_____________________ الــريـاش
﷽
𓆩 اســاور حــسين 𓆪
بقلمي رواية : الــرياش
هوَ حناني عليك قسّاك حتى عليّا ؟
لطفا لا تنسون التصويت والتفاعل بين الفقرات
⊰ حرة ⊱
بعده يريد يحجي وابو حسن تحمحم وبصوت واضح هادئ يحجي
_ بوية ريــان ان شاء الله اذا مابيها مشكلة هل يومين
نجي عليكم للبيت نخطب منك ومن انــور ايد المحروسة
بنت عمك حُــرة الـ ابني جــود .
ريــان : بنت عمي منووووووو ؟
ابو حسن : حُــرة بوية شبيك ، بابا انتِ مو اسمج حُــرة ؟
حُــرة : اي صح .
ثبت نظراته عليه وبصعوبة أتمالك أعصابه مسح على لحيته
واستدار يجاوبهم ويحاول يبين نفسه طبيعي
ريــان : المفروض قبل لا تتفضل وتريد تخطب بنية
تسألون عنها بنت منو متزوجة منفصله هسة انتوا
من خطبتوها شنو تعرفون عنها ؟
جــود : مثقفة وايد مثقفة .
ريــان : احترم نفسك لازم روحي الخاطر ابوك .
جــود : هاي الحقيقة يا خوية مثقفة وأني مثقف
وطالب تسترني مثقفة قبل شوية طگتني بكلمة مثقفة نسيت
شنو الكلمة اعوذ بالله منك يا شيطان .
حُــرة : ريلاكس .
ألتفت ريــان فاتح عيونه بصدمة رديت بحسن نية
حُــرة : خطية بسرعة نساها .
رفع اصبعه على شفايفه وجاوبني من بين أسنانه
وهو يطحل من العصبية عيونه دم صارت دم على حالها
رفعت ايدي على شفايفي بمعنى سكتت وهو استلم الموضوع
ريــان : موضوع انفتح وهنا ينسد وتلغيها الفكرة من راسك .
جــود : العباس عليك لا توكف عرضه بزواجي ما صدگت
اشوف مثقفة انقرضن اخذوهن خلصوهن .
نتر ريــان بعصبية من شاف جود عيونه عليَّ ويضحك
من شافه التفت يشوفني شنو اسوي رفعت كتفي بمعنى
اني شكو ، رفع اصبعه يحذر وعبر على جــود رفعه من التيشيرت
_ افلششششش وجهك والله شيل عيووووونك منهاااا
لاااااا اقلع عيونك لا تخلي عيونك أتشوفها .
ادخل سراج الدين لزم ايد ريــان
_ نزل ايدك خوية شسالفة كاعدين نتفاهم .
وريان فاصل منهم هز جــود هز وجهه صار احمر دم
_ والله جــود والله اذا تحجي بيها لو تفكر بس تفكر بيها
بيدي امووووووتك بهاااااي ايدي اموووووتك .
دفعه على تخم وگع جــود وريان رفع ايده
_ هاي ايدي تشوهه معالم وجهك خليني
محترم الزاد والملح بيناتنا .
ابو حسن : بوية ترا ما غلطانين بالعكس من عجبته البنية
بلغني وانا بحترام بلغتك نجي انا وشيوخ العشيرة كلها نتقدم
الها ونطلبها منك ومن اخوك وين ماتريد نروح احنا جاهزين .
ريــان : الشيوخ يا شيووووووخ شيسووووون شيوخكم ؟
درت وجهي على علي الآكبر نزل گلاص الجاي على طبلة
وراح على ريــان لزم ايده وطبطب على ظهره
علي الآكبر: اكعد ريــان .
_ ما اريد اكعد اجت يمكم كم ساعة اخوك يخلي عينه عليهه .
علي الآكبر: ريــان نسيت مو زين عليّك العصبية .
_ ماتشوووووووف اخووووك .
اشوف ريــان يلوب يريد يحجي ويگول عاقدين
بس يخاف اني ما اقبل يعلن زواجنا
علي الآكبر: ترا جنت اني وياه بالمطعم لا شايفها ولا حاجي وياها .
_ والريلاكسسسسسسس علي الآكبر والررررريلاكسسسس .
_ من دكيت البآب حجتها وهوه بلحظتها فاتح أبوية بالموضوع .
_ الموضوع ينسد نهائياً .
علي الآكبر: ليش ريــان لازم مو بعينك جــود .
دُر بيناتهم فرفحت روحها لزمها علي الآكبر وبعدها
_ شبيچ ماكو شي لا تخافين .
دُر : ريــان حباب بس اكعد .
جــود : شمالك ترجف كفرت لو سبيتكم
رايدها على سنة الله ورسولة .
علي الآكبر: صياد اذا صرت عصبي لان الموضوع انفتح هنا
تعرف حتى تجهزون نفسكم وهل يومين نجي نخطب .
استدار بكل جسمه يخزرني ركضت على دُر صرت ورا ظهرها
حُــرة : شبي هذا أخوج اني شعرفني حماج خفيف .
دُر : كلهم اخفاف اني وياج بنص مخابيل .
راح ابو حسن يلزم بي ويقنع ويحجي وريان يفور
اتلوع وهو يحوم الكلمة بطرف إلسانه يريد يحجيها ويتراجع
لان هو وعدنا ماكو احد يعرف بهذا الزواج ويعاملني مثل اخته
ابو حسن : والله بوية صدمتنا برد فعلك انت عاشرت ولدي وتعرفهم
اكلت وشربت وتعاركت وياهم صح لو غلطان .
ريــان : على عيني وراسي بس هذا الموضوع خط احمر لا ينفتح .
ابو حسن : اي غير نفتهم ليش .
ريــان : بعدها صغيرة ما تتزوج وتريد تكمل دراستها .
جــود : انا اخليها تكمل دراستها يمي وبيدي اوديها وارجعها
بهذا الموضوع لا تشيل هم تعرفنا عادي عدنا .
ريــان : جــود لا تجبرني انطيك بضربة على راسك
اخليك تنسى حتى اهلك سد حلگك .
جــود : جرب وشوف احترمتك زايد مو من حقك ترفض
البنيّة واعية وهيَّ تقرر اطلع منهااا انت اطلع منهااا .
اشر جــود عليَّ وهو يميل راسه ينصي صوته ويحجي بثقة
_ حُــرة عندج مشكلة اجي اخطبچ ونتزو... ؟
بعده بنص كلامه والصياح والمضارب صار مرعب
سديت اذني وارعش بمكاني گطعت حتى النفس
ضرب ريــان جــود بوكس وجود رجع البوكس وريان تخبل
هو ضخم اضخم من جــود عصره على الحايط وضربة البوكس الثاني
ورجع ضربة اقوى ورفعه من التيشيرت وبنبرة صوته الخشنة صاح
_ لك حُــرة مرررررررررررررتي لا تحجي بيهاااااااا يا ****
اطلععععع روحك والعباس اطلع روحك اذا تخلي عينك
بعد بعيونها وتحجي وياها اثوووول انت اثوووووول وكلب .
سحبني من دُر الي لزمتها ومن قوة خوفي ولزمتي
ماكدرت حتى تروح تفاكك بيهم درت وجهي عليهه
لزمت گلبها واشرت العلي الآكبر عليَّ
_ لا يضربها اخاف يضربها عصبي ريــان عصبي .
طلع ابو حسن ورانا يريد بس يلحگ بي هو يمشي
مثل الطلقه يركض وساحبني وراه فتح السيارة
شمرني بيها واستدار وابو حسن وحسن وباقي
اخوانه يفهمون بي وهو قافل حتى مايقبل يحجي وياهم
شغل السيارة وشخط التايرات الحد ما صدرن صوت زمجرة .
من الرهبة والخوف الي أتخلل گلبي قبضت اديناتي اثنينهن
وجمدن اريد احس بيهن ما اكدر من شفت ايدي ماتتحرك
نزلت دموعي وبجيت بعلو صوتي اصرخ وهو يصرخ
عباله لان اعترف بعقد زواجنا يصيح
_ انجبرت احجي شنوووووو ماعندي
غيره يحجون بيچ وتريدين اسكت .
بقيت احاول بيدي وهو فاصل يسوق بكل سرعته
زدت بالصراخ تخبلت ارجع بضهري اضربه بالكرسي
دار وجهه يشوفني لان صوتي حتى طبلة اذني زرفها
_ فوك غلطهااااا تصيح بنت **** تحجين وياه موووو
ريلاكس اليووووم اشوف شنو يعني ريلاكس .
حُــرة : رررررررريان يممممممممه رررررررريان .
لزمني من زندي سحبني بتجاهه وصاح
_ صوتچ لچ صوتچ .
رجف جسمي واني احاول اتحكم بأعصاب ايدي
شخط السيآرة وبنظرات التعجب تفحصني
_ حُــرة شبيچ ؟
_ ايدي ريــان ايدي .
استدار واخذ ايدي يريد يفتحها تصلبت عبالك بيها لاصق
رفعت وجهي صار بوجهه ورجعت صرخت بكل علو صوتي
سد عيونه ورجع نزل راسه يشوفها ويحاول وهي نفسها
شغل السيارة وتحرك سريع واني انهاريت من الخوف
_ انشلت ايدي يمممممهههههه .
_ حُــرة مابيها شي بس لا تصرخين خليني اعرف اسوق .
_ الله لا يوفقك يا حقير .
_ لا تدعين كافي .
_ الله لا يوووووووفقك .
_ الله لا يوفقني يلة كافي بس اسكتي راح نوصل .
بقيت ابجي بهستيريا اشوف ايدي منظرها مخيف عبالك مشلولة
وما احس بيها ولا اكدر احركها وهو كل شوية يلزمها
وصلنا المستشفى ضخمة عاف السيارة بإهمال وركض
فتح الباب وحاوطني بيده ينزلني حضني وهو يمشي
_ شيل ايدك مني اعررررف امشي روح مني روح .
_ توگعين .
_ معليك .
_ حُــرة دخيل الله بطلي عناد شليتي حالي .
_ وانت شليت ايدي .
_ اني شسويت ؟
_ خوفتني .
نزلت راسي ابجي وامشي بضياع مرعوبة كلبي يدك بسرعة
صعدنا على درج وانفتح الباب دخلنا للمستشفى راح
على استعلامات شرح وضعي الولد شافني ورجع يحجي
_ اتفضلوا بالطابق الثاني الدكتور .
رجع حضني وصعدني واني ادفع بي مايفيد وياه
صعدنا بالمصعد اريد امسح عيوني ما أكدر ردت
امسحها بكتفي ما اوصل شافني ودور على كلينكس
بالبنطلون مالته ماكو تقرب لزم وجهي سحبته
رجع يلزم بوجهي ورفع ايده مسح ادموعي بردن القميص
_ اثبتي موتيني شكد تتحركين حليني اسيطر امسح دموعج .
_ ينزل غيرهن .
_ حُــرة لا تبجين .
_ كلبي يدك سريع خايفة .
يريد يحجي تمالك نفسه وانفتح باب المصعد دور على اسم الدكتور
من شاف الغرفة اجه اتجاهي اخذني ونظراته مرفعها مني
دك على باب ودخل بعد السلام كعدني على كرسي
ريان : دكتور صارت مشكلة ويمكن خافت لو عصبت
ايدها تكورت لا تحس بيها ولا تنفتح حاولت بيها ؟
نهض الدكتور من مكانه يشوفها
_ بلا زحمة اتفضلي هنا .
رحت على سرير قريب منه أجهزه فحص
ايدي ورجع يحاول ورجع على ورقة يكتب
ريــان : ها دكتور طمني ؟
_ أعصابها تصلبت مو الضغط النفسي
اله دور كبير بالصار وياها اضافةً نقصّ فيتامينات ومعادن
تسبب بها حالة لان الأعصاب تتلف .
ريــان : والحل دكتور .
_ كتبت الكم ابر تاخذها وفيتامينات وهسة تنزلون بالطوارئ
ينطيها هل ابر بالمغذي واريد من ترجعون كمادات دافية تمارين
مستمرة على مدار اسبوع وان شاء الله ترجع احسن من قبل .
ريــان : وهل حالة تخلص منها .
_ حسب الحالة النفسية وقوة أعصابها
الظاهر ضغط كبير عليهه وبعدها صغيرة .
تشكر ريــان منه وطلعنا نزّلني للطوارئ نومني على سرير
وراح يشتري العلاج ورجع هو والمضمد ، كتف ايده وكف
فوك راسي والمضمد يشكل بالمغذي وهوه تلفونه دقيقة
ما سكت يرن يرن يرن بدون توقف حول الجهاز صامت
ورجع على وضعيته دفع للمضمد من راح هو يفتر
وكل شوية يعدل بلحيته من وصلت للنص كعد قريب
مني على سرير ولزم ايدي شوية بدت تفتح بس بيها
وجع يصعد الكتفي رفع عيونه بعيوني ويحجي وبنبرة اسف
_ الحمدلله على سلامتج .
_ شربني ماي .
اخذ البطل وعبّر أيده على خصري يگعدني
_ إيدك .
_ شلون تگعدين يعني ادفع من بعيد .
_ بسيطة تدلل .
اتجاهل كلامي ورفع البطل شربت ورجعت نمت
گعد على كرسي طبگ رجل على رجل وقبل لا يخلص
المغذي رفع حاجبة وذبّ نفس طويل
ريــان : شصار هناك ؟
حُــرة : وين .
ريــان : بيت ابو حسن ؟
حُــرة : صدگت نفسك انت زوجي تحاسب وتصير عصبي ؟
ريــان : برضانا لو غصباً عليّنا بيني وبينج عقد زواج .
حُــرة : هسة صبر بس صبر من اطلع انروح اني وياك وطلگني .
ريــان : حلو تقرر وحدها .
حُــرة : اي اقرر لان هاي حياتي .
ريــان : وبعدين وين تروحين .
حُــرة : ها .
ريــان : هسة نطلع ننفصل وين تروحي بعدين ؟
حُــرة : ارض الله واسعة .
ريــان : دخيل الله .
_ وانا هيچ مگرن حتى اقبل تعيشين بأرض الله الواسعة.
_ بعد مايصير تدخل .
_ شلون افصل عليهه هسة لچ حتى لو ننفصل تبقين بنت عمي.
_ تفصل شتسوي يعني تضررررربني .
_ إكسر راسج .
_ اذا انت زلمة اضرب .
_ حُــرة والله اضرب والله .
_ والله ما اخاف اضرب وشوووووووووف .
واني واثقة من روحي صار فوك راسي ومايل جسمه
صرت مثل النملة رفع ايده وضربني بـ إطراف اصابعه
على خدي لزمت مكان الضربة وفتحت عيوني مصدومة
اريد احجي ورجع رفع ايده يهدد بيه بقيت لازمة خدي
والكلمة بلعومي تريد تطلع وهو اصبعه على شفايفه
واخاف احجي ويضرب بقيت الوب بس تحرك صحت
_ مو زلمة والله مو زلمة .
_ اه لچ حررررررة .
_ تضرب بنية وحاسب روحك رجال ؟
رفعني من ملابسي وعيونه تجدح جدح من العصبية
ريــان : منووووو قبل شوية گال اذا زلمة اضرب ؟
_ وتضرب ؟
_ انتي گلتي اذا زلمة اضرب ضررررربت راح تخبليني .
_ لا مو زلمة اي واحد يضرب بنية مو زلمة .
لزم راسه وصار يفتر بالغرفة ونزلها بكل قوته ضرب رجله
_ احتاج صبررررررررر ايووووووووووووب .
_ متبري منك .
_ منووو ؟
_ صبر ايوب .
_ تريدين تموتيني ؟
_ شعندي وياك .
_ لعد سدي حلگج شوية سدي .
_ تعالي خلص المغذي طلعني خليني احبس روحي بالغرفة اخلص منك.
شال المغذي ورجع طلع الثاني بقيت متعجب
ورجع المضمد يخلي من راح هو دار وجهه على شباك
وبعد حرف مانطق واني خليت راسي على مخدة ونمت
من اعصابي رخت انوب يتعارك مايفكر البنية مريضة
ماكو شايل الحساس مثل امه .
بقيت بين كاعدة وبين نايمة ساعتين ونزل الدكتور
يسوي تمارين الأيدي شافها فتحت وصارت احسن
لبست حذائي وهو يمشي قبلي سريع مايمشي ويايَّ
ابو الغيرة عايفني امشي وحدي صعد واني وحدي
فتحت الباب وصعدت ردت احجي بس شفت وجهه
احمر ومبين عصبي ما ادري شبيه خفت عود اني ابد ما اخاف .
وصلنا للبيت بس دخل السيآرة للكراج وميمي اجت تحجي
وياه وهو ولا يسمع منها عافها وفات للبيت مستعجل
اجت يمي تريد افتهم اشرت على باب الأستقبال
_ ضيوف هنا ضيوف .
مشيت متردده درت عليهه وهمست
_ وانتِ هيج عادي يدخل ضيوف والبيت فارغ ؟
فتحت الباب ماكو احد دخلت كلش اريد احجي
واشوف علي الآكبر كاعد يشرب جاي وبيده جكارة
من شافني نزل راسه وكف على حيله
_ السلام عليكم خوية .
_ وعليكم السلام اتفضل .
_ ريــان وين ؟
_ هسة اصيحه فات جوة .
عبرته وطلعت من الأستقبال ردت افتع الغرفة مقفولة
ضربت على باب اكثر من مرة وصحت بـ اسمة
_ ريــان علي الآكبر يريدك اطلع .
_ بعدين .
حجاها وبعد قفل مايقبل يحجي وجعت متردده العلي الآكبر
_ ريــان قفل غرفته .
وعبالي بي شي كمز من مكانه للباب فتحه يريد بس يطلع
_ انا اجي بغير وقت .
_ هلا بيك .
يريد يروح ثبت ثواني وبدون ما يلتفت سألني
_ ضربچ ؟
_ لا .
_ تحتاجين شي انا مثل اخوچ .
_ واحسن اشكرك .
_ بالخدمة خوية .
شغل السيارة وراح دخلت للصالة الثانية صايرة غرفتي
وقفلت بابها وبقيت بيها ايدي بعدها توجعني من كتفي
مر الوكت تعبت من التفكير ، عندي شغل ومخططات
براسي اريد اسويها وكلها صايرة بطريقي
لازم اروح البيت اهل مصطفى وافهمهم الصار مو ذنبي
واحجي الهم قصة موتت ابنهم بالتفصيل واروح وياهم
حتى نشتكي على اهلي دام كلهم بالسجن تصير اسهل
بس لازم انتظر الوقت المناسب مايصير اطلع بدون
ما ادرس وافكر بكل حركة اخطيها حتى لا يضيع حقنا .
نمت بعد تفكير مهلك كعدت من الصبح احس عندي قوة
وايدي على علاج زينة بس بعدني خايفة منها طلعت
لكيت البيت نظيف وميمي مكمله كل الشغل دخلت للمطبخ
اشتهيت بصل وفطر وبيض بقيت اتحرك براحتي اروح منا
واجي هناك وكم نوع جبن طلعت باقيات اخر سي رتبتهم
بمواعين وخليتها على ميز الطعام كلهن بالترتيب
سمعت صوت المغسلة طلعت من المطبخ سريع لمحت
ريــان رجع للغرفة مبدل مبين يريد يطلع
ضربت على باب كذا مرة وملت راسي ضحكت من ابتسم
_ صباح الخبر ابن العم .
_ صباح النور حُــرة .
_ تدري شسويت ؟
- شسويتي .
_ ريوك من ايدي .
وصفكت بيدي واني اتحرك منا ومنا آشوف الاوراق
ولوحات على حياطين واكتشف غرفته
_ شلون صارت ايدج .
_ زينة .
راح للابتوب يريد يقفل ولمحت تصميم خيالي
_ دقيقة بس دقيقة .
_ ها ؟
_ شكد حلو هذا الرسم .
_ هذا تصميم بيت البارحة خلصته .
_ بيت منو ؟
_ واحد متريش مثل ابوچ .
_ قصدك ابوك ، يعني هاي انت مصمم هذا المخطط ؟
مال جسمه على مكتبه يفر بالمخطط حتى اشوفه
_ عاجبج ؟
_ اي شخص يشوفه يعجبه .
_ تحبين هيج بيوت ؟
_ لا احب البساطة هذا فهم زيادة عن الزوم .
_ قنوعة .
_ وانت ؟
_ اني صممت بيتنا ومنتظرها ترجع .
_ منو .
سكت لدقايق يقلب بالملفات راح الملف مكتوب عليه
( Wait forever )
فتح الملف وطلع مقابيلي تصميم بيت بحجم بساطته
بس لمسات بسيطة ضافت جمال للتصميم خلاب بتفاصيله
بحيث يفر بالتصميم ياخذ العقل
_ هذا اول تصميم صممته بيت احلامها
جانت تتمنى هيج تفاصيل وبيت يكون مميز
ومختلف عن باقي البيوت تخب التراث القديم
سويته مثل ماتحب بكل تفاصيله .
لمعت عيوني واني اشوف حزن ملامحه
حُــرة : متأكده من ترجع وتشوف التصميم تحبه
وتعيشون بي احلى ايام حياتكم وتعوضك وتعوضها على صار بيكم .
ذبّ حسرة ورجع يجر النفس وهو يغلق الابتوب
ريــان : الريوك برد .
ضربت راسي وطلعت اركض وهوه يمشي بكُل هدوء
كعد على ميز ونظراته ما عرفت افسرها
_ هاي انتِ سويتي الاكل .
_ اي والله اكل شوووف طيب .
كعدت واني اتحرك منا واكل منا واشرب جاي
_ طيب ؟
_ امممم .
حجاها وكمل اكل واني ما اعرف اسكت اكو خلل بلساني
اذا مايدخلني بمصيبة مايرتاح استغفر الله حُــرة تعيش بدون جفصات
_ تدري خلص الغاز ورحت دخلت جديدة .
جاوبني وهو ياكل مندمج
_ وحدج ؟
_ اي مو ميمي جانت بالسطح تشر ملابس .
_ ايدج مايصير تضغطين عليهه اني كاعد جان صحتيني ؟
_ كلت خطية مابي خير
شنوووووووووووووو ؟
_ شبيك اسم الله .
_ عيدي كلامج عيدي .
_ لا تعيد الجملة جنك ابوية بس يصيح خبلني .
_ عيدي كلامج ولج عيدي لو اخبلچ لو تخبليني .
بقيت اتذكر بكلامي استوعبت الجفصه
ضحكت من تذكرت اريد اشرد لزمني من طرف التيشيرت
_ والله قصدت مابي حيل خطية مابي حيل .
_ وتالي وياچ مو طلعتيني من الطريق والله .
_ عزا العزانه اذا بعد احجي وما افكر .
_ شنوووو .
_ عزا العزاني العزاني عزا العزاني اذا بعد احجي .
_ حُــرة .
_ الله يخليني خرسه ولا هل جفصات .
_ امين امييييييييييين يارب .
دفع الكرسي وراح انقهرت رحت اركض وراه
لبّس السترة فوك القميص ويعدل بالساعة
واني احجي مثل الزمال مايقبل يعبرني
_ خلي روحك رياضية لا تزعل على كُلشي .
دفعني من كتفي وطلع يفر بمفاتيح السيارة يمشي بنفس
هيئته الباردة عبالك قالب ثلج يمشي مو بشر .
_ شدعوة .
ريــان : مابيه خير موو ؟
_ لا عمي سيد الرجال انت ، انجبي اخسي مصطفى سيد الرجال .
_ لااااااااااا مووووو صاحية والله .
_ مشكلتي افكر بصوت عالي .
اني احجي وهو لزم راسه وصعد بالسيارة يصيح
_ شنووووو هل بلوة ربي ناقصني اني ناقصني .
_ سودة علية مصطفى جان متحمل الضيم ما بيوم يشكي .
_ عووووفي بحالة راح خلص لج شنوو انتٍ .
_ دروح للشغل دوختني اووووي .
_ بالقران اذا ما تلزمين هل لسان اني الزمه وأسحبه من مكانه .
_ عمي لا تحلف بالقران هو غير السان ما ينسحب .
طلعت الساني اثبت اله صحة كلامي عباله حُــرة من تحجي
بدون ماتدرس كلامها لزم الساني حاولت اسحبه ما ينسحب
حُــرة : سبحان الله قدرت قادر .
قلص عيونه الي ذبلت بلمح البصر
ونبرة صوته وكل تصرفاته أتغيرت
وعيت على روحي دخلت للبيت وتركته
صافن مادري شبي ، فتحت الشباك لمحته
صاعد بالسيارة يهز براسه بعدين طلع
التلفون ورجع شمر التلفون اختنكت من الضحك
وابد ما توقعت يرفع ايده ويطلع إلسانه ويشوف
كلامي صح حاول يجره اصبعه يزلگ لزم راسه
وضحك على نفسه ويمكن ضحك من كشف الموضوع حقيقي
جسمه صار يهتز ومن صدمته بروحه يخلي ايده
على عيونه وجهه ويضحك من كل گلبه .
وعود امرر الموضوع الك بالساهل فتحت الشباك وصحت
_ هاااا شفت كلامي صحيح .
دار وجهه يدور وين اني من شافني وجهي صاير احمر دم
شخط السيارة وطلع احلف عليك يمكن اليوم ماترجع للبيت .
مشيت اريد اغسل ونزل انــور من النوم وجهه مورم
من شافني كشر وجهه وعبرني وراح للمطبخ كعد
على ميز وصاح على ميمي تحمي الجاي دخلت
طلعت بعد جبن خطيّة وقشطة وكعدت مقابيله
حُــرة : تدري منو مسوي الريوك .
_ ما اريد اعرف .
_ اني سويته تريد احمي البيض .
_ انصحج نصيحة الوجه الله ؟
_ اي اسمع .
_ استري على روحچ ولي منا ترا بس اني وياج
بالبيت والله اشيلچ واعلگچ بالبنكة واشغلها واخليها
تفتر بيج انتِ منا جنج صرصورة افرها بيج من تگطعين
آلنفس اطفيها واگول موتت روحها .
يضرب على ميز بجدية وهو يحجي اني امشي شوية
من خلص كلامه وكفت بالباب وجهزت روحي للركض
_ عود هو رجال يريد يضرب بنية .
دفر الكرسي واني ركضت وهو خطواته قريبة
مني فتت للغرفة قفلتها بأخر لحظة ضرب الباب ونتر بعصبية
_ ربچ قفلتي لو صايرة بيدي املخ اهل اهلج .
_ وقنادر البارحة من شهد شو رجفت
صرت جنك جلب حاصري بالزاوية .
هو اني هيج حجيت والسب صار بفلس رعد رعد فتت
كعدت بس شنو كلبي يدك برجلي من الخوف ونسيت الطلعة
يوميّ خلصته بهل غرفة بليل سمعت صوت انــور يتعارك هو وريان
ريــان : حُــرة افتحي الباب .
_ انــور يضربني مو ؟
_ منو يضرب يا زلمة ابن زلمة اشگ حلگه والله .
فتحت الباب وعلى وجهي ابتسامة من شفت انــور وراه
بلعت ريگي نشف من الخوف عزا العزاكم يا ولد الرياش
ريــان : شصايررررر شمسويه وياه ؟
حجيت اله كلشي وهو صافن يستمع وانور مكتف ايده ينتطر ختمتها
_ عليك الله انت مو هم حجيت هيج وياك مازعلت شبي هذا ؟
ريــان : لا والله هم زعلت اذا تتذكرين ولو عندي احد
اشكيله همچ اروح اشكي بس شسوي ساكت متحمل الضيم .
حُــرة : يعني شنو تريدون اصير خرسة انتوا تحجون المطي .
انــور : لا يا بنت المطي .
عافني ريــان وراح يحجي وياه برا ويقنع بي من رجع
حجتله شلون ضرب الباب واني بقيت بالغرفة
ريــان : اي وخفتي ؟
حرة : بقيت صامدة يا جبل مايهزك ريح .
ريــان : من نعال على هيج جبل .
حُــرة : انت شبيك من البارحة لليوم بس عصبي
وتنتر وتصيح وتسب وماعجبك كلشي شبيك ها شبيك .
لزمني من ايدي رجّعني للغرفة گعدني على تخم وهو
بصفي رخت ايده مني ابتعدت وهو ابتعد صرنا ابعاد
ريــان : حُــرة اريد احجي وتنتبهين على كل كلمة احجيها
بطلي تجفص عشر دقايق لا غير لا تجفصين ويايَّ .
تحمحمت وارتبكت من طريقة كلامه وجدية ملامحه
بقيت اعصر بأصابعي خجلانة على مرتبكة
_ اسمعك .
_ حُــرة ماكو اهم من مستقبل البنية وخاصةً الي مثلچ
اني صح عاقد عليچ بس نعرف هل زواج
اجباري لا اريده ولا تريدي .
_ صح .
_ عوفي عقّد زواجنا على صفحة اريد مصلحتج
اني ما أعرفج ولا سبق والتقيت بيچ بس اريد مصلحتج
ما اريد تنظلمين ويايَّ .
_ تريد اطلع من البيت ادري دوختك بكلامي
ومشاكلي بس اني هذا طبعي والله مو بيدي
احجي بدون تفكير مرات ، واجفص بس بدون قصد والله
وصح اضحك بس بداخلي نار مو كل شخص يضحك
معناها مرتاح بالعكس الإنسان من يضحك هواي
لابس قناع هذا القناع بليل يخص مفعوله ويبدي انكسار
هذا الشخص الي طول اليوم يضحك ويضحك الكل
ويركض منا منا بنشاط حتى بس يشغل نفسه يهرب من التفكير والله .
مال راسه وبنفس ملامح الجدية جاوبني بحذر
_ اني اطلع من البيت وانتِ تبقين
لا تفكرين امل واطردج انتِ مسؤوليتي وبحمايتي .
ملت راسي بعفويه ورفعت حواجبي واشرت بيدي
_ يعني ماتريد اطلع من البيت ؟
قلد حركتي بدون مايحس وجاوبني بنبرة صوت لطيفة
_ لا ، ما اريد تطلعين من البيت .
عضيت شفايفي بلا شعور وفريت عيوني ورجعت جسمي على تخم
_ أوف الحمدلله، لعد شنو تريد ؟
_ لا تقاطعيني بالكلام حتى تفتهمين شنو اريد .
_ اوكي راح اسكت .
_ ما تحجين .
_ بعد ما احجي ابد .
_ ههههههه عفية بالشطورة .
طبگ رجل على رجل شغّل جكارة
جر نفس ورفع راسه زفر الدخان ورجع يفهمني
_ حُــرة انتِ بعدچ صغيرة كلش بعدچ صغيرة
على مسؤولية والزواج والبيت ووووو وغيرها
والزواج مو مستقبل البنية الشهادة اهم وحسن الچ
واذا تقبلين اني من باجر آخذج الاحسن مدرسة
تكملين دراستچ بيها واخصص الج راتب للمعلمين
تدرسين يمهم بعد المدرسة واجهز الج كل المستلزمات
المدرسة وسيارة تروحين بيها من باب بيتنا الباب المدرسة
وكلشي تريدي يوصل الج ، حتى الغرفة اريد انزل انــور جوة
وانتِ اخذي الطابق الفوك تاخذين راحتچ بي هنآ اخاف متقيدة .
بقيت انتظره يخلص صارت الأفكار ضجيج بعقلي وهواس
يدن براسي دوخني وقلقني هو خلص وبقيت صافنة بوجهه
ريــان : حررررررة مووووو احجي وياج .
حُــرة : ها .
ريــان : كلامي بي شي ؟
حُــرة : شنو المقابل ؟
_ مقابل ؟
_ اي من تقدم كل هل خدمات شنو
المقابل ليش يعني شنو تستفاد .
نهض من مكانه مستنكر كلامي ومصدوم من سؤالي
_ يعني ضروري استفاد ؟
_ ما ادري ريــان ما ادري مصطفى قبل گال
حُــرة ماكو شخص يساعد شخص لوجه الله الدنيا كلها مصالح .
_ اني مصطفى عقد حياتي والله .
_ لا تحجي على مصطفى .
_ حُــرة خليني لازم اعصابي صار خمس سنين
ما مطوّل خلگي بهل طريقة مصبر روحي عليچ والله .
كمزت من مكاني خايفة من صوته رفعت ايدي متوترة
يربي والله حتى حجي بعد اريد احجي ما اكدر رفعت ايدي وهمست
_ عفية لا تصير عصبي فهمني واني افهمك .
_ تجبريني على عصبية والله دستي بمصاريني
شبيچ الخاطر النبي محمد .
فضلت الصمت وأكتفيت برفع راسي وثبتت نظراتي بعيونه
ريــان : ليش عيونچ لمعت بدموعها حُــرة
انا شسويت لا تتأمليني بهل نظرات حاجيني .
حُــرة : اريدك تفهمني بس انت عصبي بسرعة تصيح .
شغّل جكارة ثانية وراح يمشي بالغرفة يهز براسه حاير
بعد حين طفاها واقترب رجع المكانه
_ اسف .
ابتسمت وهمست
_ اعتذارك مقبول .
بادلني الأبتسامة وعيونه ضحكت قبل شفايفه .
رفع أصبعه عدل شواربه وحك طرف انفه
ريــان : راح اجي وياج بكلشي ونشوف تاليها .
_ اي فهمني اني افهم بس انت اعصابك .
_ ههههههه ماشي عمي راح احجي بنفس طريقتچ
مصطفى من جان وياچ يساعدچ لو لا ؟
_ كلش هووووواي يساعدني وينصحني ويحبني
عبالك ابوية يعلمني الصح والغلط وحتى من ..
_ استووووووووب لج أبريك أبريك ماكوو .
_ هم صيح .
_ ههههههه والله انتِ تجبريني ، زين مصطفى من يساعدچ
شنو المقابل على كلامج حنى مصطفى مصلحجي مو ؟
_ ها ؟
رفع حاجبة واشر على عقلي
_ شغلي استخدمي تعبي ، ماعندي كل مصلحة وياج
بس أعرف وضعج صعب اخوانچ من ناحية واهلج
والدنيا اني ما احب المسؤولية الصراحة وانجبرت
بس هسة تأقلمت تقريباً تأقلمت .
_ يعني ماعندك غاية ومقابل ومصلحة .
_ لا والله .
_ احلف وداعت هاي البنية الي تحبها .
_ اه .
_ للأمان .
_ وداعتها هدم كلبي ماعندي غاية ولا اريد منج شي .
_ اوكي لعد شكرا .
عدل حاجبه وكمل على كلامه
_ حُــرة اني ما أعترض طريقچ حرام عليَّ انتِ تريدين جــود ؟
_ هههههههه صار ساعة اتقدم اغرائات وعروض
تالي طلعت تفتر على هل موضوع اريد جــود لو ما اريده .
_ تريدي لو لا احجي ؟
_ طبعاً لا اكيد لا هو انت وگلت من يكمل كلامه اطلب منك ننفصل .
هز راسه ورفع ايده ينزل بشعره ويعدله
_ ننفصل بس مو هسة .
نكت بنطلونه وراح يمشي للباب وقبل لا يطلع استدار
_ تصيحين على خير .
_ وانت من اهلو .
هو طلع واني اخذت راحتي نمت وطبگت رجل على رجل
وآني نايمة وبقيت ادندن وافكر بكلامه وبدراستي
وما اسمع غير صوت عالي درت وشفت ريــان لازم راسه
نزلت ملابسي وكعدت ورحت اشوف شبي
_ سلامات انضربت بالباب ؟
مد ايده بيها أدوية
_ اجيت انطيچ العلاج وجنتي نايمة ردت أطّلع وانضربت .
تحمحم وطلع مرتبك فات للغرفة واني قفلت بابي ونمت .
الثاني يوم كعدت على صوت ميمي شبعت نوم
طلعت وياها اساعدها وريان للساعة ب12 الظهر
طلع من غرفته وكالعادة مبدل
_ ها حُــرة نروح ؟
_ وين ؟
_ للمدرسة .
_ والله صدك تحجي ؟
_ طبعاً لعد البارحة يبس حلگي جنت اشاقة ؟
_ ماجنت اتصور بهل سرعة .
_ اضرب الحديد وهو حامي .
عفته وركضت للغرفة بدلت ولملمت شعري وطلعت
واني اعدل بطرف شعّر الباروكة ومركزة بالمرايا
من اسداريت ارتبكت من نظرات ريــان وحتى هو
انتبه على نظراته بحيث بسرعة أداره الموضوع
وطلعنا بدون اكل وصلني على مدرسة أهلية
اخذ الفايل مجهز كلّ الاوراق المطلوبة ونزلنا
شاف شنو لازمهم وقدم اوراقي مستنسخ كلشي
وبداية الأسبوع الجاي اباشر وياهم دوام رسمي .
رجعنا للسيارة اكمز فرحانة اريد اطير
وهو يضحك على تصرفاتي من صعدت سألني
_ حبيتي المدرسة .
_ اي تموووت نظيفة وحلوة .
فر السيارة المحل عارض صداري وجنط نزلنا
اني وياه اختاري الملابس اخذهن من ايدي
واني صعدت رجعنا للبيت ركضت على مطبخ جوعانه
طلعت كلشي عدنا من مقرمش كبب وهو فات مصدوم
بيده ملابسي كلهن والجنطة وصاير هوسة أبتسمت وغمزت
_ جوعانة والله جوعانة .
_ ام بطن .
ضحكت وهو وصلهن للغرفة ورجع غسل وراح للغرفة
من كملت ادري بي هو كلشي ما اكل دكيت الباب
طلع يهز براسه شكو : كمّلت الاكل تعال ناكل .
راح للمطبخ شاف كلشي مرتب سحب الكرسي وجلس
ريــان : بدون جفصات .
حُــرة : لااااا ابد بس عادي احجي وياك واحنا ناكل ؟
هز راسه بمعنى اي واني أخذت الاكل وكل شوية اعدل
مكاني واسولف على مدرستي ومعلماتي القديمات
وشلون جنت ارجع واسوي اكل ومن اشتري من محل
المدرسة ويصير على المحل كوم بنات بس صديقتي
تكمز بيناتهن وتروح تشتريلي واندمجت وحجيت
على مكاني ومكان صديقاتي المفضل ، ورجعت على
دراستي وشلون جنت احفظ دروسي اوكف على ظهرر
الباب واكتب وادرس لان ما احفظ اذا ما اكتب وعلى طول الأكل
احجي وهو يهز راسه لو يهمي بـ اي كملي ومرات يگول
حلو كلش حلو كملي من خلص انتبهت اني حتى ما اكلت
بعدني وحلگي يابس هو يغسل على مغسلة درّت وسألته
_ حلگي نشف يمكن حجيت هواي مو ؟
ريــان : لا .
فتح علبة العلاج اخذ اثنين حب وجع راس وشربهن
_ راسك يوجعك .
ريــان : حُــرة عندچ فرط حركة لازم اشوف حل .
أريد اجاوبة عافني وراح للغرفة وقفل بابها المهجوم كون .
جهزت جنطتي وملابسي خليتهن مقابيل عيوني
أتأملهن شكد حلوات ونازكات حتى باروكة المدرسة
جهزتها قصيرة مو طويلة كُلش الظهر سمعت انــور
يحجي هو وريان وللعصر سمعت ريان يصيح بأسمي
عدلت شعري ورحت للغرفة مالته بابها مفتوح
_ ها ريــان .
_ اخذي .
نزلت عيوني على مكتب مخلي تلفون جديد هو والباكيت
ونزل راسه البرد مايريد احجي ولا يشوف رد فعلي
_ مالتي ؟
_ اي وخليت رقمي ورقم انــور ودُر غيرهم ممنوع .
سحبته أتفحص بي عجبني اخذته وطلعت امشي
طلعت الأرقام واني باب الغرفة
ضغطت على رقمة رن مرتين وجاوبني
_ ها .
_ دا اجرب .
_ اوكي .
سد الخط كعدت اشوف شنو بي ونزلت كم لعبة وتابعت مسلسل
ورجعت طلعت رقمه ورنيت عليهه كم مرة وجاوبني
_ ها .
_ دزلي رقم مطعم اكلهم طيب اريد اطلب اكل .
_ اني اطلب شنو تريدين ؟
_ لا عندي تلفون ورصيد اني اطلب .
_ انييييييييي اطلب بنت الـ***** .
_ كنتاكي وفنكر .
حجيتها وغلقت الخط بوجهه .
نص ساعة وسمعت الباب الخارجي انفتح وطلعت ميمي
استلمت الطلب وفاتت اخذته من ايدها وفرشت بغرفتي
اكل واتابع فلم انفتح الباب واني بنص الاكل وشفايفي
كلهن كجب ومايونيز وبقايا الكنتاكي كعدت عدل
وهو يهز بيده مصدوم شاف الاكل كله مخلص
ريــان : طلبت وجبة دبل عائلي اكلتي وحدچ ؟
_ ها .
_ ضميتي منه ؟
_ شسمه .
_ شسمه ؟
_ أكلتهن .
_ وحدج ؟
_ اي والله .
_ ماشاء الله جاروشة .
طلع وسد الباب واني رحت اغسل وميمي لملمت الهوسة
وما اشوف غير انــور هاجم عليه لزمني من باروكتي
واني لزمتها ما اريد يطلع راسي شكل الشعر مو حلو
ومطگع مكان بي ومكان اصلع ضربته على ايده وصرخت
_ شبيك عوووووفني انووووووووور .
انــور : سكتت ذاك اليوم لان ريــان بعيني بس
اذا تعيديهااااا راسج افصله من جسمج افتهمتي ؟
دفعته من صدره وگع شعري بيده رفعت ايدي على راسي
وصرخت صراخ زلزلت البيت على راسه طلع ريــان
دفر الباب وركض واني على نفس وكفتني لازمه راسي
واصرخ ، اخذ الباروكة من ايد انــور المصدوم من رد فعلي
ونزل ايدي هو يلبسني واني اصرخ
_ حُــرة رجعتها كافي الخاطر الله كافي .
بقيت اصرخ وعيوني راحت على انــور وجهه صار اصفر
ويدفع بريان ويصيح وهو يضرب على شفايفه
_ سكتهاااااا فضحتنا يمعود شبيها هاي مخبلة .
ضربة ريــان على رأسه ودفعه على الدرج
_ طيح الله حظك انوررررر أتخلي عقلك وياهااا
لك شكبرك تصير يا غبير عقلك اتخلي بعقل هل بنية .
رجع لزم وجهي دفعت ايده وفتت للغرفة وبعدني اصرخ
قفلت الباب عالج توسل بس افتحي قفلت عليهم
من بلاعيمي وجعوني سكتت وطفيت التلفون والأضاءة ونمت .
ثاني يوم كعدت ماكو احد بالبيت سويت الأكل وميمي البيت
غسلت كل أحذيتنا ونظفت الكراج وفتت بدلت وطلعت
للسوبر ماركت اشتري كم شغله لليل
بقيت امشي على رصيف وصلت للسوبر ماركت اشتريت
حلويات وعصاير وببسي واني أحاسب التلفون ماسكت
خلص أحساب وسكت التلفون اخذت الغراض وطلعت
واني ادندن واركز بالسيارات والشوارع والحدايق
رجع تلفوني يرن فتحت الخط واذني زرفها بصوته
_ لچ انتِ وين وووووينچ .
_ شردت .
_ اه .
_ اي بعد ما ارجع .
_ حُــرة ارجعي الدنيا تخوف عوفي التهوووور .
_ ما ارجع بعد ابد ابد ابد .
_ لا عبالج تعيشين براحة الشارع خطر والعباس خطر .
_ لا تدخل .
حجيتها وسديت الخط بعدني امشي واشوف سيارة ريان طايرة
بالشارع عبرتني وبنص الطريق شخطها فتحت عيوني وضحكت
يمه شافني يممممممههههههه ، رجعها سريع بيتنا بعد سبع
بيوت سرعت مشيتي شوية واركض وهو بعده يمشي
بس دخلت البيت شخط السيارة ونزل منها
فتت اني والغراض للغرفة وقفلتها دقايق ويمكن دقيقة
واسمع مفتاح الباب يفتر عوجت راسي من فات
وضربت على خدي والضحكة المشكلة الضحكة لزمتني
يمكن من الخوف اجذب على نفسي واضحك .
_ هاي شنو العب عندك مفاتيح غرفتي .
رفعني من ملابسي وعيونه تريد تنط من العصبية
_ حُــرة شنووووووو تشووووفيني زعطوووووووووط .
_ حشاك .
_ جذبتي عليه خليتيني اطلع واخابر بالعالم حتى يتابعون
الكاميرات من يخابروني هسة شنووو احجي شلون ارممها .
رفعت ايدي اشرت باصابعي وهمست
_ ريلاكس لا يصير بيك شي والله تنجلط منو يفيدك .
دفعني وابتعد شغل جكارة ويفتر يفتر يفتر
كعدت على التخم وأعدل بالأعراض واحاول افهم بي
حرة : اني بعد كبرت لازم اعتمد على نفسي .
ريــان : ممنووووووووووع تطلعين بكيفچ .
حرة : دُر گالت قبل لا تتزوج جانت تطلع بكيفها .
ريــان : وين الربط انتِ شعليج بدُر لچ حُــرة اسكتي .
رن تلفونه جاوبهم يعتذر منهم اني عفته وطلعت بدون
ما اصدر صوت رحت للمطبخ صبيت ماعون تمت
وقطعت رگي اجه هم يدور عباله رجعت طلعت
اشرت على اكل وهمست بخوف
_ تاكل .
_ شنوووووو هذا ؟
_ تمن ورگي تعال جربهن طيبات والله مصطفى علمني عـ ..
_ اششششششششششششش .
_ اوكي .
نزل انــور مصدوم على أصواتنا الطالعه
_ شبيكم مخابيل انت ريــان جنت صوتك
ماينسمع اربعة وعشرين ساعة مثل المسكونة بغرفتك
جبت هل بلوة ورطت روحك بيهاا شبيك جنك مخبل تركض
منا وتروح مناااا رجعها عمي وأرجّع بغرفتك حير بهمك .
حُــرة : انجب انت شعليك .
سحلني من ملابسي دفعه ريــان وهو يصرخ
صراخ رج بي البيت عافني انــور وهو يفور
بس يريد يضربني الخايس
حُــرة : المدگدگ بعد لا تضرب .
لزمني ريــان وشال الماعون ويمشي بيَّ للغرفة
فوتني وعاف الأكل على ميز وقفل الباب
وبس هو وانور اصواتهم طالعة وقبل لا يصعد انــور صاح
_ الله يحذفكم حيووووووووانات .
ريــان : انت حيوووووان .
بعد ماطلعت ابد خليت حلوياتي وافلامي اتابع
فلم بعد فلم فلم بعد فلم للساعة بـ 10 بليل
طلعت رقمه وعيوني تزغلل من التلفون
ريــان : ها .
_ كل ما اخابر ها شنو ها ؟
_ حُــرة .
_ ها .
_ عندج شي مهم .
_ اي .
_ احجي .
_ جنت اشوف فلم البطل بنته مخطوبة وخطيبها يحبها
بيوم وليلة اجه خطيبها يبجي على ابوها ها صدك ابوها محقق
اي فـ بلغه جانوا نايمين ودخلوا عليهم عصابة قالوا بنته
وحنطوها هاا ويايه ؟
_ اممممم كملي .
_ اي عاد ابوها راح للشقة وشاف جثتها وتخبل عود هو خطية
يريد يطلع تقاعد صار يدون على اقرهم ويبحث ويبحث ويايه ؟
_ احجي دخيل الله وعباده الزبدة شنوووو ؟
_ تالي طلعوا عصابة يقتلون الناس ويسون جثثهم
مثل الحيوانات يحنطون بيهم وحتى شافوا تماثيل محنطات
عبالهم تمثال بس بالحقيقة جثث انوب تدرّي طلعوا منو ؟
_ منو ؟
_ اثنين اصغار اخوان بيهم حالة نفسية بسبب ابوهم
يحبون يعذبون الناس لان ابوهم يعذبهم فـ من يشوفون
اثنين متزوجين جديد لو مخطوبين يخربون زواجهم تدري ليش ؟
_ ليش ؟
_ حتى مايصير عدهم اطفال وينفصلون ويتعذبون الأطفال
شوف عقلهم شلون يلعب النفس وشيطاني .
_ الحاصل ؟
_ شنو رأيك نقتل هذا اخوك ابو شمه المدگدگ
ونخلص كلنا منه ومن مشاكله .
_ واني شلون اخلص من مشاكلج ؟
_ ان شاء الله اكبر واعقل .
_ هسة شنو تريدين والله ما افتهم عليچ .
_ حبيت اسولف على الفلم يلة روح نام دير بالك
اقفل غرفتك لا افوت عليكم اليوم العب بيكم لعب .
_ ههههههههه امشي لچ .
سديت الخط وبقيت اتحرك بمكاني اروح منا واجي منا
فزيت من سمعت صوت برا طلعت وصارت صوت
المكالمة واضحة سمعت المكالمة وفتحت عيوني
على وسعها وبلا شعور خليت ايدي على شفايفي
اكتم صوت صدمتي ماجنت اعرف شنو شعوري
او شنو راح يصير بس خفت من المجهول ..
يتبع ...
ثقل ميزانك بذكر اللّٰـه:
- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد ..