون خلصتها وطلعت
رجعت للبيت حتى اكل ما اريد ذبيت ملازمي بالگاع
اول مادخلت للغرفة غسلت وجهي حرارة تطلع من عيوني
شهگت لطمت من القهر والوحدة امي احتاج امي
عايشة بهذا بيت الجبير وحدي عبالك ماكو بشر ويايه
بدلت ملابسي ماعرف شنو لبست اي شي اجه بيدي
وخليت راسي على مخدة حاربت نفسي ونمت .
فزيت على لمسات خفيفه وأيد باردة تتحسس بشرتي
فتحت عيوني صار يَسار گدامي وسعت عيوني مصدومة
بوجودة دفع ايده سحبني من شعري راسي على رجله
ضربته رجع ضربني صرخت بعالي صوتي تخبل
دفعني وصار فوكي يضغط بيده على شفايفي
يَسار: اني جعويط دُر اني تغلطين علية گدام ناس تافهه .
نزل راسه يريد يبوسني برگبتي رفست بيدي وبرجلي
ضربني راشدي وابتعد يصرخ بهستريا : ليش تكرهيني
دُر خبلتيني لا ليلي ليل ولا نهاري نهار فهميني اگعدي
وفهميني ليش هل تصرفات ويايه بشنو غلطت وياااااچ .
دُر : ماعندي حچي وياك ولا اريد اشوفك اطلع برا
تلعب نفسي منك ومن ذكراك ومن اسمك يا اخي عووووفني بحالي .
يَسار : احبچ دُر .
دُر : بحجم حبك اكرهك .
يَسار : ليش .
دُر : بيوم منّ الايام جنت زينة وياك وعلاقتي بيك طيبة
انتَ قتلت كلبي وبدلت كل مشاعري كره وحقد
يحتاج اذكرك شنو سويت .
يَسار : من حبي غلطت .
دُر : حبك يسمحلك تخلي بالعصير مخدر وتخدرني
حتى استغفر الله امشي اطلعععععععع برا اطلععععع .
يَسار : سامحيني دُر لازم تسامحيني انتِ اول تالي اليه .
دُر : لك لووووو تمووووت تحلممممم اصير الك
بعدني املك نفسي ومحافظة على شرفي وراسي
دوم مرفوع الحمدلله انتِ راسك بالطين وراح يظل طول عمره بالطين .
يَسار: منووووو يگول بعدچ محافظة على شرفچ ؟
بدون تفاهم ملخني تملخ طفرت من الوجع على باب
فتحته وركضت على غرفة اهلي دفرت الباب وفتت
الغرفة فارغة : يممممممههههه بابا صفية وينكم
ريااااااان انور ولكم وينكم .
يَسار: كلهم طالعين ههههههه بس اني وياچ بالبيت
هذا شرفچ خابصتني بي اريد اكسر خشمج بي
واخاف عبالچ ما سويتها هسسسسسة اسوووويهاااااا .
ضرب راسي بالحايط اختل توازني بقيت اباوع بس عيوني تغوش
سحلني من ايدي شمرني على سرير اهلي يشگگ بملابسي
دموعي تنزل ملخته تملخ وهو يضربني اقوى من ضرباتي
رفسته وسحبت مبرد امي على ميز من الوجع والقهر على
نفسي بكل ماعندي من حيل سحبت ايدي ودفعت المبرد ببطنه
فتح عيونه والدم يطشر منه على جسمي والسرير
دفعته وعفت المبرد ببطنه لازمه هو خايف يرجف
وگف يريد يلزمي رفعت ايدي كلها دم وضحكت
بخبال صرت مخبلة وگع يم رجلي گعدت اضرب بي وهو فاقد
واني فاقدة نفسي وحالي وعقلي ..
يتبع ...
ثقل ميزانك بذكر اللّٰـه:
- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد