_____________________ الــريـاش
﷽
𓆩 اســاور حــسين 𓆪
بقلمي رواية : الــرياش
عندما نَلتقي ، لن يَكون هُناك مجال يَننا سَأحضُنكِ
بِقَدر الاُيام التَي لَم أركِ بها
لطفا لا تنسون التصويت والتفاعل بين الفقرات
⊰ دُر⊱
ابو حسن : علي الآكبر بوية اذكر الله لا تتهور .
نهض وهو مثبت انظاره عليّ وكأن ماكو غيري بالمكان
صاحت عمتي وحتى هيَّ خافت وتحلف بي
_ يمه علاوي العباس عليك لا تضربهاااااا .
علي الآكبر : اكسرها قبل لا تضربهاااااا
اكسررررر ايدي لان تريد تكسررررررهاااااا .
حجاها وضرب طبلات الكزاز بيده كسرهن تكسر .
حبست النفس بصدري وهو كش وجهه متوجع
ايده تقطر دم سريع بالگاع والكل بحالة ذهول وخوف
تشخصت عيونه بعيوني وجود ركض لزم اديناته
وحضنها على صدره متهستر يصرخ وصوته انبح
جــود : لك ليشششش اذيت روحك ليشششششش .
ابو حسن : الله اكبر عليك شسويت بروحك شخطت اتخبلت .
اخذ حسن ايده يشوفها وابو صار قريب منه
_ حاجيني من احجي وياك عيونك خليها بعيوني وحاجيني .
جــود : بوية عوفوووووووا شبيكم عوفوووا راح يتخبل من وراكم .
عمي لزم جــود ودفعه
_ شمسووووين لك شكوووو مرته ورجعت مو يدورها هاي رجعت .
جــود : مو هيج بوية مو هيج ترجعوها بكيفكم صدمته انت صدمته
خليته يملخ ايده حتى لا يضرررربهااااااااا .
نظرات العتب تروي عذاب ست اشهر ادموعي تجري
دخت بين اشوف ايده الي تجري دم والكزاز بيها
وبين عيونه الي ماتشوف بعد غيري بالمكان
فزيت ولزمت عمتي من ضج بصوته العالي
علي الآكبر: جوووووووود صوتك .
جــود : ايدك علي الاكبر .
زادت ادموعي والنحيب بموقفه شكد مقهور مني ومتلوع
مايقبل ينكسر خاطري بكلام احد ، هز راسه بلوم وعتب
وطلع عافهم كلهم يصيحون جــود ركض وراه وسراج الدين
وحسن كعد على تخم ايده ترجف على اخو
حسن : تصرفك غلط بوية .
ابو حسن : شني تعلموني الصح من الغلط .
حسن : استغفر الله بوية بس انت تعرف علي الآكبر
بشنو مر مو شوية والجرح مايطيب ماخفت عليهه
من دخلتها بالله فقد وضربها .
عمي شغل جكارة وهو يجاوبه بكل هدوء التفت يشوفني مبتسم
ابو حسن : رجعتها وخليتها مقابيل عيونه حتى اثبت اله والكم
تهديداته جذب بجذب هذا يأذي روحه قبل لا يفكر يتگرب منها .
عز الدين : هذا مو منطق يعني والله غلط لو صاير العكس
وضربها لو طا .
بنص الكلام سكت واستغفر وهو يحاجيني
_ خوية دُر مو قصدي تنجرحين بكلامي بس من خوفي عليكم .
ابو حسن : انا اعرف مصلحة ابني اكثر .
ام حسن : خابرهم فدوة خلي ياخذوا للمستشفى للمضمد .
ابو حسن : انتِ عيونچ على البنية وعوفي ابنچ اخذيها
يمچ بوية شهد لا تصعد للغرفة .
بلعت الساني من الموقف لا احجي ولا انطي ردات فعل
رحت امشي وشهد لازمتني الدنيا كلها تصير سواد بعيوني
وارجع اسيطر على روحي ذبيت روحي على فراش بالگاع
وجسمي كله يرعش وريگي يبس راحت شهد جابت ماي
شربته وبعدني بنفس الهبطة ودموعي بس دموعي تنزل
يمكن لو ما اكدر ابجي انجلط الصار مايروح من بالي
نظراته ومنظر ايده العتب بعيونه ، انكساره وملامحه التعبانه
كلهن عذبني ، كسرتني ردت فعله حتى ماتقرب مني
ماجنت متصوره منّه هل صد التعجيزي ربط ايدي والله ربط ايدي.
دخلت عمّتي بصينية اكل وكعدت بصفي حضنتني
بقيت متعجبة تعاملها اتغير جذرياً قبل وين وهسة وين
سوت لفه وتوسلت حتى اخذها
دُر : خابرتي ؟
_ عمچ خابر ولا واحد منهم يجاوب .
_ اخاف صار بي شي ؟
_ لا اسم الله ، هسة يجاوبون انتِ اكلي يمه وجهج صار اصفر .
نفسيتي لا تتقبل اكل ولا ماي وانا من جنت بتركيا تركت
الأكل ما أتقبله اكل من احس بروحي أريد اتخربط
توسلت عالجت رفضت بقيت انتظر يرجعون والوحدة
بليل فات بس سراج الدين وعمي من برا يغلط
_ مووو اخابرررر طرررشان صرتووووا .
_ بوية التهيت بي ما ظل عقل بروسنا والله .
_ شبي رجع وياااك احجي بساع احجي .
_ ايده كلها كزاز واشتغلوها خياطات بكل مكان بيده خياط .
لطمت عمتي على وجهه وتبجي وسراج راح يمها يبوس براسها
_ اخذ مسكنات والله مابي شي دخيل الله اسكتي .
ام حسن : غير يرجع وياك وين راح .
_ عوفي يمه لا تضغطون عليه يرجع قابل وين يروح اول تالي يرجع .
ابو حسن : هذا استهتر اني ارجع اربي يريد اعيد تأسيس عقله .
سراج الدين يصعد على درج وجاوبهم
_ براحتكم بعد هو ضيمه كافي انتوا زيدوها عليه .
وعمي فصل عليهم جابهم كلهم سب وغلط دخلت للغرفة
وغطيت روحي بالبطانية حسيت بروحي ثگلت حتى عليَّ
بقت ادموعي تجري الحد مانمت مانشفت ، گعدت الصبح
راسي يريد ينفجر وعيوني منفوخة حتى الكلام ما استوعبه منهم
طلعت غسلت وجهي اريد ارجع للغرفة عمي فات من المطبخ
بيده گيمر وكاهي وصمون حار من شافني اشر بيده وهوه
يضحك بنفس ضحكته البشوشه وجهه النوراني
رحت يمهم بس فتت حضني وجر خشمي
_ شمسويه بروحچ بالبجي بنيتي .
_ عيوني وحدها تبجي عمو .
_ هسة يرجع يشوف عيونچ هيج تعبانة
يتعب عيونه مثل ما تعب عيونچ .
غطيت وجهي بيدي وبجيت سحبني
على حضنه ويمسح على راسي
_ لا تقهريني بنيتي شبيچ سامعه كلمة .
_ يمكن صدك بعد ما يريدني ورجعتي غلط .
ام حسن : حقج تحجين هيج لان ماتعرفين
ولا شفتي شصار بي من رحتي ، اني لو ادري
بي ما يريدچ ما اخطي خطوة واجي ارجعچ يمه .
رفعني ابو حسن منه ويهز بيده
_ عوفيها هاي ماتعرف عمها مايضرها
اني صار سنين وياچ وشاهد على حياتچ كلها
ومو لان ابني بس ماكو غير هل ابو رجفة علاوي يحبچ
وراح يصير العوض بس اصبري بوية اسمعي مني وطولي بالچ .
نزلت عمتي ألأكل وعلى كلامهم واشوف عمي شلون ياكلً
ويسولف وعمتي تضحك وياه وهو يلف گيمر بالكاهي
وينطيني اكلت بدون ما احس بروحي من خلصت
طلعت شهد مبدلة مستعجلة تكمز فوك راسنا
_ بوية من وراكم نايمة ما ادري بروحي
مشاكلكم ماتخلص راح الدوام وديني لازم انطي درس .
راح عمي يغسل ايده وشهد تعدل بالشال وتنزل بالقميص
_ طالعة حلوة .
شهد : خوش معلمة .
_ احلى معلمة .
دزتلي بوسة بالهوا وطلعت تركض للسيارة
نزلت بتول بدون ما تحجي تنظف اجت
عمتي تعلم بيَّ شلون اثرم اسبيناغ
حاولت وياها بعدين صرت بس اعدلهن وهي تثرم
نزلت ريمان وجهه محتقن سوت اكل للجهال توكل بيهم
ودردم عود تغلط عليهم من الصبح عدها طاقة
عمتي من شافتها هيچ ضحكت وشالت الصينية
_ روحي ارتاحي يمه دُر اصعدي شوفي غرفتكم .
بقيت مترددة اصعد ، اتعثر بالخطوات وصلت بابها
وبس فتحتها كل ذكرياتنا الحلوة صارت شريط ينعرض
وكلامه الحلوة بعمري ما انساها همساته بأذني لمساته
غمضت عيوني وجريت نفس طويل اصبر بي روحي
دخلتها نفس ماهيه ماتغيرت بس يمكن احنا تغيرنا .
مبين محد منظفها نزلت اخذ سطل المسح والوصلة
واسمع بريمان تتعارك هي وعمتي
ام حسن : لا تدخلين شني هل غيرة .
ريمان : ماتخافين على ابنچ والله بهل مشكلة
ثبتي اليه لان لو تخافين عليه بعد الصار تدعين ينساها .
ام حسن : ينساها تبهذل حالة وهو يدور اثر منها .
عمتي بعد ماتريد اطول بال وياهن هدتتها بحسن
وطلعت تنظف بالكراج ، انتظرت دقايق وطلعت
اخذت من عمتي ماي وسطل وماسحة وصعدت
مسحت الأخشاب وكنست الأرضية ومسحتها
غيّرت الفرشات والبردات ونزلت صعدت
جنطتي الصغيرة بيها عطري رشيت عطري
بكل مكان بالغرفة حتى على فراش ودخلت
غسلت وسبّحت وطلعت تذكرت من البارحة
تركت الصلاة فرشت السجادة صليت كل فروضي
ونزلت من سمعت صوت شهد من شافتني ضحكت
_ تعالي دُر .
_ ها .
_ هذا العصير المفضل مالتچ كل ما اشوفه يذكرني بيج.
فرحتي بهل هديّة ماتنوصف حاولت ما ابالغ برد فعلي
واكتفيت بس اشكرها واسكت صرت اخاف حتى اظهر مشاعري
غيرت ملابسها وبقيت وياها اسولف وهي سولفت على خواتها
وخلص الظهر والعصر والمغرب وعلي الآكبر وحتى جــود مختفين .
على اعصابي انتظرهم يخلّصون اكلهم ردت اساعدهم
بالمواعين ماقبلت بتول عفتهم وما صدگت ارجع اصعد
بقيت افتر بغرفتي والتفكير اكل راسي والوقت يمشي
بطيء نمت حتى يمشي ويخلص اليوم اريد يرجع
فزيت اغطي بروحي من أسمّع الصياح جوة
شفت الساعة بـ2 بليل هذا صوت علي الآكبر
فتحت الباب بس لمحته صعد ارتعدت سديته ورحت بعيد
انتظر اسمع خطواته تقترب رجعت فتحته من حسيت
غير طريق غرفتنا كلشي بيَّ هلكني من صعد على طابق الأخير
الغرفة جــود يعني يدري اني موجودة وبالغرفة ورافض نتواجه .
بعدنا على صدمتي وصعدت عمتي اشرت
على درج وعيوني لمعت بالدموع
_ صعد فوك .
اخذتني مني ايدي ورجعتني للغرفة
_ لا تروحين يمه لا تتواصلين وياه عوفي هل ايام
هذا صدك صاير بركان يروح ينفجر عليچ ويضرب ويتندم .
_ على أي اساس يضربني بشنو غلطت وياه
اني تعذبت مثله لا يعاملني بهل طريقة احجي وياه انتِ فهمي .
بقت تهديني ماتريد تكبر المشكلة ونزلت حايرة
قفلت غرفتي ورجعت بفراشي راجع وجهه الصبح
يطلع ويفوت وتارك حياتنا بلا حل عاجبه الوضع
من الصبح كعدت على رن تلفوني سحبته من الميز
جاوبت بدون لا اقرأ الاسم بعيوني النوم
_ الو .
ريــان : صباح الخير .
عدلت روحي عبالك موجود هيج عندي رهبة من اخوتي
وبالذات ريــان اخجل احجي وياه لآن فارض احترامه
_ صباح النور ريــان شلونك .
_ عايش ، وانتِ .
_ عايشة .
_ دُر احتاج تجيني للبيت لان قبق راسي من عنادها طار .
_ حُــرة ،
_ اكوووووووو غيرهاااااااا .
بقيت على وضع الصامت حرت بشنو أجاوبه
_ من رحتي اليوم بس مرة طلعت من المهجومة الغرفة
عقلها بي *** على شنو زعلت وقفلت فهميني اذا تفهميها .
_ ما ادري أخاف قسيت وياها .
_ هي تستفزني طريقة كلامها استفزازية وبامتياز .
مشيت للثلاجة اخذت بطل ماي شربت واحجي
_ المشكلة اني وعلي الآكبر بعدها علاقتنا متكهربة .
_ معقولة .
_ اي والله وحتى ردت اخابرك .
_ صاير شي ؟
على اخر لحظة لزمت نفسي ما احجي شي من تذكرت
كلام علي الآكبر " مشاكلنا ماتطلع خارج غرفتنا "
وخفت ريــان يدخل وتصير مشكلة واني اخذت وعد على
نفسي اصبر على علي الآكبر وما ادخل شخص بمشاكلنا .
_ لالا مصار شي بس علي الآكبر بعده زعلان مني ومقهوره.
يعدني احجي ودخلت شهد بدون مقدمات تحجي
شهد : دودي انزلي حبيبي .
اشرت الها لحظة وبقيت استمع الريان
_ اذا مقهورة وما مرتاحة اجي اخذچ .
_ بعدني اريد احجي وياه وافتهم منه .
_ ماشي يمكن باجر اجي اخذچ واني احجي وياه .
_ مو تتعاركون .
شهد : منو يتعارك ؟
دُر : هههههه أخوج .
شهد : عبالي .
ريــان : بلغيها احنا ناس مانحب المشاكل مثل اخوها .
حجيت الها كلامه رفعت حاجبها وجاوبت بضحكة
_ والله احنا ناس مسالمين بس اذا شخص يلعب بالموزين
ويانا ما ننساها للموت ونطلع روحه ونطفشهم مثل مصار بأهلك .
ريــان : نفّس لغة اخوج بالتهديد .
شهد : وافتخر .
ريــان : حقچ .
اسمع ريــان يصيح هاا ولك شبيك لك دقيقة فتحت عيوني بصدمة
وشهد بقت جامدة بمكانها من سمعت صوته
انــور : قصدك يبيعون حجي هي واهلها حالهم حال الفوار .
شهد : المدگدگ اذا ما اخلي اخواني يزلزلون الگاع بيك .
انــور : اصولهم صول خلي واحد بيهم يجيني .
شهد : واني اخذك بالنعال كتل كتل اگطع النعال على راسك .
كملت كلامها وطلعت عفت التلفون مفتوح وركضت وراها
لزمتها من ايدها تمسح بدموعها لزمت ايدها وصوتي يرجف
_ عليج الله لا تحجين شي تصير مشاكل شهد اني اعتذر والله .
خليت ايدي على كلبي من سمعت جــود صاح
_ شهد منو نزل ادموعچ .
درت وجهي عليه ينزل سريع رجعت اتوسل بشهد ريحتني
شهد : انا مثلج اخاف على اخواني مستحيل احجي اسكتي .
فزيت من طلع صوت انــور وريان عالي تذكرت التلفون
مفتوح والصوت عاليّ بلعت ريگي والدنيا افترت بيَّ
بس شفت على الآكبر نزل يتبع الصوت هو دخل
واني ركضت وراه إيده ملفوفة نزلها على طرف السرير
والتلفون مشمور مقابيله يستمع للكلام
انــور : ما سمعت اطررررش مو تهدد بيَّ بإخوانها تريد اسكت .
علي الآكبر: انت قهرتها ؟
انقطعت الأصوات يمهم لا حركة ولا رد فعل هدوء بهدوء
اشك بيهم حتى النفس انگطع عدهم ، هز علي الاكبر
راسه ورفع روحه طگطگ رقبته وعيونه على تلفون
علي الآكبر: جايكم انا جايكم انفذ تهديدها بيكم .
راد يطلع جــود صاح بي
_ خليني ابرد كلبي بيها واشتغلهم بالمولوتوف .
دُر : لاااااااااااا عيب عليك بنية وياهم بالبيت حُــرة تموت والله .
اخذت تلفوني سديت الخط وكملت كلامي
_ هو ريــان خابرني على موضوع يختلف وصارت مداخلات
من شهد وانور واحد غلط على ثاني والله .
جــود : غلطتي عليه شهددد .
شهد : اي والله .
علي الآكبر: غلطتي عدل لوووووو كل عادة فهاوه .
شهد : لا گتله وين ما اشوفك اگطع النعال على راسك .
علي الآكبر: وين ما تشوفين هل عااااار
تضربي واذا ما تضربي اني اضربچ .
دفعت الباب وطلعت اختنكت اريد اجر النفس ما أكدر
مهما يصير بس ما اتحمل احد يحجي على اخواني
دخلت للحمام وقفلتها غسلت وجهي احس نار وطلعت مني
فرت فور لزمت گلبي واناشغ من البجي
هضمني ماكو غيره يكدر يهضمني غسلت وجهي وطلعت
شهد تنتظرني مسحت عيوني وحضنتني
_ هاي صدك تبجين لچ والله مايروح علي الآكبر ماقبل
امشي انزلي اذا يشوف عيونچ هسة شصار بيها يكتلني
اني وجود وينسى موضوع اخوانچ .
دُر : تستاهلون انتِ وهذا جــود اتخبل عبالك متعاركين اني وياه .
شهد : مقهور على علي الاكبر .
عفتها ونزلت جوة اريد اشكي العمي عليهم دخلت المطبخ
واشوفه گعد على كرسي وجود يلبس بي بالحذاء لان ايده
منتهية من التهور مالته بقيت لا اخذ ولا انطي من شفت
اريام خطيبته القديمة موجودة وكاعدة تحجي هيَّ وعمي وعمتي
وهو يستمع الها من شافني نزل راسه ضغطت على اعصابي
ومن سلمت رديت السلام وتبرز ايدها حتى اشوف الكيكة
خلتها على ميز ودارت وجهه على علي الآكبر
أريام: خالة ام حسن طلبت مكونات كيكة الككو الي تحبها
گالت علي مشتهي ياكل منها سويتها الك مثل ماتحبها بالضبط .
حلفت بداخلي اذا يحجي وياها ويجاوبها جواب يقهرني
اخلي يشوف العجايب مني بس صدمني من رفع راسه وجاوبها
_ تسلمين خوية ليش تعبتي روحج ام جبل تسويها مايحتاج .
اريام : ام جبل منو ام جبل ؟
رفع ايده آشر عليه وعمي ضحك بصوت بحيث اريام نزلت راسها
على عمي تخزر بي من الفشلة وعمي يستفسر منه
_ ناوي على جبل .
علي الآكبر: اي هم يلة كبرنا .
كمل كلامه وطلع بقيت اضحك بوجهه اريام وهي فحمت
لا تكدر تحجي ولا تطلع لان عمتي تقصدت تسولف الها
تعرفها بس تطلع توصل كلامها الميثاق واني بقيت
مفهيه فاتحة حلگي واباوع بالوجوه واتذكر صوته "ام جبل "
راح التعب والحزن كله مني واني اشوف وجهه اريام ينطي ألوان
عافت الكيكة وطلعت تركض ماتمشي من فتحت الباب الخارجي
شافت علي الآكبر بعده واكف ماعرفت شنو تحجي بس هو دار وجهه
منها وابتعد وبعدها مستمرة تحجي صعد بالسيارة وراح هو وجود .
بقيت صافنة بالكيكة اريد أشيلها وارجعها الهم لو اشمرها
بس استحي من عمي وعمتي صبرت نفسي بالشغل
اريد عمتي تنطيني شغل حتى اخلص وقت
بليل بعد عشاهم فاتت ريمان وبتول بالجاي والكعك
والكيك والحلويات وشهد تسولف على المدرسة وحسن
يستمع الها وسراج الدين يحشش عليهه وابو يرزل بي
رحت للمطبخ اخذت عصير من الثلاجة ورجعت بقيت بالباب
من رجع كاعد بصف ابو وجود بصفه والله حتى صرت اغار من جــود
رجعت بصف عمي اخذت نستلة بعدني افتح بيها وعمتي تسأل بي
_ جاي لو ببسي كيك لو كعك لو نساتل .
جاوبها بدون اهتمام
_ كيك وجاي .
ورجع يكمل كلامه هو وجود
دُر : عمو الزمها عفية .
اخذ العصير مني واني نزلت على اكل سحبت كيكة
من هذني بالمحلات وفتحتها من التغليف وهمست
_ يقصد هاي عمة .
دار وجهه على صوتي واني رفعت راسي هو مخنزر واني قلّدته
ام حسن : لا عمة يريد من هاي الكيكة .
دُر : لا ماياكل منها مايحب بعد كيك البيت .
ام حسن : يا علي الآكبر مايحب كيك البرا بس كيك البيت
يمه علاوي تريد من هذا الكيك الجاهز لو هذا كيك البيت ؟
دخلي يحجي شي يبووووو على راسي وراسه
طال النظر على ايدي وايد امه شمر الكوشة ونهض
_ رايح انام نفسي مسدودة .
هو راح وإنّي تنفست وجود فاهم الوضع راح وياه
عضيت اصبعي كون الزم جــود اخخخخخخخ ابرد كلبي بي والله
كعدت بالنص ساعة وصعدت بعدني على درج وطلع هو من الحمام
سابح لابس بجامة وفانيلة وينشف بشعره بالمنشفة من شافني
تجاهلني وصعد فوك واني سويت نفسه بس سديت الباب بكل قوتي .
طلعت ملابسي اريد ابدل واسمع جــود يحجي وياه
_ نطلع نسهر بكوفي مثنى .
_ امممممم .
حجاها وسمعت يضيف عليها
_ انزل قبلي دقيقة واجيك .
وصوته يقترب يفوت واني وحدي دخيلك ربي
اريد افكر بعد عقلي انشل بلا تفكير اريد اكمل
عبالك ما ادري بي اني شنو جنت اريد اسوي
اي اي اغير ملابسي ذبيت دشداشتي اريد البس
ودخل رفعت الدشداشة غطيت نفسي بس بإهمال
وتقصدت أتصنع الإهمال من حسيت كلشي بي اتخربط
دُر : علي الآكبر .
جاوبني وهو يتفادى يشوفني يريد يثبت ماعندي اي تاثير عليَّ
_ ممنوع تدخلين بقرار آني اتخذه .
_ اني شوكت ادخلت بقرارك ، بس لا تقصد الكيكة ؟
_ گلت كلشششششششششي منووووو ذكرررررر الكيكة .
_ صاير عصبي لان ماقبلت تاكل كيك اريام
هسة ابدل واصعدها كلها الك اكل منهاااا براحتك ماكو داعي تعصب.
ظل ساكت يشوفني بطرف عيونه مايكلف روحه حتى يتنازل
دار وجهه يريد يطلع ركضت دخلت روحي من ايده استندت على حايط
رفعت ايدي اتلمس ملامحه التعبانه تجنب لمساتي
_ طريق .
_ علي الآكبر خايف يضعف ويكسر كلامه .
_ كاره لمساتچ ، وجودچ ، كاره دُر كلها كرهتها .
_ جذاب كلامك شي ورجفتك تروي شي ثاني .
يبعد بروحه صار بعيد ويدير بعيونه مني يشوف
كلشي بس مايريد يشوفني جبرت روحي اثبت
_ طرررررررريق يلة .
_ اتقرب وسوي طريق ليش مبتعد وخايف .
_ اتجنب اتقرب مو ضعف بس اذا تجين بيدي ادمرچ .
_ تضربني ؟
_ طرررررريق اذا اعيدها محد يگدر يخلصچ مني .
_ كافي تهدد نفذ .
سحبني من ايدي خايف يدفعني سندني على الحايط
رفعت ايدي على راسي لا يضربني بقيت جامدة من
فتح الباب وطلع حتى ماشافني شصار ما صار بيَّ
رحت على ملابسي البس بيهن صدك كارهني ؟
واني فرضت روحي برجعتي المفروض اعز روحي
ليش أنزلها وهو مبين متخطي حبي كله مايتنازل حتى يشوفني
ورافض ينزل من نفسه وكبريائه ويحاجيني ويفتهم مني .
اريد أطلع للحمام اغسل قبل لا انام وبقيت بنص الصالة
كلبي يدگ براسي من الخوف يريدني اتحرك من شفته
راجع وصاعد الدرج متلهف ونظرات الرغبه بعيونه
وهو يمشي رفعني طوقت رجلي على بطنه وحضنت
رگبته بيدي اخذ شفايفي بين شفايفه وهو يمشي يرجعني للغرفة
دُر : مشتاق الدُر .
_ اممممم .
دُر : واضح راح تنتقم وتاخذ بثارك .
سد الباب ونزلني على سرير مبتسم بتلاعب
_ انتقم لا تخافين اخذ بثاري بس رجعت
اسوي اكثر شي اتندمت عليَّ بيوم رحتي .
دُر : علي الآكبر .
_ اممممممم .
دُر : گول روحه لعلي الآكبر .
نزل راسه يبوس رگبتي ويضغط على
خصري وتقرب يداعب اذني بهمس صوته
_ منو روحه ؟
_ دُر روحه لعلي الآكبر .
_ ههههههههههههههه .
_ بعد لا تجرح روحك .
حجتها ولزمت ايده باس طرف شفتي وجاوبني بخدر
_ ولان دُر روحه العلي الآكبر جرح روحه وعذبها .
أتمكن مني اخذني كُلي بلمسات تملك وهيمنة جردني من عنادي وخوفي
وبقيادة سيطر وتحكم بيَّ بكل تفرد انفرد وبنظرات الضعف ضعفني
وسلب كُل قدرتي ، مر الوقت بين ايده وهوه يستحوذ على عقلي وكلبي
باس راسي يريد يروح مني لزمت ايده المجروحة وبست باطنها
وعيوني خليتها بعيونه تلمست وجهه وبلا تردد نطقت كلماتي
_ اني احبك والله اني احبك وگلبي يخاف يخسرك علي الآكبر .
تقرب اكثر ايده تمشي على ملامحي تلمس شفتي وبتعب جاوبني
_ جانت هل كلمة حلم وصارت كابوس
دُر جانت هوس علي الآكبر وروحه وصارت كابوس .
هزيت راسي من سحب مخده نوم راسي عليها وغطاني
راح بعيد مني يريد يطلع لزمت بطني مغصتني ومشيت
_ لا تروح وين تروح .
_ فقدت السيطرة على روحي بيوم رحتي ما اعيدها .
_ رجعت علي الآكبر.
_ انا خايف ارجع اگرب وينعادن .
ضربته على صدره بقوتي الضعيفة
_ شنوووو قصدك .
_ عودت روحي على فراگج .
اشرت على مكانه وامسح بدموعي
_ لاااااا تخبلني علي الآكبر لا تخبلني والصار هسة .
_ حقيّ وآخذته .
ضربت ايدي بالحايط وصرخت من وجعها راد يلزمني دفعته
_ لااااا تلزمني لا طخني بعد ابددددد .
_ لا تضربين روحج لا وحگ داحي باب خيبر اتخبل عليكم هسة .
_ تقربت مني حتى تعوفني موووو هي بقت بس هاي بنفسك
واني مثل الغبية سلمت روحي عادي گلت نكسر الحواجز الصارت
ونرجع مثل قبل واحسن بعد بس ابالك شي ثاااااني علي الاكبر مووو ؟
يحجي ويايه وروحه صارت بيدي لان لازمتها من الوجع
علي الآكبر : انا ما اعوفچ حالف ما اكسر حلفاني .
_ ههههههههههه ما تعوفني موووووو ؟
_ انتِ راح تعوفيني .
_ تعوفها عليَّ عفية عليك تضغط عليَّ بتصرفاتك حتى اعوفك
ويصير الوم والغلط من دُرررررر هي دُررر مابقت مووووو ؟
_ كافي .
رجعت ضربت ايدي من راد يطلع فتح عيونه واجه اتجاهي
لزمني ما مهتم ادفع بي اصيح مايهتم دفعني على تخم ورفع
اصبعه على شفايفه وثبت وجهي : اشششششششششش .
_ صدمتني علي الآكبر صدمتني .
_ شنو تريدين حاجيني ؟
_ لا ترووووح وبطل هاي التصرفات ما اتحملها .
جر باكيت الجگاير شغل جگارته وسحب نفس طويل
وظلّ وأكف مقابيلي يريد يشوف ايدي اسحبها
_ خليني اشوفها وتنامين بحظني اليوم .
بقيت بس اركز بي اجه گعد بالارض ساند نفسه على ركبته
والجگارة بين شفايفه ، تلمس اصابيعي صايرات حمر والعظم
بين الكف والأصابع ازرگ نزل باس اصبع اصبع وعظم عظم
علي الآكبر : راح تخليني ادمر روحي على هل ضربات .
دُر : تستاهل .
_ صدك استاهل والله استاهل .
لزمني من ايدي الثانية شالني للسرير نومني وهو نزع التيشيرت
واجه تقرب مد ايده واخذني على صدره باس راسي ويمشي
اصابعه على ظهري يشيل بشعري من خدي ويصفن بوجهي
غمضت عيونه باس طرف شفتي بين النايمة وصاحية همست
_ اتحبني ؟
_ نامي .
_ گول مهوس بتفاصيل دُر .
_ اششش .
_ بعدك مريض بمرض اسمه دُر ؟
_ تعبتيني نامي .
_ بعدني مستوطنة عقلك وگلبك ؟
_ صوتچ .
_ گول اعشگج واتنفسچ بوية دُر گول بوية اريد اسمعها .
نزلني على مخدة خليت ايدي على شفايفي واني بعز نومتي
_ راح اسكت اسفة بعد ما احجي .
_ لا تعتذرين تعبتيني .
_ ارجع .
عرفت من احجي هيج وهو يحارب بنفسه مايجاوب
مايتحمل يسمعها ويظل ساكت مرد روحه مرد ورجع
يجبر بروحه ينومني وهو تصرفاته تفضح بي
لمساته وجرت النفس من يجرها مني انسان
منتهي ولهان على اخير بس يكابر .
دُر : راح ترجع مثل قبل احاربك وارجعك .
علي الآكبر: ماكو شي يرجع مثل قبل كلشي يتغير من اليوم .
_ انت احسن شي صار بحياتي علي الآكبر اني احبك لاتعرفني .
حجيتها وغفيت على دفو صدره وامان احضانه
وجه الفجر نزلني من ايده على مخده غطاني
وقبل لا يطلع تلمس وجهي وكأنه يودعني
وطلع وهو يتنفس بصوت مسموع متعب
رجعت كملت نومتي واني اسمع اذان الظهر
دخلت شهد بعدها تبدل : دُر لچ دُر اخوج المافيا هنا .
_ منو .
_ ريــان المافيا عيني اركضي .
اريد اگوم استوعبت اني بلا ملابس غطيت روحي
واشرت الها على باب وصوتي اختفى
_ وينه؟
_ حسن دخله للإستقبال .
_ روحي قبلي .
هي راحت واني ركضت أخذت ملابس ورحت للحمام سبحت
على سريع وطلعت ابدل واريد بس اوصل للغرفة لبست
شال فوك شعري لان ينگط ماي على دشداشتي ونزلت
فتحت الباب ودخلت اجر النفس گوه واشوف ريــان
لازم علي الآكبر على تخم من ياخت القميص
ريــان : لااااااا تجفص أبطني لا اجف بطنك .
دفعه علي الاكبر من دخلت رفعت ايدي اشرت
_ شكووووو شبيكم .
ريــان : يلة دُر انتظرج برا .
علي الآكبر: يمكن سمعت ممنوع تطلع وياك .
ريــان : اني اخوها يا حيوووووووووووووان .
_ اخوها مو اخوها ممنوع تطلع ما اقبل .
دُر : ليش ماتقبل .
_ بكيفي بمزاجي هيج قافل .
دُر : هاي شبيك .
علي الآكبر: اصعدي اطلعي منااا روحي .
دُر : ضروري اروح حُــرة مريضة بس احجي وياها .
علي الآكبر: يروّح هو يجيبها هنا يمج انتِ ماتطلعين .
ريــان : نجبرني اتخبل عليك واطيح حظ حظك ياا **** .
رجع عمي من برا دخل على صوتنا وهمَّ واحد يريد
يضرب الثاني وريان لازم نفسه وعلي الآكبر يستفز بي
_ شكووووو بوية سالمين ؟
ريــان : ابو حسن اجيت اخذ دُر ساعة وارجعها بيدي
علي الآكبر ركب راسه يعاند مايقبل .
_ اخذها بوية غير اخيتك .
علي الآكبر: گلت ما تطلع .
ابو حسن : اعذروني على كلامي بوية ريــان دُر بس اريد أرزله
ولك مو كسرت ايدك وتتعارك ويايه لان رجعت شني صارت عزيزه
خليها تروح ساعة ويرجعها مبين الموضوع مهم .
علي الآكبر: هسة ياخذها والست اشهر تصير ست سنووووات
اعرفهم انا بوية وتعال يا علي الآكبر عيش وتحمل ومن ترجع
لازم انا استقبل الموضوع بأريحية .
ابو حسن : اي گول بوية خايف ياخذها وما يرجعها .
ريــان : ساعة والله ساعة .
علي الآكبر: لاااااااااااااااااااااا .
طلع ريــان مكسور خاطره ركضت وراه واني اركض
لزمني على الآكبر من خصري وسحبني ضربته
على صدره وصرخت بلا وعي بوجهه
_ شنووووووو هذا أسلوبك شبيك انت شبيك .
دخلني وسد الباب وعمي مصدوم وطلع من الباب الثاني
هو وحسن بقيت بس اني وياه ضربته على صدره بكل قوتي
وابتعدت منه رفعت راسي وصحت
دُر : راح تخبلني والله .
_ مثل ما خبلتيني ؟
_ اني خبلتك ؟
غير الموضوع وقبل لا يطلع ثبت نظراته عليّ
_ ما اقبل تطلعين اذا تكسرين كلامي اتشوفين مني .
_ لاااا تهددني والله اي شي تهددني بي أني انفذه بروحي .
_ طلعه ماكوووووو .
_ انت اخذني .
_ اني ادخل بيت اخوج الكلب .
_ اخوية مو كلب ما اقبل تجاوز عليهم
تقبل اتجاوز على اهلك انت تقبلهااااااا ؟
طبگ الباب وعافني رحت اريد اصعد صاحني عمي
_ بدّلي وأنزلي .
_ وين ؟
_ حجيت انا واخوج يروح قبلنا وآني اوصلج الهم بدربي .
_ مايقبل عمو .
_ انا عمج وابو شني علي الآكبر يكسر كلامي اكسر ظهره والله .
ام حسن : دام عمج يگول روحي لا تخافين بدلي وروحي
اخوج مبين شكد يحتاج تروحين وياه خطية اخاف صاير شي .
واني منا مرعوبة عليهم صعدت بدلت ونزلت وصلت للكراج
إلبس بالحذاء وباب المطعم مفتوح عمي سبقني واني رحت
ملتهي يشتغل ويسولف هو وجود
دُر : علي الآكبر .
ألتفت شافني ورجع يشتغل
_ راح اروح .
_ روحي .
_ ماتزعل .
_ مايهم بعد مايهمني اي شي .
صحني عمي رحت امشي سريع وشهد صعدت ويانا
يريد يوصلها للمدرسة وصلني عمي للبيت
_ عمو عادي تنتظرني هنا ارجع وياك .
_ ابقي يمهم ساعة .
_ لا ارجع وياك ، شهد انزلي ويايه اقنعي حُــرة ويايه تفتح الباب .
ابو حسن : روحي وياها لوية بس لا تتأخرون .
اخذتها ونزلت فتحت الباب ودخلت عليهم البيت هدوء
ودافي ونظيف بس ميمي موجودة بالمطبخ سلمت عليها
وشهد تمشي ورايه تجر بملابسي
_ ولج احم دستور شبيج ماعندج غيرة .
_ لا ماعدنا غيرة تعالي .
رحت بوجهي على غرفة حُــرة ضرب على بابها وصحت
_ حُــرة اني دُر افتحي الباب بسرعة .
شهد : افتحي الباب لا ارعد عليچ افتحي .
درت عليهه متعجبة
_ تعرفيها ؟
_ لا والله بس انتوا ولد الرياش اذا مو بالتهديد مايفيد وياكم .
_ ليش احس علي الآكبر مقابيلي .
دارت وجهه من سمعت صوت خطوات على درج
رحت اشوف منو نزل انــور بعيونه النوم
من شافها تبسمر بمكانه ماشوف غير شهد
نزلت نزعت حذائها كعب عالي وشمرتها بوجهه
حتى بعده ما مستوعب ضربته بالثانية وبكل ثبات
راحت عليهن تلبس بيهن وهو لازم وجّهه وصدره
خليت ايدي على شفتي من نزع القميص يشوف صدره
مشخوط بالكعب شمر القميص ولزمها من ايدها شمرها على حايط .
انــور : لچ انتِ مخبلة .
شهد : احسب أحسابك وين ما اشوفك اضربك بحذاء بنعال
حسب شنو برجلي عمرك كله تخلصه هيج كل ما اشوف
هلّ خلقه اضرررررربهاااااااااااااااااا بالنعاااااال اضرررربهااااا .
لزمها من ايدها وهزها هز
_ ليششششش هاااا ليشششش .
_ من ايدك انت خطفتني وبقيت مثل الكابوس بحلامي اتحمل .
اتقرب عليهه بضعف ونبرة صوته اتغيرت لاول مرة بحياتي
اسمع واشوف انــور بهل حالة
_ مثل ما خطفتچ انتِ خطفتيني.
ضربته براشدي من يمي وجهي وجعني خفت يرجع يضربها
سحبتها من ايدها خليتها ورا ظهري ورفعت ايدي
_ لا تضربهااا عيب انــور اضربني بدالها
اذا تضربهااا تصير مو زينة والله يرعدون علينه اخوانها والله .
_ لا تخافين اني ما اريد ارفع ايدي عليها واخوانها يرعدون
عليچ وعلى اخوج مووووو يمي .
شهد : لا تسووووي روحك رجال .
_ تعالي يمي واخليج تعرفين اني رجال لو مو رجال .
بنهاية الكلام غمز الها دفعتني وهي تصيح
_ اي بالله تعااااااال .
تريد تضربه وفزت وانور تراجع من صوت رج البيت رج
ريــان : انوووووووووووووووور .
طلع من الغرفة ياشر على القميص
_ طرزان لك انت طرررررررررزان بلا ملابس .
اشر انــور على صدره وسحب القميص
_ ضربتني بالقندرة .
ريــان : لان انت قندرة .
_ ريــان لا تخليني اخلي ضيمي بيك .
شهد : عود شوفيني مدگدگ .
صعد فوك وريان لازم راسه وايده الثانية على خاصرته
_ عذرينا امسحيها بوجهي .
_ مصار شي اني حدت اخوك حود
يلة امشي دُر خلصيني عندي دوام .
ريــان : شنو ولكم بيت ابو حسن كلكم تحودون
ادري بالطفولة شنو شاربين من حليب ؟
شهد : دُر راح انتظرج برا خلصي بسرعة فدوة .
هي طلعت واني رجعت الحرة اقنع بيها بقت دقايق وفتحت
بعدني ما شايفتها ودفع ريــان الباب مداهمة
لزمها من ايدها يتفحص بيها .
حُــرة ...
_ وين جنتي .
جاوبته واني خايفة ثبتت نظراتي على دُر
_ هنا .
_ من ادك المهجوووووم ليش ما اسمع صوتج
_ ايدي .
_ جاوبيني .
_ ما اريد اشوف احد عوفني ريــان .
دُر : عوفها خليني احجي وياها فدوة .
ريــان : يعني اذا بصير بيها شي وهيّ بمسؤوليتي شسوي دُر .
اجت دُر حضنتني لزمت ايدها وهي تمسح براسي
دُر : صاير شي حاجيني ؟
_ ما اريد اعيش هنا .
ريــان : ليششششششششششش .
درت اشوفه ودُر مصدومه مثلي لان هذا الجليد مايهتم ابد
ريــان : اقصد ليش صاير شي .
_ لا .
ضرب على ميز وكتف ايده بسرعة ويأشر عليه
_ ديلة بالله لا جاوبين بكلمة وكلمتين وضّحي كلامج .
سحبت ورقة من جوة المخدة ورفعتها اخذها من ايدي وفتحها
ريــان : عقّد زواجنا شبي ؟
حُــرة : طلگني .
ريــان : وين تروحين .
حُــرة : انتوا خليتوني أخون مصطفى هو واعدني وإني وعدته
ما اتسجل بيوم الشخص غيره حباب طلكني .
ريــان : حلوووووووو كلششششششش حلوووو .
دُر : فدوة ريــان لا تصيح خطية شوفها صايرة
بيها ضعفانة وحال يبجي خليني افتهم منها
حُــرة تجين ويايه .
حُــرة : اي اي اخذيني لا تبقيني هنا .
دُر : ريــان اخذها .
_ وين دُر لا تخبليني انتِ الثانية .
_ اتغير جو يمي اني وشهد وعمتي وبليل تعال اخذها .
_ لا .
حُــرة : اي لا شنو اريد اروح .
ريــان : لا تعاندين .
حُــرة : الله يخليك اريد اطلع عندي حجي وياها هووواي .
زفر انفاسه بغضب ودفر الباب
_ اخذيهاااااا بليل اجي اخذهاااااا .
رجع للغرفة وقفلها بدلت ولزمت ايد دُر
وطلعنا عمها وشهد من شافوني ضحكوا بوجهي
ابو حسن : منو هل حلوة ؟
دُر : حُــرة بنت ياسين .
سلم وصل شهد على مدرسة ورجعني للبيت
علي الآكبر وأخوانه اثنين مخبوصين
بعدنا ما نازلين ابوهم صاح على واحد اسمه سيف الدين
_ شني هل هوسة ولكم .
_ عدنا طلبية عرس بوية .
جــود : يووووووم اليه بووووووية .
رفع روحه من الجدر وشاف دُر نزلت ولازمتني بيدها
لزم گلبه وضحك : رصاصة ولكم جسر المثقفين يممممه .
ام حسن : ها يمه .
جــود : موجة مثقفين هجموا يمه .
ابو حسن : حاول تثگل .
دخلتني دُر بوست عمتها واني اعدل بشعري حتى مايبين باروكة
نسوانهم عيونهن تريد تطلع استأذنت من عمتها دُر وصعدتني فوك
دُر : اسفة الغرفة هوسة .
_ عادي .
لملمت شلون مكان واني كعدت ضايعة شوية
واجت يمي لزمت ايدي وهمست
_ ريــان انــور مسوين وياج شي ؟
_ لا .
_ فهميني فدوة احجي .
_ دُر من الضرب والخوف تناسيت موتت مصطفى
ذاك اليوم امج وضغط ريــان خلوني اتذكر الحادث بالتفصيل
لچ مصطفى ما راضي عليّ تزوجت غيره دُر مات بسببي وتزوجت غيره .
مسحت ادموعي وهي تبجي من شافت ادموعي
_ زواجكم مو حقيقي .
_ ادري بس ما اريد اكمل اقنعي يطلگني .
_ ليش حبيبتي والله عقدكم احسن مهما يكن انتِ
بنية صغيرة بنص بيت بي اثنين شباب عزابيه
لازم تكونين على ذمة واحد بيهم .
هزيت رجعي اني ضعيفة موقفي ضعيف
_ ما اريد دُر احس الدنيا تعبتني .
سحبت ايدي الها ضربت على وجهه بكل قوتها وصاحت
_ هاي شنوووو ولج حُــرة ؟
_ اريد اروح اشوف المصطفى يتمني عافني يتيمة ومات .
_ حرام عليج .
_ الحرام على اهلي .
_ انتِ ليش خايفة قبل صاير شي بينج وبين مصطفى ؟
سديت اذني خايفة من الجواب وخايفة اسكت
احتاريت وضعت والبنية داخت مني اخذتني للحمام
غسلت وجهي وعدلت روحي ونزلت جوة عمتها
من شافتني كعدتني يمها تسألني وتضحك
بس نسوانهم ما ادري شصار بيهن .
كعدت دُر لازمه راسها دايخه شافت ابن حماها صاحت
_ تعال عفية اشتريلي بسكت اثنين وعصير اثنين .
_ فلوس .
_ اخذ من عمو علي الآكبر .
_ اخاف اروح ويصير عصبي ويضربني .
_ لالا گول دُر دزتني فدوة اركض دخت من الجوع .
ام حسن : طبعا لا اكل ولا شرب بس تفكرين وتركضين .
بقت عمتها تشكي منها لان لا ماتاكل واني اخذت دور الي ترزل
_ هي حتى بتركيا بهذلتنا تبهذل تتخربط ناخذها تنام يومين
مستشفى ونرجعها وننصح وارزل مايفيد بيها ماتحب تاكل .
رجع الطفل صاحت بي دُر
_ هاا شو رجعت فارغ .
_ عمو علي الآكبر مايقبل تاكلين .
_ يااا .
_ والله .
ولا عبالك هي تجاهلت الجوع وبقت تسولف وعمتها
تصيح بيها : روحي سوي شي اكلي .
ودُر عنادها يُدرس بقت معانده وايدها انتبهت عليهه ما تكدر
ترفعها وصاير بيها زراگ لزمتها صاحت بوجع
عمتها عافت كلشي من ايدها وطلعت شفتها تحجي هي وعلي الآكبر
حُــرة : دُر انتِ شصاير وياج هذا علي الآكبر ضرب ايدج .
_ لا اني ضربتها .
درت وجهي على نسوانهم ورجعت اسأل بيها
_ خوفتيني .
_ ماكو شي لا تخافين .
بعدني اريد اكمل حجي وياها ودخل زوجها سحب
خواشيگ ونزل صينية مليانة تمن ولحم وببسي ولبن
وفواكة مرتبها بطريقة تفتح النفس سلم ومنزل راسه
علي الآكبر: لسلام عليكم خوية .
حُــرة : وعليكم السلام ، همزين اخر لحظة جبت اكل
ردت اخابر ريــان يجي ياخدها منك معنف بنت عمي .
أبتسم بتشنج وفتح بطل الببسي صب الدُر وجاوبني
_ انا المعنف هنا مو بنت عمچ .
قبل لا يطلع اشر على اكل وقرب روحه منها
_ اكلي اروح وارجع الصينية مخلصتها .
دُر : اكعد وكلني .
حُــرة : هههههههه .
عبالي تشاقة وياه هو بهت ظل صافن بوجهه
_ عندي شغل اكلي .
رفعت ايدها وهمست
_ ايدي .
عافها وطلع خلتني اكل وهي ايدها على خدها
ونسوان اخوانها من صار الظهر صعدن فوك
اتوسلت عالجت وياها بس اريد تاكل ماتقبل .
وهي مركزه من الشباك ادردم على جــود
_ صايرين الروح بالروح ولا دقيقة يتفارگون .
وعمتها تضحك واني على واهز اراقبهم
شلون يطبخون بجداري كبار كلش
وريحة الأكل فد شي كارثي طيبة وتفتح النفس
وابوهم وياهم يسولف واشوف على الآكبر
من ايده مايسوي شي بس يوجّه اخوانه بالكلام
وكله عليهم لأن ايده ملفوفة .
للعصر كملوا وابوهم راح رجع شهد من المدرسة
دخلت بيدها لفاف ومرهم للأعصاب والعظام
غسلت وكعدت بدون كلام سحبت ايد دُر
_ حصلت عشرة انطيني ايدج لا تروح مني .
دُر : شنو ؟
شهد : اريد الفلف ايدج ولچ شصاير بيها .
سحبتها منها واني مثل اطرش وكاعد بهوسة يشوف بلا فهم
دُر : روحي الصاحب العشرة وگولي اله بدل عل دفع
خلي يجي هو يعالج أغلاطه لا يظل يدزلي فلان وفلانه .
شهد : يمه طولان السانها .
بدلت ودُر تساعد عمتها تجهز اكلهم
كلهم عبالها دخلوا يتغدون واني اخذتني وصعدنا
فوك بقيت افتر بغرفتها وهي اتحاول ترتب ساعدتها
بدون نا اقترب للسرير بعدنا بنص الهوسة ودخل
زوجها من الخجل ردت افوت بالحايط
نزل الشاش والعصارة على ميز
علي الآكبر: اكلتي .
دُر : لا .
دك الباب حماها وبيده صينية ثاني وهل مرة كباب وكص وانوع
المشاوي فوك التمن والحم مخلي وبدون مايباع ورافع حاجبه صاح
_ اخذ عيني اخذ انتقم براحتك .
علي الآكبر: انجب ولي منا .
حُــرة : احم لحظة عفية نزلني اروح اكعد اني وخالة ام حسن .
بعدني بالغرفة وعلي الاكبر سحب دُر كعدها ويفتح بالأكل
يوكل بيها وهي تاكل طبيعي لا يتوسل ولا يعالج مثلنه
نزل جــود مقابيلي واني وراه
_ اسمج ميمي .
_ نعمممم .
_ ها بوية شبيج اكلج اسمج ميمي .
_ اني ميمي يااااااا اني ميمي .
فريت ايدي ودخلت للمطبخ وهو دخل ورايَّ
_ شنو صرتي عصبية .
_ لا الحمدلله وضعي ريلاكس .
ام حسن : شني ريلاكس .
كعد مقابيلي ايده على خده وتوگع وبرجعها وامه خربت ضحك
_ ولك عيب الله يسود وجهك .
جــود : اسيح على ثقافة يبوووووووو على راسك علي الآكبر .
بعدنا نحجي واني متت بدمي فات ابوهم
والدنيا بعدها حتى مغرب ما صايرة
ابو حسن : ها بوية حُــرة وين دُر هذا ريــان بالباب .
اريد اصعد الها استحيت وكف جــود على درج وصاح
_ وينكم علي دُر ريــان اجه .
طلعت من شفت ريــان بالكراج وابوهم يفتح بالباب
من شافني القلق واضح على وجهه لزمني من ايدي وسحبني
_ شلون صرتي ؟
_ زينة .
_ ترجعين ويايه .
_ لا .
_ ليش ؟
_ ما اريدك .
_ وانا ما اريدچ بس مجبور .
_ منو جابرك .
تحمحم وابتعد مني من طلع علي الاكبر وجود
ابو حسن : اتفضل بوية ريــان عندي موضوع وياك .
دخلوا للاستقبال من فتت وياه جانت دُر إيدها لافتها
من شافها لزم ايدها متعجب ودار وجهه على علي الآكبر
_ هاي انت ضربتها .
علي الآكبر: ههههههههه ريان اسكت لا احجي وياك حجي
اخليك سنة مصدوم منه اسكت مني لا تتنفس ويايّ .
دُر : ريــان فدوة بلا مشاكل اني ضربت ايدي بالغلط .
وابو حسن ادخل كعد ريــان الخاطر ابو حسن وفات حسن
واخوهم عز الدين وسراج الدين جرمي ريــان كعدني قريب منه
_ من انعل ابوية لابو ابوج البيت كله زلم .
بعده يريد يحجي وابو حسن تحمحم وبصوت واضح هادئ يحجي
_ بوية ريــان ان شاء الله اذا مابيها مشكلة هل يومين
نجي عليكم للبيت نخطب منك ومن انــور ايد المحروسة
بنت عمك حُــرة الـ ابني جــود .
يتبع ...
حُــرة بنت الرياش
ثقل ميزانك بذكر اللّٰـه:
- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد ..