_____________________ الــريـاش
﷽
𓆩 اســاور حــسين 𓆪
بقلمي رواية : الــرياش
الهَرب أعرفهُ جيداً ، علمني الأتجاه .
لطفا لا تنسون التصويت والتفاعل بين الفقرات
⊰ دُر ⊱
دُر : امي شنووو سوت بيَّ علي الآكبر
امي شسوووووووت بيَّ هيَّ ويسار ؟
تربطت ايدي للمرة المليون اعجز بأي طريقة اتصرف
بهل مواقف الي يخلوني بيها اهلها ، هيَّ شغله بس شغله ادور براسي
دُر على موتي ما اعرفهاا لو أتخير بين أتخلى عنها وبين الموت اختار الموت .
مسحت دموعها تزل بيدي من وجهه وتقوي لزمت ايدي
_ لاااا تروح لا تعوفني لااا تروح
غدرتني امي امي غدرتني علي الآكبر .
_ وعلي الآكبر يغدرهم اصدمهم قبل
لا يصدموني انا روحي بيچ شلون اعوفچ .
حضنتني ترجف بين ايدي مثل الطفل
_ شسوووووووت امي شسوووووت اني شسووويت الهاااا .
_ ماسويتي هوه انتِ دُرر شسوين بس همّ انذال انتِ
نقية قطعة حرير بيضة نادرة وطاهرة صعب تتعايشين وياهم وتفهميهم .
_ شنو الأعراض حاجيني طمني ريح كلبي علي الآكبر.
_ مهما جانت ماتأثر على حبي الچ انا اريدچ بكل عيوبچ
لوووو مو يحفرون حتى يبعدونا ، مستمر انا متمسك بيچ لچ بوية كافي .
خلت ايدها على گلبها وتريد تسند روحها ما گدرت
شلتها خليتها بفراشها وسحبت الغطوة نمت يمها وآني أحجي حتى تطمئن
علي الآكبر: تنامين بحضني وانا ملثم ما انزع لثامي ابد .
سحبتها بهدوء نومتها على صدري وهيَّ تشهگ
تريد تحجي منعتها ما اريد نستعجل قبل لا نفتهم
دمي يغلي عكس مظهري الخارجي ثابت مسوي روحي ما مهتم
بس خايف منهم وعليها شلون اذا الي براسي صح والله اموتهم والله .
بقيت يمها بالنص ساعة من الخوف والصدمة نامت وهيَّ تشهگ
مثل الطفل ، نزلتها على مخدة غطيتها وطلعت من الغرفة والبيت
ذبيت لثامي وبقيت امشي بالشارع افكار وضجيج بداخل عقلي بدون
سكوت ، الف فكرة وفكرة براسي ، مخدرات ، هلوسة ، لو ....
صعدت سيارتي اتصلت على جــود وثبتت هدف براسي لازم يصير
اليوم عيوني ما تغمض ولا ارتاح اذا ما اعرف شنو المستور
مريت على بيت اخذت جــود من الباب وبعيونه النعاس مبين
جان نايم وتعبان عيونه صايرة دم
_ نخيتك گدها ؟
_ عد عيناك گول شصاير .
_ اريد يسار خيسه .
_ شسوي بي ؟
_ احبه .
رفع حاجبة افتهم صاير شي
_ اي إذا تحبه تدلل هوه نحتاج نحدد موقع يا اما بيتهم
لو بيت ياسين لو بيت عمران واحد منهم وثاني شي نحتاجه
يا فارس بدر وكلشي يصير تحت السيطرة لا تشيل هم .
_ جــود اني المهم عندي اليوم يسار يصير بين ايدي
اريد اسبي سبي اريد احووووده حوووود اليوووم .
_ تم .
دورنا بيت ياسين سيارة العار ماكو ، تركته شغلي اني وياسين بعدين
توجهت على بيت عمران فارغ من السيارة يعني كلهم ما موجودين
تركتهم كلهم ورحت على بيت ابو يسار تلثم وصعد جــود على سياج
شاف سيارته بس اكو حرس اثنين برا ال**** ما يعيشون بدون حرس
يعرفون بروحهم نغوله على اي دقيقة ينصكون .
بقيت بالباب الساعة والساعتين وللفجر وماكو يسار
بعد تعب اتصلت على ريــان ومن صوته مبين نايم بالمستشفى
_ ريــان اريد منك خدمة صغيرة .
_ اي خادم گول علاوي .
_ خابر يسار وجذب عليه على اساس انــور يريده .
_ صاير شي ؟
_ بعدين ريــان بعدين هسة تگدر تسويها لو اجرب شي ثاني .
_ اعتبرها صارت علاوي .
سديت الخط بقيت انتظر بالساعة طلع يسار بسيارته ما اگدر اقترب
من البيت لان تنشاف سيارتنا وتنعرف اضطريت اعوفها وبس
وصل لنص بابهم فتحت الباب وصعدت بسيارته ضربته بوكس
ودفعت المسدس بخاصرته وانا اريد اشرب من دمه
_ تحرك فوراً .
_ علي الآكبر كافي يا اخي كافي مل
اتعب شنو من بشر انت من شنو مخلوق .
_ سووووقهااااا وانت ساكت لا افرغ هل مسدس بيك .
_ راح اسوووق بس نزل المسدس خليني اعرف اتفاهم وياك .
_ بكيفي يمكن ما اريد اتفاهم كمل الطررريق لو بعد سويت ببي على نفسك .
صعدت جــود من ركن المنطقة خليته يسحب يسار
واني كملت الطريق بعد ما سد عيونه بلاصق اسود حتى مايشوف
وصلنت البيت ريــان القديم طلعت نسخة مفاتيح بقاها يمي للضرورة
فتحت البوب ودخلنا شمرته بالتراب زحف وهوه گاعد يريد يبتعد
رفعه جــود وشمره على تخم والتراب نكث بكل مكان
راح كون مقابيله گعد بكل ثبات وشغل تلفونه بـ
( يا فارس بدر يا حيدر ) وبالنص ساعة تخلص ويعيدها
وكلنا ساكتين وكل مايريد يحجي يصيح بي جــود ويسكت كالكلب .
من بعد ماخلص صبري وبدا النهار يطلع وخفت لا دُر تگعد وانا
ما موجود يمها وما اعرف شنو رد فعلها وحجم انهيارها المفروض
انا متواجد حتى لا يصير تصرف ما مدروس منها
علي الآكبر: تريد تروح وتطلع منا صاغ سليم ؟
يسار : هاي تصرفاتك أبطلك منها ابطلك .
جــود : الواضح مايريد يطلع بخير وصحة وسلامة .
رحت قريب منه رفعته من قميصه ضربت راسي براسه بكل حقد
علي الآكبر: جود شنو رأيك نقدم ضيافة من هاي التوب
ونشمر هل عار بأقرب مستشفى للكسور هاي اذا طلع عايش .
وگع بالگاع رفع ايده يحتمي بيها وگع جــود
عليَّ بوكسات وهوه يصرخ من الوجع يستنجد
يسار : دخيلك علي الآكبر بس امرني فهمني شنو تريد مني اني خادم .
علي الآكبر: هوه سؤال اذا ما اسمع جوابك من اول مرة
انطق بي احسب نفسك ميت .
يسار : اي اي اسمعك گول والله اسمع احجي ادلل .
علي الآكبر: شسويت انت والـ* وفاء بنت الـ* بدُر .
يسار : ما شايف لا وفاء ولا دُر الي بلغك جذاب .
علي الآكبر: جووووووود شوف شغلك .
طلع جــود جهاز اذا يطخ الجسم يتكهرب
دفع الجهاز على بطن يسار واشتغل شاغت روحه
ودموعه نزلت عشرة عشرة خوش زلمة ابن الكلب
رفعته وخليت وجهي بوجهه وعيوني ثبتتها بعيونها
وبعيون الغضب والحقد واعصابي ترجف منه كررت سؤالي
_ للمرة الأخيرة شسويت انت وفاااء بنت الشووووارع بدُر .
_ اذا احجي راح تمووووتني علي الآكبر بشاربك اني
ابوووس ايدك ابوووس رجلك بي عوووفني .
لزمته من رگبته اختنگت وخنگت هل عار ويايَّ
جسمي صار يرجف برعب وخرت ايدي من راد يگطع النفس
سحب ايدي باسها وهوه يبچي ويناشغ
_ بروح موتاك علي الآكبر راح اموت بيدك دخيلك اني دخيل عندك
_ شسووووويت بدُر لكككك احجي رررراح اجرم بيك .
جــود : احجي راح ياكل من لحمك ويشرب من دنك احجي .
يسار : يمووتني جــود انت ما تخاف على اخووووك .
رفعته من قميصه هزيته هز وصرخت اضرب بي غمات على بوكسات
_ ولك لعد شكد عظيمة مصيبتكم بيهااا شمسوين بهل بنية احجي.
يسار : وفاء اقترحت هذا الاقتراح وروح امي انا ما اعرف شي
على هل سوالف هيّ غسلت عقلي على ابو ماكو غير هذا الحل .
علي الآكبر: اي اي اسمع وشنووووو هذا الحل ؟
يَسار: عملية تلقيح طفل الأنابيب بداخل رحم دُر واني ابو .
هوه حجاها واني عيوني غوشت بعد اخذه جــود من ايدي
انا نزلت راسي مكسور گلبي وحيلي مهدود اريد افكر قفل عقلي قفل
اسمع صراخ يسار بس انا فاقد النطق حسيت روحي بهل دقيقة فقدت
حتى الكلام ونسيت الأحرف شلون احجي
وبشنو ابلش ،اضرب بالحياطين ما اكدر اسند طولي حيلي ما يحملني
وكلماته تتردد باذني بدون ما توكف دقيقة طفل انابيت يعني ابن يسار
تموووت دُر اذا تعررررف تموووت مثلي .
عصرت راسي جريت المسدس من جوة
مقعد السيارة ورجعت اسحب اقسام جــود نهض منه
شافني فقد وكف وسحل يسار وراه ظهره وبخبال يصيح
_ بداعتي لاااااا علي الآكبر لااا تروح بيها إعدام انا اضيع
وانت تضيععععع على ناس زبايل لاااااا خوية انا بكلشي وياك
لا تخليني انكسر دخيلك انا دخيلك نزل السلاح .
دفعت جــود بكل ما تبقى من حيلي وسحلت يسار من ملابسه
سحل شمرته بالسيارة وشغلتها بدون ما انتظر ولا افكر
الموووووت بهل دقيقة ارحم مريت بشوارع وانا مهدود الحيل
ما عرفت شلون ومنين فتت بس وصلت البيت اهلها
نزلته وفتت للبيت واسمع صوت ريــان يصرخ ورايَّ مبين جــود بلغة
تركته ولا عبالك انتهبت لو شفت لو سمعت متوجهه لهدف واحد
انفتح الباب شمرته بنص الصالة وگع على وجهه تزلغ تزلغ
علي الآكبر: وووووووووفااااااااااء .
نزلت تركض على صوتي وتصيح
_ شكوووو هيووووو نعممم شنووو بيت الخلفوك .
من شافت يسار ورفع راسه وايده الها حتى تخلصه
التفتت تريد تصعد وتشرد صارت دُر بوجهه
دُر : وين رايحة يمه شبيچ خايفة وتغير لونچ لازم مسوية مصيبة ؟
وفاء : هذا يضحك على عقلچ وانتِ صدگي بي يا غبية اني امچ .
رفعت السلاح وجهته عليهه وصحت بأمر
_ انزززززلي .
ريــان : علي الآكبر نزل السلاح .
_ انزززززلي وفاااااااء انزلي .
گعدت دُر لازمه راسها مبين دايخة بنص كسرتي وانهياري
اريد اقسم روحي حتى اصعد اخاف توگع بدون ماتحس على روحها .
ابو حسن : بوية علي الآكبر.
استداريت على ابوية ملت راسي مكسور محطم
ورجعت روحي تفرفح كل ما اتخيل الصار
علي الآكبر: انتِ شنووووو من ام هل انانية منين تشتريها
بنتج هااااااي الفوووووك بنتچ اذا تعرررررف شيصير بيهااا
ما فكرررررتي انتِ انتِ ما فكرتي حاجيني فهميني خبلتيني حاجيني .
وفاء : هوه خطفهاا يسار خطفها اني رجعتها .
يسار : جذابة وفاااااء لچ وفاااااااء والله اشوفهم شنو عندي .
دفرته وصحت وانا ادفر بي الحد ما وصل يمها
_ كلشي اعرف والفديوات الي عندك عندي والخاطر ابنها وبتها ساكت
بسسسسسس بسسسسسس بعد حتى الفديوات ماتفيدني ما اريدهن
ماكووو شي يشفي غليلي غير موتك انت ويااااهااااا .
وكف ابوية بوجهي بس بعيد رافع ايده ومن شاف وضعي
عرفني راح انفذ نزلت دموعه وهوه يصرخ
_ لا تكسرني علاوي بوية انا شاد ظهري بيك
تخسر عمرك بوووية تموتني وتموت امك تقبلها .
_ مووووتوني بووووية موووتوني .
_ اخذ حگك منهم والله بوية بس بالتفاهم .
_ ما اتفاهم وياهم بوية .
_ چا تكتل علي الاكبر تصير مجرررررم .
_ طلاب ثار انا بوووووووية طلاب ثار منهممممم .
نزلت دُر تسحل بروحها من شافت المسدس بيدي
وخوفي وصدمتي بالحقيقة بعد فقدت قوتها
دُر : تعوفني وحدي علي الآكبر تخليني ضايعة .
علي الآكبر: رررريان جووووود دُر بـ أمانتكم .
ركضت قويت لزمتي على مسدس ضربت على وجهه وصرخت
_ لا تخليني بـ آمانة شخص غيررررك علي الآكبر انا أمانتك انتَ
طلبتك تحميني مووووو تكسررني فوووك كسرررتي .
هزيت راسي وعيني عليهم والمسدس وجهته على يسار اريد
اموته اول واحد وفاء الثانية اريد يبرد نار كلبي
دُر : عودتني من اوگع بمصيبة لو اخاف اطلب منك تحميني
اذا تروح منو يحميني منو يساعدني منو يتحملني .
ابو حسن: هيج انا ماعندي خاطر يمك ولك علي الآكبر هذا موووت
وراهااا اعدام بوووية افهم لك مو لعبة هل مرة ما اكدر اطلعك منها .
دُر وابوية يحجون وريان وجود سحلوا يسار مني شمروا
بالاستقبال وقفلوا الباب ورجع على امه لزمها من ايدها
صعدها وقفل الباب ونزل بيده المفاتيح شمرت السلاح
وابوية لزمني ضربني على وجهي اختل توازني وگعت
دنكت راسي اهز بس ما اصدك الف شك وشك براسي زرعوا
ما اكدر حتى اواجه دُر واشوف وجهه وملامحها ادري بيها تنتظر
احجي محد يعرف الحقيقة وسبب عصبيتي غير جــود وجود
لو يذبحوا ما يحجي لو مو ابوية يسأل اذا الموضوع ما يطلع مني ينسي .
بعد تساؤلات من ريــان وابوية وحتى دُر نهضت
امسح بوجهي اخذت ايدها صعدتها فوك فتحت المجر
اخذت قطعة من ملابسها گعدت مابيها حتى حيل توگف
من الخوف لو من الأعراض ما ادري حرررت اناااا حرررت
سحبت تيشيرت التراك مالتها ولبستها بيدي فستانها
دُر : وين نروح ؟
خليت شال على راسها لزمته مستغربه من تصرفي
اخذت ايدها بين ايدي وطلعت وانا أنبهم
_ ممنوع تجون ورانا اخذتها نحجي براحتنا .
صعدتها بالسيارة وصعدت اهز برجلي من التفكير والتوتر
اشرب الجگاير احترگ قبل لا تحترك صرت حالي حال الجمرة
احترك بكل دقيقة وتتحول ارماد اسود .
دُر : علي الآكبر .
گلبت عيوني من العصبية اعصابي تريد تنفجررر بعد ما اتحمل والله
مدت ايدها رفعت لثامي على وجهي وتلمست ملامحي
دُر : هيج احسن احلى ما تبين ملامحك وانت عصبي تخوفني .
بقيت لثامي على وجهي وافتر بالمناطق ما اعرف وين اروح
وين اولي بروحي وبيها شلون اخلصهااا واخلص روحي منهمممم
وكفت السيارة قريب من المنتزة الي دُر تحبة ونزلت اريد اقفل
الباب حتى ما تنزل احتاج اظل وحدي واني امشي صدت عيوني
بعيونها تلمع والدمع يلالي بيها طفلة مستغربة ظلموها اذا ما
انددددددمهممممم على هاي نظراتچ الضايعة يا دُر ابجي عيوونهم .
كعدت على مصطبة صارت مقابيلها بس عتها بالسيارة
قافل الباب عليهه اريد اخليها بكلبي واقفله مو بس بالسيارة .
دُر ..
ملت راسي على شباك عقلي فارغ اذا اتعمق بالتفكير يمكن اتخبل
فزيت بعد ساعة من نزلته رجع صعد ساق بكل سرعته
وكف مقابيل بناية ركن السيارة ونزل اجه بتجاهي نزلني
متمسك بيدي قوي عبالك خايف اروح من عنده رفعت
راسي اقرأ لافتة مكتوب بيه دكتورة نسائية قوست حاجبي متعجبة
_ شنسوي هنا ما اريد اروح دكتورة نسائية .
تعمّد مايجاوب دخل بوحدة من غرف البناية نسوان هواي
گاعدات وسكرتيره بنهاية الغرفة راح يمها سلم وردت السلام
حجز بأسمي وطلعنا لان قبلي هواي اسامي
رجعني بالسيارة وهوه يفتر برا فر راسي فر وياه
لو بس اعرف شصايرر ويرتاح گلبي ليش مو راضي يريحني ويفهمني .
بالساعة انتظر وهوه بعيد طلعت السكرتيرة هز راسه
واخذني دخلت ومن الباب سلّم وحجه وياها
_ بلا زحمة اگدر ادخل وياها حالة خاصة وأريد اشرح الچ الوضع .
_ اتفضل .
دخل بملامح الخجل منزل راسه محافظ على مسافة تباعد بينه وبينها
علي الآكبر : كتورة اريد تسوين فحص لو سونار اي شي المهم
اعرف صحيح مسوين الها عملية انابيب اطفال ما ادري تلقيح بويضة
اكو هيج شي يعني بنفس اليوم يسون عملية ، تكدرين تكشفين الوضع
وتفهميني عقلي انشل دكتورة .
بقت الدكتورة تهدي بي واني صافنة لا اخذ ولا انطي
ما ادري صدمة لو تأقلم بس حسيت بگلبي من ليد تحول
ويا سرعان ذوابان هل جبل الجليد
الدكتورة : ماكو عملية انابيب الحمدلله بعدها ما تمت
بس مجهزة للحمل يعني صاير كشف وتجهيز لمثل هيچ عملية
لان المعروف مثل هيچ عمليات بالبداية لازم وضروري يتم تجهيز
المريضة من اجراءات تحاليل وعينات حتى نعرف الأم قادرة على
هيج مرحلة ، عملية تلقيح البويضة مو شي سهل رغم سهولتها وسرعتها
بس مو سهلة ومو اكيد تنجح من اول تجربة احتمال كبير تفشل
بالخصوص اذا مثل حالة دُر .
دُر : حالتي ؟
الدكتورة : اي ماما حالتچ اكيد الي قرر يجهز الرحم يعرف
رحمچ ضعيف غير قادر على حمل اطفال واذا صار فـ يكون الحمل خطر
ويتهدد بالإسقاط بأول لحظاته .
دُر : يعني شنو دكتورة اني مايصير اكون ام ؟
الدكتورة : والله يا ماما ما اكذب عليچ الامر بيد رب العالمين
بس صعب الحمل جداً صعب يثبت رحمچ متضرر مع الاسف .
نزلت دموعي حجبت عليَّ النظر فصلت عنهم
صدمتي بأمي وزاد همي بحالتي بجيت بانهيار عصبي
اصرخ واملخ بروحي وتركت موضوع الحمل روحي صارت
تلوب على امي وكفت الدكتورة حضنتني وعلي الاكبر گعد
على كرسي ايده على راسه عاجز عن التصرف والتفكير
والدكتورة على بجيتي تبچي واني هل كلمات يكررها عقلي ولساني
_ امي ليشششش هيچ تسوووي بيَّ امي اني احبهااااا
ليشششش تكسرررني اخخخخخخ يمهههههه شسويتي بيَّ
دمروني تعبوووني اهلي موووتوني .
ثواني ودقايق تمر واني على حالتي وانهياري يزيد ماينقص
انفتح الباب ودخلت السكرتيرة باوعت على علي الآكبر والدكتورة
_ اخو المريضة دُر هنا وطلب يدخل بعد ما سمع صوتها ادخله .
طلع علي الآكبر وطول والدكتورة تمسح بوجهي ودلك بيدي
واني روحي تشوووغ احس راح اموووت من القهر والتفكير
رفعت راسي وانسحبت من ايدي شفت روحي صرت بحضن
ريــان يمسح بظهري واني احجي اله شصار والي سمعته
من الدكتورة والطم على وجهي وهوه يستمع بدون ما يمل
ويهز راسه وعيونه تلمع بدموعها بس يمثل الثبات والقوة
ريــان : دكتورة عادي اطلعها ماعندج بعد شي وياها .
_ لا عيوني اخذها بس امانة هذا الكارت خابرني طمني عنها
كسرت گلبي هل بنية الصار بيها كارثة ومن اقرب انسانة عليها المفروض .
خجل ريــان يجاوبها اخذ الكارت وتشكر منها وحضني
يمشي بيَّ بس طلعني النسوان كلها عيونها علينا
خليت وجهي بصدرة من الخجل وهوه حضني طلعني بسرعة
صعدني بالسيارة بقيت اتلفت درت وجهي وبعيون تجري سألت
_ وين علي الآكبر .
_ راح .
_ حقه قرررررف لعبت روحه مني حقه خلي يررروح تعبنا
محد يتحمل هل قذارة محد يتحمل هل رخص حقه هوه نظيف
خلي يعيش بعيد مني يعيش بنظافة كافي يظلم نفسه ويايَّ .
ضرب الستيرن بكل قوته ويصرخ
ريــان : الله لااااااااااااا يوفقچ يممممممممممممه شسويتي بينا يممممه .
ضميت وجهي بيدي اشهگ الشهگه شگگت صدري وعيوني تحرگني
اعصر برجلي من الصدمة جسمي كله يوجعني مو بس گلبي
اريد اشرد اريد اموت اريد اروح الدنيا مابيها احد ماكو مثل
مصيبتي ماكو مثل اذيتي ماكووووو ماكوووووو .
نزلني ريــان للبيت شفت فهد ينتظر بالباب وريان نزل يصيح
_ شسوي هنااا موووو سفرتك .
فهد : عرفوا مكاني يمك امان اكثر .
ريــان : ماعندي حيل اشيل بعد حمل فهد مابيَّ .
فهد : اروح تريد اروح ؟
ريــان : افاااا انا اخليك حالك حال اخواني دمك من دمهم وغلاتك
من غلاتهم بحماية الصياد انتَ بابا تعال تعال فوت وخليها على الله .
نزلني ما اكدر اشوف بعيوني شالني ودخلني ركض صعدني
البيت فارغ مابي صوت ولا قطرة صوت نومني على سرير
مسح على راسي وطلع اول ما طلع سمعت صوت قفل الباب
عرفته قفله حتى يأمن محد يدخل ولا اطلع هيج يادوب يسيطر
اخذت تلفوني ولا رسالة ولا مكالمة من علي الآكبر شمرت
الجهاز وزحفت على مجرات سحبت علبة الأدوية فرغت الحبوب
بحضني بعد مابيَّ صبر المفروض هل شي يصير من زمان حيل
انا حيل بعد ماعندي لا زواج نجح وحمل واصير ام صار حلم متبخر
اهل حيوانات وحوش الوحوش احسن وارحم منهم البزون تخاف
على اطفالها احسن من امي اخخخخخ امي يا صدمتها بروحي
زحفت على ثلاجة اخذت بطل ماي شربت شريط كامل واني حطام
عافني من سقطت عافني وهسة عافني بس حقه منووو يتحمل
يعيش بشك مايعرف صار عملية انابيب لو متقرب مني اني كرهت
روحي هوه مايكرررررهني اني كررررررهت روحي هوه يكررره
روحه بعد ماكوووو روحه لعلي الآكبر كلشي تغير كلشي روح واختفى
اخذت الشريط الثاني اشرب بي وعيوني تغوش وعلى نفس الانهيار
شربت الشريط الثالث وعلبة ما ادري مال شنو اخذتها كلها
رجعت ضهري على مجرات الغرفة تفتر بيَّ والأرض بيها صار زلزال
شمرت كل أشرطة العلاج والعلب فارغات خلصتهن كلهن
مسحت دموعي ورحت زحف على مبايل نمت بالأرضية الباردة
ودگيت رقمة لساني ثگل وعقلي بعد مايفكر بس بالوجع الصار بمعدتي
جاوبني بصوت ثگيل
دُر : نايم .
_ اي .
_ واني اموت .
سكت لثواني صرخت وروحي تعبانة
_ راح اموت روحي حتى تخلص مني اني تعبتك .
سمعت صوت طگطگه قوية صارت وصاح برهبة من كلامي
_ دُر دُرررررررر .
_ روحها انتَ .
_ شسويتي دُررررر بووووية .
_ اني احبك علي الآكبر انت انظف بشر قابلته بحياتي .
اسمع صوت نزلت الدرج وعمتي وعمي واخوانه يصيحون
_ شبيك علاااااوي وين رايح شكوووو نحجي وياك لك علي .
وصوت البوب والسيارة تشتغل وروحها تشتعل من صوته
علي الآكبر: دُر بووووية ويااااي دخيلچ لا تهدميني دُر انا ماعيش بدونچ .
_ لا عيش وتزوج وحب وحدة مثلكم اهلها مثلكم اني واهلي كلنا
اوباش من القذارة والغرابة .
علي الآكبر: لاااااااا يااااااااا علي دُررررر بوية صووووتچ
شبي شسوووووووويتي بروحچ دُر گلبي متعلگ بگلبچ
علي الآكبر يتعب بدون روحهههه انتِ رووووحي ليش تأذيني ليش .
هورن السيارة وكل دقيقة اسمع يشخط اطارات السيارة من سرعته
دُر : انت تدري اني احبك ؟
_ وانا احبچ .
دُر : سامحني اني تعبت .
_ لاااااااا تروحين دخيلچ ابقي ويايَّ دُر خليني اسمع صوتچ .
دُر : عيوني ماتنفتح .
_ وبعد ؟
_ بطني توجعني .
_ وبعد .
_ راسي احس روحي تطلع .
_ يا بووووووية يا رووووحي شسوووويتي دُر حاجيني لا تسكتين .
_ شربت ح حبـ
أريد اكمل بس ايدي ثگلت وگع التلفون من ايدي جسمي انشل
بعد ما اكدر احس بـ كل اجزاء جسمي والنفس صار يثگل
وشوية شوية عيوني تنگلب وافقد الوعي وكلشي يغوش .
بعد دقايق اسمع صوته اگدر اسمع بس لا احس بجسمي ولا اشوف
صارت ضربات قوية على باب مقفول
علي الآكبر: صفية المفاااااتيح وين جيبي نسخ .
_ ماكو بابا ريــان اخذ نسخ طلع .
علي الآكبر: ياااااااااااعلي ياعلي .
يردد بـ( ياعلي ) ويفلش بالباب ويدفر بكل قوته
بعد وقت گدر يكسر الباب ويدخل شالني احس بيده شالتني
وحضني على صدره يمسح بوجهي ومن شفايفي طلعت ماده بيضاء
من شافهاااا دگ بيده الگاع يريد يشيلني مايگدر واسمع صوت جــود
اجه ويصيح مصدوم ويصيح شيلهاااا لك شيلهااااا
علي الآكبر: هدت حيلييييييي دُر بعد مابيَّ حيل عيني جــود .
جــود : نزلها راح اشغل السيارة اركض مو وكتها تضعف علاوي .
بهل دقيقة واني بين أيده سلمت روحي وفقدت كلشي
لا ادري اني متت لو عايشة ولا احس بوجع ولا اعرفهم وين
وصلنا راح اعيش لو اموت كلشي ما استوعب بعد خلص كلشي
من بعد ساعات بقيت أحس بأصوات واضاءة قوية بعيوني
انطيت رد فعل لا ارادياً واصوات غريبة فوك راسي تشرح
حسيت بحسمي ينرفع من سرير السرير ثاني متنقل دخلوني
وطلعوني من مكان بمجرد ما انفتح الباب صوت اسمع اصواتهم
ريــان : الدكتور طلع طلعتتتتت طلعت .
ابو حسن : بشرنا دكتور بشرني .
الدكتور: نظفنا معدتها من الأدوية بس مانعرف شنو
الأعراض الجانبية المريضة اخذت كميات كبيرة من الأدوية .
ريــان : يعني شنو دكتور وضحلي ؟
الدكتور : ان شاء الله بالساعات القادمة نشوف اكو خطورة او لا .
دخلوني على دكتور غرفة ثلج احس الم بمعدتي ماينوصف
بكلمات ، نقلوني على سرير وحسيت بوعزة ابرة بيدي تدخل
غمضت عيوني اكثر ثواني وصار هدوء
علي الآكبر: ساعة كلشي صار بساعة بس شاب راسي بيها وحگ علي .
لمسات ايده الباردة على ملامحي كش وجهي
نزل وجهه على ايدي وهوه يكرر
- تريد تموتني تدري اموت بلاها تريد تهدني هديتيني هد وعلي .
فتحت عيوني بثگل نايم على ايدي ويعاتبني
لزمت ايده رفع راسه من شافني فاتحة عيوني
والأول مرة بحياتي اشوف علي الآكبر يبچي بهل طريقة
كل شهگة تطلع من روحه تگطع حتى نفسه ويجرها بحرب
رفع كف من كفوفه على كل وجهه وجسمه يهتز
_ علي الآكبر .
_ حرام عليچ وحگ كافل زينب حرام .
غمضت عيوني لزم وجّهي بإثنين اديناته
_ لااا تنامين لا تغمضيهن تعبني هذني موتني وضعفني لا تغمضيهن
فتحت عيوني بس خاوية مابيَّ
_ شگد اعيدها وارجع اعيدها فراگچ يخوفني
انا اخوف زلم بس فراگچ يخوفني بوية دُر .
دُر : ضعت .
_ انا بيتچ .
_ تعبت .
_ راحتچ يمي .
_ الخوف خبلني .
_ يخسي الخوف يگرب عليچ وايدچ بيدي .
نزلت ادموعي تجري على خدي توگع على مخده باس راسي وعيوني
علي الآكبر: دُر بوية لا تعذبيني
_ شكيت بيك وخليتك تتعارك انت واخوك وعفت اهلك وجرحتك .
علي الآكبر: اشششش لا يصير بيچ شي وتبهذليني اسكتي .
_ كافي تسامحني اني ما استاهل حبك .
علي الآكبر: بس انا استاهلچ اريدچ وما اريد غيرچ روحي بيچ .
قبل لا افقد وارجع للنوم بسبب تأثير المسكنات همست
_ راح يجي يوم يخلوك تكرهني مطيق تسمع حروف اسمي .
غفيت بلا شعور مني ما احس غير بعد ساعات جسمي من الحرارة
ينفض نفض وصوت ريــان يمي يهمس
_ ليش تزيدين همومي اريدچ عون تساعديني عليهم
ليش صرتي الرابعة اشوف ابوية لو اخوية لو اختي لو حُــرة
خليتوني حالي حال المخبل افتر منا واروح مناك .
بقيت على حالتي بس اريد افتح عيوني اگعد لو اگدر احجي ما اگدر صار
صعبة عليَّ اگدر اسمع بس اسمع فاقدة كلشي مني .
يومين على هل حالة بالثالث ادخلوا الدكتورة والممرضة
بعد ما جيك وضعي رفعت الدكتورة السرير وبقت هيَّ والدكتور
يختبروني ويحجون ويسألون بس كملوا طلعوا عافوني گاعدة
فاتت عمتي وجهه شاحب تعبان بوستني وبقت يمي
دُر : عمه وين علي الآكبر .
_ ما ادري بهذا الولد يريد يموتني .
طلعت ادور على عمي ورجعت ماشافت احد
بقت تاكل بروحها تنتظرهم يرجعون دقايق وسمعت صوتهم
واحنا بالغرفة نسمع اصواتهم
ابو حسن : بعد اي تصرف منك غلط ما اريد علي الآكبر
والله اخذ حقك العطوة انطيتها اسبوع ويحولون عدنا
ابو يسار ويسار وعمامهم حظهم أطيحه وعلي بس تنت لا ترجف .
علي الآكبر: لا ارجف شنو مرتاح انا انتظركم اسبوع
بين ما يسار يساااافررررر وبعد وين أحصله هاي ياكل
سنة سنتين مرتاح بالخارج وتعال عووود من يرجع اسكت .
ابو حسن : هااا هيچ صارت چا روح امشي ولي روح
صير چتال يسار وفاء واخذ اعدام .
طلعت عمتي تركض وبصوت ناصي تتوسل بعلي الآكبر يوگف
لا يتهور ، رجعت غفيت الثاني يوم ريــان گعدني والدكتور وياه
هوه يحجي والدكتور يشرح كل شي صار وراح يصير .
حُــرة ..
نوم او سُبات ، هرب او واقع ، حزن او كشف اوراق
من بعد ايام من غيبوبة سببها اول شخص المفروض يحميني
( ابوية ) گدرت ارجع لوعيي بس بجسد منهك وعيوب
صنعها انسان لا بل وحش بلا قلب او احساس اخذ لذت
احلى سنين عمري قتل برائتي واحلامي ولازال لا يشبع
ولا يرتوي من عذابي وسلب شغفي بالحياة .
اول شخص شافته عيوني واني التفت للجهة الثانية
ريــان نايم على تخم والتعب مبين على وجهه وعيونه
حُــرة : ريــان ، ريــان تسمعني ابو الرون الووو گعدت .
فز على صوتي يمسح بوجهه من شافني گعدت ضحك
ريــان : لچ نملة گعدتي ؟
_ لا بعدني هههي .
_ ههيي لا والله مو بس گعدتي انوب محملة .
_ عيوني شبيها تغوش ماشوف وجهك زين .
_ صار عندچ انفجار بالشعيرات الدموية بعيونچ .
تلمست عيوني ولمحت ايدي عبارة عن كدمات
حُــرة : وين جنت ليش طلعت وفات ضربني ما حميتني منه .
ريــان : بيومها صارت عندي مشكله اضطريت اروح .
حُــرة : اريد ماي .
راد يطلع يجيب ماي صحت بي
_ انتظر اريد تلفون حتى اخابر عليك .
رجع دور بجيوب البنطلون طلع تلفوني فريت ايدي بتعب وحجيت
_ العب تلفوني عنده شسويت بي ما سويت اعترف .
_ زرت صفحة مصطفى مو حضرتچ مسوية الصفحة مزار يومي
ماقصرت اني هم سويتها مزار يومي .
_ ولك شو تحجي بنبرة عالية واني طالعة من الموت ؟
_ لعد شلون احجي .
_ بنبرة صوت ناصية لطيفة لا أفرج المستشفى عليك .
تقرب اخذت التلفون طلع بين ما طلعت رقمه اشوف مغوش
دگيت عليه جاوبني بنفس الدقيقة
ريــان : بيچ شي .
حُــرة : لا بس انت نازل سولف .
_ ليش .
_ بيَّ تعويز كلام راحت ايام وساعات من عمري بدون حجي .
_ نملة ترا انتَ هسة طلعتي من الموت استهدي بالرحمن .
_ هاي شبيها الغرفة تفتر بيَّ .
_ لان تحجين هواي .
_ نفسية الله يقرضك انت وعشيرتك .
_ هسة اصعد واقرضچ انتِ قبلنا بنت الكلب .
_ لا تغلط على ابوية .
_ حقچ شريف عفيف .
_ اي الغلط على ياسين حرام .
_ احترررررررك ياسين لاااا هوه بي خير ولا خلفته .
بقيت الخط مفتوح ورفعت راسي انتظر يرجع مابيَّ حيل احجي
راسي ثگيل بقيت على وضعي الى ان رجع اريد اشرب المي
اساعد نفسي حتى اكعد ما اكدر باوعت بوجهه بصدمة
تقدم فر ايده على خصري ورفعني
_ جسمچ متشنج لا تخافين هسة شوية شوية تفكين .
_ بس جسمي ثگيل والله حيل ثگيل .
_ حُــرة لا تخافين انتِ مو تدرين بجسمچ يتشنج
يعني على هل ضرب والقهر تريدين تبقين صاحية .
_ خفت لااا خفت حتى راسي ثگيل صيح الدكتور وين الدكتور
انت جذاب تجذب عليَّ ماتريد تخوفني يمكن ماتريد انصدم .
_ حُــرة والله احجي صدك لا تتصرفين مثل الزعاطيط .
_ بس اريد الدكتور وينهم صيحهم كلبي راح يوكف .
حجيتها وبجيت خفتّ انرعبت رعب اني ما احس بجسمي
مو مثل كل مرة يتشنج وينمل هل مرة ما احس بي ابد
شهكت واصيح بصوتي التعبان
_ الدكتوررررر بس اريد الدكتور .
فتح بطل الماي واجه لزم راسي وغسل وجهي بيده
وشربني وهوه يحجي بتوتر وخوف واضح
_ اشربي ماي وهسة اروح اجيب الدكاترة مو بس الدكتور .
_ انشليت مو ريان انشليت شلني ابوية ؟
_ أشله واشل اهله لااا مو شلل اسمعي مني اخذي الكلمة
مني راح ترجعين احسن من قبل بس تحتاجين متابعة .
_ يعني يمممممهههه يعني هذا مو شلل ساعات ويروح .
_ يمكن ساعات ويمكن ايام ويمكن اشهر حسب استجابة الجسم
انتِ بس لا تخافين لا تصيحين لا تتوترين اني اساعدچ بكلشي .
_ اني ما اعيش ثگيله على احد افتهم لووووو ارجع اتحرك لو
امووووت اهون من الذلة اني حُــرة ما اعيش مذلولة .
عافني وطلع نشغت شهگت ادمرت وحدي
رجع والدكاترة اثنين وياه كشفوا على حالتي ويحجون وياه
ويطمنون بيَّ ماكو شي خطر بس كلبي يلعب ما ارتاحيت ابد
_ ان شاء الله على تمارين العلاج الفيزيائي ترجعين احسن من قبل .
بس طلعوا بقيت اهز براسي ما اريد اعيش هيچ هذا الواقع مرفوض
اني انشل ليشششششش ليشششش شنو الجريمة الي سويتها
بشنووو غلطت بشنوووو اريد افتهمممممم شنو ذنبي .
ريــان بعيد گاعد وايده على راسه واني بعلو صوتي اصرخ وابجي
دقايق وطلع طول بالربع ساعة ورجع ساند انــور دخله للغرفة
انــور : ها العرمة .
ريــان : امشي ارجعك .
انــور : عوفني اعرف دواها .
شهگت وبنبرة صوت مكسور
_ انــور انشليت جسمي ما احس بي .
دار وجهه على ممر البرا مايريد اشوف وجهه وريان طلع من المكان
دقايق وگدر يدخل كعد مقابيلي واني بعدني على نفس البجي والصراخ
انــور : كلنا حُــرة كلنا مشلولين .
حُــرة : حرام والله حرام .
انــور : شوفي حُــرة اني وانتِ وابوية وزادتها دُر كلنا بالمستشفى
كلنا شايل مسؤليتنا شخص واحد ريــان هلك هلاك ريــان تعبت
اذا نضعف ونبجي وننكسر نزيد فوك التعب اضعاف .
حُــرة : شنو بيدي لو انت بمكاني شتسوي ؟
انــور : اسوي مثلج واكثر ويمكن اموت روحي
صعبة اني وياج صعبة بس نسبة ترجعين مثل قبل 90%
وريان وياچ واني ودُر ترجعين والله بس شدي حيلج .
حُــرة : ودراستي ؟
_ انتِ وريان تتفاهمون على مستقبلچ.
_ اني ما اعرف هيچ اظل يممممههههه .
_ حقچ انتِ مثل القردة تكمزين ماتصرف الچ تنامين .
_ اي والله هسة لو مشلول لساني ولا جسمي .
_ ليش ولچ .
_ هسة من اجفص شلون اشرد يمه راح اصير مكفخه .
فات ريــان شافنا نحجي دخل ماي رتبه بالثلاجة وطلع الكارتون
انــور : ها هسة متفقين ماكو بجي لطفي الجو ؟
هزيت راسي ورجع ريــان للغرفة مقوس حاجبة بستغراب
ريــان : ها خنست انت وياها .
انــور : مو جبتني احجي وياها حتى تسكت هاي سكتت العرمة .
حُــرة : شبيك ابو وجهه الأصفر وجهك يحتاج نعال شهد .
كمز عليَّ اريد اتحرك احمي نفسي اجه ريــان دفعة
انــور : سمعتهاااااااا هل نمررررررررة شلون تغلط .
ريــان : عوفها بعد الله شيسوي بيها .
حُــرة : حسيت روحي جلب مشلون الله لا يوفقك انت واخوك .
ريــان : مايوفق منووو ولچ .
حُــرة : ابو الرون عوف ملابسي عيوني اعتبرني مخبلة
لا تاخذ بكلام لساني هذا ابو جفصه الله لا يوفقه يفشلني وياكم .
طبطب انــور على كتف ريــان واشر عليَّ
انــور : هم مشلولة وهم مخبلة وهم ام السان روضها
دام ما تكدر تتحرك خليك قيادي حوك .
ريــان : ليش صاير تحجي مثل علي الآكبر حوك واطمكم ؟
انــور : اني احجي مثل هذا المخبل امداني ، اني احجي مثل اخته .
حُــرة : شوووف شووووف اذا يسمعكم علي الآكبر تحجون بـ اخته
ذبحكم يصير على قبلة ذبحكم حلال يوزع لحمكم للجلاب حتى
جلاب الشوارع ما تاكله بي ريحة بيت الرياش الخايسين كلكم خيسه .
انــور : يااااا بنت الخيسسسسسسه يا خايسة يا بنت الخايس .
يريد يهجم وريان صاح بي
_ اعتبرها نملة بلا رجلين ميخالف امسحها بوجهي .
انــور : ربيهااا لا الزمك اربيك واربيهااااا .
حُــرة : بزر نساتل مايتحمل كلمة
لو بيك خير علي الآكبر ما يحصرك .
كملت وغمزت اله قصدي انغير مود ريــان بس هذا سطل مايفهم
هوه اني حجيت هيج وصار يدفع بريان درت راسي على جهه
الثاني على اساس نمت وبقيت على حالتي يتصايح ويتعارك
رجع للغرفة مالته واني صدك غفيت ما ادري بروحي
الثاني يوم كعدت على صوت الدكتور شفت انــور گاعد مبدل
والدكتور يشرح حالتي الريان
انــور : گعدت الزومبي .
الدكتور: منو زومبي .
ريــان : يشاقة وياها دكتور .
حُــرة : ها شمه هنا .
الدكتور : شمه شنو ؟
غمز ريــان ويعض بشفايفه يريدنا بس نسكت
ريــان : دكتور احممم القاب بينهم ، اسكت انت وياها .
حُــرة : هسة اخابر شهد تاخذه ونخلص منه .
انــور : الله يرحمه من موتوا يمكن فرح خلص من هم جبير .
حُــرة : احوووووو على مدگدگ .
الدكتور : مافهمت شي شنو يحجون طلاسم .
كتف ريــان ايده ورفع كل ايده يغطي بوجهه من الفشلة
ريــان : ماكو شي دكتور يعني هسة اكدر اطلعها .
_ اي طبيعي طلعها بس كُل يوم تلتزم على جلسات العلاج الطبيعي.
_ صار دكتور .
اجت ممرضة اثنينهم طلعوا بدلت ملابسي وصاحت على ريــان
اجه ساعدها شالني بعربانة متحركة يخليني هوه كعدني
واني انهاريت اهز براسي لاااااااا لاااااااا واصرخ بعلو صوتي
ريــان : لچ شبيچ بس حاجيني .
_ اني اكعد بكرسي متحرك ليششش هوه اني شنو شفت من حياتي .
ريــان : بس هل فترة .
_ لااااا ريااااااان لاااااا شيلني منا كعدني على سررريرررر
اخذني اخذذذذه مناااا اني مابيَّ شي راح امشي اكدر امشي
يمهههههههه لاااااا حباب لاااااا سوي شي سوي شي اني
اكدر امشي ساعدني ريــان سوي شي لا تعوفني هيج حباب .
ريــان : شنو بيدي عليچ لچ حراير شنو بيدي وما اسوووي والله
لو ادفع كلشي عندي وترجعين تمشين اسويهااا .
حركت راسي سريع جسمي صار ينزل بس جامد
ما احس بي مو تشنج هذا مو تشنج فقدت ما احس
بـ اعصاب جسمي شلووون بيَّ شسوووي بروووحي
ريــان : حُــرة راح يووووكف گلبچ لچ كاااافي خليني احجي وياچ
اسمعيني بس اسمعيني .
طلعت الممرضة تركض وانور ينتظر برا
لزم وجّهي بإثنين اديناته وصاح وعيونه تلمع ثبتها بعيوني
_ كلمة زلمة اخذيها من صياد وعد زلمة اخذيها من هل شارب
شهر بس شهر واني بهاي ايدي الزم ايدچ واخليچ تخطين اول خطوة
واحتمال اخليچ تركضين وعد مني .
حُــرة : تمل وتعوفني اني كلها عافتني انت هم تعوفني .
ريــان : انتِ امانتي بحماية الصياد ما اعوفچ اذا انتِ ماتريدين تعوفيني
نسيتي قبل وعدت حُــرة تكمل وفيت رجعتچ وهسة
اخذيها مني ترجعين تمشين وتكملين واشتري الچ سيارة
انتِ تروحين وترجعين بيهاا وبشرط سيارة انتِ تحبيها .
حُــرة : اريد سيارتك .
_ تاهو ماترهم جبيرة عليچ .
_ شوووف ما تمشي بكلامك اعرفك .
_ والله بس تنجحين من السادس سيارتي الچ وعد .
_ وطلگني ؟
_ اذا بذاك اليوم تريدين طلاك يجرالچ .
_ اي اريد .
_ تدلل حراير .
يريد يمشيني بالعربانة صرخت
_ لاااا ما اطلع بيها استحي ابد ما اكعد بيها ابد .
_ بس نوصل للسيارة .
_ الخاطر الله الخاطرررر الله ريــان .
تخوصر صافن عليَّ وعلى كرسي استسلم وبدون سابق انذار
نزل دخل ايده شال رجلي والثانية جوة ضهري وشالني
مثل الطفل طلعني انــور يمشي ولازم خاصرته
من شاف ريــان شايلني هز ايده وصاح
_ بس هل جعويط تگدر عليك تمشيك على مرامها وانت الممنون .
_ مجبور احممم لا اقصد حُــرة تستاهل .
صعدنا بالمصعد ما مفاهمتهم كلشي يمشي واني بنفس مكاني
يحركني ريــان منا منا من الخجل ضميت وجهي بصدره
ما اريد اشوف نظرات العالم من تشوفه شايلني
انــور : عبالهم ابوها شايلها لا تستحون .
ريــان : دولي بعدني صغير حيوووان .
صعدني كعدني بالسيارة جامدة ويعدل بجسمي
شكد انقهرر اني الي جنت ايدي ما اخلي يلزمها
هسة يعدل ويشيلني صرت اطحل بروحي طحل من القهر
وبس دموعي تنزل وحتى ما أكدر امسحها، صعدت نفس الممرضة
ويايه رفعت ايدي بنفسي بس هل ايد ايد تتحرك من جسمي وراسي
احس بي كعدت بصفي وابتسمت وهيَّ تعرفني عليهه
_ اني رفل ممرضة ومساعدة راح اكون وياج بالأيام الجاية
شنو تحتاجين يمچ بس تصيحيني .
هزيت راسي والتفتت على ريــان ادري بي راح جابها
حتى تساعدني يدري اخجل من عنده ولمساته ما اتقبلها
_ شكراً ابو الرون .
_ واجبي .
رجعنا للبيت نزل انــور قبلنا يحجي هوه وحارس جديد اول
مرة اشوفه فتح الباب للسيارة وطلع تلفونه نزل ريــان يريد يشيلني
حُــرة : مو على اساس ابوك ودُر بالمستشفى ليش عفتهم ؟
طلع علي الآكبر من البيت صاح على ريــان
_ ها رجعتوا.
ريــان : اي وين ابوية ودُر .
علي الآكبر: ابوك بغرفته دُر تنتظركم جوا استعجل .
شالني بحذر دخلني للبيت والمساعدة ويانا التفتت شفتها
عينها على علي الآكبر صفنت بي من شافتني شفتها نزلت راسها
هوه ولا يشوف احد رجع دخل للبيت كعدني ريــان دُر من شافتني
اجت حضنتني واني حسيت بحضنها صرخت ابجي وهيَّ تبجي
دُر : حسبي الله ونعم الوكيل عليهم عسى الصار بيچ يصير بيهم اضعاف .
كعدت بصفي خلت راسي على صدرها حاضنتني وتمسح بوجهي
ودموعي ريــان وعلي الاكبر وأنور طلعوا برا يسولفون
ودُر تحجي وتصبر بيَّ وتحلف ما واح تعوفني ابد لو مهما صار
نص ساعة وسمعت صوت جــود دخل ريــان مكتف ايده
استند على باب ويفر بيده
_ صدك تروحين وياهم ؟
دُر : عمي وعمتي وجود حلفوني اجي رايحين يخطبون الجود
مابيها شي اروح وياهم وبليل گال علي الآكبر يرجعني .
_ براحتچ بس انتِ مريضة .
دُر : اذا اكعد هنااا واشوفها اموت والله اروح احسن اشرد من هل بيت .
باستني وطلعت هيَّ وريان وكفت بعيد بس أسمع أصواتهم مو واضحة
دُر : امانة عينك عليها خطية ترا حُــرة روحها عزيزة
لا تحسسها بشي واني بس اليوم وارجع بيَّ مابيه من حيل اشيلها
بعيوني وكفاتها حلوة ماعدها غيرنا .
ريــان : بدون ما توصيني حُــرة صارت بمعزتچ .
دُر : اعتبرها بنتك فدوة .
ريــان : ليششش انتِ واخوچ تحسسوني شايب
لااا تحجون هيچ مقابيلهاااا شسالفة ترا تعبان
بعدني بعززز شبابي اعصابكم عمي ذكروا الله .
دُر : اسم الله شبيك .
ريــان : خلووووني سااااااكت واحد يگول عبالهم ابوها
والثانية تگلي اعتبرها بنتك لاااا تخلوني اغلطططططط .
رنيم : لا تگولين بكد بنته ينقهررر عايش بالوهم ومغمض عيونه
ويعشك ويحب طفلة مثل ما گالها قبل طفلة بس اخذت عقله .
ريــان : اشششششششش انتِ ولاااااا صووووووت .
رنيم : تخاف تسمعني حبيبتك حُــرة تحب اگول حُــرة لو حراير ؟
دُر : رنيم اصعدي لا يروح يفقد ويضرب ويصير هوه الغلطان .
رنيم : خلي يضرب مايهم بقت على اخووووج .
بقيت بس استمع اول مرة اسمع ريــان ينتر برنيم بهل طريقة
ويقبل احد يحجي وياها مايقبل احد يدخل بينهم هوه وياها
اني من اتعارك وياها يتخبل ويحير شلون يسكتني
اجت البنية رفل يمي صحت بيها
_ فدوة صيحي على ريــان يصعدني انام ارتاح فوك .
راحت تصيحه اجه هوه شالني ودُر تحجي هيَّ ورنيم بعدها مرادد
طلعني برا همست بتعب
_ اريد انام .
ريــان : لازم اوفي بالوعد خليتيني اقسم قسم احقق مطلبچ نسيتي .
_ يا قسم .
_ شوفي بعيونچ .
درت وجهي شفت اربع خرفان مدخلها للكراج وشاب
موجود لازم واحد من الخرفان وقبل لا يذبح يلقن بالخروف
سمعته يگول
( بسم الله والله أكبر اللهم لك وإليك هذهِ ثواب على روح المرحوم
مصطفى ابن كريمة فـ تقبل ) .
غمضت عيوني دموعي تجري خليت ايدي على گلبي
وريان يطبطب على ضهري وعلي الاكبر وانور من بعيد
يشوفونه وساكتين مايحجون ذبحهن واحد بعد الثاني
ويكرر الكلام بكل مرة يذبح بيها خروف
ريــان : وين تريدين نوزعها لو نطبخها .
حُــرة : لا قسمها وزعها بالمناطق الفقيرة فدوة انطيها
لكل شخص محتاج وخلي بقصاصات اسم مصطفى حتى
يقرون اله الفاتحة ماينسون .
ريــان : اذا تبجين ما اوزعها والله كافي .
مسحت دموعي وسكتت واني اجاوبه
_ بعد ما ابجي بس راح يعرف اني ذبحتها ثواب ؟
ريــان : اي يعرف زوجج اشتراهن بفلوسة .
_ يا يمههههه عزززا صدك لااا اوووكف غير تحجي
جان ما ذبحت شكد عيب
ريــان : هههههههه منين عيب ولچ خبلة انتِ .
_ يعرف اني تزوجت وانت اشتريت الخرفان .
علي الآكبر: ههههههههههه على فطرة بعدها خطية .
انــور : هل نمرة العرمة كلشي تعرف لا تخافون عليها
تسوي روحها فقيرة كاشفچ بس اني اكشف هل وجهه البريئ شنو وراه .
علي الآكبر: مايحجي كلمة بيهاااا خير عار ويخلص عمرك كله عار .
انــور : ما متربي وياك مو مثلك يعار .
دُر : اي تضارب انت وياه عفية عليكم صيروا سينما .
علي الآكبر: وحگ ابو راس الحار الخاطرچ ساكت
اخلي هل ابو شمه المدگدگ الخامس من بين الخرفان هاي
اذبحه وياهن ذبح اذبحكككك تعرررف شنووو ذبح اذبحك .
حُــرة : عندي حل ثاني نذبح ذبيحة خامسة فداء الكم
رنيممممم لچ عيني رنيم وينچ تعالي دام الگصاب هنااا يگصبچ وياهن .
رنيم : يگصبون راسچ كون .
انــور صار احمر من الضحك وعلي الآكبر طلع برا ودُر طلعت وياه
يضحكون وريان يحتار وين يضم بوجهه .
الگصاب بعيد همزين ما يسمعنا لان يعلگ بالذبايح
اجه من قرب يخلص يسأل ريــان
_ بعد تحتاج شي استاذي ؟
راح يمهن شافهن تشكر منه ودفع فلوس واخذ لحم وراح
طبطب ريــان على لحم وهوه يسمعني
_ روح محولل وموهوب ارتاح الله خلصك من مصيبة والله عندك بخت .
حُــرة : بالقران وروح مصطفى جان مصطفى يموت على فصلاتي
يگول لو بيدي اربعة وعشرين ساعة اخليچ گبالي وما اشبع منچ .
ريــان : انجبي يلة انجبي .
هزيت ايدي بصعوبة وكملت كلامي الخايس اخاف يفكر
مصطفى مايحبني لازم يعرررف مصطفى يموت عليَّ يعشقني عشق
حُــرة : هوه غير مصطفى جان ينام على صوتي
ويعشق ضحكتي الي افصل بيها يگلي احب ضحكت المشبوهات .
ريــان : لان مشبوه مثلچ .
حُــرة : ومن احجي مايمل يسمعني ويضحك من اروح فدوة
الـ ضحكت مصطفى والطول مصطفى .
ريــان : راح اسحل راسج هنااا أمرغه بالدم بنت الكلب .
حُــرة : انتظر مو صار هواي ما حاجية خليني اعبر
اتذكر من افصل يعشق فصلاتي .
ريــان : هاي من زمان تفصلين عبالي من مات فصلتي .
حُــرة : لا من اني صغيرة عندي فصلات وجان من نوع جامد مثلك
بس على سوالفي يضحك مثل ضحكتك لا وينك وين ضحكت مصطفى
ماتوصل ضحكته الصراحة يعني .
ريــان : مصطفى فرح من كتلوا واني اذا يموتوني افرح .
حُــرة : فوتني الساني راح ينطي كلمات قوية تخليك تبجي .
ريــان : بالله احجي .
شالني صعدني على درج ورنيم ما وكفت حجي وهوه يتصرف
عبالك مايسمعها ولا يشوفها متجاهلها تماماً
هوه يصعدني اني شبعت مغثه منها صحت عليهه
حُــرة : بس اطيب اذا ما اتزوج ريــان واخليچ تلطمين .
ريــان : ميته عليَّ .
فات انــور خربان ضحك ورنيم زادت بالعصبية
حُــرة : اسكت لا افشلك اريد اغورها حتى تحبك بعد ماتتعارك وياك .
انــور : بعد شتسوي البنية لا بقت تلميح لا بقت كلام
بس المطي يعيش طول عمره مطي .
ريــان : طالع على اخوية الغبير .
وصلنا فوك شفت المكان نفسه اللي ضربني بي ياسين
ضميت وجهي برگبته ونشغت عرفني اتذكرت كلشي
لزمني بتملك ونزل راسه اكثر حتى اصير اقرب
حرك أرنبه انفه على رگبتي وصعد على اذني ويجر النفس بهيام
ريــان : شيصير لو تبقين هيچ خايفة وتحتمين بحضني منهم كلهم .
فتحت عيوني ابعد براسي وهوه ينزل روحه اكثر حتى ما ابتعد
حُــرة : نزلني .
ثبت بمكانه رافض يتحرك بنص الغرفة واكف لا يقبل ينزلني ولا يبعد
راسه وجهي صاير برگبته وايده تتحكم بيَّ فاقدة السيطرة
نزلني على السرير رافض يخلي عيونه بعيوني بكل
تحكم وسيطرة نزل نفسه طبع بوسات متفرقة على رگبتي
حُــرة : لا تستغل ضعفي .
ريــان : دوختيني .
حُــرة : لا تخليني اضوج منك .
ريــان : خليتيني متلوع عليچ تقهريني من تذكرين غيري حراير .
دفعته بيدي بس ثگلت هوه اقوى مني بإضعاف قوتي
حُــرة : راح تجيرني اصرخ صرخة .
ريــان : لو تريدين ابتعد جان من زمان سويتيها وصرختي
بس عقلچ رافض ابتعد لا تتصرفين هيچ ويايَّ .
حُــرة : ررررررريااااااااان .
_ امري الصياد تحت امرچ حراير .
اندفع الباب دخل انــور يلهث فحطان موجوع خايف
مرعوب كلشي بي يرجف من شافنا ريــان فز من مكانه داير وجههً
عليه ما يلتفت على انــور وانور يصيح
_ وجع الوجعععععك هسة وكتها .
ريــان : وثول شبيك فايت مثل الثووووور .
انــور : دُر خابرتني راح يعقدون الشهد على واحد اسمة بدر
لك ريــان راح ياخذوها مني .
يتبع ..
ثقل ميزانك بذكر اللّٰـه:
- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد ..