_______________________ الــريـاش
﷽
𓆩 اســاور حــسين 𓆪
بقلمي رواية : الــرياش
مـثـل سـر الـبـيـوت بڪلـبي ضميتگ..!
لطفا لا تنسون التصويت والتفاعل بين الفقرات
⊰ دُر⊱
هو من شافني ضحك رغم حالته ايده صابيها
وراسه ملفوف بس كاشخ ويعرج بس مصمم على قوة
وبارز نفسه بينهم ، طلعوا عمامي مسدساتهم
وگفهم ابوية من دخل ومبين مجبور ومهدد
بالإكراه طلع الكلمات : اني موافق انطي دور العلي الآكبر .
انور : لااااااااااااا تكفرررررني شبيك تخبلت .
جود : يا فارس بدر يا حيدر الحبك ما خسر يا حيدر
والعافك خسر يا حيدر الحبك ما خسر والعافك خسر يا فارس بدر يا حيدر .
يسار : عمي والله اسويها دم راح يكمل عقدي
بابا تسمععععع لووووو لاااااا شووووف اخوووووك شيسوي .
علي الآكبر: علي حامل الراية ، علي مناوي المنايا
علي هز السرايا علي علي هز السرايا ومحبس صار
عمك بيدي بعد ياااا فارس بدر يا حيدر .
كمز واحد من عمامي يريد يضرب علي الآكبر
وابوية رجع بوجهم : تعالوا فوتوا للغرفة افهمكم
وانتوا ابو حسن دخل خطارك للاستقبال بس دقايق ونرجع .
باوع جود على انور ويسار وصاح : يا فارس بدر يا حيدر
الملاحم من يطبها ساواها وگلبها وبيمينه شطبها ، علي بكل وقت يلفي ويزأر .. يا فارس بدر يا حيدر .
اخذتني صفية للمطبخ ابوية اخذ عمامي للغرفة الجوة
ولد ابو حسن دخلوا الضيوف كلهم كاعدين
وكل شوية واحد من عمامي طالع صوته
طلع يسار قميصه مشگوگ وابو يضرب
بي سحبه انور وابوية من ايده وهو كمز يباوع
منا ومنا اول ما شافني بالمطبخ ركض اني من الرهبة
ضميت راسي وعطت بعالي صوتي : علي الاكبررررررررررررررر .
يسار : لج صار سنين انتظرج على جثتي يعقد عليج
دُررررر احبج اني لچ والله احبچ وروح امي ما اتحمل
اشوفچ تروحين لغيري .
دُر : انجب ابوو المخدرات انجب .
تقرب يريد يضربني وصار صياح عالي وابوية
يصيح : لاااا تدخل علي الاكبر شبيك ما يسوي شي بس يحاجيها .
انور : هذا شبي راح اروح اموووووته .
هو عيونه علية ما تحمل عيونه ادور على شي يضرب
بي شاف بس الكرسي وهو تك ايد رفعه وشمره من بعيد
على يسار وگع يصيح وابو تخبل يهدد بـ علي الآكبر
وانور كمز لزمه علي الآكبر من قميصه وبكل حيله ضربه براسه
وهو ملفوف بلفاف راح يوكع والدم ينزل من راسه على طول
جسمه وملابسه ، وكف يسار يريد يستغل وضعه ويضربه
هو اقترب منه وضربه بيده المصبوبة ونزل رفع ايده
وغمه بكل قوته بحيث صارت رده براسه نرفع ونضرب بالگاع .
_ من كون غمه تغمكم غم يا غمان .
جود وأخوانه ابو لازمهم يتوسل بيهم ما يدخلون
والشيوخ تصيح : عيب ابو حسن مايصير يفوتون
البيت اله حرمته صيح بعلي الآكبر .
على الآكبر: انور شمه اذا اسمع صوتك انومك بصف يسار خيسه .
انور : بابا يعني انت قابل على هل مهزلة
يتجاوز ويضرب بينه بنص بيتنا شنوووو
هل صلافة تقبل افوت بيتكم هاااا انت تقبل .
هجم على انور بضرب بي بوكسات وهذا يصرخ
بكل قوته وابوية وابو يسار يفكون بي وهو نام علية نيوم
_ لك ديوث تقارن بيتكم بيتنا عاااااااااار
يفوت بيتنا العار انت اذا توكف بمنطقتنا اكص رجلك وابو فاضل .
يوسف : كاااااااافي لك كاااافي عوفهم لك انوووووور
اطلع الله لا يرضى عليكم اطلعووووووا راح تصير مصيبة .
علي الآكبر: مصايب مصيبة شنووووو وحگ اخو زينب
اذا ماتروحون هسة من وجهي الله وحدة يستركم مني .
سحبوهم عبالهم يريدهم يسكتون بس هو قصده
يفوت للمطبخ ، داس على يسار وفات يركز بيه
بخوف : شمسوين بيچ شصاير شنو هاي الكدمات .
نزلت رفعت بنطلوني شوفته رجلي ورفعت عيوني تقطر دموع
_ رجلي توجعني هذا وراك ضربني بالحزام البارحة
حتى اوافق على يسار .
_ ياهو منهم اشري عليه .
رفعت ايدي اشرت على هذا عمي عود الخايس
رفع حاجبة وبكُل برود ضحك : اي والمفروض اخاف ؟
مد ايده علي الآكبر على حزام البنطلون وهو يرجع الضحكة
_ انت جرب واحكم تخاف لو ماتخاف ، وانتوا اي واحد يدخل
وحگ عگال ابوية هسة اروح اسلم كلشي عندي
للدولة، وما اكتفي افضحك واطلع الصوتيات الي عندي اوزعها
على تجار المتفق عليهم حتى يخسرون وانت تربح
واخليكم تگعدون على حديد .
كمل تهديده وصاح بصوت جلجل البيت
_ جووووووود سرررراج الدين تعالوا .
فهموا بدون كلام لزموا وعلي الآكبر دفره على رجله
وگعه وجود وسراج يمنعون الكل يقترب وعمي قوي
يدفع ويضرب وعلي الاكبر وگع على رجله ضرب ضرب ضرب
واحد يسب بالثاني الشيوخ كلهم طلعوا يصيحون فضحتونا عيب
مايصير ينضربون بنص بيتهم وين صايره هاااااي .
دار وجهه بتجاهي ومسح الدم من وجهه
_ برد كلبچ لو اكمل .
مسحت دموعي وحجيت بخوف : علي الآكبر راسك ينزف
الخياط انفتح كافي عوفهم .
ختمها بغمه بنص راسه وهذا يشيل بروحه ويرگعها
شلون هذا يسوي هيج بيَّ وابو يسار يصيح : اخوانه خمسة علينة
تعوقت حركتنا منهممممم ما تشووووف .
علي الآكبر: انور انتَ رد اذيتها تختلف عنهم
بس مو هسة اريد اكمل واعقد عليها وبعدين اشوف شغلي وياك .
انور : لا هاي هيه خوفتني .
علي الاكبر : هااااا يعني ماتخاف .
انور : راح اشيل يسار واطلع من المهجوم
وابوية يبتلي بيك مو راضي وهو دخلك للبيت .
علي الاكبر : ديلة يا ديوث يلة اطلع حجي زايد ما اريد .
جود : علي الآكبر نعوف عمها ؟
علي الآكبر: ستنتظرون يختمر ؟
سراج الدين : اي غير تحجي .
ابو حسن : ابو راس اليابس خلصت لو بعدك ؟
علي الآكبر: راح نبدي بوية مانخلص بعد ..
طلع ابوية هو وابو حسن رجعوا الشيوخ
وعلي الاكبر التفت بتجاهي : دُر اصعدي فوك واقفلي
الباب يلة بوية بساع .
هزيت راسي ومريت من جهته اباوع عليهم
وهمَّ كلهم يخزرون بيَّ ، بقيت فوك استمع بس
ما قفلت الباب عمامي المجرمين كلهم تعاركوا همَّ وابوية
بس من برر موقفه وليش وافق وشرح الهم الصار بالغرفة
قرروا يروحون وقبل لا يطلعون وزعوا المهام : ابو يسار انت
تظل هنا تساعد ابو انور بعقد بنته .
علي الآكبر: متوهمين انا ما اعقد اليوم باجر ان شاء الله
طالعين الكربلاء نقد مقابيل ابو فاضل واخو الحسين ( عليهم السلام )
انور : حتى عقدكم مو مثل العالم هوووو عقد لو فاتحة
وين اكووو عقد زواج يصير بضريح .
جود : صوتك روح امشي اطلع شمشم .
علي الآكبر: ابو ريان صحّ صايرة بيناتنا مشاكل بس احترامك من احترام
المحروسة بنتك اي طلب عندك تريد تطلبه مني انا جاهز .
يوسف : نسألها اذا موافقة عليك باجر اخذها واعقد عليها .
ابو حسن : اي منّ الاصول نسألها مابيها شي بالعكس من الزينات .
دگ تلفوني بهل اثناء بـ اسم الرياش نهج مُغاير
إبتسمت وجاوبته: اشتاقيت اشوف هل اسم يرن على تلفوني .
_ وانا اشتاقيت الـ
قطع كلامة منتبه بـ اخر لحظة
احمممم دُر راح يطلبون رأيچ انتِ حرة توافقين ترفضين براحتج
هذا مستقبلچ ويمكن اني مو مثل ما تريدين معذورة وحقج
والله ما ازعل منج ابد بالعكس اني بس اريد اشوفچ بخير وهذا يكفيني .
دُر : وتعوفني مو ؟
سمعتهم يصيحون بـ اسمه واجت صفية انطتني خبر يريدوني
_ دُر اسمعيني مو افرض كلمة لا والله بس
اريد تلبسين شال من ادخلين عليهم .
سحبتني صفية وهو سد التلفون ودخل
بقيت دقايق واني افكر بالموضوع بعدين
استسلمت ورجعت للغرفة دورت على شال
لبسته بـ إهمال ونزلت ابوية واكف من شافني رجع
كعد اجه ابو حسن فتح شوية من الباب وضحك : هلا ببنيتي .
حجيت بصوت بس ناصي هو يسمع
_ اشتاقيتلك عمو حتى اشتاقيت الكلمة بنيتي منك .
ابو حسن : ايام وتصيرين بيتي يمي بحمايتي اصير ابوج والله
وهذا ابو راس اليابس اطيح حظه اذا يزعل هل دُرر .
نزلت راسي والقهر مبين على ملامحي ومن التوتر والتردد
اگرص بيدي رفعت عيوني وهمست : بس اني والله خايفة
من كلمة زواج وما مستعدة .
ظل صافن مصدوم برد فعلي دار وجهه على علي الآكبر
خزره ورجع يحجي ويايه بصوته الحنون : لا تفشليني
جدام الشيوخ وافقي بوية وانا بس يروحون ساعة وارجع
عليچ ويايه علي الآكبر نتفاهم عجبچ الحجي خير على خير
ما عجبچ وعد مني بوية ما اخلي بعد يتگرب منچ ويضغط عليچ.
_ هاااا ابو حسن مو طولتها خوية شني رأي البت عدها أشكال .
دُر : موافقة ماعندي مشكلة .
جود : هلاهل هلاااااااهل ولكم هلهلوا .
اجت عيني بعين على الاكبر مبتسم ابتسامة حنونة وينظر اليه بفخر
بادلته الابتسامة وحجت بصوت ناصي : عمو ابو حسن راح انتظرك .
دگ صدره عفته ورحت وهو رجع الهم اسمع جود يهلهل
وحسن يصيح بي : ولك ديج مخنوك هاي مو هلهوله .
طلع انور يكفر ويسب بيه يصيح على ابو
_ دخلت الهمج بنص بيتنا اذا ما اشرب من دمها .
يوسف : اي خلي يهجم بيتنا علمود بنية
اذا يودي التسجيلات لأبو ياسين ويعرف
اني وعمك سبب خسارته ينهي على عائلة الرياش بالكامل .
رفع أيده يأشر على مكانهم ويرجع يضرب على راسه
_ وتخلي واحد مثل علي الآكبر يتحكم بينا
شنووووووو يگلي يولد ماي بارد بسرعة
يريد يسويني خادم جوة ايده اني تالي عمري
انهان وبنص بيتي من واحد حافي .
يوسف : حافي وفركم فر طيح الله حظك
شغل عقلك مثله يا كلب من دخل حياتنا كلبها على روسنا .
انور : شسوي يعني شسوي ؟
يوسف : سايس الوضع بين مانشوف شلون نصفي هو واهله .
انور : اذا ما انتقم منه بعرضه اضربه ، هو عنده اخت مووو ؟
دفعه أبويّة وراح رجعلهم وهو يشيل بروحه ويرگعها
يريد يروح للمطبخ وشافني وكل حقد الكون تجمع بعيونه
_ اذا ما ابجي عيونچ دم يا دُر اطلع ****** .
دُر : دروح علي الآكبر عطشان جيب مي بارد
لا يلزمك هسة هو واخونه تصير كيس ملاكمة .
يريد يصعد يضربني فتحت شفايفي
وعطت : والله اصيح والله انزل احترم نفسك وانزل ولي منااااا .
انور : دموع يسار اطلعهااااا من بطن عيونكم نهررررر يجري
كسرت صاحبي ارجعها بكلبكم وشوفي .
عافني وطلع من البيت كله وبيت ابو حسن كلهم
اخذوا الشيوخ وراحوا قفلت الباب الى ان دگ تلفوني
_ ها عمو ؟
ابو حسن : بنيتي منتظرين جوة .
سديت الخط ونزلت ماكو احد بالبيت حتى ابوية طالع
مو شي جديد تعودت ، صفية اشرت على صالة الضيوف
ضربت على باب ثلاث مرات وفتحته كاعد علي الاكبر
يسولف هو وابو : السلام عليكم .
ردوا السلام ، كعدت مقابيلهم خجلانة حايرة شلون اجاوبهم وافهمهم
ابو حسن : بنيتي بالبداية نعتذر على صار
اليوم بيهم والتجاوزات الصارت من ولدي
هذولي من يفقدون اعصابهم انا ابوهم ما اكدر عليهم .
دُر : بالعكس المفروض اشكرهم خلصوني منهم واخذوا حقي
هذولي اذوني بطريقة وحشية الفترة الفاتت .
ابو حسن : سمعت من صفية جسمج من الضرب انشل .
هو هيج يحچي وعلي الاكبر يفرك بيده باوع علية وصاح
_ هااا مجهز مصيبة ؟
علي الآكبر : صار الثار ثارين بوية شلوني وشلوها
وحگ ابو الحسنين اذا ما اشل حركتهم واخليهم
مايعرفون يتصرفون انا نكره .
ابو حسن : چا هو هسة انت شسويت شليتهم شل لا يكدرون يرفضون
زواجكم ولا يكدرون يشتغلون زين حايرين بزمانهم يباصرون
برواحتهم شلون يخلصون عليك وعلى اخوتك ولا تگول مايهموني
شوف حالتك شوفها .
علي الآكبر: غدر كل الصار غدر .
ابو حسن : ويگدرون يضربوكم غدر بعد وبعد وبعد .
علي الاكبر : كلمن ويومه محد ياخذ عمر زايد
هو عمر لو عمرين نخلص عمرنا نمشي بصف الحايط
والمثل هل زبايل يتلاعبون بينا افااااااااا يا حيف الشوارب اذا ارضاها .
ابو حسن : انت ما اكدر عليك لا وحگ ربك
اسكت اريد احاجي البت اسكت .
علي الآكبر: هههههه تعرفني علي حق يا تاج راسي
احجي بعد روحي احجي .
ضربة على ظهره والتفت عليه كاعدة اركز بيهم شلون يتفاهمون
وابو ياخذ وينطي وياه ويحترم قراره رغم خوفه يمنعه .
ابو حسن : بنيتي الغالية الطيبة هسة انا ابوچ مو بس ابو هذا
ابو راس اليابس ، احجيلي شنو مخليج تترددين بهذا الزواج
غير الطبقة الاجتماعية بيناتكم .
هزيت راسي هم رجعوا افتهموني غلط ياربي
شلون افهمهم وبيا طريقة ، الخجل على تردد بالكلام
كله تولد عندي بسبب طفولتي وكثرة وحدتي التعبير بهل مواقف يخوني
_ اني ما اتردد من ناحية هل شي ، خايفة اسبب الكم مشاكل
وتتأذى عائلتكم بسببي اهلي ما راح يسكتون اني اعرفهم
يرجعون كلشي صار اضعااااااف والله يرجع كلشي اضعاف .
علي الآكبر: قل لن يصيبنا إلا ما كتب الله لنا
صدق الله العظيم ، اذا بيوم يصير شي يصير لان هذا المكتوب
اذا احنا نمشيها عدل وربنا شاهد ورازقنا عقل وقوة
يخلينا اضعاف قوتهم ونردهم انت من هل ناحية لا تشيلين هم
اني وكل اخواني جاهزين لكل ردات فعلهم .
ابو حسن : وانا اتكفل ولدي ذياب لا يوسف ولا عمامچ
يگدرون عليهم وحگ ابو فاضل أذا يغتاظون يدمرررروهم .
بقيت رأسي نازل حايرة اريد افهمهم الخجل اكلني اكل
ما انطاني مجال احجي حررررف : بوية تعالي بحماية على الآكبر
وازين شاربي اذا بيوم تتندمين على قرارچ انتِ من بناتي
والقسمة اللي ما ارضاها الهن ما ارضاها الچ انتِ عزيزه عليَّ .
أومأت براسي هو وكف وعلي الاكبر وياه
_ عندج مجال تفكرين بمستقبلچ من هل ساعة
لباجر بعد اذان الظهر نطلع الكربلاء اذا وافقتي .
علي الآكبر: وانا محترم قرارچ مهما كان
وحتى لو رفضتي كلمة زلمة اخذيها اذا تطلبيني ما اردچ .
دُر : شكراً الكم على كلشي .
طلع ابو حسن مشيت وياهم اريد اطلعهم
باوع على الآكبر بعيوني ويحجي بهدوء
_ بوية اعرف عندج حجي بكد الكون ونايم على ضلوعچ
لا تهملين محادثنا اليوم دُر لا تهمليها .
ابو حسن : يلة علي الآكبر تأخرنا .
علي الآكبر: انتبهي على نفسج دُر .
رفعت ايدي على شفايفي وصرت اضرب عليها
_ لا تحجي هل جملة اكرهااا اخر مرة حجيتها عفتني .
بلع ريگه وتخربط كل وضعه عيونه على شفايفي
تقرب وهو هيمان : لا تضربيهن تضربين كلبي من تضربيهن .
حجاها وطلع منتبه على نفسه فرك شعره بعثره
وصعد بالسيارة ابو يسوق سديت الباب ولزمت شفايفي
كلمته مافارقتني صعدت دايخه قفلت غرفتي وكعدت
دورت تلفوني صفنت بي انضرب باب غرفتي
_ منوو ؟
_ اني ابوج .
ضميت تلفوني فتحته دخل بس هو وسد الباب
كعد على سرير ورفع راسه يحجي : شيصير بعدين
لا تعتبين انتِ دخلتي شيطان بيناتنا .
دُر : اني يااااا ابووووية اني دخلته انتووووووا جبرتوني على كلشي
خليتني افكر اتزوج واني والله شايلة فكرة الزواج من راسي
خليتني احتمي بالغرررررريب من اهلي تعرف شكد صعبة
استنجد بغريب يحميني من اخووووية اني تعبت منكممم .
_ ما قصرت وياج بيوم .
دُر : انتَ بكلشي قصرتي بابا بكلشي
جنت اتمنى بيوم تخلصني بيوم من ايد
ابن اخووووك وهو يحاول يعتدي على بنتك خلصتني منه بيوم ؟
_ اني مو دائماً متواجد ، واذا متواجد ما ادري
هو اول تالي زوجج انتِ جنتي معارضة وطولتيها عليكم .
لطمت على وجهي بكل ماعندي من قوة وصحت
_ وابنك جنت اجي اكلك بابا انوووور زاد بالضرب
وملابسي مشگگات وجهي دم ضرب اهانة كلشي شفت من انور
تگلي اخووووج الجبير يخاف عليج ، يخاف علية يضربني ؟
_ انتي تستفزي .
_ اييبييييييي اني موووووو ادمية اني الغلطانة دائماً
جنت اسمع واشوف معاملة اباء صديقتي الهن
خوفهم حبهم واموووووت يابه امووووووت
بعمرك ما حضنتيني ما طبطبت ماباركت اليه بنجاحاتي
ماشفت منكم شي حلو عيشتني بقصر وفرت كلشي
ما عداكممممممم انت وامي فقدت وجودكم ماعندي عائلة اني ماعندي .
_ اريد حل اجيت اشوف حل اني رافض زواجج وما راضي
عليج اذا تتزوجين علي الآكبر .
_ دائماً انتوا ما راضين وما تدخلون اصلا هسة
ليش عارضتنا لان اكو حب بالموضوع ماتحبون شي اسمة حب .
_ ماااااا راضي عليج اذا تتزوجي افتهمتي لووووو لا .
_ افتهم اني افتهم .
عافني وطلع اخذت تلفوني وطلعت ابوية متخربط كل وضعه
ومبين ما ناوي على خير : وين .
درت وجهي مبتسمه متعجبة
_ لاااا هذا اكيد حلم اول مرة بحياتك تسألني هذا السؤال
دائما اسافر ايام وانت حتى ماتدرين اني مسافرة .
_ كلشي اعرف اني من امج كلشي .
_ هي وين امي حبيبتك وينها ؟
نزل راسه وهو يهزه بتوعد
_ رايحة للسوبر ماركت اشتري كم شغلة وارجع .
طلعت واني اكره هذا التحلل الأسري
اهتم تالي وكت يهتم ايام مرضي اروح اعالج روحي وحدي
جروحي عالجتها وحدي
خساراتي مراهقتي عشتها وحدي
نجاحي ورسوبي عشتها وحدي
عمري كله عشته وحدي وحيدة ماكو بيهم واحد يتفقدني
كل واحد حاير بحياته بس يعرفون الفلوس ينطوني فلوس
لان الفلوس بنظرهم تصنع الانسان .
طلعت امشي للسوبر ماركت صار مقابيلي منتزه
وكفت اباوع على اباء يلاعبون اطفالهم وامهاتهم
بعيد يضحكون والاخوان يتشاركون ويتسابقون
انهاريت لزمت راسي وصرت اهز بي بكل قوتي
خسروني احلى ايام حياتي خسرررررتهااااااااا
ظلموني وجاي يحسسني بتأنيب الضمير
حرمونا اني واخواني من ابسط حقوق الاطفال
ريان انور يسار كلنا ضحاية عائلة الرياش
والفاقد عائلته عمره كله يخلص مكسور
وكسرته لا تتصلح ولا تترمم .
اخذت صورة ورسلتها لعلي الاكبر كتبت بدون تردد
_ اني ما اكدر اسفة مستحيل أظلمك ويايه
انتَ ماتستاهل اني تربية على ايد روبوتات
اطباعهم طبعت بيه صرت ما احس بمشاعر
كلبي ميت اذا اقبل بيك ما اسعدك بالعكس
راح تعيش تعاستي مستحيل احب .
قراها بلحظتها رفعت راسي اباوع على اطفال
ودموعي تصب توگع على الجهاز امسحه
وارجع اكتب : اخاف يصير عندي اطفال واظلمهم
لا اعرف اعبر ولا اعرف اكون مسؤولة عنهم
ما اريد اولد اطفال واعذبهم مثل عذابي .
رفعت شعري وتلفوني على رجلي شهگت
وصدري احتقن من حرگت كلبي وكملت : اني ما اصير زوجة مناسبة ابد
شلون احب ما اعرف شلون أحبَّ اصلا احس الحب تمثيل وكذبة
تدري ماعندي ام تعلمني اسمع من صديقاتي همَّ ينظفون
بيوتهم اني تعودت على مساعدات
ينظفون ويطبخون اني كلشي يوصلني جاهز .
ختمتها بكلمة
- علي الآكبر انت تستاهل الأحسن مني .
غلقت تلفوني ادري بي يخابر من اكمل كلام
رجعت اشاهد العوائل واني كاعدة بعيد عنهم
على مصطبة ومقابيلي سياج مشبك حديد
وعلى يميني ابو النفاخ ، وعلى يساري ابو قهوة وشاي
واحد ثاني يبيع شامية وجبس والأطفال ياخذون منهم
كلهم عدهم عوائل يصرفون عليهم واطفال ينتظروهم .
سمعت صوت سيارة درت وجهي نزل علي الآكبر
رفعت حاجبي بمعنى شلون عرفت وبقيت اتبع
خطواته الى ان وصل مقابيل ابو الجاي اخذ اثنين
وكعد بصفي قرب كلاص وهو مبتسم : اخذي دفي نفسج
خشمج احمر من البرد .
اخذته وجريت نفس هو يشرب بدون كلام واني اشرب بدون
حيل احس كلشي بيه تعبان اول ما خلص وكف مقابيلي
_ تعالي .
_ وين .
_ هنا مانروح .
_ علي الآكبر اني وضحـ .
رفع اصبعه على شفايفه بمعنى اسكت
_ اول مرة اطلب ترديني ؟
خليت الجاي على مصطبة واتبعته دخّل المنتزه يمشي
بكُل لياقة مبين على جسمه لاعب حديد لان ظهره مقسم
صاحب اكتف عريضة ، توقف والتفت مبتسم لزم المرجوحة
_ اصعدي .
_ شنو ؟
_ اصعدي شوية .
_ والعالم .
_ وينهم .
_ هذولي كلهم .
_ المهم انتِ .
_ استحي .
_ اني يمج .
_ احب كلمة اني يمج .
_ يلة بوية يلة اصعدي .
كعدت واني خايفة
_ بعمري ما صعدتها ترا اخاف توكع .
_ حديد قوية مثلج ماتوگع .
صار يدفع بيها بالبداية خفيف بعدين حسيت بروحي طرت
صاح بصوت ضاحك : ارفعي راسج افتحي ايدج .
ضحكت بعلو صوتي ناسية الكون والعالم وكلشي
طلعت ضحكتي من كلبي
_ علي اخاف ما صاعدتهااا اخاف .
_ انا يمج لا تخافين اوگع قبل لا توگعين بوية .
توقف بعد فترة بس بدت تخف وكف امامي
وكعد مقابيلي مثني ركبه ايده ملفوفه مبين تأذي
ورأسه معالجه مخلي لفاف جديد هذاك انترس دم
صفن بعيوني مبتسم : سنتين وست اشهر وواحد وعشرين يوم
وعشر ساعات اني انتظرج وجانت هاي امنيتي من يومها
اصفن بوجهج جنت اگول لعيوني
( اذا تصيرلي بيوم اعميچ اذا تطبگين الرمش برمش )
دُر : علي الآكبر ما اسعدك مرعوبة اخاف أظلمك .
علي الآكبر : انتِ ضيعتيني بيچ ، ابدّي وياج من جديد
لا المسؤولية تهمني ولا غيرها كلشي يجي بالتدريج
المهم انتِ يمي واني يمج .
دُر : مسؤولية .
علي الآكبر : على تنظيف تريدين تخربيها اني وياج
اصير ام تعلم بتها ، متزوجة شيف انتِ تصيرين بس انتِ وبس بالطبخ .
دُر : مشاعري .
علي الآكبر : ما اطلب تحبيني بس
وحگ حب علي لفاطمة حبيبت روحه
ارجع كلبچ يدگ بأسمي بس بأسمي
اتعب عليچ اصير الج الحبيب
والأب، والاخ اذا تريدين .
دُر : خايفة .
علي الآكبر : خافي من الكون كله ومني لا تخافين .
دُر : اذا تصير الكم مصيبة اخاف اشوف بعيونك لوم وعتب .
علي الآكبر: تلگيني اول واحد يمج امسح على عيونج .
دُر : اذا غلطت .
علي الاكبر : اب ويحتوي بنته ويعلمها .
دُر : الاطفال ؟
علي الاكبر : ما اريدهم اريدج ، من نستعد لهل خطوة نخطيها سوية .
دُر : وكلام الناس .
علي الاكبر : اخر اهتماماتنا نعيش بعالمنا ما ندخلهم .
دُر : اذا ما نجحنا وتعايشنا بسلام .
علي الآكبر: وحگ الله انا ما اعرفچ لو مهما اشوف منچ
واذا اجيتي بيوم وطلبتيها مني نتفاهم اذا ما وصلنا لحل يجرالج .
دُر : استسلم ما اكدر عليك .
علي الآكبر : ما اضغط عليج فكري واني وياج بكل قرار بوية
الساعة بـ 12 وربع انتظر منج رسالة مضمونها تعال اخذني .
أومأت براسي رفعنا راسنا ونشوف العالم كلها مستغربة
ومركزين ويانا قلص عيونه وهو مبتسم : فقدت عقلي العب من هسة .
ضحكت على فشلته اشر نطلع هو يمشي واني بصفه
اريد اروح للبيت صعدني بالسيارة وكفها : تاكلين لبلبي حار .
بقيت ساكته نزل يجيب كاسات اثنين سفري
فتحها وانطاني رارنج : عصري وياه يطلع يفلش .
سويت مثل ما يسوي وهو يبتسم ويكمل
_ مبين بعمرج ما اكلتي .
دُر : اخاف احجي وانفهم غلط .
_ من تحجين ويايه لا تگولين اخاف كلشي عندج احجي بدون تقيد .
_ ما اشتري من بائع متجول بس والله طيب عجبني
ماجنت انتبه عليهم بعد اشتري منهم تحسهم
طيبين يستاهلون نشتري منهم .
علي الآكبر: هذولي أنقى ناس تعبانين بحياتهم
حتى يحصلون اكلهم بالحلال مثلي ومثل هواي شباب عراقيين .
صار يسولفلي عنهم ويشرح شكد يتعبون
ويسولف عن قصص اصدقائه الى ان ما حسيت بنفسي
اكلتها كلها مسحت بكلينكس وفر السيارة رجعني للبيت
اول ما دخلت حرك وراح بس وصلت للصالة اريد اصعد
فات يسار وجهه مورم وبعده بنفس قميصه
_ ما مبرية الذمة ليوووووم الدين صبرت عليج عمر
وتعرفين شكد احبج وتوافقين على عااااااار نكرررررره .
دُر : الخراب الصار بيناتنا من ايدك
تخديري ، تحرشاتك القذرة ، ضربك على اقل سبب
تدفع اخوية حتى يضربني وصلته المرحلة يكرهني
انور جان مايرفع ايده ولا يشوفني انتَ خليتني براسه
حتى امل من الضرب واهمال اهلي وانت تمثل دور المحب واقبل بيك .
يسار : مووووو هووووو نفس الشي استغل ضعف شخصيتج
استغل انتِ بحاجة اهل وحماية واهتمام صار يمثل عليج
الى ان اتمكن منج يا غبية رايحة برجلج على الفقررر
حياتهم صعبة لا عبالك سهلة يتمنون يعيشون عيشتنا هل قذرين
ومستعد اثبت علي الآكبر ما يحبج بس يريد ينتقم على موقف
صار بينه وبين ابوج راح ينتقم من ابوج بيج يا غبية .
دُر : لاااااا تدخل بحياتي وابتعد اني اريد اعيش
الفقر بشنوو فادتني فلوسكم ما اريدها اذا تبقيني
بـ هل ضعف مليت منكمممم مليت واني وحيده
وانت حالك حالهم تعيشني شهر زينة تالي ترجع زير نساء
مو بيدك بس اطباعهم بيك مزروعة انتَ تربيت هل هل نمط واني مثل
واذا على انتقام اقبل بقت على هاي سهلة .
عفته وصعدت وهو يصيح بعالي صوته
_ والله ما يتهنى بيج واني عااااايش والله ياخذ
ممتلكاتي لج اني اناني اناني ممتلكاتي ما اعوووووفها بسهولة .
واني اصعد بعدم اهتمام ضحكت ورديت
_ ههههههههه ابوك نفس كلام ابوك كلشي يخصكم ممتلكات
بدون مشاعر همكم الممتلكات امداكم انتوا وممتلكاتكم الله يخلصني .
قفلت غرفتي وخليت راسي على مخدتي تعبت من كعدت
لهل دقيقة مشاكل هلكت ، راسي يريد ينفجر نمت بس
افكر حتى واني نايمة افكاري لا تسكن ولا تهدأ
الثاني يوم فزيت الساعة بـ 2 ونص الظهر
لطمت على وجهي ارفع بشعري وامسح بوجهي
ادور على تفوني ارجف لاااااا ربي راح يفتهمها رفض
وين التلفوووون وين لككككككك اخخخخخخ مني اخخخخخ .
اخذت التلفون وكفت افتر بالغرفة وحتى من التوتر ما اعرف ادوس
دزيت رسالة يتوتر ونص الكلمات غلط من الاستعجال
_ علي الآكبر والله جنت نايمة ما ادري بنفسي شلون طولت
جنت تعبانة اعتذر ترا اني موافقة وردت اكتب تعال اخذني .
انتظرت يشوفها ماكو شمرته على سرير ودخلت اغسل بوجهي
اريد اصحصح شلون غلطت سوووي منبه يا غبية انطي
خبر صفية تگعدج من نومج نوم الميتين .
بس طلعت اخذت التلفون فتحت المحادثة انتظر يدخل
ماكو ، بقيت اكل بـ اصابيعي اتصلت بعد ما اتحمل
جاوبني بس ماكو صوته .
_ دزيت رسالة وينك .
_ قريتها .
_ بيك شي .
_ منتظرج من الصبح انا منتظر يمج .
طلعت من الغرفة الشباك الصالة الفوك فتحت البردات
صار مقابيلي مستند على سيارته
_ وحتى لو ترفضيني اظل منتظرج هنا عمرررر
الى ان تحضن ايدج ايدي لا صبري يخلص ولا يمل كلبي منج .
ابتسمت وجهي احس صار حار
_ عدلي تسريحة الاسد وانزلي
خلصت روحي اهلي من الانتظار
قابل اهلي علي الاكبرررر امشي يلة .
عدلت شعري وفتت واني اجاوبة
_ براسك الملفوف وإيدك المصبوبة جنك مومياء .
ضحك بعالي صوته بحيث اريد بعد يضحك سد الخط
واني ركض سبحت وطلعت فستان لون سمائي وخليت مكياج
ورشيت عطر واخذت مستمسكات اخاف يحتاجوها وطلعت
ابو يسار ويسار وابوية وانور وعمامي اثنين منهم
موجودين بحيث بقيت صافنة متعجبة من شوكت يجتمعون
والله بعمري ما شفتهم ملتمين عجزت افسر نظراتهم
بس عرفت اكو مصيبة راح تصير بالطريق .
ماجنت خايفة بس احترمتهم وكفت انطيهم علم
_ راح تروحون ويايه ؟
واحد من عمامي وكف وتقرب
_ كلنا ما راضين وما راح نسكت والمصايب بالطريق
تتحدينا والتحدي صعب خسارته ارووووواح
تذكري زين يا بنت اخوية
( بكُل مرة يقترب منچ علي الآكبر الثمن غالي )
اقترب ابوية لزمني من ايدي وطلعني يمشي بسرعة
_ خلي هل عااااااار يفيدج
وصلني للباب ودفعني بس انفتح الباب تغير 180 درجة
_ علي الاكبر اخذها واني اجي وراكم .
بدون ما ينطي أهمية فتح الباب صعدت
ساكته ايدي على كلبي صرت احجي اله عن كلامهم
جاوبني : قبل لا يغدروني بالحادث دزولي هاي الرسالة
فتح التلفون مكتوب ( ثمن كل مرة تغامر وتستقبلها وتقترب منها ) .
_ علي الآكبر هذولي مجرمين كلشي يسون
حتى اذا يقتلون بدم بارد همه مو عبالهم متت وعادي عدهم
بالعكس فرحوا يعني حتى اروح الناس مو مهمة عدهم .
اخذ التلفون والتفت حتى ينتبه للطريق
_ لا تفكرين بشي اليوم مهم عدنا لا تنطيهم
مجال يخربوها فرحتنا .
اخذ المستمسكات وساق السيارة دخل منطقتهم
_ الوالده حلفتني تجين هنا قبل لا نطلع للزيارة .
_ مو لازم يروحون ويانا .
_ اعتيادي .
نزلنا مقابيل بابهم اخوانا بالباب واكفين يسولفون
كلهم تقدموا يسلمون متت من الخجل منهم
هو بسرعة افتهم تقرب مني واشر : تعالي دُر .
أتبعته اول ما دخلنا استقبلوني امه تبوس بيه
وطلعت شهد فرحانة وهي تبوسني تحجي
_ وهاي الرادها وهاي التمناها دُر العلي الآكبر اخذناهااا
كللوووووووووووششششششششششش .
وفات جود من سمعها يدك برجله بالگاع وبعالي صوته يصيح
_ وهاااا وهااا وهاااا اليوم يومك يا بطل العب على الجرباية .
دار علي الآكبر مصدوم فاتح عيونه وراح يمشي
سريع لزمه من ملابسه ورفعه : شنووووووووو ولك .
هو لازمه من ملابسه ويدك برجله ويصفك ومايل يخاف
تجي ضربة : وهااا هااا هاااا لا تگول الوحدك كل احنا اخواتك .
ضربه بغمه هو لزم راسه وعلي الاكبر طلع وهو يصيح
_ من كون غمه تغمك غم يا اغم .
جود : مايرضى على شي ابو راس اليابس عود اهوس
وفرحان دوخني الله يساعدك خوية انور على غمات
اخوي مو ايد بني ادم لاااااا حشى .
اخذتني امهم نسوان اخوانه واكفات يضحكون
سلمت عليهم بس كملت منهن لزمتني شهد
فوتتني بغرفة صغيرة جوة بيها ميز خشب
ومجرات وبوب وفوكاه فراشات نوم هواي مغطيها بتول ابيض
فتحت وحدة من البوب وطلعت ملابس مرتبات بلون الابيض
يلمعن لمع وبيهن تطريز ذهبي فتحتها فستان ابيض ومثل
العبايه تلبس على الراس بلون ابيض وكفوف بيض
وجوارب شفافات : يمه رايحين مكان مقدس ما اريد بعقد زواجكم
تلبسين اسود مايصلح فال مو حلو خيطت هل ملابس بيدي
من اول ما أجاني علي الآكبر وگال عاشگ يمه ورايدها
ومن يومها اخيط بيها وأدعي تصيرين اله بس ماجنت ادري
انتِ البنت الي قاصدها ابني .
ابتسمت بوجهه وهي لزمتني من ايدي وبعيونها دموع
_ علي الآكبر خلص عمره تعبان ومن يوم حبج صار
يضحك رغم صبر هواي راحته وياچ يمه وفرحته تكمل بيچ
احنا اهلچ وهو مو لان ابني بس ربيت وتعبت بتربيتهم
وسويتهم زلم يحترمون نسوانهم ذيابه خليتهم والله يمه .
مسحت دموعها وهمست بخجل
_ لا تبجين ابجي وياج والله .
مسحت على راسي وصاحت بشهد
_ ساعديها يمه شهد اشوف اخوج اخاف يحتاج شي .
كملت وطلعت وشهد تباوع
_ اي نبدي نجلف المكياج لان يطردونه دفرات
شايفة المفتشات شيسون بالتفتيش كلشي يتلمسن
ويعلقن على حباية بالوجه.
اخذتني غسلت وجهي من المكياج كله ورجعتني دارت وجهه
حتى تعوف مساحة اليه نزعت فستاني ولبست الابيض
وكعدتني لبستني كب وحجاب لفتهم بالون الابيض وجابت
دنابيس تثبت بالعبايه البيضاء تصير مثل تول العروس بس ثخين .
وراحت تركض جابت حمرة رفعتها
_ هاي الحمره السحرية تخليها خضرة تنگلب وردي وردي .
كملت وطلعت عطري رشيت منه والكفوف لبستهم
فتحت الباب اريد اطلع وصوتهم طالع
ابو حسن : علي الاكبررر دكم القميص سدها شني صدك طالع .
جود : دعوووووف الزلمة يسوي إغراءات للبنية .
ابو حسن : شني ولك هو بت ومطلع صدره يسوي إغراءات .
علي الآكبر: هههههههههههههه .
سد الدكمة صرت مقابيلهم متت بدمي على نظراتهم
من الصدمة فتح عيونه ورفع اصابيعه دخلهن بشعره
فزرنا جود من صاح وهو يشمر المشط : يااااااااا خرب التسريحة .
التفت على جود ورجع التفت اكلني اكل بعيونه
عبالك ماكو احد موجود بلع ريگ وعمي ضحك
_ احنا هنااااا والعباس .
نزل راسه يضحك ونسوان اخوانه واكفات يباوعون
عليَّ وعلية من اشرت ام حسن صاحن
_ اي اي ربي يكتب الهم الخير يتهنون .
_ الله يتممها على خير .
_ الف مبروك مقدماً .
طلع عمي وعمتي وشهد وحسن وجود بسيارة
مال عمي والثانية صعدنا اني وياه بيها مالتهم كلهم
والباقين بقوا بالبيت ، اول ما صرت اني وياه وحدنا
توتر يفتح بالشباك ويرجع يباوع يريد يحجي بس لازم نفسه
مر على محل نزل جايب ورد فتح الباب وهمس : يا عروس نسيتي الورد .
اخذته فرحانه بي من صعد شميت الورد طبيعي
احمر وابيض عطره يجننن : استحيت اطلبه .
_ ما يحتاج تطلبين اني اعرف شنو تحبين .
واني كاعدة اسمع بلع ريگه وكل شوية ياخذ كلينكس
يمسح وجهه ويرجع يركز بالطريق يحوم مايعرف شيسوي
_ شبيك قلقتني .
_ احتريت .
_ انزع السترة .
_ مايحتاج احتر بالحالتين .
درت منه لزم راسه فاتح الشاش درت شوية
باوعت يعض بـ اصبعه : قلقتني .
_ هسة نوصل .
_ شبيك ؟
_ بالضيم .
اخذ التلفون وصاح : جود تنزل قبلنا تركض تجهز كلشي للعقد .
بس وصلنا للكراج نزل جود واحنا اجتمعنا ونزلنا
ابو حسن : علاوي داخلين قبلكم بوية لا تتأخر .
هز راسه واخذتي يمشي بصفي الناس تباوع موتوني من الخجل
دخلني على محل ذهب : نختار الذهب.
هزيت راسي نزل هواي موديلات تخم كامل
عجبه واحد واني عجبني اشياء ناعمة ما احب المبالغ بيهم
واختاريت حلقة سادة وهو اختار حلقة فضة رتبها بعلبة
وطلعنا هو ضحكته ما اختفت بس اني كلبي ما مرتاح .
دخلت على تفتيش والتقيت بي جوة رحنا على غرفة
كبيرة يعقدون بيها لكيت عائلته منتظرين دخلونا
هو طلع دقايق ورجع وياه ابوية وابو يسار وانور
كعدوا بدون صوت هو بصفي كعد واقترب مني
صار الشيخ ينطي ايات قرانية ويشرح عن الزواج
ختامها كان : دُر يوسف عيسى هل تقبلين بالزواج م
من علي الآكبر صفون ؟
باوعت بوجهه ابوية فر راسه ما راضي
علي الاكبر : دُر .
التفتت عيوني مدمعة
علي الآكبر: تقبلين تكونين شريكة حياتي ونصفي الثاني
صديقتي وبنت روحي استاهلچ وتستاهليني تريديني ؟
هزيت راسي واني ابتسم على كلماته اليه تعزف لحن بأذني
وكلبي ما اعرف شيصير بي من اسمع واشوف عيونه ولهفته
دُر : موافقة قبلت الزواج .
الشيخ : علي الآكبر صفوان هل تقبل الزواج من دُر يوسف عيسى ؟
علي الآكبر : وافقت على التي انتظرتها سنين وايام وليالي
والفرح شفته بيوم الشفت ضحكتها
يلي جنچ ضحكت طفلة ماينشبع من ضحكتها
وعد من علي الاكبر الدُرر روحي
تبقين انتِ ألأولى والأخيرة بروحه .
جود : شيخ تسمحلي اهلهل .
ضحك الشيخ وكفت امه وشهد يهلهلون ويباركون النا
واهلي حتى ما كلفوا نفسهم يقتربون طلعوا بنفس الدقيقة
بقيت واكفه مكسورة خاطر تقرب علي الآكبر بس خلص
سلام رفع وجهي بطرف اصبعة وبصوت خافت يحجي
بحيث بس اني اسمعه
_ من جنت اشوفچ اگول معقولة هاي تصير اليه
وصلت وياج لهل مرحلة والله ما مصدك صرتي اليه والله .
فركت ايدي من الخجل اريد انزل راسي يمنعني
تقرب بقيت جامدة وحسيت جسمي تكهرب من
اقرب وطبع شفايفة على راسي باسني بوسة
طويلة ونزل على خدي اليمين باسه فتحت عيوني
وفزيت ابتعدت وهو مايدري بروحه بحيث من الخجل
صار يتحمحم ، تشكر هو وعمي من الشيخ وطلعنا اول ما وصلنا
الباب لاول مرة اخذ ايدي ضمها بيده .
_ واخيراً ايدي حضنت ايدچ .
وجود يذب هوسات هو وشهد ويمشون ورانا يشمرون جكليت
علي الآكبر: ترا راسي مفتوح تريد تفتحه بالزايد اشمر على عالم .
جود : افشخ العالم تريد .
علي الآكبر : اي اي فشخهم بالكي يطيحون حظك .
جود : ماما دُر تقبلين على زوجج هذا الكلام فعلي زر السيطرة .
دُر : حتى اني ضربتني عبالك تشمر حجار شبيك .
يجاوبني وهو يجر بالكلمة ويتموع عود يقلدني
جود : اوووي نازوكية شبيك شبيه قابل فرحان شدعوة .
علي الآكبر: عوفها لك تحجي مثقف .
جود : بالله شهد احجي مثقف .
شهد : ياااا شلون احجي مثقف انوب .
جود : دا احجي دا ابجي دا اضحك دا اكُل .
شهد : انوح ، اتباصر وياك ، اتسامر وياكم .
جود : اووووي مو نازوكية النزاكة عند ماما دُر .
ام حسن : تعالي يمه هذولي يدوخون امشي نزور .
دُر : وعلي الاكبر غير يجي .
جود : هسة بس يأجر عباية ويجي .
حجاها وركض وشهد صارت دم من الضحك .
علي الآكبر: كملوا زيارة بس لا تتأخرين يمه ادري بيج
راح تنامين لا تبقين وجهه لا طهر لا مي ما تموسحين بي
رجعيها بسرعة انا ازور واطلع انتظركم .
اخذوني والاول مرة بحياتي ازور جان المكان عطرة عالم مختلف
البرودة بي تشرح القلب ، والمنظر يدمع العين شكد جانت بنفسي
ازورهم اسمع بس بعمري ما رحت الهم اشرت ام حسن على مرقد
_ هذا ابو راس الحار اخو زينب العباس ( عليك السلام )
نزلت دموعي وصارت تتسابق بس شفته
خليت عيوني على القبة وبداخلي حجيت قهر روحي
_ نفسي ازورك واشكي عندك ظلمي يا مولاي
انا يتيمة مولاي يتيمة عافوني قبل وبعدها يعوفوني
والله تعبي بس من اهلي سيدي اخذ حقي من كل شخص اذاني
مولاي بديت يمكم بداية جديدة بحياتي خايفة منها بس متأملة خير
ساعدوني مولاي اني احتاج احد يساعدني وياخذ حقي
ومتأملة بعلي الاكبر يصير العوض بعد التعب .
مسحت شهد على ظهري ودخلنا زرنا الإمامين
وصلينا صار هواي كلش هواي ما اصلي
قريت الزيارة وبس طلعت شفت علي الآكبر
واكفين ينتظرون بين الحرمين لابس رسمي
بس القميص مفتوح من فوك مد ايده بقيت
صافنه ورفعت وجهي اباوع بوجهه
رجعها فشلان اقتربت لزمتها رجع ضحك
ام حسن : تلبسها ذهبها هنا .
وكف مقابيلي فتحت العلبة اخذ القلادة واقترب مني
توترت وصرت ارجف من احس بـ انفاسه قريبة مني
كمل وابتعد كمل السوار والمحبس واخر شي رفعت
ايدي لبسني حلقتي ، واخذ حلقته وايدي ترجف رجف
لبسته حلقته باسها مد ايده بسرعة على ظهري قدمني
حسيت بتصلب ضربني باس راسي .
جود : شني هي كل ساااااع شبع مو الجفاف صعد للطيور
متت ولكم متت زوجوني خرب شلوووون ورطة هاي .
انوب النسوان الغريبة من يفوتون يتلمسوني بعباتي
وهذا جود يصيح بيهن : شني خالة جاي تعرس حتى
من العروس تاخذن مراد .
ام حسن : يا يمه شهرنا بين الناس
عوفهم يمكن عدهم بنات ما مزوجات يريدن مراد .
علي الآكبر: مراد يا مراد يمه ضريح هي ضريح .
وهو يحجي اجت وحدة لزمت العباية من وره
تمسح بيها وعلي الاكبر يصيح : اي حيل مسحي بيها .
ابو حسن يباوع هو وحسن خربانين ضحك وام حسن راحت تمشي وياهم
وجود شهد لازمته وتسولف هي وياه ومدري على شنو يضحكون
علي الآكبر اخذ ايدي وصرنا نمشي سوية رفع ايدي
هو يمشي باسها ويطول بالبوسة يجر نفس من كل كلبه
وكل شوية يصفن بوجهي وهو ساكت ما يحجي .
وصلنا المطعم كعدنا وجود يفرك بطنه
_ اطلب على حسابك علي الآكبر مو تعبانين وجايين وياك .
اجه ولد سجل طلباتنا وراح نزلّ الاكل وهمه عادي عدهم
بس اني عدني من تجتمع علئلة على سفرة اكل تساوي الكون بحاله
بحيث من لمتهم شبعت وبس مركزه بسوالفهم واكلهم
انتبه علي الآكبر وكل شوية ينبهني : اكلي دُر .
اهز راسي اكل شي بسيط وارجع اصفن
استسلم وهو لازم نفسه مقابيلهم مايريد
ينطيني بس تعب صار يسوي لفات صغار
وينطيني ياكل هو وحده واني الثانية
بعزّ فرحتنا دگ تلفون ابو حسن سد المكالمة
وهو يشرب بالجاي : اخلص الجاي وجاوبهم .
رجعوا بنفس الدقيقة يخابرون الباقين كلهم ناسين التلفونات صامت
حسن : منو هذا ؟
_ سراج الدين .
رجع يتصل جاوبه وعلي الاكبر مو وياهم اخذ ايدي
يمسح بيها بالكلينكس ، رفعت راسي شفت ابو حسن
كل ملامحه تغيرت
حسن : شبيك بوية ؟
دار وجهه ابو حسن باوع على علي الاكبر
وجاوب : لالا ماكو شي كلشي ماكو .
سد الخط وصاح بـ حسن : تعال ويايه احنا راجعين
وانتوا كملوا على راحتكم ورجعهم علاوي بوية .
علي الآكبر: اوكف لحظة شصاير .
_ ماصاير بوية ارتاح ماكو شي .
طلع تلفونه وابو لزمه : لا تخرب فرحتك وكمل ماكو شي سهلة .
سحبه من ايده وصار يدوس اتصل على سراج الدين
جاوبه بسرعة : شكووووو شبيك ليش تصيح .
سراج الدين : لك علي حرگوا المطعم وصل للبيت للكراج
وابن حسن لك ابن حسن وصلت اله الناااااار وهو يلعب بالكراج .
يتبع ...
هواي تسألوني على حسابي انستا هناك انشر رابط قناة التلي
الكم وانزل الغش الكم ونتفاعل ونتناقش سوية بالأحداث ضيفونااااييي .
ثقل ميزانك بذكر اللّٰـه:
- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد